Te Manuia Se-Gata-Mai​—E Maua i te Lagi io me i te Lalolagi?

E MATA, e fakalagolago malosi atu tou fiafia ki te koga telā e nofo koe i ei? E fai mai sāle te tokoukega o tino me e fakalagolago malosi atu te lotou fia‵fia ki vaegā mea pelā mo te malosi faka-te-foitino, te aogā tonu o olotou olaga, mo fesokotakiga ‵lei mo nisi tino. Tenei te faataoto i te Tusi Tapu: “E sili atu te lei manafai e kai laulakau koe fakatasi mo tino kola e alofa koe ki ei, i lo te kai meafasi gali i te koga e seai se fiafia i ei.”​—⁠Faataoto 15:⁠17.

Se mea fakafanoanoa me e maua a takalia‵liaga, fakasauāga mo nisi faifaiga matagā i te ‵tou lalolagi nei. Kae e a te lagi, io me ko te koga o agaga, ko te koga telā e fia olo atu ki ei a tino e tokouke māfai ko ‵mate latou? E mata, ne fai faeloa te lagi mo fai se koga filemu kae manuia, e aunoa mo so se fakalavelave, e pelā mo te talitonuga masani?

E akoako mai te Tusi Tapu me e nofo atu te Atua i te lagi fakatasi mo te fia miliona o agaga ko agelu. (Mataio 18:10; Fakaasiga 5:11) E fakamatala mai me i a latou ne tama faka-te-agaga a te Atua. (Iopu 38:​4, 7, NW) E isi se saolotoga o agelu ke fai olotou filifiliga e pelā mo tino; e isi ne olotou mafaufau. Tela la, e mafai ne latou o filifili aka ke fai te mea tonu io me ko te mea ‵se. E mata, ka filifili aka a agelu ke fai a mea ‵se? Kāti ka ofo a nisi tino ke iloa atu me i te fia afe tausaga ko ‵teka, ne agasala a agelu e tokouke ki te Atua​—⁠me ne ‵teke atu latou ki a ia!​—⁠Iuta 6.

Tino ‵Teke i te Lagi

Ne sae mai te agasala i te lagi ona ko te ‵tekeatuga a se agelu, telā ne fakaigoa fakamuli ko Satani (te Tino ‵Teke) io me ko te Tiapolo (te Tino Fatufatu). E tiga eiloa ne fakalogo muamua te agelu tenā, ne fakaaogā ne ia tena saolotoga ke fai se mea ‵se. Fakamuli ifo ne faka‵pisi atu ne ia ana amioga ma‵sei ki nisi agaga. Tela la, i aso o Noa, a koi tuai o poko mai te Lolo, ne ‵kau atu a agelu e tokouke ki a Satani i tena ‵tekeatuga ki te Atua.​—⁠Kenese 6:2; 2 Petelu 2:⁠4.

Ne seki ‵tuli fakavave keatea a agelu agasala konā mai i te lagi. Kae ne talia ke ‵nofo atu latou i konā​—⁠kae kāti ne isi ne tapulā ki olotou saolotoga i ei​—⁠i te fia afe tausaga.a Kae i te taimi ne seki toe talia ei ne te Atua ke ‵nofo atu latou i konā, ne “tuli keatea” latou mai te lagi, kae fakamuli loa ka ‵ta fakapalele latou. I konā loa ne fai atu penei se leo mai te lagi: “Ke fiafia te lagi, pela foki mo tino katoa e ‵nofo i ei.” (Fakaasiga 12:​7-12) Ne fia‵fia eiloa a agelu fakamaoni me ne oko atu ki te taimi telā e se toe maua mai a tino matagā konā i te lagi!

