E Mata, e ‵Tau mo au o Tuku Atu Toku Ola ki te Atua Kae Papatiso?

1. Ne a mea kāti ka mafaufau koe ki ei mai tua o te sukesukega faka‵lei ki te tusi tenei?

E UKE a muna‵tonu mai te Tusi Tapu ko oti ne tauloto ne koe mai tau sukesukega ki te tusi tenei, e pelā mo te folafolaga a te Atua e uiga ki te ola se-gata-mai, te tulaga o tino ‵mate, mo te fakamoemoega ko te toetuga. (Failauga 9:5; Luka 23:43; Ioane 5:28, 29; Fakaasiga 21:3, 4) Kāti ko oti ne kamata o kau atu koe ki fakatasiga a Molimau a Ieova kae talitonu koe me tenā eiloa te tapuakiga tonu. (Ioane 13:35) Kāti ko oti ne kamata o ati aka ne koe se va fakataugasoa ‵pili mo Ieova, kae kāti ko oti ne fakaiku aka ne koe ke tavini atu ki a ia. Tela la, ka mafaufau aka koe, ‘Ne a nei aku mea ka fai ke tavini atu ki te Atua?’

2. Kaia ne manako ei se tagata Aitiope ke papatiso a ia?

² Tenā eiloa te mea ne mafaufau ki ei se tagata Aitiope telā ne ola i taimi o Iesu. Mai tua o te fakatuakaga o Iesu mai te mate, ne talai atu te soko o Iesu ko Filipo ki se tagata. Ne fakatalitonu atu ne Filipo ki a ia me i a Iesu ko te Mesia. Ne otia te tagata Aitiope i ana mea ne tauloto tenā ne fai fakavave atu ei a ia: “Kiloke! Tenei te vai; e isi se pogai e se ‵tau ei au o papatiso?”—Galuega 8:26-36.

3. (a) Se a te fakatonuga ne fai atu ne Iesu ki ana soko? (e) Se a te auala e ‵tau o papatiso ei se tino?

³ E akoako faka‵lei mai te Tusi Tapu me kafai e manako koe o tavini ki a Ieova, e ‵tau koe o papatiso. Muna a Iesu ki ana soko: “Olo atu koutou ki fenua katoa o fai a tino i ei mo fai a soko, kae papatiso atu latou.” (Mataio 28:19) Ne tuku mai ne Iesu se fakaakoakoga e auala i tena papatisoga. Ne ufi katoatoa a ia ki lalo i te vai, kae ne seki fakamatulutulu atu ne vai ki tena ulu. (Mataio 3:16) I aso nei, kafai e papatiso se Kelisiano, e ‵tau foki mo ia o ufi katoatoa ki lalo i te vai.

4. Se a te mea e fakaasi atu ne tau papatisoga?

⁴ Kafai koe ko papatiso, e fakaasi atu i ei ki nisi tino me e manako tonu eiloa koe ke fai mo taugasoa o te Atua kae tavini atu ki a ia. (Salamo 40:7, 8) Kāti ka mafaufau koe, ‘Ne a aku mea e ‵tau o fai ke papatiso au?’

TE ILOAGA MO TE FAKATUANAKI

5. (a) Se a te mea muamua e ‵tau o fai ne koe koi tuai koe o papatiso? (e) Kaia e tāua ei a fakatasiga Kelisiano?

⁵ Koi tuai o papatiso koe, e ‵tau o iloa ne koe a Ieova mo Iesu. Ko oti ne kamata o fai ne koe te mea tenei mai te sukesuke ki te Tusi Tapu. (Faitau te Ioane 17:3.) Kae e se tenā fua. E fai mai te Tusi Tapu me e ‵tau o “faka‵fonu koutou ki te iloaga tonu” e uiga ki te loto o Ieova. (Kolose 1:9) Ka fesoasoani atu a fakatasiga a Molimau a Ieova ki a koe ke maua se fesokotakiga ‵pili mo Ieova. Tenā eiloa te pogai tāua e tasi e ‵tau ei o kau faeloa koe ki fakatasiga.—Epelu 10:24, 25.

