Ko oi a Faifeau a te Atua i Aso Nei?

“Ka ko te motou mafai o fai te galuega, e mai te Atua: me ko ia ne fai ne ia tatou ke mafai o tavini i te feagaiga fou.”​—2 KOLINITO 3:​5, 6.

1, 2. Se a te tofiga telā ne ‵kau atu ki ei a Kelisiano katoa i te senitenali muamua, kae ne ‵fuli pefea a mea i ei?

I TE senitenali muamua, ne fai ne Kelisiano katoa se tofiga tāua​—ko te tiute ke talai atu te tala ‵lei. Ne fakaekegina katoa a latou kae ne fai mo fai ne faifeau o te feagaiga fou. Ne maua ne nisi tino a tofiga fakaopoopo, e pelā mo te akoako atu i te fakapotopotoga. (1 Kolinito 12:​27-29; Efeso 4:11) E maua ne mātua a tiute ‵mafa i loto i te kāiga. (Kolose 3:​18-21) Kae e ‵kau atu a latou katoa ki te galuega talai fakavae kae tāua. I te lomiga mua o Tusitusiga faka-Kelisiano i te gana Eleni, a te tofiga tenei se di·a·ko·niʹa​—se taviniga, io me se galuega fakafaifeau.​—Kolose 4:17.

² I te ‵tekaatuga o taimi, ne ‵fuli i ei a mea. Ne ati aka se potukau e pelā me ko te kau faifeau, kolā ne puke ne latou a te tauliaga ke talai atu mō latou eiloa. (Galuega 20:30) E mu‵tana fua te aofaki o te kau faifeau kolā e fakaigoa ne latou a latou eiloa ki Kelisiano. Ne lauiloa a te tokoukega o latou e pelā me se kau lotu. E tiga eiloa ko oti ne akoako atu ki te potukau tenā, me e isi ne olotou tiute kese‵kese, e aofia i ei te faiga o meaalofa mō te tausiga o faifeau, a te tokoukega o latou ne fakalogo‵logo fua ki te mataupu e uiga ki te galuega talai.

3, 4. (a) E fai pefea a tino i Lotu Kelisiano ‵Se mo fai ne faifeau? (e) Ko oi e ma‵natu aka a tino me ko faifeau i Lotu Kelisiano ‵Se, kae kaia e ‵kese ei a faifaiga o mea i va o Molimau a Ieova?

³ E fai mai a faifeau konā me e tavini atu latou ki nisi tino (mai i te pati faifekau, se ‵fuliga i te ‵gana Latina o te di·aʹko·nos ko te “tavini”).a Ke maua ne latou te tulaga tenei, e iku mai latou i kolisi io me ko akoga kae e faū ei latou. E fai mai penei a te International Standard Bible Encyclopedia: “A te ‘faūga e fakasino tonu eiloa ki se tulaga fakapito telā e tuku atu ki faifeau io me ko faitaulaga e auala i se fakatapūga ‵malu, fakatasi mo te faka‵mafaga o te pulega ke folafola atu te Muna io me ke fai se sauniga ‵malu, io me e fai talua.” Ko oi e faū ne latou a faifeau? E fai mai penei te New Encyclopædia Britannica: “I lotu kolā e isi ne epikopo i ei, e faū sāle ne se epikopo a faifeau. I lotu Pelepeleane, e fai a te faūga ne faifeau o te lotu Pelepeleane.”

⁴ Tela la, ko oti ne fakatapulāgina a te tauliaga ke fai mo fai se faifeau ne lotu i Lotu Kelisiano ‵Se. Kae e se tenā eiloa te auala i va o Molimau a Ieova. Kaia e se fai ei penā? Me ne seki fai penā i te fakapotopotoga Kelisiano i te senitenali muamua.

Ko oi Tonu Eiloa a Faifeau a te Atua?

