MANATU I TE 18

E Aoga a Fakamatalaga ki te Kau Fakalogo‵logo

1 Kolinito 9:19-23

MEA E ‵TAU O FAI: Fai ke mafau‵fau au tino fakalogo‵logo ki te mataupu, kae ke isi se lagonaga me ne tauloto ne latou se mea aoga kae tāua mai i ei.

TE AUALA KE FAI EI:

Mafaufau ki mea ko oti ne iloa ne au tino fakalogo‵logo. I lō te toe faka‵foki atu o mea kolā ko oti ne lagona muamua ne latou, fesoasoani ki a latou ke ‵kilo ki te mataupu tenā mai i se kilokiloga fou.

Fai fakavave atu a manatu kolā ko masani ki ei, kae ke faipati malielie māfai ko fakamatala atu ne koe a manatu ‵fou.
Sukesuke kae mafaufau ‵loto. Kafai e mafai, ke aofia ne manatu kolā e se masani ‵lei ki ei a tino io me ne tala ‵fou o mea ne ‵tupu ke faka‵mafa atu ei se manatu tāua. Mafaufau faka‵lei ki manatu i tau mataupu mo te auala e soko ei a manatu konā mo tala kolā e manako koe o fakaaoga.

I te taimi e fai ei au sukesukega ki tau mataupu, ke fakamalosi aka te malosi o tou mafaufau mai te fesili ifo ki a koe eiloa a fesili penei ‘se a, kaia, anafea, tefea, ko oi, mo te e pefea.’ Fai ke matagi te auala e akoako ei koe mai te faka‵sae aka o ne fesili mai i fesili konā, kae ke tali aka i te taimi e fai ei tau lāuga.
Fakaasi atu te aoga o tau fekau. Fakamatala atu te auala e aoga ei a manatu konā mai te Tusi Tapu ki au tino fakalogo‵logo i olotou olaga i aso takitasi. Sau‵tala ki ne tulaga i te olaga, amioga, mo faifaiga kolā e fetaui ‵lei mo au tino fakalogo‵logo.