6. E pefea te uke o mea e ‵tau o iloa ne koe i te Tusi Tapu kae koi tuai koe o papatiso?

⁶ Ao, e se fakamoemoe a Ieova ke iloa ne koe a mea katoa i te Tusi Tapu kae koi tuai koe o papatiso. Ne seki fakamoemoe a ia ke iloa ne te tagata Aitiope a mea katoa kae koi tuai a ia o papatiso. (Galuega 8:30, 31) Kae ka tumau eiloa tatou i te tauloto e uiga ki te Atua ke oko ki te se-gata-mai. (Failauga 3:11) Ko te mea ke papatiso koe, e ‵tau o iloa kae talia ne koe a akoakoga fakavae i te Tusi Tapu.—Epelu 5:12.

7. Ne fesoasoani atu pefea tau sukesukega ki te Tusi Tapu ki a koe?

⁷ Muna a te Tusi Tapu: “E aunoa mo te fakatuanaki e se mafai o fakafiafia faka‵lei atu se tino ki te Atua.” (Epelu 11:6) Tela la, e manakogina ke fakaasi atu ne koe te fakatuanaki kae koi tuai koe o papatiso. E fai mai te Tusi Tapu me e isi ne tino i te fakai mua o Kolinito ne lagona ne latou a mea ne akoako atu ne soko o Iesu kae ne “tali‵tonu kae papatiso.” (Galuega 18:8) I se auala tai ‵pau, ne fesoasoani atu eiloa tau akoga ki te Tusi Tapu ke maua ne koe te fakatuanaki ki folafolaga a te Atua mo te malosi o te taulaga a Iesu, telā e mafai o faka‵sao ei tatou mai te agasala mo te mate.—Iosua 23:14; Galuega 4:12; 2 Timoteo 3:16, 17.

FAKAILOA ATU KI NISI TINO A MUNA‵TONU MAI TE TUSI TAPU

8. Se a te mea ka fakamalosi ne ia koe ke fakailoa atu ki nisi tino a mea ne tauloto ne koe?

⁸ I te taimi e tauloto ei koe ki te Tusi Tapu kae lavea ne koe tena aoga i tou olaga, ka fai ei ke gasolo aka o malosi tou fakatuanaki. Ka manako koe ke fakailoa atu ki nisi tino au mea ne tauloto. (Ielemia 20:9; 2 Kolinito 4:13) Kae ko oi la tino ka fakailoa atu ne koe ki ei?

9, 10. (a) Ko oi a tino e mafai o fakailoa ne koe ki ei au mea ne tauloto? (e) Ne a au mea e ‵tau o fai māfai ko manako koe ke talai fakatasi mo te fakapotopotoga?

⁹ Kāti ka fia fakailoa atu ne koe ki ou kāiga, taugasoa, tuakoi mo tino e ga‵lue tasi mo koe au mea ne tauloto. E ‵lei ‵ki te mea tenā, kae ke fai faeloa ne koe i te auala atafai kae alofa. Fakamuli loa, ka mafai ei o talai fakatasi koe mo te fakapotopotoga. Kafai e mafaufau koe i a koe ko toka, e mafai o faipati atu koe ki te Molimau telā e fai ne ia tau akoga faka-te-Tusi Tapu kae fai atu me ko manako koe ke kau ki te galuega talai fakatasi mo te fakapotopotoga. Kafai e mafaufau a ia i a koe ko toka kae ko ola foki koe e ‵tusa mo mea e fakaasi mai i te Tusi Tapu, tenā ko mafai ei o fakatoka ke fai‵pati fakatasi koulua mo toeaina e tokolua o te fakapotopotoga.