5. E ‵tusa mo te Tusi Tapu, ko oi e aofia i tino kolā e tavini atu e pelā me ne faifeau?

⁵ E ‵tusa mo te Tusi Tapu, a tino tapuaki katoa a Ieova​—i te lagi mo te lalolagi​—ne faifeau. Ne tavini atu a agelu ki a Iesu. (Mataio 4:11; 26:53; Luka 22:43) E ‘tavini atu foki a agelu ki a latou kola ka maua ne latou a te fakaolataga.’ (Epelu 1:14; Mataio 18:10) A Iesu ne fai mo fai se faifeau. Ne fai mai a ia penei: “E pela mo te Tama a te Tagata, e seki vau au ke tavini mai a tino ki a au, kae ke tavini atu au.” (Mataio 20:28; Loma 15:8) Tela la, ona ko soko o Iesu e ‵tau o ‘tau‵tali i ona kalafaga,’ e se se mea fakapoi me e ‵tau foki o fai latou mo fai ne faifeau.​—1 Petelu 2:21.

6. Ne fakaasi mai pefea ne Iesu me e ‵tau o fai ana soko mo fai ne faifeau?

⁶ Mai mua malie eiloa o tena fanakaga ki te lagi, ne fai atu a Iesu ki ana soko: “Olo atu . . . ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu. Akoako atu foki latou ke faka‵logo ki mea katoa kola ne fakatonu atu ne au ki a koutou.” (Mataio 28:​19, 20) Ne ‵tau o fai ne soko o Iesu a tino mo fai ne soko​—ne faifeau. A soko ‵fou kolā ne fai ne latou e ‵tau o tauloto ke faka‵logo ki mea katoa kola ne fakatonu mai ne Iesu, e aofia i ei a te fakatonuga ke olo atu o fai a soko. A te tagata io me ko te fafine, tino matua io me se tamaliki, se soko tonu o Iesu Keliso e ‵tau o fai mo fai se faifeau.​—Ioelu 2:​28, 29.

7, 8. (a) Ne a tusi siki e fakaasi mai me i Kelisiano ‵tonu katoa ne faifeau? (e) Ne a fesili ne faka‵sae aka e uiga ki te faūga?

⁷ Ke fetaui ‵lei mo te mea tenei, i te aso o te Penitekoso i te 33 T.A., a soko katoa o Iesu kolā ne ‵kau atu, tāgata mo fāfine, ne ‵kau fakatasi i te fai‵pati atu e uiga “ki galuega fakaofoofogina a te Atua.” (Galuega 2:​1-11) E se gata i ei, ne tusi mai penei te apositolo ko Paulo: “Me e talitonu a te tino i tona loto, tela la, ko takuamiotonugina a ia, kae kafai e molimau foki ona laugutu, e fakaolagina a ia.” (Loma 10:10) Ne fakasino atu ne Paulo a pati konā, se ki se potukau faifeau fakaatea, kae “ki te fanau pele katoa a te Atua i Loma.” (Loma 1:​1, 7) E tai penā foki, a ‘Kelisiano katoa kola e fakamaoni ki a Keliso Iesu’ ne ‵tau “o toka foki koutou o takutaku atu a te Tala ‵Lei o te Filemu.” (Efeso 1:1; 6:15) Kae ko tino katoa kolā ne lagona ne latou te tusi telā ne fakatuātusi atu ki te kau Epelu ne ‵tau o ‘puke mautakitaki ki te fakamoemoega.’​—Epelu 10:23.

⁸ Ko te taimi fea e fai ei se tino mo fai se faifeau? I nisi tugāpati, ko te taimi fea e ‵tau ei o faū a ia? Kae ko oi e faū ne ia a ia?

Te Faūga e Pelā me se Faifeau ​—Ko te Taimi Fea?

