Ke “Fakatau A‵lofa Koutou”

“Tenā te mea e iloa ei ne tino katoa ko oku soko koutou, manafai e fakatau a‵lofa koutou!”​—IOANE 13:⁠35.

“AKU tama‵liki.” (Ioane 13:33) Ne fakaaogā ne Iesu a te tugāpati fakaalofalofa tenā ki ana apositolo i te po mai mua o tena mate. E seai aka foki eiloa se koga i tala faka-Evagelia ne fakaaogā muamua ei ne Iesu a te tugāpati fakaalofalofa tenei e uiga ki a latou. Kae i te po fakapito tenā, ne fakamalosi aka ei a ia ke fakaaogā te tugāpati fakaalofalofa tenei ke fakaasi atu ei te ‵poko o tena alofa ki ana soko. A te tonuga loa, kāti ne faipati faka-30 taimi a Iesu i te po tenā e uiga ki te alofa. Kaia ne faka‵mafa atu ei ne ia te tāua o te uiga tenei?

² Ne fakamatala atu ne Iesu te pogai e tāua ‵ki ei te alofa. Ana muna: “Tenā te mea e iloa ei ne tino katoa ko oku soko koutou, manafai e fakatau a‵lofa koutou!” (Ioane 13:35; 15:​12, 17) E fetaui ‵lei te fai mo fai se soko o Keliso mo te fakaasiatuga o te alofa fakataina. E se ‵tu ‵kese a Kelisiano i olotou vaegā gatu io me ko nisi faifaiga, kae ona ko te lotou fakatau a‵lofa. A te vaegā alofa ‵tu ‵kese tenei ko te lua o fakatonuga mai fakatonuga e tolu kolā e fai ei se tino mo fai se soko o Keliso kae ne taku mai i te kamataga o te tolu o mataupu mō sukesukega i te mekesini tenei. Ne a mea e fesoasoani mai ke tumau tatou i te faka‵logo ki te fakatonuga tenei?

“Ke Momea Ake Eiloa Otou Faiga Penā”

³ E pelā eiloa mo te mea ne lavea atu i soko o Keliso i aso o te kau apositolo, e lavea atu foki a te alofa ‵tu ‵kese tenei i va o soko ‵tonu o Keliso i aso nei. Ne tusi atu te apositolo ko Paulo ki Kelisiano mua, penei: “E se toe aogā a te tusi atu ki a koutou e uiga ki te alofa atu ki otou taina tali‵tonu. Me ko oti eiloa ne akoako koutou ne te Atua ke iloa ne koutou o fakatau a‵lofa. Me ko oti ne fai penei ne koutou ki taina tali‵tonu katoa.” Kae e tiga eiloa ne fai penā olotou faifaiga, ne toe fai mai foki penei a Paulo: “Ke momea ake eiloa otou faiga penā.” (1 Tesalonia 3:12; 4:​9, 10) E ‵tau foki o faka‵logo tatou ki te fakamalosiga a Paulo kae taumafai ke “momea ake eiloa” te ‵tou fakatau a‵lofa.

⁴ I tena tusi foki eiloa tenā, ne fakamalosi atu a Paulo ki ana taina tali‵tonu ke “fakaloto malosi atu a tino mata ma‵taku” kae ke “fesoasoani atu ki tino vāi‵vāi.” (1 Tesalonia 5:14) Ne fakamasaua atu foki a ia i se taimi e tasi ki Kelisiano me i tino “kolā e ma‵losi i te fakatuanaki, e ‵tau mo [latou] o fesoasoani atu ki mea e se mafai ne tino vāi‵vāi” o fai. (Loma 15:⁠1) Ne tuku atu foki ne Iesu a fakatonuga e uiga ki te fesoasoani atu ki tino kolā e vāi‵vāi. Mai tua o tena faiatuga me ka tiakina a ia ne Petelu i te po ne puke fakapagota ei a ia, ne fai atu a Iesu ki a Petelu, penei: “Kae kafai ko toe mafuli mai koe, ke fakamalosi la ne koe ou taina.” Kaia? Me ka tiakina foki ne latou a Iesu kae e ‵tau o fesoasoani atu ki a latou. (Luka 22:32; Ioane 21:​15-17) Tela la, e fakamalosi mai te Muna a te Atua ke fakaasi atu te ‵tou a‵lofa ki tino kolā e vāi‵vāi i te feitu faka-te-agaga mo tino kolā ko leva ne seki toe ‵kau mai ki te fakapotopotoga Kelisiano. (Epelu 12:12) Kaia e ‵tau ei o fai tatou penā? E maua ne tatou te tali ki ei i tala fakatusa ‵gali e lua konei a Iesu.

