Se a te Fakamoemoega mō Tino ‵Mate?

1. Se a te tala ‵lei e uiga ki tino ‵mate?

I te taimi ne oko atu ei a Iesu ki Petania, telā e tu pili ki Ielusalema, kae ko tena taugasoa ko Lasalo ko fa aso ne mate ei. Ne fanatu a Iesu ki te tanuga fakatasi mo Maleta mo Malia, ko tuagane o te tino mate. E seki leva, kae ne maopoopo atu se vaitino. E mata, e mafai o fakaataata i tou mafaufau a te fia‵fia o Maleta mo Malia i te taimi ne fakatu aka ei ne Iesu a Lasalo mai te mate ki te ola?​—Faitau te Ioane 11:21-24, 38-44.

Ko oti ne iloa ne Maleta a te tala ‵lei e uiga ki tino ‵mate. Ne iloa ne ia me ka faka‵tu aka ne Ieova a tino ‵mate ke toe ola i te lalolagi.​—Faitau te Iopu 14:14, 15.

2. Se a te tulaga o tino ‵mate?

Ne faite a tino mai te ‵pefu. (Kenese 2:7; 3:19) E se fai tatou mo fai ne agaga i se foitino mo ‵kano. A tatou ne tino faka-te-foitino, e seai se vaega i a tatou e tumau i te ola mai tua o te mate. Kafai e ‵mate tatou, e ‵mate foki ‵tou mafaufau, kae fakagata atu foki i ei ‵tou mafaufauga. Tela la, e seai ne pati ne fai mai ne Lasalo e uiga ki te taimi ne mate ei a ia ona ko te mea e seai eiloa se mea e iloa ne tino ‵mate.​—Faitau te Salamo 146:4; Failauga 9:5, 6, 10.

E mata, e fakapuapuagatia ne te Atua a tino i te afi mai tua o te mate? Ona ko te mea e fakaasi mai i te Tusi Tapu me e seai se mea e iloa ne tino ‵mate, e manino ‵lei me i te afi i seoli se akoakoga ‵se telā e fatufatu fakamasei atu ki te Atua. A te manatu e uiga ki te fakapuapuagatia o tino ki te afi se mea fakatakalialia ki a ia.​—Faitau te Ielemia 7:31.

3. E mata, e mafai o fai‵pati mai a tino ‵mate ki a tatou?

E se mafai o fai‵pati io me e lagona ne tino ‵mate se mea. (Salamo 115:17) Kae ko nisi agelu e amio ma‵sei, kae e mafai o fai‵pati mai latou ki tino kae fakaloiloi mai i a latou ko tino ‵mate. (2 Petelu 2:4) E fakatapu ne Ieova a te taumafai ke fesokotaki atu ki tino ‵mate.​—Faitau te Teutelonome 18:10, 11.

4. Ko oi ka toe ‵foki mai ki te ola?

E lau i miliona o tino kolā ko ‵mate i te tanuga ka toe ‵foki mai ki te ola i te lalolagi. Ke oko foki eiloa ki nisi tino kolā e se iloa ne latou te Atua kae ne fai ne latou a mea ma‵sei ka toe‵tu mai.​—Faitau te Luka 23:43; Galuega 24:15.

Ka mafai o tauloto a tino kolā e toe‵tu mai ki te munatonu e uiga ki te Atua kae fakaasi atu te fakatuanaki ki a Iesu mai i te faka‵logo ki a ia. (Fakaasiga 20:11-13) A latou kolā e toe ‵foki atu ki te ola kae fai a mea ‵lei, ka toe mafai o maua ne latou a te ola se-gata-mai i te lalolagi.​—Faitau te Ioane 5:28, 29.

5. Se a te mea e fakaasi mai ne te toetuga e uiga ki a Ieova?

Ne mafai o fakatoka ne te Atua a te fakamoemoega mō tino ‵mate i te ugamaiga o tena Tama ke mate mō tatou. Tela la, e fakaasi mai i te toetuga a te alofa mo te atafai o Ieova. Kafai e toe‵tu mai a tino ‵mate ki te ola, ko oi te tino e manako malosi koe ke lavea atu?​—Faitau te Ioane 3:16; Loma 6:23.