9. Ko te taimi fea ne faū ei a Iesu, kae ko oi ne faū ne ia a Iesu?

⁹ Ke iloa aka a te taimi mo te tino e fāu ne ia se tino, ke mafaufau ki te fakaakoakoga a Iesu Keliso. Ne seki maua ne ia se pepa o tena faūga io me se tikulī mai i nisi akoga ke fakamaoni aka me ne fai a ia mo fai se faifeau, kae ne seki faū foki a ia ne so se tagata. Kaia e mafai ei o fai atu me ne fai a ia mo fai se faifeau? Ona ko te mea ne fakataunu ki a ia a pati fakaosofia konei a Isaia: “Ko i luga i a au te Agaga o te Aliki [ko Ieova]. Ne faū ne ia au o lauga atu te Tala ‵Lei.” (Luka 4:​17-19; Isaia 61:1) E fakaasi mai ne pati konā me e seai eiloa se fakalotolotolua me ne fakatonu atu ki a Iesu ke takutaku atu te tala ‵lei. Ko oi ne fakatonu atu? Ona ko te mea ne fakaeke a ia ne te agaga o Ieova mō te galuega, ne manino ‵lei me ne faū a Iesu ne Ieova te Atua. Ne tupu anafea a te mea tenei? Ne oko ifo a te agaga o Ieova ki luga i a Iesu i te taimi ne papatiso ei a ia. (Luka 3:​21, 22) Tela la, ne faū a ia i te taimi ne papatiso ei a ia.

10. Ko oi e fai ne ia a tino ke “mafai” o fai mo fai se faifeau Kelisiano?

¹⁰ Kae e a soko o Iesu i te senitenali muamua? Ne maua foki te lotou tofi e pelā me ne faifeau mai i a Ieova. Ne fai mai penei a Paulo: “Ka ko te motou mafai o fai te galuega, e mai te Atua: me ko ia ne fai ne ia tatou ke mafai o tavini i te feagaiga fou.” (2 Kolinito 3:​5, 6) E fai pefea ne Ieova ana tino tapuaki ke fetaui ‵lei mō te galuega faifeau? Mafaufau ki te fakaakoakoga a Timoteo, telā ne taku ne Paulo ki se ‘taina, tela e ga‵lue tasi matou mō te Atua, i te talai atu ne matou a te Tala ‵Lei e uiga ki a Keliso.’​—1 Tesalonia 3:2.

11, 12. Ne mafai pefea o gasolo atu ki mua a Timoteo ke fai pelā me se faifeau?

¹¹ A pati fakamuli kolā ne fai atu ki a Timoteo e fesoasoani mai ki a tatou ke malamalama i te auala ne fai ei a ia mo fai se faifeau: “Kae pela mo koe, ke tumau koe i mea tonu kola ne akoako atu ei koe, kae ne talitonu faka‵lei foki koe ki ei. Me e iloa ne koe me ko oi ou faiakoga muamua, kae masaua foki i tau folikiga ko oti ne iloa ne koe a Tusitusiga Tapu, kola e mafai o avatu ne latou ki a koe te poto tela e takitaki ei koe ki te fakaolataga e alatu i te fakatuanaki i a Keliso Iesu.” (2 Timoteo 3:​14, 15) A te fakavae o te fakatuanaki o Timoteo, telā ne fakaosofia ei a ia ke fakaasi te mea tenā i mua o tino katoa, ko te iloaga i te Tusi Tapu. E mata, ne manakogina fua i ei a faitauga totino mō te mea tenei? Ikai. Ne manako a Timoteo ki se fesoasoani ke maua ei te iloaga tonu mo te malamalama faka-te-agaga e uiga ki mea kolā e faitau ne ia. (Kolose 1:9) Tela la, ne fakamalosi atu ki a Timoteo ke “talitonu.” Ona ko te mea ko oti ne iloa ne ia a te Tusi Tapu ‘mai tena folikiga,’ kāti ana faiakoga muamua ko tena mātua mo tena tupuna fafine, me i tena tamana e seki fai mo fai se tino talitonu.​—2 Timoteo 1:5.