Kafai e mafau‵fau tatou ki tala konā, kolā e se ti iloa sāle ne tino, e mautinoa eiloa me e se mafai eiloa o maua te filemu tonu i so se taimi telā e se faka‵logo ei a tino ata‵mai ki tulafono mo fakatakitakiga a te Atua. (Isaia 57:​20, 21; Ielemia 14:​19, 20) Kae kafai e faka‵logo a tino katoa ki tulafono a te Atua, e lausa valevale i ei te filemu mo te tokagamalie. (Salamo 119:165; Isaia 48:​17, 18) Kafai e a‵lofa atu a tino katoa ki te Atua, e faka‵logo foki ki ei, kae fakatau a‵lofa foki i a latou eiloa, ka fai te lalolagi nei mo fai se koga gali kae fakafiafia loto, i ne? E tali mai te Tusi Tapu penei, ao!

Kae e a a tino loto ‵fika kolā e ita fitifiti ma ‵fuli ne latou olotou amioga? E mata, ka fakamakosu faeloa ne latou te filemu o tino kolā e ma‵nako tonu ke fai ne latou te loto o te Atua? Ikai, ne fakasala ne te Atua a agelu ma‵sei i te lagi, kae ka fakasala foki ne ia a tino ma‵sei kolā e ‵nofo i te lalolagi nei.

Ka Faka‵mā Pakipaki te Lalolagi Nei

“A te lagi ko toku nofogaaliki, ka ko te lalolagi ko te koga e tuku ei oku vae,” ko muna a te Atua. (Isaia 66:⁠1) Me i te Atua ko te ‵toe tino ‵malu, ka se talia ne ia ke fakalailai faeloa ‘te koga e tuku ei ana vae’ i mea ma‵sei. (Isaia 6:​1-3; Fakaasiga 4:⁠8) E pelā mo te ‵tuli keateaga ne ia o agaga ma‵sei mai te lagi, ka ave keatea foki ne ia a tino ma‵sei katoa mai te lalolagi nei, e pelā mo fakamatalaga konei mai te Tusi Tapu:

“A latou kola e fakatuanaki ki te Aliki, ka fai mo latou te fenua, ka ko tino amio ma‵sei ka afuli keatea.”​—⁠Salamo 37:⁠9.

“A tino amiotonu kae fai mea tonu ka ola i te fenua tenei. Ka ko te Atua ka tapale keatea ne ia a tagata amio masei mai i te fenua, kae unu keatea a tino agasala, e pela me ne lakau e unu keatea mai i te laukele.”​—⁠Faataoto 2:​21, 22.

“Me i te Atua e fai eiloa ne ia a te mea tonu: e tuku atu ne ia a puapuaga ki luga i a latou kola e fakapuapuagatia ki a koutou, kae tuku atu foki ne ia ki a koutou kona e puapuagatia se malologa, pela foki mo matou. E fai ne ia manafai e foki mai te Aliki ko Iesu mai te lagi mo ana agelu ‵malu. E o‵mai mo te afi ka ulaula o ‵sunu ki ei a latou kola e se iloa ne latou a te Atua, mo latou foki kola e se faka‵logo ki te Tala ‵Lei e uiga ki te tou Aliki ko Iesu. E puapuagatia latou i te fakasalaga se gata mai, e ‵vae foki latou keatea mai mua o te Aliki, pela foki mo tona ‵malu sili.”​—⁠2 Tesalonia 1:​6-9.

“A te lalolagi mo mea katoa i ei kola e ma‵nako ki ei a tino e palele atu katoa; ka ko te tino tela e fai ne ia a te mea e loto ki ei a te Atua e ola ki te se gata mai.”​—⁠1 Ioane 2:⁠17.

Ka Tumau te Filemu i te Lalolagi?

E tiga eiloa e fakaasi mai ne te Tusi Tapu me e isi se tapulā ki te taimi e fa‵ki ei te Atua i tino ma‵sei, e iloa pefea ne tatou me ka se toe ‵gaki mai a tino matagā māfai ko oti ne ‵ta fakapalele latou? Me i te taimi ne palele atu ei te Lolo i aso o Noa, ne toe ‵gaki fakavave mai a amioga ma‵sei kae ne ‵tau o fakamā‵vale atu te Atua ki aofaga matagā a tino mai i te faka‵numi ne ia o te lotou ‵gana.​—⁠Kenese 11:​1-8.

