MATAUPU 14
E Mafai Pefea o Fiafia te Atua ki te ‵Tou Tapuakiga?
E pelā mo mea ne sau‵tala ki ei i te mataupu mai mua, e se ko lotu katoa e fiafia ki ei te Atua. Kae e mafai o tapuaki atu tatou ki te ‵tou Mafuaga i te auala telā e fiafia a ia ki ei. Se a “te vaegā tapuakiga [io me, lotu]” telā e fiafia a ia ki ei? (Iakopo 1:27, fml) Mafaufau ki mea e akoako mai i te Tusi Tapu.
1. Se a te mea e ‵tau o fakavae ki ei te ‵tou tapuakiga?
E ‵tau o fakavae te ‵tou tapuakiga ki te Tusi Tapu. Ne fai atu Iesu ki te Atua: “Tau muna ko te munatonu.” (Ioane 17:17) E se fakatāua ne nisi lotu a te munatonu telā e maua i te Muna fakaosofia a te Atua, ko te Tusi Tapu. E sui ne latou ki olotou akoakoga totino mo tuu mo aganuu. Kae ko Ieova e se fiafia ki tino kolā e “tiaki a tulafono a te Atua.” (Faitau te Maleko 7:9.) I te suā feitu, e mafai o fiafia a ia māfai e tau‵tali faka‵lei atu tatou ki pati fakatonutonu i te Tusi Tapu.
2. E ‵tau o tapuaki atu pefea tatou ki a Ieova?
E pelā me ko te ‵tou Mafuaga, ko Ieova tokotasi fua e ‵tau o tapuaki tatou ki ei. (Fakaasiga 4:11) Ko tena uiga e ‵tau o a‵lofa tatou ki a ia, tapuaki fua ki a ia e aunoa mo te fakaaogaga o tupua, mea faite, io me ne mea fakatusa.—Faitau te Isaia 42:8.
A te ‵tou tapuakiga e ‵tau o “tapu kae talia” ne Ieova. (Loma 12:1) Ko tena uiga e ‵tau mo tatou o faka‵logo ki ana tulafono i mea tau amioga. E pelā mo tino kolā e a‵lofa ki a Ieova, e fia‵fia kae faka‵logo latou ki ana tulafono mō te fakaipoipoga. Kae ‵kalo kea‵tea latou mai faifaiga kolā e fakamasei ei te foitino, e pelā mo te fakaaogaga o paka io me ko te fakaaogaga ‵se o vailakau tapu io me ko meainu ma‵losi.a
3. Kaia e ‵tau ei mo tatou o tapuaki fakatasi mo taina tali‵tonu ki a Ieova?
A fakatasiga e fai ne matou i te vaiaso e tuku mai ei te avanoaga ke ‘‵viki atu ki a Ieova i te fakapotopotoga.’ (Salamo 111:1, 2) A te auala e tasi e fai ei ne matou te mea tenā ko te usu atu o pese o vikiga ki te Atua. (Faitau te Salamo 104:33.) E fakamolemole mai a Ieova ke ‵kau tatou ki fakatasiga me e alofa a ia ki a tatou kae iloa foki ne ia me ka fesoasoani mai ke mafai o maua ne tatou a te ola se-gata-mai. Kafai e maopoopo fakatasi tatou ke maua a fakamalosiga ka aoga eiloa ki a tatou.
KELI MALOSI IFO
Iloilo aka a pogai e se talia ei ne Ieova ke fakaaoga a mea fakatusa i tapuakiga. Tauloto ki auala tāua e mafai ei o ‵viki atu tatou ki te Atua.
4. E se ‵tau mo tatou o fakaaoga a mea fakatusa i ‵tou tapuakiga
E iloa pefea ne tatou me e se fiafia a te Atua ki te mea tenā? Pei te VITIO, ko sau‵tala ei ki te fesili tenei.
Ne a mea ne ‵tupu ki nisi tino o te Atua i aso o te Tusi Tapu kolā ne fakaaoga ne latou se tupua ke tapuaki atu ki a ia?