¹² Kae e uke atu a mea ne aofia i te faiga o Timoteo mo fai se faifeau. E tasi mai i ei, ne fakamalosigina tena fakatuanaki ne ana fesokotakiga mo Kelisiano i fakapotopotoga ‵pili atu ki a ia. E iloa pefea ne tatou te mea tenā? Me i te taimi ne fetaui muamua ei a Paulo mo Timoteo, “ko oko eiloa i te tavaea o Timoteo ne taina talitonu i Lusa mo Ikonio.” (Galuega 16:2) E se gata i ei, ne tusi atu ne nisi taina i aso konā a tusi ki fakapotopotoga ko te mea ke fakamalosi aka ei latou. Ne āsi atu a toeaina asiasi ko te mea ke fakamalosi atu ki a latou. Ne fesoasoani atu a vaegā fakatokaga penā ki Kelisiano e pelā mo Timoteo ke gasolo atu ki mua i te feitu faka-te-agaga.​—Galuega 15:​22-32; 1 Petelu 1:1.

13. Ko te taimi fea ne faū ei a Timoteo e pelā me se faifeau, kae kaia e fai mai ei koe me ne seki gata atu i konā a tena gasolo atu ki mua i te feitu faka-te-agaga?

¹³ E ‵tusa mo te fakatonuga a Iesu telā ne tusi ki lalo i te Mataio 28:​19, 20, e mafai o tali‵tonu tatou me ne fakaosofia te fakatuanaki o Timoteo i se taimi ke tautali atu a ia ki a Iesu kae ke papatiso foki. (Mataio 3:​15-17; Epelu 10:​5-9) A te mea tenei se fakailoga o te tukuatuga mo te loto kātoa o Timoteo ki te Atua. I tena papatisoga, ne fai ei a Timoteo mo fai se faifeau. Mai i te taimi tenā o vau ki mua, tena olaga, tena malosi, mo mea katoa ne tuku atu ki te Atua. A te mea tenei se vaega kātoa o tena tapuakiga, “se taviniga tapu.” Kae ne seki lotomalie a Timoteo ke fai fua a ia mo fai se faifeau. Ne tumau eiloa a ia i te gasolo atu ki mua i te feitu faka-te-agaga, ke fai ei a ia mo fai se faifeau Kelisiano matua ‵lei. Ne tupu te mea tenei ona ko te fesokotakiga pili o Timoteo mo vaegā Kelisiano ma‵tua pelā mo Paulo, ana sukesukega totino, mo tena loto finafinau i te galuega talai.​—1 Timoteo 4:14; 2 Timoteo 2:2; Epelu 6:1.

14. I aso nei, e gasolo atu pefea se tino ‘filifilia mō te ola se-gata-mai’ ke fai mo fai se faifeau?

¹⁴ I aso nei, e ‵pau eiloa a te faūga mō te galuega faka-Kelisiano. A te tino telā “ko oti ne filifilia mō te ola se gata mai” e fesoasoani atu ki a ia ke tauloto e uiga ki te Atua mo ana fuafuaga e auala i se akoga faka-te-Tusi Tapu. (Galuega 13:48) E fakaakoako a te tino tenā ke fakagalue aka ne ia a fakatakitakiga a te Tusi Tapu i tena olaga kae ke ‵talo faka‵lei atu ki te Atua. (Salamo 1:​1-3; Faataoto 2:​1-9; 1 Tesalonia 5:​17, 18) E kau atu a ia ki nisi tino tali‵tonu kae fakaaogā faka‵lei a mea kolā e tuku mai mo fakatokaga e auala i te “tavini fakamaoni kae poto.” (Mataio 24:​45-47; Faataoto 13:20; Epelu 10:​23-25) Tela la, e gasolo atu foki a ia ki mua i se fakasologa ‵lei o akoakoga.