A te pogai tonu ke tali‵tonu ei tatou me ka se toe ‵gaki mai a amioga ma‵sei e fai penei, me ka se toe pule atu a tino ki te lalolagi e pelā mo mea kolā ne ‵tupu mai tua ifo o te Lolo. Kae ka pule atu te Malo o te Atua ki te lalolagi nei. Ka pule mai te malo tenā mai te lagi, kae ka fai foki mo fai te pulega e tasi fua mō te lalolagi kātoa. (Tanielu 2:44; 7:​13, 14) Ka gasuesue fakavave te malo tenā ke taofi aka so se tino telā e taumafai ke toe fai se amioga masei. (Isaia 65:20) A te ‵tonuga loa, ka tamate fakamuli ne te Malo tenā a te mafuaga o amioga ma‵sei​—⁠ko Satani te Tiapolo​—⁠fakatasi mo ana temoni, ko agelu ma‵sei kolā ne tau‵tali atu ki a ia.​—⁠Loma 16:⁠20.

Kae ka se ‵tau o toe manava‵se foki a tino e uiga ki meakai, gatu, fale, mo galuega​—⁠ko vaegā mea kolā e se lava sāle i aso nei kae e fai ei a tino ke amio ma‵sei. E tonu, ka ‵fuli te lalolagi kātoa ke fai mo fai se palataiso ola ‵lei kae ka malaku a meakai mō tino katoa.​—⁠Isaia 65:​21-23; Luka 23:⁠43.

Kae e sili atu i te tāua, ka akoako atu te Malo ki ana tino e uiga ki te olaga filemu kae ka fakama‵siki aka latou ki se olaga ‵lei katoatoa. (Ioane 17:3; Loma 8:21) Kafai ko oti te mea tenā, ka se toe fakatau‵fai a tino mo olotou vāivāiga mo uiga fia‵fai agasala, ka mafai ne latou o faka‵logo katoatoa atu ki te Atua kae ka fia‵fia eiloa latou ke fai penā, e pelā mo mea kolā ne fai ne te tino ‵lei katoatoa ko Iesu. (Isaia 11:⁠3) A te ‵tonuga loa, ne tumau Iesu i te fakamaoni ki te Atua kae faitalia a fakaosoosoga ‵lasi mo faifaiga fakasauā​—⁠ko vaegā mea kolā ka se maua sāle i te Palataiso.​—⁠Epelu 7:⁠26.

Te Pogai e Olo Atu ei a Nisi Tino ki te Lagi

E iloa ne nisi tino kolā e fai‵tau sāle ki te Tusi Tapu a pati konei a Iesu: “E uke a mea e ‵nofo ei koutou i te fale o toku Tamana, kae tenei au ka fano o fakatoka mo koutou.” (Ioane 14:​2, 3) E mata, e fakafesiligina i ei te fakamoemoega ke ola a tino ki te se-gata-mai i te lalolagi palataiso?

E fetaui ‵lei te avā akoakoga konā. A te ‵tonuga loa, e fakatau ‵lago atu te suā manatu ki te suā manatu. A te mea muamua, e fai mai te Tusi Tapu me e foliki fua te aofaki o Kelisiano fakamaoni​—⁠e toko 144,000​—⁠ka toe‵tu atu e pelā me ne agaga ke ola i te lagi. Kaia e tuku atu ei te taui fakaofoofogia tenā ki a latou? Me i a latou ko te potukau telā ne matea atu ne Ioane i tena fakaasiga, kolā e toe‵tu aka kae “ka fai latou mo faitaulaga a te Atua mo Keliso, kae ka pule fakatasi latou mo ia i te afe o tausaga.” (Fakaasiga 14:​1, 3; 20:​4-6) Kafai e fakatusa te toko 144,000 ki te fia piliona o tino i te lalolagi nei, e fai eiloa latou mo fai se “lafu foliki.” (Luka 12:32) Me ko oti ne fe‵paki latou mo fakalavelave masani o tino, ka maina latou e pelā mo Iesu i ‘tou vāivāiga, kae ka tausi ne latou te galuega ke toe faka‵lei aka a tino, penā foki loa mo te lalolagi.​—⁠Epelu 4:⁠15.

