Lakau Kolā e Tumau te Leva
E foliga mai me e se ‵lei ke faite sou fale i se kaugutu o se mauga, maise eiloa māfai e tu i se koga maluga ‵ki. faitalia te faigata o te faiga tenā, kae e isi ne lakau e igoa ki te alpine, e ‵piki ‵mautakitaki eiloa i vaegā kaugutu penā, e ‵tusa loa me ko te taimi o te ‵tau ‵moko io me ko te ‵tau ‵vela.
SE MEA masani, me i lakau konei e se oko eiloa te lotou ma‵losi ki lakau penā kolā e ola i koga ma‵lalo. I nisi taimi e se ola ‵lei kae e ‵piko foki a aka o lakau konā kolā e toe‵toe fua. E ‵fuli olotou foliga ne te sē ‵lei o te ‵tau o te aso mo te sē maumea o te laukele telā e ola i ei.
Ona ko te tumau o latou i toe koga sē ‵lei penā i te lalolagi nei, kāti e talitonu koe me e toetoe fua te taimi e ola ei latou. Kae e se penā loa. E fai mai a nisi tino me i te lakau e igoa ki te Metusela, se paina, telā e tupu aka i se koga telā e 10,000 futu te maluga i Mauga ‵Kena o Kalefonia, ko 4,700 tausaga te leva. E taku mai ne te Guinness Book of Records 1997 a te lakau tenei e pelā me ko te ‵toe lakau leva ne ola i te lalolagi nei. A Edmund Schulman, telā ne sukesuke ki lakau ola leva konā, ne fakamatala mai penei: “A te vaegā paina tenei e foliga mai me ne ola leva ona ko tulaga faiga‵ta. E lavea atu me e ola a lakau [ko te paina] kolā ko leva kite maluga ko te 10,000 futu i koga lavaki kae fatufatua i Mauga ‵Kena.” Ne maua foki ne Schulman me i toe lakau leva i nisi vaegā paina aka e ola foki i tulaga faiga‵ta.
E tiga eiloa e ‵tau o manumalo latou i mea faiga‵ta, e lua mea e aogā ki fakaakoakoga konei o te tumau. Ko te lotou ‵tu tokotasi, i koga kolā e se ola malosi i ei a nisi lakau aka, e puipui ei latou mai i afi i te vao, telā se mea fakamataku lasi e tasi ki lakau kolā ko leva. Kae ko olotou aka e faka‵mautakitaki ei latou ki fuafatu i te kaugutu kae e mafai fua ne se mafuie o fakaga‵sue a lakau konā.
I te Tusi Tapu, e fakatusa a tavini fakamaoni a te Atua ki lakau. (Salamo 1:1-3; Ielemia 17:7, 8) E mafai foki o fe‵paki latou mo mea faiga‵ta ona ko fakanofonofoga e ‵nofo atu latou i ei. E mafai ne fakasauāga, masaki, io me ko te mativa fulafulaki o tofotofo malosi te lotou fakatuanaki, maise eiloa māfai e tumau a tofotofoga konā i tausaga e uke. Kae e tiga eiloa te feitu tenā, e fakatalitonu mai ne te Atua telā ne faite ne ia latou, ko ia telā ne faite foki ne ia a lakau kolā e mafai o fakafesagai atu ki mea faiga‵ta, ki ana tino tapuaki, me ka ‵lago atu a ia ki a latou. E folafola mai a te Tusi Tapu ki tino kolā e ‵tu ‵mautakitaki, penei: “E tuku atu foki ne ia ki a koutou a te loto mau, te malosi, mo te fakavae mautakitaki.”—1 Petelu 5:9, 10.
‘A te ‵mautakitaki o se tino, te loto ‵mau, io me ko te tumau’ ko te uiga tonu o te veape Eleni telā e ‵fuli sāle ki te “kufaki” i te Tusi Tapu. E pelā mo te lakau ko te alpine, a aka ‵lei ko te kī ki te kufaki. E ‵tau mo Kelisiano o ‵mautakitaki olotou aka i a Iesu Keliso ko te mea ke ‵tu ‵mautakitaki latou. Ne tusi mai penei a Paulo: “Ona ko te mea ko oti ne talia ne koutou a Keliso Iesu ko te Aliki, tela la, ke ola koutou i a ia. Ke ‵mau otou aka, ke putiputi ake foki koutou i a ia, ke ati ake foki koutou i te fakatuanaki, e pela eiloa mo te mea ne akoako atu ki a koutou, ke ‵fonu foki koutou i te loto fakafetai.”— Kolose 2:6, 7.
Ne malamalama ‵lei a Paulo i te tāua ke ma‵losi a aka i te feitu faka-te-agaga. Ne taua malosi atu a ia fakatasi mo “te logo‵mae o te foitino,” kae ne kufaki a ia i fakasauāga matagā i tena galuega kātoa. (2 Kolinito 11:23-27; 12:7) Kae ne iloa ne ia me ne mafai ne ia o tumau ona ko te malosi o te Atua. Ne folafola mai a ia penei: “E mafai ne au o fai a mea katoa kona, ona ko te fakamalosi mai o ia telā e tuku mai te malosi ki a au.”—Filipi 4:13, NW.
E pelā mo te fakaakoakoga a Paulo, e se fakalagolago a te kufaki faka-Kelisiano ki tulaga ‵lei. E pelā mo lakau ko te alpine kolā ne tumau eiloa i taimi o matagi ma‵losi i te fia selau tausaga, e mafai o ‵tu ‵mautakitaki tatou māfai e ‵mau ‵tou aka i a Keliso kae fakalagolago ki te malosi telā e tuku mai ne te Atua. E se gata i ei, kafai e tumau tatou ke oko ki te gataga, e maua ne tatou te fakamoemoega ke oko atu tatou ki te fakataunuga tonu o te suā folafolaga mai te Atua: “Oku tino ka ola leva e pela me ne lakau.”—Isaia 65:22; Mataio 24:13.