Fakaeteete i ‘Leo o Tino Fakaa‵tea’

“Ka se tau‵tali latou ki se tino fakaatea, ka ‵tele latou keatea; i te mea e se matea ne latou a tona leo.”​​—IOANE 10:5.

1, 2. (a) Ne saga atu pefea a Malia i te taimi ne kalaga atu ei a Iesu ki tena igoa, kae se a te fakamatalaga a Iesu mai mua atu telā e fakaasi mai i te mea tenei? (e) Se a te mea e fesoasoani mai ke fakapili‵pili atu faeloa tatou ki a Iesu?

NE KILOKILO atu a Iesu, telā ne toetu aka, ki te fafine e tu i tafa o tena tanuga telā ko seai se tino i ei. Ne iloa ‵lei ne ia tou fafine. Ko Malia te Makatala. Ko tai kātoa te lua tausaga ko ‵teka, ne faka‵lei ei ne ia tou fafine telā ne pukea ne temoni. Talu mai te taimi tenā, ne fesoasoani atu faeloa tou fafine ki a ia mo ana apositolo, i olotou galuega i aso katoa. (Luka 8:​1-3) I te aso tenā, a Malia e tagi, ona ko te fanoanoa me ne lavea ne ia te taimi ne mate ei a Iesu, kae ko galo atu foki tena foitino i te taimi tenā! Tela la, ne fesili atu ei a Iesu ki tou fafine: “Te fafine, ai a e tagi ei koe? Ko oi tenā e ‵sala ne koe?” Ne leake eiloa a Malia me ko te tino fai fatoaga, telā ne tali atu ei tou fafine, penei: “Te aliki, kafai ne ave ne koe a ia keatea, taku mai la me tefea te koga ne tuku ne koe a ia ki ei, ke ave ne au a ia keatea.” Tenā, ne fai atu ei a Iesu, penei: “Malia!” I konā foki eiloa, ne iloa fakavave ei ne tou fafine a te auala ne faipati sāle atu ei a Iesu ki a ia. Ne fai atu tou fafine mo te fiafia, penei: “Te Faiakoga!” Kae ne ‵sai atu ei tou fafine ki tou tagata.​​—Ioane 20:​11-​18.

² E fakaasi mai i te tala tenei i se auala fakaotia loto a pati kolā ne fai mai ne Iesu mai mua atu i ei. I te faka‵tusaga ne ia o ia eiloa ki se tausi mamoe a ko ana soko ki mamoe, e fai mai me e kalaga atu eiloa te tausi mamoe ki igoa o ana mamoe kae e iloa foki ne mamoe a tena leo. (Ioane 10:​3, 4, 14, 27, 28) E tonu, e pelā eiloa mo te mamoe telā e iloa ne ia te leo o tena tausi, e penā foki eiloa a Malia, ne iloa ne ia te leo o tena Tausi Mamoe, ko Keliso. E penā foki eiloa a soko o Iesu i aso nei. (Ioane 10:16) E pelā eiloa mo te logo ‵lei o taliga o te mamoe telā e mafai ei o fakapilipili atu ki tena tausi, e penā foki te logo ‵lei o tatou i te feitu faka-te-agaga, e mafai ei o tau‵tali fakapilipili atu tatou i kalafaga o te ‵tou Tausi Mamoe ‵Lei, ko Iesu Keliso.​​—Ioane 13:15; 1 Ioane 2:6; 5:​20.

3. Ne a nisi fesili e mafai o masaua ne tatou mai te tala fakatusa a Iesu e uiga ki mamoe?

³ Kae pelā eiloa mo te tala fakatusa tenā, a te mafai ne te mamoe o iloa a leo o tino, e mafai ei o iloa ne ia te leo o tena taugasoa mo te leo foki o tena fili. E tāua ‵ki eiloa te mea tenā ona ko te mea e isi foki ne ‵tou fili kolā e ‵teke malosi mai. Ko oi la latou? E gasue‵sue pefea latou? E mafai pefea o puipui tatou mai i a latou? Ke maua te tali, ke na onoono aka tatou ki nisi pati a Iesu i te tala fakatusa e uiga ki mamoe.

