Mātua, Tausi Atu ki Otou Kāiga

“Kafai e isi se tino e se fia tausi ki sona kāiga, . . . ko tona uiga ko ‵teke io me ko tiaki ne ia te fakatuanaki.”​—1 TIMOTEO 5:8.

1, 2. (a) Kaia e fakamalosi loto ei ke lavea atu me e ‵kau atu a kāiga ki fakatasiga faka-Kelisiano? (e) Ne a nisi mea faiga‵ta e fe‵paki mo kāiga i olotou taumafaiga ke oko atu ki fakatasiga mai mua o te taimi?

KAFAI e onoono koe ki te fakapotopotoga Kelisiano a koi tuai o kamata te fakatasiga, e mafai o lavea atu ne koe a tama‵liki kolā e ‵ma kae ‵lei olotou gatu kae ko saga‵saga i tafa o olotou mātua. E mata, e se se mea gali ke lavea atu te alofa i vaegā kāiga penā​​—te alofa ki a Ieova mo te lotou fakatau a‵lofa? Kae se mea faigofie ke se matea atu a taumafaiga e uke kolā ne fai ko te mea ke oko atu te kāiga ki fakatasiga i te taimi tonu.

² E fakalave‵lave malosi te ukega o kāiga i te aso kātoa, kae e momea aka foki te lotou fakalave‵lave i po kolā e fai ei a fakatasiga. E ‵tau o kuka a mea‵kai, ko galuega masani i te fale, ko mea a‵koga a tama‵liki e ‵tau o fai. E pānaki a mātua mo te ‵toe amoga ‵mafa, e onoono foki latou me ko tino katoa ko oti ne kou‵kou, ‵kai, kae ko toka foki mai mua o te taimi. Kae e tonu la me e mafai o tupu fakafuasei se fakalavelave ki se tama‵liki i aso kolā e fai ei a fakatasiga. E mafai o masae te tivae o te tamaliki matua i ana tafaoga. E ta‵tela valevale a meakai a te toekimuli. Ko kamata o fakatau kinau a tama‵liki. (Faataoto 22:15) Ne a mea e mafai o iku mai i ei? E mafai eiloa o fakasēaogā i ei a fakatokaga kolā ko oti ne fai faka‵lei ne mātua. Kae toeitiiti ko oko atu te kāiga tenā i taimi katoa ki te Kingdom Hall mai mua o te taimi e kamata ei te fakatasiga. Ko oko eiloa i te fakamalosi loto ke lavea atu te kāiga tenā i te Kingdom Hall i vaiaso katoa, mo tausaga katoa kae e ga‵solo aka ei a tama‵liki o ma‵tua i te tavini atu ki a Ieova!

3. E iloa pefea ne tatou me e fakatāua malosi ne Ieova a kāiga?

³ E tiga eiloa e faigata kae e fakafi‵ta foki tau galuega e pelā me se mātua i nisi taimi, e mafai o talitonu koe me e fakatāua malosi ne Ieova au taumafaiga. A Ieova ko te Māfuaga o te kāiga. Tenā eiloa te pogai e fai mai ei tena Muna me e ‘fakalagolago a kāiga katoa ki tena igoa’​​—ko te pogai e ola ei te kāiga​​—ko Ieova. (Efeso 3:​14, 15) Telā la, kafai e taumafai koutou mātua o fakataunu otou tulaga faka-te-kāiga i te auala tonu, e fakaaloalo atu eiloa koutou i ei ki te Aliki Tafasili i te Maluga o te lagi mo te lalolagi. (1 Kolinito 10:31) E a, e se fai te mea tenā mo fai se tauliaga lasi ‵ki? Tela la, se mea ‵lei ke mafau‵fau tatou ki te tiute telā ne tuku atu ne Ieova ki mātua. Ka mafau‵fau tatou i te mataupu tenei, ki te tiute ko te tausi atu ki te kāiga. Ka onoono nei tatou ki auala e tolu kolā e manako te Atua ke tausi atu ki ei a mātua.

