Ke Fakaakoako ki a Ieova i te Akoakoga o Au Tama‵liki

“E a, e isi se tamaliki e seki fakasala ne tona tamana?”​—EPELU 12:⁠7.

NE FAKAASI mai ne se sukesukega telā ne fai i Tiapani i nāi tausaga ko ‵teka me kāti e nofo pelā ki te āfa o tino ma‵tua ne fakasau‵tala aka, ne mafau‵fau me e foliki fua te fesokotakiga i te va o mātua mo olotou tama‵liki kae ko tō fakapelepele va‵lea ne mātua olotou tama‵liki. Ne fakaasi mai ne te suā sukesukega telā ne fai i te fenua foki eiloa tenā me toeitiiti ko kātoa te kuata o tino kolā ne taku ‵tonu atu me e se iloa ne latou o sau‵tala faka‵lei mo olotou tama‵liki. E tupu foki te fakalavelave tenei i nisi fenua i tua atu o Fenua ki te Saegāla. Ne lipoti mai te Toronto Star, penei: “Ne taku ‵tonu mai a mātua e tokouke i Kanata, me e se iloa ne latou o fai mo fai ne mātua ‵lei.” E faigata ki mātua i koga katoa o puti aka olotou tama‵liki.

² Kaia e faigata ei ki mātua o puti aka olotou tama‵liki? E tasi te pogai sili, me ko ‵nofo atu tatou i “aso fakaoti,” kae ko oko mai foki nei a “taimi faiga‵ta.” (2 Timoteo 3:⁠1) E se gata i ei, e fai mai te Tusi Tapu me “i te taimi koi foniki ei a te tagata, a tena loto e se ‵lei.” (Kenese 8:​21, NW) E tuku faka‵sau malosi atu a talavou ki osomaiga a Satani, telā e fai pelā me se “leona fekai” kae oso atu ki tino sē ata‵mai. (1 Petelu 5:⁠8) E mautinoa eiloa me e oko atu a fakalavelave ki mātua kolā e fakatoka faka‵lei ke puti aka olotou tama‵liki “i te olaga ‵lei mo akoakoga faka-Kelisiano.” (Efeso 6:⁠4) E mafai pefea ne mātua o fesoasoani atu ki olotou tama‵liki ke ‵tupu aka e pelā me ne tino tapuaki a Ieova kolā e ma‵tua ‵lei, kae ko mafai foki o “iloa ne latou o tami ki te kesekesega o te ‵lei mo te masei”?​​—⁠Epelu 5:​14.

³ “A te uiga o tamaliki, e fai ne latou a uiga valea,” ko pati a te Tupu poto ko Solomona. (Faataoto 13:1; 22:15) Ke ave keatea a te vaegā uiga valea penā mai i olotou loto, e manakogina ne tama‵liki a fakatonutonuga a‵lofa mai i olotou mātua. Kae e se talia faeloa ne talavou a vaegā fakatonutonuga penā. A te ‵tonuga loa, e ‵teke sāle atu latou ki pati fakatonutonu faitalia me ko oi e avatu ne ia a fakatonuga konā. Tela la, e ‵tau o tau‵loto a mātua ke “akoako atu ki te tamaliki te mea e tau o fai.” (Faataoto 22:⁠6) Kafai e taofi ‵mau a tama‵liki ki vaegā polopolokiga penā, e mafai ei o maua ne latou te ola. (Faataoto 4:13) E pefea te tāua ke iloa ne mātua a mea kolā e aofia i te akoakoga o olotou tama‵liki!

Te Uiga o Polopolokiga

⁴  E ‵kalo keatea a nisi mātua mai te fakatonutonuga o olotou tama‵liki ona ko te ma‵taku i te mea ma ‵losi atu ki a latou me e manea‵nea ne latou olotou tamaliki​​—⁠i te feitu faka-te-foitino, i pati, io me ko feitu tau lagonaga. E se ‵tau o ma‵taku ki ei. A te pati “polopoloki” telā e fakaaogā i te Tusi Tapu, e se fakauiga ki maneaneaga io me ko fakasauāga. A te pati Eleni mō te “polopoloki” e fakasino atu muamua eiloa ki te fakatonutonuga, akoakoga, te fakatonuga, mo te ‵mautakitaki i nisi taimi, mo te fakasala i te alofa.