‘A Ia Telā e se Ulu Atu i te Mataloa’

4. E ‵tusa mo te tala fakatusa e uiga ki te tausi mamoe, ko oi e tau‵tali atu ki ei a mamoe, kae ko oi e se tau‵tali atu latou ki ei?

⁴ E fai mai a Iesu: “Ka ko ia telā e ulu atu i te mataloa, ko ia tenā ko te tausi mamoe. Ka ‵tala mai ki a ia ne te tausi mataloa te mataloa; kae lagona ne mamoe tona leo: kae kalaga foki a ia ki ana mamoe i olotou igoa, takitaki ei latou ki tua. Kafai e ave ne ia ana mamoe, e mua i a latou, kae tautali atu mamoe i a ia; i te mea ko iloa ne latou tona leo. Ka se tau‵tali latou ki se tino fakaatea, ka ‵tele latou keatea; i te mea e se matea ne latou a tona leo.” (Ioane 10:​2-5) Masaua la me e fakaaogā fakatolu ne Iesu te pati “leo.” E faipati fakalua a ia ki te leo o te tausi mamoe, kae ko te tolu o taimi, e fakasino atu a ia ki ‘te leo o te tino fakaatea.’ Ko oi te tino fakaatea telā ne fakasino atu ki ei a Iesu?

5. Kaia e se talimālō faka‵lei atu ei tatou ki te tino fakaatea telā e taku mai i te Ioane mataupu e 10?

⁵ E seki faipati a Iesu i konei ki se tino fakaatea telā e ma‵nako tatou o talimālō atu ki a ia​​—se pati telā e fakauiga i te ‵gana mua i te Tusi Tapu ki te ‘fakaafega o tino fakaa‵lofa io me ko tino fakaa‵tea.’ (Epelu 13:2) I te tala fakatusa a Iesu, a te tino fakaatea tenei e se se tino telā ne ‵kami ne koe. “E se ulu atu i te mataloa o fano ki te lulu mamoe, kae kake o fano ki ei mai se isi ala, a ia se tino kaisoa kae faomea.” (Ioane 10:1) Ko oi la te tino muamua telā e fakaasi mai i te Muna a te Atua me ne fai mo fai se tino kaisoa kae ‵faomea? Ko Satani te Tiapolo. E maua ne tatou a fakamaoniga i te tusi ko Kenese.

Te Taimi Muamua ne Lagona Atu ei te Leo o te Tino Fakaatea

6, 7. Kaia e fetaui ‵lei ei ke fakaigoa a Satani ki se tino fakaatea kae se tino kaisoa foki?

⁶ E fakamatala mai i te Kenese 3:​1-5 a te auala ne lagona atu ei te leo o te tino fakaatea i te taimi muamua eiloa i te lalolagi nei. E fakaasi mai i te tala tenā me ne fanatu a Satani ki te fafine muamua, ko Eva, e auala i se gata kae ne faipati atu ki tou fafine i se auala faitogafiti. E tonu, e se taku ‵tonu mai i te tala tenei me i a Satani se “tino fakaatea.” E tiga eiloa te feitu tenā, e fakaasi mai i ana mea ne fai i auala e uke me ne ‵pau eiloa a ia mo te tino fakaatea i te tala fakatusa a Iesu telā ne fakamau ki lalo i te Ioane mataupu e 10. Mafaufau ki nisi feitu kolā e tai ‵pau ei.

⁷ E fai mai a Iesu me e fanatu te tino fakaatea tenei ki te lulu mamoe i se isi auala fakaatea. E penā foki eiloa a Satani, ne fakaaogā ne ia se isi auala fakaatea, mai te fakaaogāga o se gata, ke fanatu ei a ia ki a Eva. Ne fakaasi faka‵sau atu i te auala faitogafiti tenei i a Satani​​—se tino loi kae kaisoa telā e ulu ‵muni ki loto. E se gata i ei, ne fanatu te tino fakaatea tenā o kaisoa a mamoe a te tausi mamoe i te lulu. A te ‵tonuga loa, e sili atu tena masei i lō se tino kaisoa masani, me e taumafai foki a ia o “tatino, kae fakamasei mea.” (Ioane 10:10) E penā foki a Satani, a ia se tino kaisoa. I te fakaloiloiga o Eva, ne kaisoa ei ne ia te fakamaoni o tou fafine mai te Atua. E se gata i ei, ne avatu foki ne Satani te mate ki tino katoa. Tela la, ne fai a ia mo fai se tino tatino.