¹⁰ Ne a mea ka fai‵pati koutou ki ei? Ka sau‵tala a toeaina mo koe ke iloa aka me e malamalama kae talitonu eiloa koe ki akoakoga fakavae mai te Tusi Tapu, ko ola koe e ‵tusa mo mea e fai mai i te Tusi Tapu, kae ko manako tonu eiloa koe ke fai pelā me se Molimau a Ieova. Ke masaua la, me e tausi ne toeaina a tino katoa i te fakapotopotoga, e aofia ei koe, tela la, sa mataku o faipati ki a latou. (Galuega 20:28; 1 Petelu 5:2, 3) Mai tua o te faipatiga tenei, ko fakailoa atu ei ne toeaina me ko mafai o talai koe fakatasi mo te fakapotopotoga.

11. Kaia e tāua ei ke fai a ‵fuliga kae koi tuai o talai koe fakatasi mo te fakapotopotoga?

¹¹ E mafai o fakamatala atu ne toeaina me koi manakogina ke fai ne koe a nisi ‵fuliga i tou olaga koi tuai o talai koe fakatasi mo te fakapotopotoga. Kaia e tāua ei ke fai a ‵fuliga konā? Me kafai ko fai‵pati tatou ki nisi tino e uiga ki te Atua, ko sui ne tatou a Ieova kae e ‵tau mo tatou o ola i te auala telā e faka‵malu ei a ia.—1 Kolinito 6:9, 10; Kalatia 5:19-21.

SALA‵MO KAE ‵FULI MAI

12. Kaia e ‵tau ei o sala‵mo a tino katoa?

¹² E isi se suā mea e ‵tau o fai ne koe kae koi tuai koe o papatiso. Ne fai mai te apositolo ko Petelu: “Tela la, ke sala‵mo koutou, kae ‵fuli mai, ko te mea ke mafai o ‵solo kea‵tea otou agasala.” (Galuega 3:19) Se a te uiga o te sala‵mo? E fakauiga ki te fanoanoa malosi ki so se mea ‵se ne fai ne tatou. E pelā me se fakaakoakoga, kafai ne fai sāle ne koe a amioga fakatauavaga sē ‵tau i tou olaga, e ‵tau mo koe o salamō. Kae kafai foki loa ne taumafai malosi faeloa koe o fai te mea ‵lei i tou olaga kātoa, e ‵tau eiloa koe o salamō, me i a tatou e agasala katoa kae manakogina ke fakamolemole atu ki te Atua ke fakamagalo tatou.—Loma 3:23; 5:12.

13. Se a te mea e fakauiga ki ei a te “‵fuli mai”?

¹³ E mata, ko lava fua i te fanoanoa ki se mea ‵se ne fai ne koe? Ikai. Ne fai mai a Petelu me e ‵tau foki mo koe o “‵fuli mai.” Ko tena uiga e ‵tau mo koe o ‵teke so se mea ‵se ne fai ne koe muamua kae kamata o fai te mea tonu. Ke fai se fakatusaga, fakaataata i tou mafaufau me faimalaga atu koe ki se koga fakaa‵tea mō te taimi muamua. E seki leva, ko iloa aka ne koe me ko fanatu koe i te auala ‵se. Ne a au mea ka fai? E mautinoa, me ka tele malielie atu koe, tu, ‵fuli kae toe tele atu i te auala tonu. E penā foki eiloa i te taimi e fai ei tau akoga ki te Tusi Tapu, kāti ko iloa ne koe me isi ne faifaiga masani io me ne mea i tou olaga kolā e ‵tau o ‵fuli. Ke loto fiafia koe o “‵fuli mai”—ko tena uiga ko te faiga o fakama‵fuliga kolā e manakogina—kae kamata o fai te mea tonu.

TUKU ATU TOU OLA KI TE ATUA

14. E fai pefea ne koe tau tukuatuga ki te Atua?

¹⁴ A te suā mea tāua foki e ‵tau o fai koi tuai koe o papatiso ko te faiga o tau tukuatuga ki a Ieova. A te tuku atu o tou ola ki a Ieova, ko te faiga ne koe o se ‵talo o tauto me ka tapuaki fua koe ki a ia kae fai tena loto e pelā me ko te ‵toe mea tāua i tou olaga.—Teutelonome 6:15.