⁵ I te tukumaiga o vaegā polopolokiga penā, ne tuku mai ne Ieova te Atua se fakaakoakoga ‵lei katoatoa. I te fakatusatusaga o Ieova ki se tamana faka-te-foitino, ne tusi mai a te apositolo ko Paulo, penei: “E a, e isi se tamaliki e seki fakasala ne tona tamana? . . . I te feitu ki o‵tou tamana faka te foitino, e fakasala foki ne latou a tatou, ka ko te Atua e fai eiloa ne ia ko te mea ke manuia ei tatou, ke kau fakatasi ei foki tatou i tona ‵malu.” (Epelu 12:​7-10) E tonu, e polopoloki ne Ieova ana tino ko te mea ke ‵malu io me ke ‵mā latou. E mafai foki eiloa o tau‵loto tatou ki mea e uke atu e uiga ki te polopolokiga o tama‵liki mai i te mafaufau ki te auala ne akoako ei ne Ieova ana tino.​​—⁠Teutelonome 32:4; Mataio 7:​11; Efeso 5:⁠1.

Te Alofa​​—⁠Ko te Fakavae Fakamalosi Loto

⁶ E fai mai penei te apositolo ko Ioane: “Me i te Atua ko te alofa eiloa a ia.” Tela la, a te akoakoga telā e tuku mai ne Ieova e fakavae faeloa ki te alofa. (1 Ioane 4:8; Faataoto 3:​11, 12) E mata, e fakauiga i ei me ka faigofie ki mātua kolā e a‵lofa ki olotou tama‵liki ke fakaakoako atu ki a Ieova i te feitu tenei? Ikai, e se penā loa. A te alofa o te Atua ko te alofa telā e fakavae ki fakatakitakiga ‵lei. Kae e fakamatala mai se tagata Eleni poto e tokotasi me i te vaegā alofa tenā e “se fetaui faeloa mo lagonaga masani.” E se ‵kese a faifaiga a te Atua ona ko te alofa valea. E mafaufau faeloa a ia ki te ‵toe mea ‵lei mō ana tino.​​—⁠Isaia 30:20; 48:⁠17.

⁷ Mafaufau ki te alofa telā ne fakaasi atu ne Ieova i ana faifaiga ki te kau Isalaelu. Ne fakaaogā ne Mose se ata gali ke fakamatala mai ei ne ia a te alofa o Ieova mō te tamā atufenua o Isalaelu. E fai‵tau tatou, penei: “Ne tausi fakalei eiloa ne te Aliki a Isalaelu ke se paku, e pela mo te aeto tela e akoako tena tama ke eva, kae fola sale ona kapakau o sapo ana punua. Ko te Aliki eiloa tokotasi ne taki ne ia [a Iakopo].” (Teutelonome 32:​9, 11, 12) Ke akoako tena tama ke eva, e kapatā ne te aeto ana kapa‵kau i ‘tena ofaga,’ ke fakamalosi atu ki ana punua ke na eva atu loa. Kafai ko eva se punuā manu mō te taimi muamua mai tena ofaga, telā e tu i se koga maluga ‵ki, a te mātua e “eva atu foki mai luga” o te punua. Kafai e foliga mai me ka tō ifo te tamā manu tenā ki te laukele, ko eva ifo ei te mātua ki lalo, kae sau ne ia a tena tama i ‘ana kapakau.’ Ne tausi atu foki a Ieova mo te alofa ki te atufenua fou o Isalaelu i se auala tai ‵pau. Ne tuku atu ne ia ki tino a te Tulafono faka-Mose. (Salamo 78:​5-7) Ne tausi faka‵lei ne te Atua a tena atufenua, kae toka foki o vau o faka‵sao latou māfai ko oko atu ki a latou se fakalavelave.