E fakaaoga ne nisi tino a mea fakatusa mo te mafaufauga me e fai ei ke pili atu latou ki te Atua. Kae e mata, e mafai o fai ei ke ‵mao kea‵tea a ia mai te Atua? Faitau te Esoto 20:4-6 mo te Salamo 106:35, 36, ko sau‵tala ei ki fesili konei:
Ne a mea fakatusa ne lavea ne koe e fakaaoga ne tino i olotou tapuakiga?
E pefea a lagonaga o Ieova e uiga ki te fakaaogaga o mea fakatusa?
E pefea ou lagonaga e uiga ki te fakaaogaga o mea fakatusa?
5. A te tapuaki atu fua ki a Ieova ka fakasaoloto ei tatou mai manatu ‵loi
Onoono ki te auala ka fakasaoloto ei tatou mai manatu ‵loi māfai e tapuaki atu tatou ki a Ieova i te auala tonu. Pei te VITIO.
Faitau te Salamo 91:14, ko sau‵tala ei ki te fesili tenei:
Ne a mea ne tauto mai a Ieova me ka fai ne ia ki a tatou māfai e fakaasi atu ‵tou a‵lofa mai te tapuaki atu fua ki a ia?
6. E tapuaki tatou ki te Atua i fakatasiga a te fakapotopotoga
E ‵viki atu tatou ki a Ieova kae fakamalosi a nisi tino e auala i te usuga o pese mo te faiga o ‵tou tali i fakatasiga a te fakapotopotoga. Faitau te Salamo 22:22, ko sau‵tala ei ki fesili konei:
E mata, ne gali ki a koe a tali ne lagona ne koe i fakatasiga?
E manako koe o fakatoka ke fai sau tali?
7. E fiafia a Ieova māfai e fakaasi atu ki nisi tino a ‵tou mea ne tauloto
E uke auala e mafai o fakaasi atu ne tatou a muna‵tonu mai te Tusi Tapu ki nisi tino. Faitau te Salamo 9:1 mo te 34:1, ko sau‵tala ei ki te fesili tenei:
Se a te mea ne tauloto ne koe mai te Tusi Tapu kae manako koe o fakaasi atu ki nisi tino?
MEA E FAI MAI NE NISI TINO: “E se mafai o fakafiafia ne tatou a te Atua.”
Se a tau faka‵tau?
MANATU AOGA
E fakafiafia ne tatou a te ‵tou Mafuaga māfai e tapuaki atu fua tatou ki a ia, ‵viki atu ki a ia i fakatasiga a te fakapotopotoga, kae fakailoa atu ki nisi tino a ‵tou mea ne tauloto.
Fesili
Tefea te koga e fakaasi mai ei a te auala tonu ke tapuaki atu ki te Atua?
Kaia e ‵tau ei o tapuaki atu fua tatou ki a Ieova?
Kaia e ‵tau ei o tapuaki atu tatou fakatasi mo nisi tino kolā e ma‵nako o fakafiafia te Atua?
NISI FAKAMATALAGA
Faitau ki te tala o se fafine telā ne fiafia me ko saoloto a ia mai te tapuaki atu ki tupua, “Ko se Toe Fai Nei Au mo Pologa ki Tupua.”
“E ‵Fuli ne te Tusi Tapu a Olaga o Tino” (Te Faleleoleo Maluga, Iulai 1, 2011)
Tauloto ki auala e mafai o fesoasoani atu ke fai au tali i fakatasiga a te fakapotopotoga.
“Tavae a Ieova i te Fakapotopotoga” (Te Faleleoleo Maluga, Ianuali 2019)
Onoono ki te auala ne maua ei ne se talavou a mea aoga mai fakatasiga a te fakapotopotoga faitalia te faigata ke kau atu a ia ki ei.
E tali‵tonu a tino e tokouke me i te koluse se faifaiga faka-Kelisiano, kae e mata, e ‵tau o fakaaoga ne tatou i ‵tou tapuakiga?
“Kaia e se Fakaaoga ei ne Molimau a Ieova a te Koluse i Olotou Tapuakiga?” (Mataupu i te neti)
a Ka sau‵tala fakamuli tatou ki mataupu konei.