8. Ne ‵fuli ‵se pefea ne Satani a pati mo lagonaga o Ieova?

⁸ Ne lavea atu foki te tulaga sē fakamaoni o Satani i te auala ne ‵fuli ‵se ei ne ia a pati mo lagonaga o Ieova. “E tonu eiloa i te Atua ne fai atu ke sa ‵kai koulua ki fuaga o so se lakau i te fatoaga?” ko tena fesili ki a Eva. Ne poi fakaloiloi a Satani kae e pelā me ne fai atu a ia, penei: ‘E mafai pefea ne te Atua o fai se mea sē alofa penā?’ Ne toe fai atu a ia: “A te Atua ne fai atu penā, me e iloa ne ia me kafai e ‵kai koulua ki fuaga o te lakau tenā, ko koulua ka ‵pau mo te Atua.” Mafaufau la ki ana muna: ‘E iloa ne te Atua.’ E fai pelā me ne fai atu a Satani, penei: ‘E iloa ne au a mea kolā e iloa ne te Atua. E iloa ne au ana lagonaga, kae e ma‵sei ‵ki eiloa.’ (Kenese 2:​16, 17; 3:​1, 5) Se mea fakafanoanoa, me ne seki ‵fuli keatea a Eva mo Atamu mai te leo o te tino fakaatea tenei. I lō te fai penā, ne faka‵logo laua ki ei kae ne oko atu ei te malaia ki a laua mo lā tama‵liki.​​—Loma 5:​12, 14.

9. Kaia e ‵tau ei o fakamoe‵moe tatou ke lagona atu a leo o tino fakaa‵tea i aso nei?

⁹ E fakaaogā foki ne Satani a auala penā ke takitaki ‵se ei a tino o te Atua i aso nei. (Fakaasiga 12:9) A ia ko “te tamana foki eiloa o tino ‵loi,” kae ko tino pelā mo ia, kolā e taumafai o takitaki ‵se ne latou a tavini a te Atua, ko ana tama‵liki konā. (Ioane 8:​44) Ke na onoono aka tatou ki nisi auala kolā e lagona atu ei a leo o tino fakaa‵tea konei i aso nei.

Te Auala e Lagona Atu ei a Leo o Tino Fakaa‵tea i Aso Nei

10. Se a te auala e tasi e lagona atu ei te leo o tino fakaa‵tea?

¹⁰ Fakamatalaga faka‵se tino. E fai mai te apositolo ko Paulo: “Sa talia akoakoga fakaatea ke takitaki koutou keatea mai te auala tonu.” (Epelu 13:9) Ne a vaegā akoakoga konā? Ona ko te mea ‘e mafai o takitaki atu ei tatou keatea,’ e manino ‵lei me ne fakasino atu a Paulo ki akoakoga kolā e fakasēaogā ei te ‵tou tulaga paleni ‵lei i te feitu faka-te-agaga. Ko oi e fakasalalau atu ne latou a vaegā akoakoga fakaatea penā? Ne fai atu a Paulo ki se potukau o toeaina Kelisiano penei: “Ka isi ne tino mai i a koutou ka faipati ki te muna loi, o takitaki a tino tali‵tonu ke tau‵tali i a latou.” (Galuega 20:30) E tonu, e ‵pau eiloa aso nei mo aso o Paulo, e isi ne tino kolā ne ‵kau atu ki te fakapotopotoga Kelisiano ko taumafai nei o takitaki ‵se a mamoe mai te “faipati ki te muna loi”. E pelā mo pati a te apositolo ko Petelu, e fakaaogā ne latou “a tala ‵fatu” ​​—ko tala kolā e foliga mai pelā me ne muna ‵tonu kae tela la, e seai ne lotou aogā, e pelā eiloa mo tupe faite.​​—2 Petelu 2:3.