Te Tausi Atu i te Feitu Faka-te-Foitino

4. Ne a fakatokaga ko oti ne fai ne Ieova i te kāiga e uiga ki te tausi atu ki manakoga o tama‵liki?

⁴ Ne tusi atu te apositolo ko Paulo: “Kae kafai e isi se tino e se fia tausi ki sona kāiga, kae maise eiloa tino o tona kāiga tonu, ko tona uiga ko ‵teke io me ko tiaki ne ia te fakatuanaki, kae sili atu tona masei i lō te tino sē kelisiano.” (1 Timoteo 5:8) I te fakasino atu o Paulo ki “se tino” i konei, ko oi ne mafaufau a ia ki ei? Ko te ulu o te kāiga, telā ko te tamana i te ukega o kāiga. Ne tuku atu foki ne te Atua se tulaga taulia ki te fafine ke fai mo fai se fesoasoani ki tena avaga. (Kenese 2:​18) Ne fesoasoani sāle atu a fāfine i taimi o te Tusi Tapu ki olotou avaga i te tausi atu ki te kāiga. (Faataoto 31:​13, 14, 16) I aso nei, ko oti ne gasolo aka o tokouke a kāiga kolā e tokotasi fua te mātua i ei.a E fai eiloa ne mātua Kelisiano e tokouke, kolā e seai ne olotou avaga, se galuega tafasili i te ‵lei i te tausi atu ki olotou kāiga. E tonu la me e ‵lei atu māfai e tokolua a mātua i te kāiga, a ko te tamana ko te ulu i ei.

5, 6. (a) Ne a nisi mea faiga‵ta e fe‵paki mo tino kolā e taumafai o tausi atu ki olotou kāiga i te feitu faka-te-foitino? (e) Se a te kilokiloga e uiga ki galuega ‵togi ka fesoasoani atu ke tumau a Kelisiano kolā e tausi atu ki olotou kāiga?

⁵ I te 1 Timoteo 5:​8, se a te vaegā tausiga telā ne mafaufau ki ei a Paulo? E fakaasi mai i te mataupu kātoa me ne faipati atu eiloa a ia ki te tausiga o te kāiga i te feitu faka-te-foitino. I te lalolagi i aso nei, e uke ‵ki eiloa a fakalavelave e mafai o fe‵paki mo te ulu o te kāiga i te tausi atu ki te kāiga i te feitu tenā. E lauiloa eiloa a fakalavelave i mea tau tupe i te lalolagi kātoa, e pelā mo te ‵katiga o tino ga‵lue, te tokouke o tino e seai ne galuega ‵togi, mo te gasolo aka foki o ‵togi ‵mafa a mea e tausi ei te ola. E fesoasoani atu pefea ki se fatukāiga ke fai tena tiute i taimi o vaegā fakalavelave penā?

⁶ Se mea ‵lei ke masaua ne te fatukāiga me e fai eiloa ne ia te galuega telā ne tuku atu ne Ieova ki a ia. E fakaasi mai i pati fakaosofia a Paulo me kafai e lagona ne se tino te fakatonuga tenā kae e ita fitifiti ma fakalogo ki ei, “ko tona uiga ko ‵teke io me ko tiaki ne ia te fakatuanaki.” E taumafai malosi se Kelisiano ke mo a ma maua ne ia se vaegā tulaga penā i mua o tena Atua. Kae se mea fakafanoanoa, me e seai eiloa “se loto a‵lofa” i tino e tokouke i te lalolagi i aso nei. (2 Timoteo 3:​1, 3) E tonu, e se fai ne tamana e tokouke olotou tiute, telā ko ‵tu atu ei olotou kāiga i se tulaga fakaalofa. E se penā loa te kilokiloga a tāgata a‵vaga Kelisiano ki olotou kāiga. E se pelā mo te tokoukega o tino kolā e ga‵lue fakatasi mo latou, e fakatāua eiloa ne fatukāiga Kelisiano a galuega ‵togi kolā e se tāua i te kilokiloga a tino, me e fakafiafia atu ei ki a Ieova te Atua, ona ko te mea e fai ei ke mafai ne latou o tausi atu ki olotou kāiga pele.