Te Lalolagi​—⁠Ko te Koga ‵Nofo o Tino ki te Se-Gata-Mai

Mai i te fakatokaga o te taulaga togiola a Iesu Keliso, ne kamata ei o fakamaopoopo fakatasi ne te Atua te toko 144,000 i te 2,000 tausaga ko ‵teka, kae e foliga mai nei e pelā me ko kātoa ‵lei te potukau tenā. (Galuega 2:​1-4; Kalatia 4:​4-7) Kae ne seki fai fua te taulaga a Iesu mō agasala a te toko 144,000, “kae pela foki mo agasala a tino katoa.” (1 Ioane 2:⁠2) Tela la, e maua ne tino katoa kolā e fakatuanaki ki a Iesu a te fakamoemoega ke ola ki te se-gata-mai. (Ioane 3:16) Ka toe‵tu mai a latou kolā e ‵moe i tānuga, kae e masaua ne te Atua, ki te lalolagi telā ka faka‵mā pakipakigina, kae e se olo atu latou ki te lagi. (Failauga 9:5; Ioane 11:​11-13, 25; Galuega 24:15) Ne a mea ka maua atu ne latou i konā?

E tali mai te Fakaasiga 21:​1-4, penei: “Ko ‵nofo nei mo tino te fale o te Atua! . . . Ka se toe iai ne loimata i olotou mata. Ka se toe iai se mate, se fanoanoa, se tagi io me se ‵mae. Ko palele atu a mea mua.” Ke na mafaufau ki ei​—⁠ka se toe ‵mate a tino, kae ka palele atu ki te se-gata-mai te ‵mae mo te tagi! I konā loa, ka fakataunu mai i se auala fakaofoofogia a te fuafuaga muamua a Ieova mō te lalolagi, penā foki loa mo tino i ei.​—⁠Kenese 1:​27, 28.

‵Tou Filifiliga​—⁠Ko te Ola io me ko te Mate

Ne seki tuku atu ki a Atamu mo Eva te avanoaga ke olo atu laua ki te lagi. A te lā filifiliga ko te faka‵logo ki te Atua kae ke ‵nofo laua ki te se-gata-mai i te lalolagi palataiso io me ke se faka‵logo ki a ia kae ‵mate i ei. Se mea fakafanoanoa me ne fakaiku aka ne laua ke se faka‵logo kae ne toe ‵foki atu laua ki “te laukele.” (Kenese 2:​16, 17; 3:​2-5, 19) Ne seki manako lele eiloa te Atua ke ‵mate a tino valevale kae ke ui atu i te tānuga o olo atu ki te lagi ke ‵nofo atu i konā. Ne faite ne te Atua te fia afe o agelu ke ‵nofo atu i te lagi; a agaga konā e se ko tino kolā ko oti ne ‵mate kae ne toe‵tu aka ki te olaga i te lagi.​—⁠Salamo 104:​1, 4; Tanielu 7:⁠10.

Ne a ‵tou mea e ‵tau o fai ko te mea ke maua ei te fakamanuiaga ko te ola se-gata-mai i te lalolagi Palataiso? A te faiga muamua ko te sukesuke faka‵lei ki te Muna a te Atua, ko te Tusi Tapu. Ne ‵talo atu Iesu penei: “Kae tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.”​—⁠Ioane 17:⁠3.

A te suā faiga ke oko atu ki fiafiaga se-gata-mai i te Palataiso ko te fakagalue aka o te iloaga tenā i tou olaga. (Iakopo 1:​22-24) E maua ne tino kolā e ola e ‵tusa mo te Muna a te Atua a te fakamoemoega ke matea tonu atu te fakataunuga o valoaga ‵gali e pelā mo te valoaga telā ne tusi ki lalo i te Isaia 11:​9, penei: “Ka seai eiloa se mea fakamataku kae masei i luga i Siona, te mauga tapu o te Aliki. A te laukele ka fonu i te malamalama i uiga o te Aliki, e pela mo te tai tela e fonu i te suatai.”

[Fakamatalaga fakaopoopo]