11. E fakaasi faka‵sau atu pefea ne pati kolā e maua i te 2 Petelu 2:​1, 3 a auala mo taumafaiga a aposetate?

¹¹ Ne toe fakaasi faka‵sau mai ne Petelu a auala kolā e fakaaogā ne aposetate mai te fai atu me “e aumai ne latou akoakoga fakamasei olaga mo akoakoga sē ‵tonu.” (2 Petelu 2:​1, 3) E pelā eiloa mo te tala fakatusa a Iesu e uiga ki te lulu mamoe mo te tino kaisoa telā e se ulu atu i “te mataloa o fano ki te lulu mamoe, kae kake o fano ki ei mai se isi ala,” e penā foki te ulu ‵funa mai o aposetate faitogafiti ki loto i a tatou. (Kalatia 2:4; Iuta 4) Se a te mea e taumafai latou ki ei? E toe fai mai a Petelu: “Ko aogā ei a tala ‵fatu a faiakoga ‵loi konei ki a koutou.” A te ‵tonuga loa, faitalia me ne a pati fakasako‵sako e fai mai ne aposetate, a te mea tonu e taumafai latou ki ei ko te “kaisoa, te tatino, mo te fakamasei mea.” (Ioane 10:10) Ke fakaeteete i vaegā tino fakaa‵tea penā!

12. (a) E mafai pefea ne ‵tou taugasoa o fakaasi faka‵sau mai ki a tatou te leo o tino fakaa‵tea? (e) Ne a mea tai ‵pau i auala faitogafiti a Satani mo tino fakaatea i aso nei?

¹² Taugasoa ma‵sei. E mafai o lagona atu a te leo o tino faka‵tea i tino kolā e ‵kau fakatasi tatou. A taugasoa ma‵sei e fakama‵taku malosi eiloa ki talavou. (1 Kolinito 15:33) Masaua me ne saga muamua atu eiloa a Satani ki a Eva​​—te tino telā ne faite fakamuli i te tauavaga muamua kae sē uke malosi ana mea ne iloa. Ne talitonu eiloa tou fafine ki pati a Satani me ne fakatapulā tena saolotoga ne Ieova, kae tagaila se loi fua te mea tenā. Ne alofa eiloa a Ieova ki ana tino ne faite kae fai eiloa ne ia a mea kolā e ‵lei ei latou. (Isaia 48:17) E penā foki i aso nei, e taumafai eiloa a tino fakaa‵tea o fakatalitonu atu ki a koutou, talavou, me e fakatapulā ne otou mātua Kelisiano te otou saolotoga i se auala sē ‵tau. E mafai pefea o fakamalosi atu a tino fakaa‵tea penā ki a koutou? E taku ‵tonu mai se tamaliki fafine Kelisiano e tokotasi penei: “Ne vāivāi ‵ki toku fakatuanaki i se taimi ona ko tamaliki e vasega tasi mo au. Ne fai mai faeloa latou me i taku lotu ko tō uke ana tulafono kolā e se ‵lei.” Kae ko te ‵tonuga loa, e a‵lofa tonu eiloa ou mātua ki a koe. Tela la, kafai e taumafai a tama‵liki i te akoga o fai koe ke sē tali‵tonu ki ou mātua, ke mo a ma faka‵segina koe pelā mo Eva.

13. Se a te auala poto ne tautali atu ki ei a Tavita, kae se a te auala e tasi e mafai o fakaakoako atu ei tatou ki a ia?

¹³ E uiga loa ki taugasoa ma‵sei, e fai mai te faisalamo ko Tavita: “Au sē fai takaga ki tino e seai ne aogā; au sē kau foki ki tino amio ‵pelo.” (Salamo 26:4) E mata, e lavea atu ne koe te uiga tenā i tino fakaatea? E ‵funa aka ne latou olotou uiga ‵tonu​​—e pelā eiloa mo Satani telā ne ‵funa ne ia a ia eiloa mai te fakaaogāga o te gata. I aso nei, e ‵funa aka ne nisi tino amio ma‵sei olotou foliga mo manakoga ‵tonu mai te fakaaogāga o te Internet. I potu sau‵tala i te Internet, e fakafoliga atu ne tino ma‵tua ma‵sei i a latou ne talavou ke ‵po aka ei koe. Talavou, fakamolemole ke na fakaeteete malosi koutou ke mo a eiloa e pa‵kia koutou i te feitu faka-te-agaga.​​—Salamo 119:101; Faataoto 22:3.

