“E Tonu, a te Tagata Tenei ko te Tama Eiloa a te Atua”

Ko “te ono o itula,” io me ko te tutonu. Ne oko atu se pouliga ‵kese ki “te fenua kātoa ke oko eiloa ki te iva o itula,” ko te tolu i te fakaafiafi. (Maleko 15:33) Ne seki māfua mai a te pouliga fakaofoofogia tenei ona ko te ‵ponoga ne te masina a te la. Ne ‵tupu a mea konei i te taimi o te masina fou, kae ko te vaitaimi o te Paseka, tela ko sulu ei te masina. Kae ne leva atu a te pouliga tenei i lō nai minute māfai ko ‵pono a te la ne te masina. Tela la, ne māfua mai eiloa i te Atua a te pouliga tenei!

Mafaufau la ki lagonaga o tino kolā ne fakaitaita atu ki a Iesu. I te vaitaimi pouli tenei, ne fakapili‵pili atu a fāfine e tokofa ki te lakau fakasaua. Ko te matua o Iesu, Salome, Malia te Makatala, mo Malia te mātua o te apositolo ko Iakopo Foliki.

Ne ‵nofo a te apositolo ko Ioane mo te mātua tagi fanoanoa o Iesu telā ne ‘tu atu i tafa o te lakau fakasaua.’ Ne kilokilo atu eiloa Malia ki tena tama ne fanau kae tausi ne ia e tautau mai mo te logo‵mae. Ne maua eiloa ne tou fafine a lagonaga e pelā me ne ‵suki “ki se pelu loa ‵ki.” (Ioane 19:25; Luka 2:35) Kae faitalia te lasi o tena logo‵mae, ne mafaufau a Iesu ki te ‵lei o tou fafine. Ne taumafai malosi tou tagata o kalo atu tena ulu ki a Ioane kae fai atu ki tena matua: “Te fafine, kiloke! Tenā tau tama!” Oti aka, ne kalo atu tena ulu ki a Malia, kae fai atu ki a Ioane: “Kiloke! Tenā tou mātua!”—Ioane 19:26, 27.

Ne tuku atu eiloa ne Iesu tena mātua, telā ko mate tena avaga, ke tausi ne te apositolo telā ne alofa malosi a ia ki ei. Ne iloa ne Iesu me i ana āfa taina, ko nisi tama tagata a Malia, e seki fakatuanaki ki a ia. Tela la, ne fai ne ia a fakatokaga ke tausi atu ki manakoga faka-te-foitino mo manakoga faka-te-agaga o tena mātua. Ko oko eiloa i te gali o te fakaakoakoga tenā!

I te taimi ne gata atu ei te pouliga, ne fai atu a Iesu: “Au ko fia inu.” I te faiga tenei, ne fakataunu mai ei ne ia a tusitusiga. (Ioane 19:28; Salamo 22:15) Ne lagona ne Iesu me ko oti ne ave keatea ne tena Tamana tena puipuiga ko te mea ke mafai o tofotofo katoatoa te fakamaoni o tena Tama. Kāti ne pakalaga atu a Keliso i te ‵gana Alamaika i te gaugaleo Kalilaia: “Eli, Eli, lama sapakatani?” ko tena uiga māfai e ‵fuli: “Toku Atua, toku Atua, kaia ko tiaki ei au ne koe?” Ne seki maina a nisi tino kolā ne ‵tu atu i konā kae fai atu: “Kiloke! A iako kalaga ki a Elia.” Ne tele atu se tino tokotasi o latou kae ufi se omomi ki uaina ‵vi, faka‵piki ki te mata o te lakau, kae tuku atu ke inu a Iesu. Kae ne fai atu a nisi tino: “Tuku malie a ia! Ke onoono aka tatou me e mata, e vau a Elia o tuku ifo a ia ki lalo.”—Maleko 15:34-36.

Ne kalaga atu ei a Iesu: “Ko oti ne fakataunu!” (Ioane 19:30) Ao, ko oti eiloa ne fakataunu ne ia a mea katoa kolā ne uga mai a ia ne tena Tamana ke fai i te lalolagi. I te otiga loa, ne fai atu a Iesu: “Toku Tamana, ko tuku atu ne au toku ola ki ou lima.” (Luka 23:46) Ne tuku atu ei ne Iesu tena ola ki a Ieova, mo te loto talitonu me ka toe fakafoki atu ne te Atua ki a ia. Fakatasi mo te talitonu katoatoa ki te Atua, ne fakapale ifo ei te ulu o Keliso, ko te mea eiloa ko mate.

I konā ne poko se mafuie fakamataku kae mafa‵fa ei a kaupapa. Ne malosi ‵ki telā ne ma‵suke aka a tanuga mai tua o Ielusalema kae ne ‵to mai ki tua a foitino ‵mate. A tino kolā ne olo atu i konā ne lavea ne latou a foitino ‵mate ne ulu atu ki loto “i te fa‵kai tapu” kae fakaasi atu a mea ne fatoa lavea ne latou.—Mataio 12:11; 27:51-53.

I te taimi ne mate ei a Iesu, a te ‵pui laugatu ‵mafa telā ne ‵vae i ei te Potu Tapu mai te Potu Tafasili i te Tapu i te faletapu o te Atua ne masaelua, mai luga ki lalo. A mea fakaofoofogia kolā ne ‵tupu se fakaasiga o te kaitaua o te Atua ki tino kolā ne tamate ne latou tena Tama, kae e fakauiga foki i ei me i te auala ki te Potu Tafasili i te Tapu, ko te lagi, ko ‵tala mai nei.—Epelu 9:2, 3; 10:19, 20.

Se mea ‵tau me ne ma‵taku ‵ki eiloa a tino. Ne folafola atu a te ofisa pule telā ne takitaki ne ia te tamatega: “E tonu, a te tagata tenei ko te Tama eiloa a te Atua.” (Maleko 15:39) Kāti ne nofo atu i te taimi ne fakamasino aka ei a Iesu i mua o Pilato e uiga ki te mataupu me i a ia ko te tama a te Atua io me ikai. Nei la, ko talitonu a ia me i a Iesu e amiotonu kae ko te Tama eiloa a te Atua.

Ne ‵poi a nisi tino i mea fakaofoofogia konei ne ‵tupu, ne ‵foki atu ki olotou fale, kae “pāpā olotou fatafata” e pelā me se fakailoga o te lasi o te loto mafatia mo te masiasi. (Luka 23:48) E aofia i tino kolā ne kilo‵kilo atu mai i se koga ‵mao ko soko fā‵fine e tokouke kolā ne faima‵laga fakatasi mo Iesu i taimi e uke. Ne otia foki olotou loto i mea fakaofoofogia katoa konei.