15. Se a te mea e tupu māfai ko papatiso se tino? (Ke onoono foki ki te fakamatalaga mai lalo.)

¹⁵ Fakamuli loa, kafai ko oti ne ati aka ne te tino akoga i te Tusi Tapu tena alofa ki a Ieova te Atua mo se fakatuanaki malosi ki te taulaga togiola, ko manako ei a ia ke tuku kātoa atu a ia ki tena Tamana faka-te-lagi. (Ioane 14:1) E fai ne ia a te tukuatuga tenā i se ‵talo totino kae oti aka loa, ko papatiso ei a ia e pelā me se fakailoga o te faifaiga sē lavea tenā i mua o tino katoa. A tena papatisoga ko tena faūga foki eiloa tenā me tenā eiloa te taimi ka fai ei a ia e pelā me se tavini tukugina atu kātoa, se di·aʹko·nos, a te Atua. E ‵tau o tumau a ia i te ‵vae keatea mai i te lalolagi. (Ioane 17:16; Iakopo 4:4) Ko oti ne tuku kātoa atu a ia eiloa e pelā me ‘se taulaga ola, se taulaga tapu kae logomalie ki te Atua’ e aunoa mo se fakalotolotolua. (Loma 12:1)b A ia ko te faifeau a te Atua, mai i te fakaakoako atu ki a Keliso.

Se a te Galuega Faka-Faifeau a Kelisiano?

16. Ne a nisi tiute o Timoteo e pelā me se faifeau?

¹⁶ Se a te mea e aofia i te galuega a Timoteo? Ne maua ne ia a tauliaga fakapito e pelā me se taugasoa faimalaga o Paulo. Kae i te taimi ne fai ei a ia mo fai se toeaina, ne galue malosi a Timoteo i te akoako mo te fakamalosi atu ki taina Kelisiano. Kae ko te vaega fakavae o tena galuega, ko te mea telā ne fai ne Iesu mo Paulo, ko te talaiatuga o te tala ‵lei mo te faiga o soko. (Mataio 4:23; 1 Kolinito 3:5) Ne fai atu a Paulo ki a Timoteo: “Kae pela mo koe, e ‵tau eiloa mo koe o mafaufau faka‵lei i mea katoa, kufaki i puapuaga, fai te galuega a te tino folafola, kae fakataunu tau galuega totino.” (I ā matou a mataimanu ‵kese.)​—2 Timoteo 4:5.

17, 18. (a) Se a te galuega faka-faifeau telā e ‵kau atu ki ei a Kelisiano? (e) E pefea te tāua o te galuega talai ki se faifeau Kelisiano?

¹⁷ E ‵pau eiloa mo faifeau Kelisiano i aso nei. E ‵kau atu latou ki se galuega faka-faifeau mō tino katoa, se galuega a te tino folafola, mai i te takitaki o tino ki te fakaolataga telā e fakavae ki te taulaga a Iesu kae e akoako atu a tino loto mau‵lalo ke ka‵laga atu ki te igoa o Ieova. (Galuega 2:21; 4:​10-12; Loma 10:13) E fakamaoni atu ne latou mai i te Tusi Tapu me i te Malo ko te fakamoemoega fua e tasi mō tino logo‵mae kae e fakaasi atu i ei me e mafai o tai ‵lei te tulaga o mea i aso nei māfai e ola tatou e ‵tusa mo fakatakitakiga mai te Atua. (Salamo 15:​1-5; Maleko 13:10) Kae e se talai atu ne se Kelisiano se tala ‵lei telā e fesoasoani atu fua i ei ki tino i te feitu faka-te-foitino. I lō te fai penā, e akoako atu ne ia me “e sili atu eiloa te aoga o fakamalosiga faka te agaga i feitu katoa, me folafola mai ne ia te ola i aso nei mo te ola ka oko mai.”​—1 Timoteo 4:8.

¹⁸ E tonu, e isi ne auala fakaopoopo a faifeau e tokouke ke tavini atu ei latou, kolā kāti e ‵kese mai i se isi Kelisiano. E tokouke i a latou e isi ne olotou tiute faka-te-kāiga. (Efeso 5:21–​6:4) E isi ne tiute o toeaina mo tavini fakafaifeau i te fakapotopotoga. (1 Timoteo 3:​1, 12, 13; Tito 1:5; Epelu 13:7) E fesoasoani atu a Kelisiano e tokouke ki te faitega o Kingdom Halls. E maua ne nisi tino a te tauliaga gali ke ga‵lue pelā me ne tino fakagāmua i se fale Peteli e tasi a te Sosaiete o te Faleleoleo Maluga. Kae e tiga eiloa te feitu tenā, e ‵kau atu a faifeau Kelisiano katoa ki te talaiatuga o te tala lei. E seai eiloa se fakamasakoga ke se kau atu ki ei. E iloa ne tino katoa a te tino telā e kau atu ki te galuega tenei, me e fai a ia mo fai se tinā faifeau Kelisiano tonu.