⁸ E mafai pefea ne mātua Kelisiano o fakaakoako atu ki te alofa o Ieova? Muamua la, e ‵tau o akoako atu ne latou ki olotou tama‵liki a akoakoga fakavae mo fakatakitakiga kolā e maua i te Muna a te Atua. (Teutelonome 6:​4-9) A te fakamoemoega, ko te fesoasoani atu ki tama‵liki ke fai a fakaikuga e ‵tusa mo akoakoga faka-te-Tusi Tapu. I te faiga tenei, e eva atu ei a mātua mai luga o olotou tama‵liki i se auala fakatusa, kae onoono atu me e fakagalue aka pefea ne latou a akoakoga fakavae kolā ko oti ne tau‵loto ne latou. I te taimi ko gasolo aka ei o ma‵tua a tama‵liki kae ko tuku malielie atu te saolotoga ki a latou, e toka a mātua atafai ke “olo ifo ki lalo” kae ‘sau aka te lā tama i lā kapakau’ i so se taimi e sae mai ei se mea fakamataku. Se a te vaegā mea fakamataku e mafai o sae mai?

⁹ Ne fakailoa atu ne Ieova te Atua ki te kau Isalaelu a ikuga o te mafuta fakatasi mo tino amio ma‵sei. (Numela 25:​1-18; Esela 10:​10-14) A te kau atu ki te tino amio se ‵lei se mea fakamataku masani eiloa i aso nei. (1 Kolinito 15:33) Se mea ‵lei ke tau‵tali atu a mātua Kelisiano ki a Ieova i te feitu tenei. Ne kamata o fiafai se tamaliki fafine ko 15 ana tausaga e igoa ki a Lisa, ki se tamaliki tagata telā e se ‵pau ana amioga mo kilokiloga i te feitu faka-te-agaga mo te kāiga o tou fafine. “Ne lavea fakavave ne oku mātua se ‵fuliga i oku uiga kae ne fakaasi mai ne laua a te alofa atafai,” ko te fakamatalaga a Lisa. “I nisi taimi, ne fakatonu ne laua a au, kae i nisi taimi, ne fakamalosi mai mo te a‵lofa ki a au.” Ne saga‵saga fakatasi laua ki lalo mo Lisa kae fakalogo‵logo ki a ia mo te kufaki, telā ne fesoasoani atu ki tou fafine ke fakafesagai atu mo te loto malamalama ki te fakalavelave tonu​​—⁠ko te manakoga ke talia a ia ne ana taugasoa.a

Ke Tumau Eiloa te Faiga o Fesokotakiga

¹⁰ Ke manuia a mātua i te akoakoga o tama‵liki, e ‵tau mo latou o taumafai ke fakatumau te faiga o fesokotakiga mo olotou tamaliki. E tiga eiloa e iloa katoatoa ne Ieova a mea i ‵tou loto, kae e fakamalosi mai a ia ke fesokotaki atu faeloa tatou ki a ia. (1 Nofoaiga Tupu 28:⁠9) Mai tua o te avatuga o te Tulafono ki te kau Isalaelu, ne ‵tofi aka ne Ieova a te matakāiga o Levi ke akoako atu ki a latou, kae ne uga atu foki ne ia a pelofeta ke fakamatala faka‵lei kae faka‵tonu aka foki olotou faifaiga. Ne fakaasi mai foki ne ia tena loto fiafia ke fakalogologo ki olotou ‵talo.​​—⁠2 Nofoaiga Tupu 17:​7-9; Salamo 65:2; Isaia 1:​1-3, 18-​20; Ielemia 25:4; Kalatia 3:​22-​24.