Ne Galo Atu se Mamoe mo se Tupe Siliva

⁵ Ne fai ne Iesu se avā tala fakatusa toe‵toe ke akoako atu ei ki ana tino fakalogo‵logo a te kilokiloga a Ieova e uiga ki tino kolā ko takase‵se i te feitu faka-te-agaga. E tasi mai i ei, ko te tala e uiga ki se tausi mamoe. Ana muna: “Kafai se tino o koutou e isi ne ana mamoe e lau, kae galo se tasi o latou, se a te mea ka fai ne ia? E tuku ne ia te tinoiva mo te tokoiva mamoe i te vao, kae fano o ‵sala te mamoe ne galo ke maua. Kafai e maua, ko oko eiloa i tona fiafia, kae amo ki ona tuauma. Ko ave ei ne ia ki tona fale, kae āmi ona taugasoa mo ona tuakoi ke o‵mai. Ko fai atu ei a ia ki a latou, ‘Ke fia‵fia ake tatou, me ko oti ne maua ne au taku mamoe ne galo!’ Au e fai atu ki a koutou, me penā foki eiloa te lasi o te fiafia i te lagi i te tino agasala e tokotasi, ko salamō i lō te tinoiva mo te tokoiva tino amio‵tonu, kolā e se aogā ki ei te salamō.”​—⁠Luka 15:​4-7.

⁶ Ako te lua o tala fakatusa, ko te tala e uiga ki se fafine. Muna a Iesu: “E pelā foki mo se fafine e isi ne ana tupe siliva e sefulu, kae ne galo e tasi. Se a la tena mea ka fai? Ka fa‵ka ne ia se molī kae tuetue ne ia tena fale, kae onoono faka‵lei ki koga katoa ke maua ne ia te tupe. Kafai ko maua ne ia te tupe, ko āmi ei ne ia ona taugasoa mo ona tuakoi ke o‵mai. Ko fai atu ei a ia penei, ‘Ke fia‵fia fakatasi ake tatou, me ko maua ne au taku tupe ne galo!’ Au e fai atu ki a koutou, me penā foki eiloa te fia‵fia o te kau agelu a te Atua, i te tino agasala e tokotasi ko salamō.”​—⁠Luka 15:​8-10.

⁷ Ne a mea e mafai o tauloto ne tatou mai i tala fakatusa toe‵toe konei? E fakaasi mai i ei (1) a te pogai e ‵tau ei mo tatou o a‵lofa ki tino kolā ko gasolo o vāi‵vāi, penā foki loa mo te (2) mo mea e ‵tau o fai ne tatou ke fesoasoani atu ki a latou. Ke na mafau‵fau nei tatou ki manatu konei.