Uiga o se Faifeau Kelisiano

19, 20. Ne a uiga e ‵tau o fakamalosi aka ne faifeau Kelisiano?

¹⁹ A te tokoukega o faifeau i Lotu Kelisiano ‵Se e fakamoe‵moe ke avatu se fakaaloalo fakapito, kae e talia sāle ne latou a vaegā tofi pelā mo “tou ‵malu” io me ko te “tamana.” Kae e iloa ne se faifeau Kelisiano me ko Ieova fua e ‵tau o avatu ki ei te fakaaloaloga. (1 Timoteo 2:​9, 10) E seai se faifeau Kelisiano e taumafai ke maua ne ia se vaegā fakaaloaloga maluga io me ne tofiga fakapito penā. (Mataio 23:​8-12) E iloa ne ia me i te uiga fakavae o te di·a·ko·niʹa ko te “taviniga.” A te veape telā e tai pau mo te pati tenā, e fakaaogā i nisi taimi i te Tusi Tapu ke fakasino atu ki te taviniga totino, e pelā mo te tavini atu i te fakatokaga o mea‵kai. (Luka 4:39; 17:8; Ioane 2:​5) E tiga eiloa e maluga te fakaaogāga o te pati tenā i te taviniga a te Kelisiano, koi fakauiga eiloa te di·aʹko·nos ki se tavini.

²⁰ Tela la, e seai se faifeau Kelisiano e maua ne ia se pogai ke mafaufau me e tāua ‵ki eiloa a ia. A faifeau Kelisiano ‵tonu​—ke oko foki eiloa ki tino kolā e maua a tofiga fakapito i te fakapotopotoga​—ko tavini kolā e loto mau‵lalo. Ne fai mai a Iesu penei: “Kafai se tino i a koutou e manako ke sili a ia, e ‵tau mo ia o fai mo tavini a koutou. A ia foki tela e fia muamua, ke fai a ia mo pologa a koutou.” (Mataio 20:​26, 27) I te taimi ne fakaasi atu ei ne ia ki ana soko a te uiga tonu ke fakamalosi aka ne latou, ne ‵fulu ne Iesu olotou vae, kae ne fai ei ne ia te galuega a te tavini malalo eiloa. (Ioane 13:​1-15) Ko tafaga la te taviniga loto maulalo tenā! Tela la, e tavini atu a faifeau Kelisiano mo te loto maulalo ki a Ieova te Atua mo Iesu Keliso. (2 Kolinito 6:4; 11:23) E fakaasi atu ne latou te ‵lei olotou mafaufau i te tavini atu o te suā tino ki te suā tino. Kae kafai e talai atu latou, e tavini atu latou e aunoa mo uiga kaiū ki olotou tuakoi sē tali‵tonu.​—Loma 1:​14, 15; Efeso 3:​1-7.

Ke Kufaki i te Galuega Faka-Faifeau

21. Ne taui atu pefea ki a Paulo ona ko tena kufaki i te galuega faka-faifeau?

²¹ Ke fai pelā me se faifeau, ne manakogina a te kufaki mō Paulo. Ne fai atu a ia ki te kau Kolose me ne logo‵mae malosi a ia ko te mea ke talai atu ne ia te tala ‵lei ki a latou. (Kolose 1:​24, 25) Ona ko te mea ne kufaki a ia, ne talia ne tino e tokouke te tala ‵lei kae ne fai mo fai ne faifeau. Ne fai latou pelā me ne tama a te Atua mo taina o Iesu Keliso, mo te fakamoemoega ke fai mo fai ne tino faka-te-agaga fakatasi mo ia i te lagi. Ko tafaga la te gali o te taui tenā mō te kufaki!

