Te ‵Sala Atu ki te Fiafia
I NĀI tausaga ko ‵teka, ne fakafesili atu ei ki tino i Falani, Siamani, Peletania mo te Iunaite Sitete a te fesili tenei, “Se a te mea e manakogina ke fiafia ei koe?” Mai tino kolā ne fakasautala aka, e 89 pasene ne fai mai me ko te malosi ‵lei; e 79 pasene e fai mai me ko te mauaga o se fakaipoipoga ‵lei; e 62 pasene ne fakasino atu ki taui ‵lei e maua ne mātua; kae e 51 pasene ne tali‵tonu me i te mauaga o se galuega ‵lei ka maua i ei te fiafia. Kae ui eiloa ko iloa ne te tokoukega o tino me e se maua te fiafia e auala i tupe, e 47 pasene ne tali‵tonu me e fai eiloa penā. Ne a mea e fakaasi mai i mea konā?
Muamua la, ke onoono aka ki te sokoga o tupe mo te fiafia. E fakaasi mai i se sukesukega o toe tino mau‵mea eiloa e toko selau i te Iunaite Sitete me e se sili atu te lotou fia‵fia i lō nisi tino. E se gata i ei, e ‵tusa mo te lipoti mai tokita o te mafaufau, e tiga eiloa toeitiiti ko uke fakalua atu a kope a tino e tokouke i te Iunaite Sitete i te tolusefulu tupu tausaga ko ‵teka, ko sē maua nei ne latou te fiafia masani telā ne maua muamua ne latou. E fai mai te suā lipoti: “I te vaitaimi foki eiloa tenā, ne gasolo aka ei o tokouke atu a tino loto mafatia. Ne sili fakatolu atu te aofaki o talavou kolā ne faka‵mate. Ne sili fakalua atu te aofaki o avaga ‵tala.” I nisi fenua kese‵kese e 50, ne fakaiku aka ne tino sukesuke e uiga ki te sokoga o tupe mo te fiafia, me e se mafai o ‵togi te fiafia ki tupe.
A te suā mea, e pefea te tāua o vaegā mea e pelā mo te malosi ‵lei, te mauaga o se fakaipoipoga ‵lei mo se galuega ‵lei ki te mauaga o te fiafia? Ia, kafai la konei eiloa a mea e manakogina ke fiafia ei se tino, e pefea la te fia miliona o tino kolā e se maua ne latou te malosi ‵lei mo tino kolā e se fia‵fia i olotou fakaipoipoga? Kae e pefea la a taki tauavaga kolā e seai ne olotou tama‵liki mo tagata mo fafine kolā e seai ne olotou galuega ‵togi? E mata, ko oti eiloa ne fakaiku aka me ka maua ne tino taki tokotasi konā se olaga fakafanoanoa? Kae, e mata, e mafai o gata te fiafia telā e maua ne tino kolā e maua nei ne latou te malosi ‵lei mo fakaipoipoga ‵lei māfai ko ‵fuli olotou fakanofonofoga?
E Mata, e Salasala Atu Tatou i te Koga Tonu?
E ma‵nako a tino katoa ke fia‵fia latou. E se se mea fou te mea tenei, me ko oti ne fakamatala mai i te Mafuaga o tino se “Atua fiafia,” kae ne faite a tino ki ana foliga. (1 Timoteo 1:11, NW; Kenese 1:26, 27) Tela la, e se tioa eiloa o ‵sala atu a tino ke maua ne latou te fiafia. Kae e iloa aka ne tino e tokouke me i te fakatumauga o te fiafia e pelā eiloa mo te ‵kakuga o one i tou alofilima—e ma‵mulugofie fua.
Kae, e mata, ko tō ‵sala malosi atu a nisi tino ki te fiafia? Konā eiloa a pati a te tagata poto ko Eric Hoffer. Ne lavea aka ne ia me i “te ‵sala atu ki te fiafia se pogai tāua eiloa e tasi o te sē fiafia.” Kae e tonu ‵ki eiloa te mea tenā māfai e ‵sala atu tatou ke maua te fiafia i se koga ‵se. Kafai e penā loa, e mautinoa eiloa me ka maua fua ne tatou i ei a te taui ko te fanoanoa mo te kaitaua. A te taumafai ke maumea; ke lauiloa io me takutakua; taumafaiga ki mea fakapolitiki, mea faka-te-fenua, io me ko mea tau te maumea; io me ko te ola fua mō koe eiloa i te fakama‵liega ou manakoga totino e se tuku mai i ei a te fiafia. E se tioa eiloa o talia ne nisi tino a te kilokiloga a se tino tusi tala telā ne fai mai: “Kafai e se ‵sala atu tatou ki te fiafia, ka fia‵fia eiloa tatou”!
Se mea tāua foki me i te sukesukega telā ne fai i te kamataga o te mataupu tenei e fakaasi mai i ei me e toko 4 mai te toko 10 o tino kolā ne aofia i ei e tali‵tonu me e maua te fiafia mai te faiga o mea ‵lei mo te fesoasoani atu ki nisi tino. Kae e toko 1 mai te toko 4 e faka‵mafa mai i ei a te lasi o te tusaga o te fakatuanaki mo te talitonuga fakalotu i te mauaga o te fiafia. Telā la, e mautinoa eiloa me e ‵tau o iloilo faka‵lei ne tatou te mea telā e fai i ei ke fia‵fia tonu tatou. Ka fesoasoani mai te suā mataupu ke matea ne tatou te mea tenā.
[Ata i te itulau e 3]
E tali‵tonu a tino e tokouke me i te mauaga o se olaga faka-te-kāiga ‵lei, io me se galuega ‵lei ko te kī tāua ki te fiafia. E lotomalie koe ki ei?