Ne ‵Galo Kae e Tāua ‵ki

⁸ Ne galo atu se mea i te avā tala fakatusa konā, kae mafaufau la ki mea ne fai ne te tino telā i a ia a mea konā. Ne seki fai atu te tausi mamoe, penei: ‘Se a te aogā o te mamoe e tasi tenā māfai koi ‵toe loa aku mamoe e 99? E se tāua ki a au te mamoe e tasi tenā.’ Ne seki fai mai foki penei te fafine: ‘Kaia e manavase fua ei au ki te tupe e tasi tenā? Ko lava loa au i tupe e iva kolā koi ‵toe.’ I lō te fai atu penā, ne ‵sala te tausi mamoe ki tena mamoe ne galo e pelā eiloa me e tasi fua tena mamoe. Kae ne fanoanoa foki te fafine tenā e pelā eiloa me e seai aka foki ne ana nisi tupe. I te avā tala konā, ne tumau eiloa te tāua o mea kolā ne ‵galo i mafaufau o tino kolā i a laua a mea konā. Se a te mea e fakaasi mai i te mea tenei?

⁹ Mafaufau aka la ki pati a Iesu i te fakaotiga o te avā tala konei: “Au e fai atu ki a koutou, me penā foki eiloa te fia‵fia o te kau agelu a te Atua, i te tino agasala e tokotasi ko salamō.” Tela la, e fakaasi mai i te manava‵se o te tausi mamoe mo te fafine, a lagonaga o Ieova mo te kau agelu i te lagi. Ne tumau eiloa te tāua o mea kolā ne ‵galo i mafaufauga o te tausi mamoe mo te fafine, kae e penā foki loa te tumau i te tāua i te kilokiloga a Ieova a te tino telā ko tapeapea atu io me ko se toe fesokotaki mo tino o te Atua. (Ielemia 31:⁠3) Kāti ko vāi‵vāi a tino penā i te feitu faka-te-agaga, kae e se ‵teke tonu mai latou. Faitalia te lotou tulaga vāivāi, kāti koi tau‵tali atu eiloa latou ki fakatonuga a Ieova. (Salamo 119:176; Galuega 15:29) Tela la, e pelā mo faifaiga a Ieova i aso mua, ne seki tuku fakavave atu ne ia a “latou ke ‵ta fakapalele.”​—⁠2 Tupu 13:⁠23.

¹⁰ E pelā mo Ieova mo Iesu, e a‵lofa malosi foki tatou ki tino kolā ko vāi‵vāi kae ko ‵galo atu foki mai te fakapotopotoga Kelisiano. (Esekielu 34:16; Luka 19:10) E ‵kilo atu tatou ki se tino vāivāi i te feitu faka-te-agaga e pelā me se mamoe ne galo​—⁠kae e se pelā me se tino e seai se aogā ke fesoasoani atu ki ei. E se ‵tau o fai atu tatou, penei: ‘Kaia fua la e a‵lofa ei tatou ki te tino vāivāi tenā? E seai eiloa sena aogā ki te ‵lei o te ‵tou fakapotopotoga.’ I lō te fai atu penā, e ‵kilo atu tatou ki a latou kolā ko tapea‵pea keatea kae ko fia ‵foki mai e pelā me e tāua ‵ki​—⁠telā e ‵pau eiloa mo te kilokiloga a Ieova.

¹¹ E fakaasi atu la pefea ne tatou ‵tou a‵lofa ki tino penā? E fakaasi mai ne tala fakatusa e lua konei a Iesu me e mafai o fai tatou penā (1) māfai e gasue‵sue muamua tatou o fakaasi atu te fiafia ki a latou, (2) mai te fesoasoani atu mo te atafai, mo te (3) mai te fesoasoani atu mo te loto fiafia. Ke na iloilo aka ne tatou a feitu takitasi konei.

Ke na Gasuesue Muamua Koe

¹² I te tala fakatusa muamua, ne fai atu a Iesu me ne fano eiloa te tausi mamoe o “‵sala te mamoe ne galo.” Ne gasuesue muamua te tausi mamoe kae ne taumafai malosi eiloa a ia ke maua te mamoe ne galo. Ne seki taofi aka a ia ne mea faiga‵ta, mea fakama‵taku, io me ko te ‵mao o te koga e ‵tau o fanatu a ia i ei. E ‵kese mai i ei, ne tumau eiloa te tausi mamoe i te ‵sala atu ki te mamoe ke oko ki te taimi ne “maua” ei.​—⁠Luka 15:⁠4.