¹¹ E mafai pefea o fakaakoako atu a mātua ki a Ieova māfai ko fesokotaki atu latou ki olotou tama‵liki? A te ‵toe mea sili e ‵tau o fai ne latou, ko te fakamāumāuga o taimi e uke mō latou. E ‵lei foki mō mātua ke ‵kalo keatea mai i pati sē aogā kolā e fakamasei atu, e pelā mo te, “Konā fua? Au ne mafaufau me se mea tāua”; “Koe e valea fua”; “Kaitoa! A koe se tamā sipa fua.” (Faataoto 12:18) Ke fakamalosi atu ki tama‵liki ke fakaasi mai a mea i olotou loto, e taumafai a mātua ‵poto ke fai mo fai ne tino kolā e fakalogologo faka‵lei. Kafai e se ‵saga atu a mātua ki olotou tama‵liki i te taimi koi fo‵liki ei latou, kāti ka se fia ‵saga atu a tama‵liki ki a latou māfai ko ma‵tua. Ne loto fiafia faeloa a Ieova ke fakalogologo ki ana tino. E tumau a ia i te fakalogologo ki tino kolā e ‵fuli atu ki a ia mo te loto maulalo i te faiga o ‵talo.​​—⁠Salamo 91:15; Ielemia 29:12; Luka 11:​9-​13.

¹² Mafaufau foki ki nisi vaega o uiga o te Atua kolā ne fakafaigofie ei ki ana tino ke olo atu ki a ia i so se taimi. E pelā mo te Tupu ko Tavita i Isalaelu mua ne fai ne ia te agasala ko te mulilua mo Patisepa. Me i a ia se tino sē ‵lei katoatoa, ne fai foki ne Tavita a nisi agasala matagā i tena olaga. Kae ne seki fakatamala a ia o fakapilipili atu ki a Ieova kae ‵sala atu ki tena fakamagaloga mo tena taliaga. E seai se fakalotolotolua i ei, me i te alofa atafai mo te alofa fakamagalo o te Atua, ne fakafaigofie ei ki a Tavita ke toe foki atu ki a Ieova. (Salamo 103:⁠8) Mai i te fakaasiatuga o vaegā uiga faka-te-Atua penā, e pelā mo te alofa mo te alofa fakamagalo, e mafai ei ne mātua o fesoasoani atu ki te fakatumauga o te fesokotakiga ke oko foki eiloa māfai e fai ne te tamaliki se mea ‵se.​​—⁠Salamo 103:13; Malaki 3:​17.

Ke Uiga Faigofie

¹³ Kafai e fakalogo‵logo a mātua ki olotou tama‵liki, e ‵tau o uiga faigo‵fie latou kae ke fakaasi atu “te poto mai te lagi.” (Iakopo 3:17) Ne tusi mai a te apositolo ko Paulo, penei: “Ke fakaasi atu otou uiga alofa [“faigofie,” NW] ki tino.” (Filipi 4:⁠5) Se a te uiga faigofie? E tasi te fakamatalaga o te pati Eleni telā ne ‵fuli ki te “uiga faigofie” e “se fakasino tonu atu ki tamā mea fo‵liki o te tulafono.” I te taimi e puke ‵mau ei a mātua ki tulaga i mea tau amioga ‵mā mo te feitu faka-te-agaga, e mafai pefea o fakaasi atu ne latou a uiga faigo‵fie?

¹⁴ Ne tuku mai ne Ieova se fakaakoakoga tu ‵kese o te uiga faigofie. (Salamo 10:17) I te taimi ne fakamalosi atu ei a ia ki a Lota mo tena kāiga ke tiakina a te fa‵kai telā ka fakamaseigina ko Sotoma, a Lota ne ‘tumau eiloa i te fakatuatuai.’ Fakamuli ifo, i te taimi ne fai atu ei te agelu a Ieova ki a ia ke ‵tele latou ki koga maugā, ne fai atu a Lota, penei: “A mauga ko to mao; e iku au o puketu ne te fakalavelave, ko mate ei au seki oko ki te koga tena . . . E matea ne koe te fa‵kai foniki [ko Soala] tela? Tuku mai au ke fano ki ei me e pili mai.” Ne pefea a faifaiga a Ieova ki te mea tenei? Ne fai atu a ia, penei: “Ko lei, ko talia ne au. Ka se fakamalaia ne au te fa‵kai foniki tena.” (Kenese 19:​16-21, 30) Ne lotomalie mo te fiafia a Ieova ki te fakamolemole a Lota. Se mea tonu, me e ‵tau mo mātua o tau‵tali atu ki tulaga kolā ko oti ne tuku mai ne Ieova te Atua i tena Muna, ko te Tusi Tapu. Kae koi mafai eiloa o talia a manakoga o tama‵liki māfai e se fe‵paki mo akoakoga fakavae a te Tusi Tapu.