22, 23. (a) Kaia e ‵tau ei o kufaki a faifeau Kelisiano i aso nei? (e) Ne a fuataga ‵gali e maua mai i te kufaki o se Kelisiano?

²² E manakogina a te kufaki i aso nei mō tino kolā e fai ‵tonu mo fai ne faifeau a te Atua. E manava‵se malosi a tino e tokouke i aso katoa ona ko masaki io me ko te logo‵mae o te olaga matua. E ga‵lue malosi a mātua ke puti aka olotou tama‵liki​—kae e seai ne avaga a nisi mātua konā. E ‵teke atu mo te loto ‵toa a tama‵liki i akoga ki fakamalosiga ma‵sei i olotou tafa. E fe‵paki a Kelisiano e tokouke mo fakalavelave faiga‵ta i mea tau tupe. Kae e tokouke a tino e logo‵mae i fakasauāga io me e fe‵paki mo mea faiga‵ta ona ko “taimi faiga‵ta” i aso nei! (2 Timoteo 3:1) E tonu, e mafai o fai atu ne faifeau a Ieova kolā ko tai kātoa te ono miliona a pati ne fai atu ne te apositolo ko Paulo: “Kae i mea katoa e fai ne matou, e fakaasi atu ei i a matou ko tavini a te Atua, i te loto kufaki.” (2 Kolinito 6:4) Kae e tiga eiloa te feitu tenā, e se loto vāi‵vāi a faifeau Kelisiano. E ‵tau eiloa o fakamālō tonu atu ki te lotou kufaki.

²³ Kae e sili atu i ei, a te kufaki e aumai i ei a fuataga ‵gali, e pelā eiloa mo te mea ne tupu ki a Paulo. E auala i te kufaki, e fakatumau ei ne tatou te ‵tou fesokotakiga pili mo Ieova kae fai tena loto ke fiafia. (Faataoto 27:11) E fakamalosi aka ne tatou ‵tou fakatuanaki, kae e fesoasoani atu i ei ki te kau taina Kelisiano. (1 Timoteo 4:16) E fesoasoani atu a Ieova ki ana faifeau kae fakamanuia ne ia te lotou galuega i aso fakaoti konei. Ne iku atu i ei ki te fakamaopoopoga o te toega o te toko 144,000, kae ko sili atu nei i te toko miliona o tino ko maua te fakamoemoega mautinoa ke ola ki te se-gata-mai i te lalolagi palataiso. (Luka 23:43; Fakaasiga 14:1) E tonu, a te galuega faka-faifeau a Kelisiano se fakaasiga o te alofa fakamagalo o Ieova. (2 Kolinito 4:1) Ke na fakatāua ne tatou katoa te galuega tenā kae ke fia‵fia me i te ikuga o te mea tenā ka tumau ki te se-gata-mai.​—1 Ioane 2:17.

[Fakamatalaga fakaopoopo]

E Mafai ne Koe o Fakamatala Mai?

• Se a te tiute telā ne aofia i ei a Kelisiano katoa i te senitenali muamua?

• Ko te taimi fea kae ko oi foki e faū ne ia se faifeau Kelisiano?

• Ne a uiga e ‵tau o fakamalosi aka ne se faifeau Kelisiano?

• Kaia e ‵tau ei o kufaki se faifeau Kelisiano māfai ko fe‵paki mo mea faiga‵ta?

[Ata i te itulau e 15]

Ne akoakogina a Timoteo ki te Muna a te Atua mai i tena folikiga. Ne faū a ia mo fai se faifeau i te taimi ne papatiso ei a ia

[Ata i te itulau e 16]

A te papatisoga se fakailoga o te tukuatuga ki te Atua kae e fakailoga foki ei a te faūga o se tino mo fai se faifeau

[Ata i te itulau e 18]

E loto fia‵fia a faifeau Kelisiano ke tavini atu