7. Kaia e fetaui ‵lei ei ke mafau‵fau ‵loto a mātua ki te fakaakoakoga a Iesu?

⁷ E mafai foki o fesoasoani atu ki ulu o kāiga ke mafaufau ‵loto ki te fakaakoakoga ‵lei katoatoa a Iesu. Ke masaua me ne fakasino fakavaloaga atu te Tusi Tapu ki a Iesu e pelā me ko te ‵tou “Tamana ki te se gata mai.” (Isaia 9:​6, 7) Ona ko ia ko te “Atamu fakaoti,” ne sui eiloa ne Iesu “te tino muamua ko Atamu” e pelā me ko te tamana o tino kolā e fakatuanaki atu ki a ia. (1 Kolinito 15:45) E se pelā mo Atamu telā ne fai mo fai se tamana manatu fakapito, e fai eiloa Iesu mo fai te ‵toe tamana ‵lei. E fai mai te Tusi Tapu e uiga ki a ia: “Tenei te mea e iloa ei ne tatou me se a te mea e taku ko te alofa: ko te ola o Keliso ne tuku mai mō tatou.” (1 Ioane 3:​16) E tonu, ne ofo atu eiloa mo te loto fiafia ne Iesu tena ola mō nisi tino. Kae i aso takitasi, ne fakamuamua faeloa ne ia a manakoga o nisi tino i lō ana manakoga i mea fo‵liki katoa. E maua eiloa ne koutou, mātua, a mea aogā mai te fakaakoako atu ki te vaegā alofa sē fakapito tenā.

8, 9. (a) Ne a mea e mafai o tauloto ne mātua mai i se aomatua e uiga ki te tausi atu mo te alofa sē fakapito ki olotou tama‵liki? (e) E fakaasi atu pefea ne mātua Kelisiano e tokouke te alofa sē fakapito?

⁸ E mafai o iloa ne mātua a mea e uke atu e uiga ki te alofa sē fakapito mai pati konei a Iesu ki tino fui‵fai o te Atua: “Ko uke a taimi ne manako au o fakapulupulu koutou ki oku lima, e pelā eiloa mo se moa fafine e fakapulupulu ana tama ki ona kapa‵kau!” (Mataio 23:37) Ne fakamatala manino mai i konei ne Iesu se ata fakatusa e uiga ki se aomatua telā e tausi ne ia ana punua mai lalo i ana kapa‵kau. E tonu, e uke a mea e tauloto ne mātua mai te tausiga a se aomatua ki ana punua faitalia te fakamataku o te mea tenā ki a ia. Kae e tāua foki ke matea atu a mea kolā e fai ne se aomatua i aso takitasi. E eva sāle atu latou mai i olotou ofaga o salasala ne meakai ma latou. Kafai foki loa ko fi‵ta malosi latou, e faka‵to atu ne latou a mea‵kai ki gutu o olotou punua, e folo fakavave ne punua a mea‵kai konā kae e masani o toe ma‵nako mai ki nisi mea‵kai e uke atu. E uke ‵ki a mea ola ne faite ne Ieova e “‵poto” ‵ki i te tausiga o olotou tama.​​—Faataoto 30:24.

