Fesili Mai te Kau Fai‵tau
E mata, e ‵tau o fakataunu faeloa a tautoga ki te Atua?
I te Tusi Tapu, a te tautoga se feagaiga ki te Atua ke fai se mea io me ke ofo atu se taulaga, ke fai se galuega, io me ko te ‵kalo keatea mai mea kolā e seai ne tulafono ki ei. E isi ne tala i te Tusi Tapu e uiga ki tautoga kolā ne fai ne tino kolā ne fakamoe‵moe ke fai muamua ne te Atua se mea kae oti ko fatoā tau‵to ei latou ke fai se isi mea aka. E pelā mo Hana te mātua o te pelofeta ko Samuelu, “Ne fai te tautoga a Hana i konā, muna a ia: ‘Te Aliki Maluga, kilo mai ki au, tau tavini! . . . Sa tiakina mai au! Kafai e aumai ne koe se tama tagata ma aku, au e tauto me ka toe tuku atu eiloa ne au ki a koe i tena olaga kātoa, kae ka se ‵kati eiloa ona laulu.’ ” (1 Samuelu 1:11) E fakamatala mai foki i te Tusi Tapu a tautoga e pelā me ne mea e fai mo te lotomalie. E pefea te tāua o tautoga ki te Atua?
E fai mai a te Tupu o te kau Isalaelu i aso mua ko Solomona, penei: “Kafai e tauto koe ki te Atua ke fai se mea, masaua o fakataunu fakavave eiloa.” Ne toe fai mai foki a ia, “Fai te mea ne tauto koe o fai. E sili atu te ‵lei ke se fai sau tautoga, i lō te fai o tau tautoga kae e se tausi ne koe.” (Failauga 5:4, 5) Ne fai mai a te Tulafono telā ne tuku atu ki te kau Isalaelu e auala i a Mose, penei: “Kafai ne fai se tautoga a koe ki te Aliki tou Atua, masaua ke fai eiloa te mea ne tauto koe o fai; a te Aliki ka masaua eiloa ne ia tau tautoga, kae e agasala koe manafai e se fai ne koe te mea ne tauto koe o fai.” (Teutelonome 23:21) E manino ‵lei eiloa, me e tāua ‵ki a te tautoga telā e fai ki te Atua. E ‵tau eiloa o isi se pogai ‵tau e fai ei te mea tenā, kae e ‵tau foki eiloa o lava te malosi o te tino ke fakataunu a mea katoa ne tauto a ia ki ei. Kafai e se mafai, e ‵lei atu ke se fai ne ia se tautoga. Kafai ko oti ne tauto atu, e mata, e ‵tau o fakataunu a tautoga katoa?
E a māfai ne fai ne se tino se tautoga kae iloa fakamuli aka ne ia me e se fetaui te tautoga tenā mo te loto o te Atua? E a māfai ko foliga mai me ko isi se fesokotakiga i amioga ma‵sei mo te tapuakiga tonu i te fakataunuga o te tautoga tenā? (Teutelonome 23:18) E manino ‵lei, me e se ‵tau o fakataunu a te tautoga tenā. E se gata i ei, mai lalo i te Tulafono telā ne tuku atu ki a Mose, kafai ne fai ne se fafine se tautoga, e mafai o fakasēaogā ne tena tamana io me ko tena avaga a te tautoga tenā.—Numela 30:3-15.
Ke mafaufau foki ki se tino telā ne tauto ki te Atua ke se avaga eiloa a ia kae fakamuli ifo ko fai mo fai se fakalavelave ki a ia. Ko fai ne tena tautoga tenā ke tu atu a ia i se tulaga telā ka mafai ei o ofa fakamuli ne ia a tulafono a te Atua i mea tau amioga. E mata, e ‵tau eiloa o taumafai a ia o fakataunu tena tautoga? E mata, e ‵lei atu ke taumafai o puipui a ia mai te tosina atu ki te faiga o amioga ma‵sei mai te fakasēaogāga o tena tautoga kae fakamolemole atu ki te Atua ke fakamagalo a ia? I a ia eiloa te fakaikuga. E se ‵tau o fai ne se isi tino aka te fakaikuga.
E a māfai ne fai fakavave aka fua ne se tino se tautoga e aunoa mo te mafaufau faka‵lei ki ei? E mata, e ‵tau mo ia o taumafai ke fakataunu eiloa te tautoga tenā? E se se mea faigofie ke fakataunu ne Iefata tena tautoga ne fai ki te Atua, kae ne fai eiloa ne ia a te mea ne tauto a ia ki ei. (Famasino 11:30-40) Kafai e se fakataunu ne se tino tena tautoga, ka fai fua ne ia te Atua ke “kaitaua” kae ka fakasēaogā i ei a mea ‵lei kolā ko oti ne fai ne te tino tenā. (Failauga 5:6) A te manatu māmā ki te fakataunuga o se tautoga ka fai fua i ei ke se fiafia mai a te Atua.
Ne fai mai a Iesu Keliso, penei: “Kae ke fai atu koutou penei, ‘Ao’ me ‘Ikai,’ me ko so se muna ake e fai ne koutou, e māfua mai eiloa i te Tino Masei.” (Mataio 5:37) E se ‵tau fua o saga atu se Kelisiano ki te faiga o ana tautoga ki te Atua kae ‵tau foki o fakataunu ne ia ana pati katoa e fai—ki te Atua pelā foki ki tino. E a māfai ko oko atu te fakalavelave tenei ki se tino, me ko oti ne fai tena tautoga ki se tino telā ne foliga mai muamua pelā me se mea ‵lei kae fakamuli ne fatoā iloa atu me se mea valea fua? E se ‵tau o manatu māmā a ia ki vaegā mea penā. Kafai ko oti ne sau‵tala faka‵lei ki ei, e mafai o talia ne te suā tino ke fakasaoloto a ia mai te faiga o te mea tenā.—Salamo 15:4; Faataoto 6:2, 3.
Se a te mea e ‵tau o mafaufau ‵mafa tatou ki ei, i te faiga o tautoga mo nisi mea aka? Ke na ‵sala faeloa tatou ki auala e fakatumau ei ‵tou fesokotakiga ‵lei mo Ieova te Atua.