14. E fakasalalau atu pefea i mea fakasalalau i nisi taimi, a leo o tino fakaa‵tea?

¹⁴ ‵Losiga ‵se. E tiga eiloa e ‵lei a nisi tala e uiga ki Molimau a Ieova, i nisi taimi e talia sāle ne mea fakasalalau ke fakasalalau atu a leo o tino fakaatea. E pelā mo te tala i se fenua e tasi, ne ‵losi ‵se atu ei me ne ‵lago a Molimau ki te malo o Hitila i te Taua i te Lua a te Lalolagi. I te suā tala, ne ‵losi atu ei me ne fakamasei ne Molimau a falesa. I nisi fenua, ne ‵losi atu foki me ne ita fitifiti a Molimau ma fakaaogā a togafiti fakatokitā ki olotou tama‵liki kae e ‵funa aka foki ne latou a agasala matagā a olotou taina tali‵tonu. (Mataio 10:22) E tiga eiloa te feitu tenā, e tali‵tonu eiloa a tino kolā e iloa ‵lei ne latou tatou me e se ‵tonu a vaegā ‵losiga penā.

15. Kaia e se ‵lei ei ke talitonu ki mea katoa kolā e fakaasi mai i mea fakasalalau?

¹⁵ Ne a mea e ‵tau o fai ne tatou māfai ko fe‵paki mo ‵losiga ‵se kolā e fakasalalau atu ne leo o tino fakaa‵tea penā? Se mea ‵lei ke faka‵logo tatou ki pati fakatonutonu i te Faataoto 14:15: “A tino va‵lea e tali‵tonu i so se mea; a tino ‵poto e onoono faka‵lei eiloa ki olotou mea e fai.” Se mea sē ‵lei ke talitonu ki so se mea telā e fakaasi mai i mea fakasalalau e pelā me ne mea ‵tonu katoa. E tiga eiloa e se fakaasi atu ne tatou te loto sē talitonu ki fakamatalaga katoa i te lalolagi, e iloa ‵lei ne tatou me i “te lalolagi kātoa ko i lalo i te pule a te Tino Masei.”​​—1 Ioane 5:​19.

‘‵Tofo Aka a Pati me ne Mai i te Atua’

16. (a) E fakaasi mai pefea i faifaiga a mamoe a te ‵tonu o pati a Iesu i te Ioane 10:4? (e) Se a te mea e fakamalosi mai i te Tusi Tapu ke fai ne tatou?

¹⁶ E iloa tonu la pefea ne tatou me ne taugasoa io me ne fili kolā e fai‵pati e uiga ki a tatou? Ia, e fai mai a Iesu me e tau‵tali atu a mamoe ki te lotou tausi mamoe me e “iloa ne latou tona leo.” (Ioane 10:4) E se ko foliga o te tausi mamoe telā e fai ei ke tautali atu te mamoe; kae ko tena leo. E fakaasi mai i se tusi e tasi e uiga ki fenua i te Tusi Tapu me ne iloa ne mamoe te lotou tausi i ana gatu, kae e se ko tena leo. Ne tali atu se tausi mamoe me ko te leo telā ne iloa ne latou. Ke fakamaoni aka te mea tenei, ne fesuiaki ei lā gatu mo se tino fakaatea. Ne pei te tino fakaatea ki gatu o te tausi mamoe, ne kalaga atu ki mamoe, kae ne seki fia ‵saga atu a mamoe ki ei. Ne seki iloa ne latou tena leo. Kae i te taimi ne kalaga atu ei te tausi mamoe, ne ‵tele fakavave atu ei a mamoe ki a ia, e tiga eiloa me ne seki pei ana gatu tausi mamoe. Tela la, e mafai eiloa o foliga atu se tino pelā me se tausi mamoe, kae e se fakamaoni atu ei ki mamoe me i a ia se tausi mamoe. E iloilo faka‵lei aka ne mamoe te leo o te tino telā e kalaga atu, mo te leo o te tausi mamoe. E fai mai te Muna a te Atua ke fai foki ne tatou te mea tenā​​—“tofotofogina ke iloa tonu, me ko te Agaga e ‵nofo mo latou e vau mai i te Atua.” (1 Ioane 4:1; 2 Timoteo 1:​13) Ne a mea ka fesoasoani mai ke fai ne tatou te mea tenā?