15, 16. Se a te mea e fakamalosi atu ei ki te tino ke tuku atu a ia ki te Atua?

¹⁵ A te faiga o te tautoga ke tavini atu fua ki a Ieova e ‵pau eiloa mo te tautoga e fai ne koe ke ‵nofo fakatasi mo se tino i tou olaga kātoa telā e alofa koe ki ei. Ke mafaufau me fai famau se tagata mo se fafine. I te taimi ko kamata o masani te tagata mo te fafine, ka gasolo aka o lasi tena alofa ki tou fafine kae manako ke avaga lāua. E ui eiloa e tāua ‵ki a te fakaikuga tenei, ko talia eiloa mo te loto fiafia ne te tagata a te tiute tenei ona ko tena alofa ki tou fafine.

¹⁶ I te taimi e tauloto ei koe e uiga ki a Ieova, ne kamata o alofa koe ki a ia, kae manako o fai te ‵toe mea e mafai ke tavini atu ki a ia. Ka fakamalosi aka ne te mea tenei ke fai sau ‵talo o tauto me ka tavini koe ki a ia. E fai mai te Tusi Tapu me ko so se tino e manako o tautali i a Iesu e se ‵tau mo ia o “toe mafaufau ki a ia eiloa.” (Maleko 8:34) Se a te uiga o te mea tenā? E fakauiga i ei me e ‵tau o fakamuamua ne koe a te fakalogo ki a Ieova i tou olaga kātoa. A te mea telā e manako a Ieova ki ei e sili atu tena tāua i lō ou manakoga mo fakamoemoega totino.—Faitau te 1 Petelu 4:2.

SA MATAKU O TUKU ATU TOU OLA

17. Kaia e se fai ei ne nisi tino olotou tukuatuga ki a Ieova?

¹⁷ A nisi tino e se tuku atu ne latou olotou ola ki a Ieova, me e ma‵taku latou i te mea ma sē mafai o fakataunu ne latou te lotou tautoga ke tavini atu ki a ia. E se ma‵nako latou o fakafanoanoa a Ieova, io me fai mai latou me kafai e se fai te lotou tukuatuga, ka se fakasala latou ne Ieova i faifaiga kolā e fai ne latou.

18. Se a te mea ka fesoasoani atu ki a koe ke manumalo i te mataku ma fakafanoanoa ne koe a Ieova?

¹⁸ Ka fesoasoani atu eiloa a tou alofa ki a Ieova ke manumalo koe i te mataku ma fakafanoanoa ne koe a ia. Ona ko tou alofa ki a ia, ka fai eiloa ne koe te ‵toe mea e mafai ke tausi tau tautoga ne fai ki a ia. (Failauga 5:4; Kolose 1:10) Ka se manatu aka koe me e faigata ‵ki ke fai a te loto o Ieova. Ne tusi mai a te apositolo ko Ioane: “Tenei te uiga o te alofa ki te Atua, ko te fakalogo ki ana fakatonuga; kae ko ana fakatonuga e se ‵mafa.”—1 Ioane 5:3.

19. Kaia e se ‵tau ei o mataku koe o fai tau tukuatuga ki a Ieova?

¹⁹ E se manakogina ke ‵lei katoatoa koe ke mafai o fai tau tukuatuga ki a Ieova. E se fakamoemoe eiloa a ia ke fai ne tatou a mea e sili atu i lō mea e mafai ne tatou o fai. (Salamo 103:14) Ka fesoasoani atu a ia ki a koe ke fai te mea tonu. (Isaia 41:10) Talitonu ki a Ieova mo tou loto kātoa, kae “ka fai ne ia ke ‵tonu ou auala.”—Faataoto 3:5, 6.