¹³ E penā foki loa, e manakogina ke gasuesue muamua te tino telā e malosi ke fesoasoani atu ki se tino telā e manako ki fakamalosiga. Ne iloa ‵lei ne tāgata fakamaoni i aso mua a te mea tenei. Ne fai foki penā a Ionatana, te tama a te Tupu ko Saulo, i te taimi ne lavea atu ei ne ia me ne ‵tau o maua ne tena taugasoa pele eiloa, ko Tavita, a fakamalosiga, “ne fanatu Ionatana ki a ia i konā, kae fai atu ki ei ke sa mataku i a ia e puipui eiloa ne te Atua.” (1 Samuelu 23:​15, 16) I te fia o tausaga mai tua ifo i ei, i te taimi ne lavea atu ei ne te kovana ko Neemia me ne gasolo o loto vāi‵vāi ana nisi taina Iutaia, “tenā ne faipati” fakavave atu ei a ia ke ‘masaua ne latou a Ieova.’ (Neemia 4:14) E ma‵nako foki tatou ke ‘fai‵pati atu’​—⁠ke gasue‵sue muamua​—⁠o fakamalosi atu ki tino kolā ko loto vāi‵vāi. Kae ko oi a tino i te fakapotopotoga e ‵tau o fai penā?

¹⁴ E maua ne toeaina Kelisiano a te tiute ‵mafa ke ‘fakamalosi atu ki lima kolā ko vāi‵vāi mo tulivae kolā ko pole‵pole i te vāi‵vāi,’ kae fai atu ki “tino loto vāivāi, ‘Fakama‵losi kae sa ma‵taku!’ ” (Isaia 35:​3, 4; 1 Petelu 5:​1, 2) Kae masaua la me ne seki tuku atu fua ki toeaina te fakamalosiga a Paulo ke “fakaloto malosi atu a tino mata ma‵taku,” mo te ‘fesoasoani atu foki ki tino vāi‵vāi.’ I lō te fai penā, ne fakasino atu a pati a Paulo ki ‘Kelisiano katoa i Tesalonia.’ (1 Tesalonia 1:1; 5:14) A te taumafai o fesoasoani atu ki tino kolā ko loto vāi‵vāi, se tofiga mō Kelisiano katoa. E ‵tau mo Kelisiano taki tokotasi o olo atu o ‵sala ki te “mamoe ne galo,” e pelā mo te tausi mamoe i te tala fakatusa. E tonu, e magoi eiloa te faiga tenei māfai e ga‵lue fakatasi mo te kau toeaina. E mata, e mafai o gasuesue koe ke fesoasoani atu ki se tino loto vāivāi i tau fakapotopotoga?

Ke Fakaasi Atu te Uiga Atafai

¹⁵ Ne a mea ne fai fakamuli ne te tausi mamoe i te taimi ne maua ei ne ia te mamoe ne galo? Ne “amo [ne ia] ki ona tuauma.” (Luka 15:⁠5) Ko oko eiloa i te gali mo te fakaalofalofa o te tala! Kāti ne takasēsē atu te mamoe i te fia o ao mo po i koga kolā e se masani a ia ki ei, kae kāti ne fia ‵kai foki a leona ki ei. (Iopu 38:​39, 40) Kāti ne vāivāi malosi te mamoe ona ko te sē lava o ana meakai kae ne seki mafai o ‵teke atu ki fakalavelave ne fe‵paki mo ia i tena auala o foki atu ki te lafu mamoe. Tela la, ne punou ifo a te tausi mamoe, ne amo faka‵lei aka ne ia te mamoe, kae ne toe fakafoki atu te mamoe tenā ki te lafu mamoe faitalia a mea faiga‵ta. E mafai pefea o fakaasi atu ne tatou te atafai telā ne fakaasi atu ne te tausi mamoe tenei?