17. (a) E masani ‵lei pefea tatou mo te leo o Ieova? (e) Se a te mea e mafai o fai ne tatou ona ko te iloaga e uiga ki a Ieova?

¹⁷ E manino ‵lei, me ko te iloa ‵lei ne tatou a te leo o Ieova, io me ko tena fekau, ko te iloa ‵lei foki ne tatou te ‵kese o te leo o te tino fakaatea. E fakaasi mai i te Tusi Tapu te auala e mafai ei o ati aka ne tatou te vaegā iloaga tenā. E fai mai penei: “Ka lagona ne koutou tena leo i otou tua e fai penei, ‘Tenei te auala. Tautali i ei.’ ” (Isaia 30:21) A te “leo” mai tua o tatou e vau mai te Muna a te Atua. I taimi katoa e fai‵tau ei tatou ki te Muna a te Atua, e fai eiloa pelā me e lagona ne tatou te leo o te ‵tou Tausi Mamoe Sili, ko Ieova. (Salamo 23:1) Tela la, ko te uke o taimi e sukesuke ei tatou ki te Tusi Tapu, ko te momea aka foki o ‵tou masani ki te leo o te Atua. A te iloaga ‵loto tenā, e fai ei ke iloa fakavave ne tatou a leo o tino fakaa‵tea.​​—Kalatia 1:8.

18. (a) Se a te mea e aofia i te fakalogo ki te leo o Ieova? (e) E ‵tusa mo te Mataio 17:​5, kaia e ‵tau ei o faka‵logo tatou ki te leo o Iesu?

¹⁸ Ne a nisi mea e aofia i te iloaga o te leo o Ieova? I tafa o te lagona ne tatou, e aofia foki i ei te faka‵logo ki ei. Ke toe onoono ki te Isaia 30:21. E folafola mai te Muna a te Atua: “Tenei te auala.” E tonu, e auala i sukesukega ki te Tusi Tapu, e lagona ei ne tatou a fakatonuga a Ieova. E se gata i ei, e toe fakatonu mai penei: “Tautali i ei.” E manako a Ieova ke fai ne tatou a mea kolā e lagona ne tatou. Tela la, mai te faiga o mea kolā e tauloto ne tatou, e fakaasi atu i ei me e se lagona fua ne tatou te leo o Ieova kae e faka‵logo foki tatou ki ei. (Teutelonome 28:1) A te fakalogo ki te leo o Ieova e fakauiga foki ki te fakalogo ki te leo o Iesu, me ne fai mai eiloa a Ieova ke fai tatou penā. (Mataio 17:5) Se a te mea e fai mai ne Iesu, te Tausi Mamoe ‵Lei, ke fai ne tatou? E akoako mai ki a tatou ke fai a soko kae ke tali‵tonu foki ki “te tavini poto kae fakamaoni.” (Mataio 24:45; 28:​18-​20) A te fakalogo ki tena leo e maua ei ne tatou te ola se-gata-mai.​​—Galuega 3:​23.

“Ka ‵Tele Latou Keatea”

19. E ‵tau o ‵saga atu pefea tatou ki leo o tino fakaa‵tea?

¹⁹ E ‵saga atu la pefea tatou ki leo o tino fakaa‵tea? E pelā mo te mea e fai ne mamoe. E fai mai a Iesu: “Ka sē tau‵tali latou ki se tino fakaatea, ka ‵tele latou” keatea mai i a ia. (Ioane 10:5) E lua a mea e ‵tau o fai ne tatou. Muamua la, “ka sē tau‵tali” atu tatou ki se tino fakaatea. E tonu, e ‵teke katoatoa atu tatou ki se tino fakaatea. A te ‵tonuga loa, a pati Eleni i te Tusi Tapu kolā ne ‵fuli ki te “ka sē,” ko te ‵toe fakaasiatuga malosi eiloa o te uiga ‵teke i te ‵gana tenā. (Mataio 24:35; Epelu 13:5) A te lua o mea ko te “‵tele” o tatou keatea mai i a ia, io me fulitua atu ki a ia. Tenā eiloa te auala tonu e tasi e ‵tau o fai ne tatou ki tino kolā e se fetaui olotou akoakoga mo te leo o te Tausi Mamoe ‵Lei.