¹⁵ E aofia i uiga faigofie a te fakatokaga a loto o tama‵liki ko te mea ke toka latou o talia a pati polopoloki. Ne fakatusa ne Isaia a Ieova ki se tino fai fatoaga kae fai mai penei: “E seai se tagata toki lakau e nofo faeloa o fakamalu ana laukele o fakatoka mō te taimi e toki ei. Kafai ko oti ne fakatoka ne ia a te laukele, ke toki ei ne ia a fuaga o lakau kaina pela mo te tili mo te kumina. E toki ne ia a lainā saito mo kalite, kae i feitu o ana fatoaga e toki foki ne ia a nisi lakau kaina.”​​—⁠Isaia 28:​24, 25.

¹⁶ A Ieova e “fakamalu” te “laukele o fakatoka mō te taimi e toki ei.” Telā e fakatoka ei ne ia a loto o ana tino a koi tuai o polopoloki latou. I te fakatonutonuga o olotou tama‵liki, e mafai pefea ne mātua o “fakatoka” a loto o olotou tama‵liki? E tokotasi te tamana ne fakaakoako atu ki a Ieova i te taimi ne fakatonutonu aka ei ne ia tena tamaliki tagata ko fa ana tausaga. I te taimi ne ‵pago ei ne tena tama se tamaliki a tena tuakoi, ne fakalogologo muamua te tamana mo te kufaki ki fakamasakoga a tena tama. Oti aka i ei, ne “fakatoka” ne te tamana te loto o tena tama mai i te faiatuga o se tala e uiga ki se tamā tamaliki telā ne logo‵mae i mea faiga‵ta ne fakaoko atu ne se tino takafiatoa. I te fakalogologo atu ki te tala, ne fai atu ei ne te tamaliki me e ‵tau o fakasala a te tino takafiatoa tenā. A te vaegā ‘fakatokaga’ penā ne fakatoka ei te loto o te tamaliki kae ne faigofie ke lavea atu ne ia i ei me i te ‵pagoga ne ia o te tamaliki a tena tuakoi se faifaiga a se tino takafiatoa kae e masei foki.​​—⁠2 Samuelu 12:​1-​14.

¹⁷ Ne toe fakatusa ne Isaia a te fakatonutonuga ne Ieova a mea ‵se ki te suā faifaiga a te tino ‵toki lakau​​—⁠ko te ‵tukiga o fuaga. E fakaaogā ne te tino ‵toki lakau a mea faigaluega kese‵kese ke tuki ki ei a fuaga e ‵tusa loa mo te makeke o te fuaga. E fakaaogā se lakau māmā mō tuki a kumima uli kae e fakaaogā se lakau ‵mafa mō te suā vaega o te kumima. Kae kafai e ma‵keke malosi a fuaga e solo a mea konā ki teka o te kā. Kae e se tuki palapala ne ia a saito ma‵keke. E penā foki eiloa māfai ko manako a Ieova ke ave keatea so se mea sē aogā i ana tino, e fakakese‵kese ne ia ana faifaiga e ‵tusa mo manakoga mo fakanofonofoga o tino. E se sonā fakasala io me e fakasala ‵mafa ne ia a tino. (Isaia 28:​26-29) E ‵saga atu a nisi tama‵liki ki olotou mātua māfai ko ‵kilo atu fua olotou matua ki a latou kae e se ‵tau o fai se isi faifaiga ki ei. Kae ko nisi tama‵liki e manakogina ke fakamasaua atu faeloa ki ei, kae ko nisi tama‵liki e ‵tau o ‵mafa te fakasalaga e fai ki ei. Ka fai ne mātua kolā e uiga faigo‵fie a fakatonutonuga e ‵tusa mo manakoga o olotou tama‵liki.