¹⁶ Kāti e mafai o fi‵ta se tino i te feitu faka-te-agaga māfai ne seki toe fesokotaki atu a ia ki te fakapotopotoga. Kāti ne takasēsē se tino penā i te lalolagi nei telā e ‵fonu i fakalavelave, e aunoa mo se fakamoemoega, e pelā mo te mamoe telā ne ‵vae keatea mai te tausi mamoe. E aunoa mo te puipuiga telā e maua i te lafu mamoe, ko te fakapotopotoga Kelisiano, e tuku faka‵sau atu a ia ki osomaiga a te Tiapolo, telā “e fanofano tele e pelā mo se leona fekai, e salasala ki te tino ke kai ne ia.” (1 Petelu 5:⁠8) E se gata i ei, e vāivāi foki a ia ona ko te sē lava o mea‵kai faka-te-agaga. Kae kāti e se mafai o manumalo a ia i mea faiga‵ta kolā e fetaui mo ia i tena auala o toe foki mai ki te fakapotopotoga, māfai e seai se fesoasoani e maua ne ia. Tela la, e ‵tau o pu‵nou ifo tatou ki lalo, o sau faka‵lei aka te tino vāivāi tenā ki luga, kae toe fakafoki atu a ia mo te atafai ki te fakapotopotoga. (Kalatia 6:⁠2) E mafai pefea o fai ne tatou te mea tenā?

¹⁷ Ne fai mai te apositolo ko Paulo, penei: “Kafai se tino ko vāivāi, e vāivāi foki au.” (2 Kolinito 11:29; 1 Kolinito 9:22) Ne alofa a Paulo ki tino, e aofia foki i ei a tino loto vāi‵vāi. E ma‵nako foki tatou o fakaasi atu te vaegā alofa penā ki tino kolā e vāi‵vāi. Kafai ko āsi atu tatou ki se Kelisiano telā ko vāivāi i te feitu faka-te-agaga, ke fakatalitonu atu ki a ia me e tāua ‵ki eiloa a ia i te kilokiloga a Ieova, kae e mafau‵fau faeloa ana taina Molimau ki a ia. (1 Tesalonia 2:17) Ke na fakailoa atu ki a ia me e toka latou o fesoasoani atu ki a ia kae e fia‵fia foki ke fai latou pelā me ne “taina e ‵tau o fakatau fesoasoani i taimi o fakalavelave.” (Faataoto 17:17; Salamo 34:18) A pati a‵lofa kolā e fai atu mai ‵tou loto e mafai o fakamalosi malielie atu ki a ia ke oko ki te taimi telā ko mafai ei ne ia o toe foki mai ki te lafu mamoe. Kafai e penā loa, ne a nisi mea e ‵tau o fai ne tatou? E fakaasi mai ne te tala fakatusa e uiga ki te fafine mo te tupe siliva telā ne galo a te mea e ‵tau o fai.

Ke Loto Fiafia

¹⁸ Ne iloa ne te fafine telā ne galo tena tupe siliva me se mea faigata ‵ki ke ‵sala atu ki ei kae ne seki ‵fiu a ia i ei. Moi ne tō atu te tupe i se togāvao io me se koga pelapelā, kāti ko mafaufau aka a ia me ko se mafai eiloa o toe maua. Kae ona ko te mea e iloa ne ia me e isi eiloa se koga i tena fale e mafai o maua i ei, ne kamata ei tou fafine o salasala faka‵lei atu i koga katoa. (Luka 15:⁠8) Muamua la, ne faka‵ka ne ia te molī ke fakamaina aka ei te fale telā ne pouli. Oti aka, ne ‵teu faka‵lei ne ia te fola ki se salu, mo te fakamoemoega ke lagona atu te pakēkē mai o se mea. Fakamuli loa, ne salasala faka‵lei atu a ia i koga pouli katoa i te fale ke oko eiloa ki te taimi ne matilotilo mai ei te tupe siliva ona ko te mainaga mai te molī. Ne taui atu a taumafaiga mo te loto fiafia o te fafine tenei!