20. Ne a mea ka fai ne tatou māfai ko fe‵paki mo (a)  aposetate faitogafiti, (e) taugasoa ma‵sei, (i) tala sē ‵tonu i mea fakasalalau?

²⁰ Tela la, kafai e fetaui tatou mo tino kolā e fakaasi mai i olotou leo a manatu o aposetate, e ma‵nako tatou ke fai te mea telā e fakaasi mai i te Muna a te Atua: “Ke fakaeteete koutou mai tino kolā e fakatupu ne latou te finauga mo te faigata, me e ‵teke ki akoakoga kolā ne akoakogina ei koutou; ke faka‵mao koutou mai i a latou.” (Loma 16:17; Tito 3: ​10) E penā foki a talavou Kelisiano, i te fakafesagai atu ki te fakamataku o taugasoa ma‵sei, e ma‵nako eiloa latou o faka‵logo ki pati fakatonutonu a Paulo ki te talavou ko Timoteo, penei: “Ke fakagata manakoga fakatamatane.” Kae kafai ko lagona atu a losiga ‵se i mea fakasalalau, ka masaua eiloa ne tatou a nisi pati a Paulo ki a Timoteo: “Ka ‵fuli keatea latou [ko tino kolā e faka‵logo ki leo o tino fakaa‵tea] mai te mea tonu o faka‵logo ki tala ‵kai. Kae pelā mo koe, e ‵tau eiloa mo koe o mafaufau faka‵lei i mea katoa.” (2 Timoteo 2:​22; 4:​3-5) Faitalia eiloa te ‵tagi ‵gali mai o leo o tino fakaa‵tea, e ‵tele eiloa tatou keatea mai mea katoa kolā e mafai ei o fakamasei mai ki ‵tou fakatuanaki.​​—Salamo 26:5; Faataoto 7:​5, 21; Fakaasiga 18:​2, 4.

21. Se a te taui e faka‵tali ki ei a tino kolā e ‵teke atu ki leo o tino fakaa‵tea?

²¹ Mai te ‵teke atu ki leo o tino fakaa‵tea, e faka‵logo eiloa a Kelisiano fakaekegina ki pati a te Tausi Mamoe ‵Lei kolā e maua i te Luka 12:32. I konā, e fai atu ei a Iesu ki a latou: “Taku lafu foliki . . . , ke se ma‵taku koutou i te mea ko fiafia eiloa te otou Tamana o tuku atu ki a koutou a te Malo.” E penā foki a ‘nisi mamoe’ e olioli eiloa mo te fia‵fia ke lagona ne latou a pati a Iesu konei: “O‵mai, i a koutou ko oti ne fakamanuiagina ne toku tamana, ke fai mō koutou a te malo ne fakatoka mō koutou mai te kamataga o te lalolagi.” (Ioane 10:16; Mataio 25:34) Ko oko eiloa i te fakafiafia o te taui ka maua ne tatou māfai e ‵teke atu tatou ki ‘leo o tino fakaa‵tea’!

E Masaua ne Koe?

• E fetaui ‵lei pefea a Satani mo te fakamatalaga o te tino fakaatea telā ne taku mai i te tala fakatusa a Iesu e uiga ki te lulu mamoe?

• E lagona atu pefea a leo o tino fakaa‵tea i aso nei?

• E iloa ‵lei pefea ne tatou a leo o tino fakaa‵tea?

• E ‵saga atu pefea tatou ki leo o tino fakaa‵tea?

[Ata i te itulau e 29]

Ne lavea ‵lei ne Malia a Keliso

[Ata i te itulau e 30]

E se fanatu ‵tonu te tino fakaatea ki mamoe

[Ata i te itulau e 32]

E ‵saga atu pefea tatou ki leo o tino fakaa‵tea?