FOLAFOLA ATU I MUA O TINO KE MAUA TE FAKAOLATAGA

20. Mai tua o te faiga o tau tukuatuga ki te Atua, se a te suā mea e ‵tau o fai?

²⁰ E mata, e mafaufau koe me ko toka koe o fai tau tukuatuga ki a Ieova? Kafai ko oti ne fai tau tukuatuga ki a Ieova, ko toka koe mō te suā mea. E ‵tau koe o papatiso.

21, 22. E mafai pefea o fakaasi atu ne koe “i mua o tino katoa” a tou fakatuanaki?

²¹ Fakailoa ki te kouotineita o te potukau o toeaina i tau fakapotopotoga me ko oti ne fai tau tukuatuga ki a Ieova kae ko manako koe o papatiso. Tenā ko fakatoka ei ne ia ne toeaina ke onoono fakatasi mo koe ki akoakoga fakavae mai te Tusi Tapu. Kafai e lotoma‵lie latou i a koe ko toka, ko fakailoa atu ei ne latou me ka papatiso koe i te suā fono a Molimau a Ieova. I te taimi o te fono, ka isi se lāuga telā e fakamatala mai ei te uiga o te papatisoga. Ka oti ko fesili atu ei ne te failauga ki tino kolā ka papatiso a fesili  faigofie e lua. Mai au tali ki fesili konā ko fakaasi atu ne koe “i mua o tino katoa” a tou fakatuanaki.—Loma 10:10.

²² Ka oti, ko papatiso ei koe. A koe ka ufi katoatoa eiloa ki lalo i te vai. A tou papatisoga se fakaasiga ki tino katoa me ko oti ne tuku atu ne koe a koe eiloa ki a Ieova kae ko fai nei pelā me se tokotasi o Molimau a Ieova.

TE UIGA O TAU PAPATISOGA

23. Se a te uiga o te papatiso “i te igoa o te Tamana mo te Tama mo te agaga tapu”?

²³ Ne fai mai a Iesu me i ana soko ka papatiso “i te igoa o te Tamana mo te Tama mo te agaga tapu.” (Faitau te Mataio 28:19.) Se a te uiga o te mea tenā? E fakauiga i ei me ko talia ne koe te pulega a Ieova mo te tulaga o Iesu i fuafuaga a te Atua e pelā foki mo te auala e fakaaoga ei ne te Atua a tena agaga tapu ke fakataunu tena loto.—Salamo 83:18; Mataio 28:18; Kalatia 5:22, 23; 2 Petelu 1:21.

24, 25. (a) Se a te uiga o te papatisoga? (e) Ne a mea ka sau‵tala tatou ki ei i te mataupu fakaoti?

²⁴ E isi se uiga tāua o tau papatisoga. I te taimi ne ufi ei koe ki lalo i te vai, e fakauiga i ei me ko oti ne mate koe, io me ne tiaki ne koe tou olaga mua. Kafai ko fanaka koe mai te vai, ko kamata ne koe se olaga fou mai te faiga o te loto o te Atua. E fakaasi mai ei me ka tavini atu koe ki a Ieova mai te taimi nei o fano ki mua. Ke masaua me i a koe e seki fai tau tukuatuga ki se isi tino, io me se fakapotopotoga, io me se galuega. A koe ne tuku atu tou ola ki a Ieova.

²⁵ Ka fesoasoani atu tau tukuatuga ke ati aka se va fakataugasoa ‵pili mo te Atua. (Salamo 25:14) E se fakauiga i ei me kafai ko papatiso se tino ko sao a ia. Ne tusi mai te apositolo ko Paulo: “Ke tumau i te ga‵lue mō te otou fakaolataga mo te ma‵taku mo te pole‵pole.” (Filipi 2:12) A te papatisoga ko te kamataga fua. Kae e mafai pefea o fakapilipili atu koe ki a Ieova? Ka tali aka ne te mataupu fakaoti o te tusi tenei a te fesili tenā.