¹⁹ E fakamasaua mai ne te fakamatalaga tenei i te tala fakatusa, me e mafai ne tatou katoa o fai te tiute faka-te-Tusi Tapu ke fesoasoani atu ki se Kelisiano vāivāi. Kae e iloa ne tatou me e manakogina i ei a taumafaiga e uke me ne fai atu te apositolo ko Paulo ki toeaina i Efeso, penei: “Me ko te ga‵lue malosi o tatou ki auala konei, ko ‵tau ei mo tatou o fesoasoani ki tino vāi‵vāi.” (Galuega 20:3a) Ke masaua la me ne seki mafai o maua ne te fafine te tupe mai te ‵sala fakavave atu fua i loto i tena fale. Ikai, ne manuia a ia me ne ‵sala faka‵lei atu eiloa ki ei ke oko ki te taimi ne “maua” ei ne ia. E penā foki tatou, kafai e taumafai tatou ke toe fakamalosi aka se tino telā ko vāivāi i te feitu faka-te-agaga, e ‵tau o olo atu tatou i se auala mautinoa telā e fakaasi atu ei ‵tou loto fia‵fia. Ne a mea e mafai ne tatou o fai?

²⁰ E mafai pefea o fesoasoani atu ki se tino loto vāivāi ke fakamalosi aka tena fakatuanaki mo tena loto fiafia? Kāti e manakogina fua i nisi taimi ke fai se akoga faka-te-Tusi Tapu i se tusi faka-Kelisiano telā e fetaui ‵lei. A te tonuga loa, e mafai o fesoasoani atu tatou ki se tino loto vāivāi i se auala tumau kae aogā māfai e fai sena akoga faka-te-Tusi Tapu. Kāti e mafai o iloa aka ne te ovasia o te galuega talai a tino kolā e ‵tau o fesoasoani atu ki ei. E mafai o taku mai ne ia a mataupu e mafai o suke‵suke ki ei mo tusi kolā e fesoasoani malosi atu. Ne fakaoti faka‵lei ne te fafine i te tala fakatusa tena galuega mai te fakaaogāga o mea faigaluega aogā, kae e penā foki tatou i aso nei, e maua ne tatou a mea faigaluega kolā e fesoasoani mai ki te fakataunuga o ‵tou tiute mai te Atua ke fesoasoani atu ki tino kolā e vāi‵vāi. Kāti ka fesoasoani malosi mai eiloa ‵tou tusi ‵fou e lua i te feitu tenei. A tusi konei ko te Tapuaki ki te Atua Tonu mo te Draw Close to Jehovah (Ke Fakapili‵pili Atu ki a Ieova).a

²¹ E maua ne tino katoa a fakamanuiaga mai te fesoasoani atu ki tino loto vāi‵vāi. E maua ne te tino telā e fesoasoani atu ki ei a te fiafia me ko toe ‵kau fakatasi a ia mo taugasoa ‵tonu. E maua ne tatou te fiafia tonu telā e māfua mai fua i te tukuatuga o mea. (Luka 15:​6, 9; Galuega 20:35e) E momea aka te fealofani o te fakapotopotoga māfai e fakaasi atu ne tino taki tokotasi i ei a te alofa ki nisi tino. Kae e sili atu i ei, e fakaaloalo atu i ei ki ‵tou Tausi Mamoe ata‵fai, ko Ieova mo Iesu, me e maua foki ne lā tavini i te lalolagi nei a te manakoga ke fesoasoani atu ki tino loto vāi‵vāi. (Salamo 72:​12-14; Mataio 11:​28-30; 1 Kolinito 11:1; Efeso 5:⁠1) Tela la, ko oko eiloa i te tāua a te pogai e ‵tau ei o tumau tatou i te “fakatau a‵lofa”!

[Fakamatalaga mai lalo]

E Mafai o Fakamatala Mai ne Koe?

• Kaia e ‵tau ei mo tatou katoa o fakaasi atu te alofa?