Ke Fai a Sau‵talaga Faka-te-Kāiga mo Fai se Mea Fakafiafia

¹⁸ E aofia i toe auala ‵lei ke akoako au tama‵liki ko te faiga o se akoga tumau ki te Tusi Tapu mo te sau‵talaga ki te Tusi Tapu i aso katoa. E sili atu te magoi o te akoga faka-te-kāiga māfai e fakatumau te faiga tenā. Kafai e se fakatoka faka‵lei te taimi ke fai ei te akoga tenā ailoga e fai sāle a vaegā akoga penā. Tela la, e ‵tau mo mātua o ‘fakaaogā faka‵lei a taimi’ mō te faiga o te akoga. (Efeso 5:​15-17, NW) A te taumafaiga ke maua se taimi mautinoa telā e ‵lei ki tino katoa e mafai o fai pelā me se mea faigata. Ne iloa aka ne se ulu o te kāiga e tokotasi me i te taimi ne gasolo aka ei o ma‵tua ana tama‵liki, ne momea aka te faigata ke ‵kau fakatasi te kāiga kātoa ona ko te kese‵kese a fakasologa o mea a latou e ‵tau o fai. Kae ne ‵kau fakatasi faeloa te kāiga i po e fai ei a fakatasiga a te fakapotopotoga. Tela la, ne fakatoka ei ne te tamana ke fai te akoga faka-te-kāiga i se po e tasi i po konā. Ne fanofano ‵lei eiloa te fakasologa tenā. Ko fai nei a tamaliki e tokotolu mo fai ne tavini papatiso a Ieova.

¹⁹ Kae e se lava fua i te faiga ke fakaoti se mataupu faka-te-Tusi Tapu i te akoga e tasi. Ne akoako ne Ieova a te kau Isalaelu kolā ne toe ‵foki atu e auala i faitaulaga kolā “ne faitau atu ne latou a te Tulafono a te Atua, . . . kae fakamalamalama atu foki ki a latou ke malama‵lama latou.” (Neemia 8:⁠8) E tokotasi te tamana telā ne fesoasoani atu mo te manuia ki ana tamaliki katoa e tokofitu ke a‵lofa ki a Ieova ne fanatu faeloa ki tena potu a koi tuai o fai te sukesukega faka-te-kāiga ko te mea ke fakatoka, kae ke fakafetaui aka foki a te mataupu ki manakoga o tama‵liki taki tokotasi. Ne fai ne ia te sukesukega mo fai se mea fakafiafia ki ana tamaliki. Ne fai mai penei se tamaliki tagata e tokotasi telā ko matua: “Ne fakafiafia faeloa te faiga o te sukesukega. Kafai ne ta‵fao matou i tua mo te polo kae kalaga mai ke olo atu matou ki te sukesukega faka-te-kāiga, ne tiakina fakavave eiloa ne matou te motou polo kae ‵tele atu ki te sukesukega. Te po ne fai ei te akoga ne fai mo fai se tasi o ‵toe po fakafiafia eiloa i te vaiaso.”

²⁰ Ne folafola mai penei te faisalamo: “A tamaliki ne meaalofa mai te Aliki; ko te tinā fakamanuiaga tonu eiloa tena.” (Salamo 127:⁠3) A te akoakoga o ‵tou tamaliki e manakogina i ei a taimi mo taumafaiga, kae ko te faiga penā e mafai ei o maua ne ‵tou tama‵liki a te ola se-gata-mai. Ko tafaga la te ‵lei o te taui tenā! Tela la, ke na fakaakoako tatou mo te loto finafinau ki a Ieova i te taimi e akoako ei ‵tou tama‵liki. Kae e tiga eiloa e tuku atu ki mātua a te tiute ke “puti ake [a tamaliki] i te olaga ‵lei mo akoakoga faka-Kelisiano,” e se fai pelā me ka manuia faeloa te taumafaiga tenā. (Efeso 6:⁠4) Kae e tiga eiloa e atafai faka‵lei atu ki se tamaliki, e mafai ne ia o ‵teke atu kae taofi aka tena tavini atu ki a Ieova. Se a la te mea e ‵tau o fai? Tenā loa te manatu ka sau‵tala ki ei i te suā mataupu.

[Fakamatalaga mai lalo]

Se a Tau Tali?

• E mafai pefea ne mātua o fakaakoako atu ki te alofa o Ieova telā e fakamatala mai i te Teutelonome 32:​11, 12?

• Ne a mea ne tauloto ne koe mai te auala ne fesokotaki atu ei a Ieova ki te kau Isalaelu?

• Se a te mea e akoako tatou ki ei i te fakalogologo atu o Ieova ki te fakamolemole a Lota?

• Se a te akoakoga e uiga ki te fakatonutonuga o tama‵liki ne tauloto ne koe mai i te Isaia 28:​24-29?

[Fesili mo te Sukesukega]

1, 2. Kaia e maua ei ne mātua a fakalavelave i te putiakaga o olotou tama‵liki?

3. Kaia e tāua ‵ki ei a te akoakoga mo te puipuiga a mātua ki te iku manuia o te putiakaga o tama‵liki?

4. Se a te uiga tāua o te “polopoloki” telā e fakaaogā i te Tusi Tapu?

5. Kaia e aogā ei ke mafau‵fau ki faifaiga a Ieova ki ana tino?

6. Kaia e mafai ei o faigata ki mātua ke fakaakoako atu ki te alofa o Ieova?

7, 8. (a) Se a te fakaakoakoga o te alofa fakavae ne tuku mai ne Ieova i ana faifaiga ki ana tino? (e) E mafai pefea ne mātua o fakaakoako atu ki a Ieova i te fesoasoani atu ki olotou tama‵liki ke maua te atamai ke tau‵tali atu ki akoakoga fakavae a te Tusi Tapu?

9. Se a te mea fakamataku telā e ‵tau o fakaeteete malosi a mātua a‵lofa i ei? Fakamatala mai.

10. Ne a auala ne tuku mai ei ne Ieova se fakaakoakoga ‵lei i te fesokotaki atu ki tino Isalaelu?

11. (a) E mafai pefea ne mātua o fakamalosi aka a te fesokotakiga ‵lei mo olotou tama‵liki? (e) Kaia e tāua ei ke fakalogo‵logo faka‵lei a mātua i te taimi e fesokotaki atu ei latou ki olotou tama‵liki?

12. Ne a uiga e mafai o fakaasi atu ne mātua ke fakafaigofie ei mō tama‵liki ke olo atu ki a latou?

13. Se a te mea e aofia i te uiga faigofie?

14. Ne fakaasi atu pefea ne Ieova a te uiga faigofie i ana faifaiga ki a Lota?

15, 16. Se a te akoakoga e mafai o tauloto ne mātua mai i te fakatusaga telā e maua i te Isaia 28:​24, 25?

17. Se a te akoakoga e uiga ki te fakatonutonuga ne mātua a mea ‵se a olotou tama‵liki e maua i te Isaia 28:​26-29?

18. E mafai pefea o fakaavanoa ne mātua a taimi ke fai ei se akoga faka-te-Tusi Tapu tumau?

19. E mafai pefea ne mātua o fakaakoako atu ki a Ieova i te taimi e fai ne latou se akoga faka-te-kāiga?

20. Se a te fakalavelave e mafai o sae aka i te putiakaga o tamaliki telā e ‵tau o mafaufau faka‵lei tatou ki ei?

[Ata i te itulau e 20]

E ‵tau o fakaavanoa ne mātua a taimi mō olotou tama‵liki

[Ata i te itulau e 22]

“Te po ne fai ei te akoga ne fai mo fai se tasi o ‵toe po fakafiafia eiloa i te vaiaso”