• Kaia e ‵tau ei o fakaasi atu te ‵tou a‵lofa ki tino loto vāi‵vāi?

• Ne a mea aogā e maua ne tatou mai tala fakatusa e uiga ki te mamoe mo te tupe siliva kolā ne ‵galo?

• Ne a mea tāua e ‵tau o fai ne tatou ko te mea ke fesoasoani atu ki tino loto vāi‵vāi?

[Fesili mo te Sukesukega]

1. Se a te uiga telā ne faka‵mafa ne Iesu mai mua faeloa o tena mate?

2. Kaia e tāua ‵ki ei ki Kelisiano a te fakaasiatuga o te alofa?

3. Se a te fakamalosiga e uiga ki te alofa telā ne fai atu ne te apositolo ko Paulo?

4. Ko oi e ‵tau o ‵saga malosi atu tatou ki ei, e ‵tusa mo pati a Paulo mo Iesu?

5, 6. (a) Ne a tala fakatusa toe‵toe e lua kolā ne fai mai ne Iesu? (e) Ne a mea e fakaasi mai i tala fakatusa konei e uiga ki a Ieova?

7. Ne a akoakoga aogā e maua ne tatou mai te tala fakatusa e uiga ki te mamoe mo te tupe siliva kolā ne ‵galo?

8. (a) Ne a mea ne fai ne te tausi mamoe mo te fafine ona ko lā mea ne ‵galo? (e) Se a te mea e fakaasi mai i faifaiga a laua e uiga ki lā kilokiloga ki lā mea ne ‵galo?

9. Se a te mea e fakaata mai i lagonaga o te tausi mamoe mo te fafine?

10, 11. (a) E ‵tau o pefea ‵tou kilokiloga ki tino kolā ko tapea‵pea atu keatea mai te fakapotopotoga? (e) E ‵tusa mo tala fakatusa a Iesu, e mafai pefea o fakaasi atu ne tatou ‵tou a‵lofa ki a latou?

12. Se a te mea e fakaasi mai ne pati konei, “‵sala te mamoe ne galo,” e uiga ki te kilokiloga a te tausi mamoe?

13. Ne ‵saga atu pefea a tāgata fakamaoni i aso mua ki manakoga o tino kolā ko vāi‵vāi, kae e mafai pefea o fakaakoako atu tatou ki a latou?

14. Ko oi a tino i te fakapotopotoga e ‵tau o fakamalosi atu ki tino kolā e loto vāi‵vāi?

15. Kaia kāti ne atafai malosi atu ei te tausi mamoe ki te mamoe?

16. Kaia e ‵tau ei o mafaufau faka‵lei tatou ki te atafai telā ne fakaasi atu ne te tausi mamoe ki te mamoe ne galo?

17. E mafai pefea o fakaakoako atu tatou ki te apositolo ko Paulo māfai ko āsi atu tatou ki se tino telā ko vāivāi?

18. (a) Kaia ne seki ‵fiu vave ei a te fafine i te tala fakatusa? (e) Ne a taumafaiga ne fai ne te fafine mo te loto fiafia, kae ne a mea ne iku mai i ei?

19. Ne a fakaakoakoga e maua ne tatou i faifaiga a te fafine i te tala fakatusa e uiga ki te tupe ne galo māfai ko fia fesoasoani atu tatou ki tino vāi‵vāi?

20. Ne a mea e mafai o fai ne tatou ke fesoasoani atu ki tino loto vāi‵vāi?

21. Kaia e maua ei ne tino katoa a fakamanuiaga māfai e fesoasoani atu ki tino loto vāi‵vāi?

[Ata i te itulau e 24]

E gasue‵sue muamua tatou, e atafai atu, kae loto fia‵fia foki tatou i te fesoasoani atu ki tino loto vāi‵vāi

[Ata i te itulau e 25]

E maua ne tino katoa a fakamanuiaga māfai e fesoasoani atu latou ki tino loto vāi‵vāi