⁹ I se auala tai ‵pau, e fakaasi atu eiloa ne mātua Kelisiano i te lalolagi kātoa te alofa sē fakapito penā. E ‵lei atu ki a koe ke logo‵mae koe i lō te talia ne koe ke fakalogo‵mae atu ki au tama‵liki. E se gata i ei, e talia ne koe mo te loto fiafia a mea faiga‵ta i aso takitasi ko te mea ke tausi atu ki tou kāiga. E tokouke i a koutou e ala ‵malu o ga‵lue i galuega fakafi‵ta kae ‵pafu. E galue malosi koe ke mafai o ‵togi a mea‵kai kolā e aogā mō te kāiga. E galue fakafi‵ta koe ko te mea ke maua ne au tama‵liki ne gatu ‵mā, se fale ‵lei, kae ke lava foki olotou akoakoga. Kae e fai eiloa koe penā i aso katoa, mō te fia o tausaga. E mautinoa eiloa me e fakafiafia atu ki a Ieova a vaegā taumafaiga penā! (Epelu 13:16) E tiga eiloa te feitu tenā, e ‵tau o masaua ne koe me e isi ne mea kolā e tāua atu i te tausiga o tou kāiga.

Te Tausiga i te Feitu Faka-te-Agaga

10, 11. Se a te ‵toe manakoga tāua o tino, kae se a te mea e ‵tau o fai muamua ne mātua Kelisiano ko te mea ke fakataunu te manakoga tenei i olotou tama‵liki?

¹⁰ E sili atu i te tāua o te tausi atu ki te kāiga i te feitu faka-te-agaga i lō te feitu faka-te-foitino. Ne fai mai Iesu: “E se na ko meakai fua e ola ei te tino, ka ko muna katoa kolā e ‵to mai i te gutu o te Atua.” (Mataio 4:4; 5:3) Ne a mea e mafai o fai ne koutou, mātua, ke tausi atu ei i te feitu faka-te-agaga?

¹¹ E uiga ki te mataupu tenei, kāti e seai aka foki se isi fuaiupu i te Tusi Tapu e sili atu te siki ‵soko mai i lō te Teutelonome 6:​5-7. Ke na ‵suke la tau Tusi Tapu ki ei kae faitau a fuaiupu konā. Masaua la me ne fai atu muamua ki mātua ke ati aka te lotou fesokotakiga mo te Atua, mai te fakamalosi aka o te lotou a‵lofa ki a Ieova kae taofi ‵mau foki ki ana muna i olotou loto. Ao, e ‵tau o apo malosi koe i te Muna a te Atua, mai te faitau mo te mafaufau ‵loto faeloa ki ei ko te mea ke ati aka tou malamalama mo tou alofa tonu ki auala, akoakoga fakavae, mo tulafono a Ieova. Ka iku atu i ei ki te faka‵fonuga o tou loto ki muna‵tonu fakaofoofogia mai te Tusi Tapu kolā ka fai ei koe ke fiafia, ke ofo, kae alofa ki a Ieova. Ka lava kae ‵toe a mea ‵gali e tuku atu ne koe ki au tama‵liki.​​—Luka 6:​45.

12. E mafai pefea o tau‵tali atu a mātua ki te fakaakoakoga a Iesu i te faiga ke ‵goto ifo a muna‵tonu i te Tusi Tapu ki olotou tama‵liki?

¹² E toka ‵lei a mātua kolā e ma‵losi i te feitu faka-te-agaga o fakaaogā a pati fakatonutonu i te Teutelonome 6:​7, ke ‘faka‵goto ifo’ a pati a Ieova ki loto o olotou tama‵liki i so se avanoaga. Ke ‘faka‵goto’ ki loto ko tena uiga ke akoako kae faka‵mafa atu faeloa a mea konā. E iloa ‵lei ne Ieova me i a tatou katoa​​—maise eiloa a tama‵liki​​—e ‵tau o akoako atu faeloa ki ei ko te mea ke masaua ne latou. Ne fakaaogā faeloa ne Iesu a te auala tenā i tena galuega talai. E pelā mo ana akoakoga ke maua ne ana soko te loto maulalo i lō te fakamata‵mata mo te fakatau‵fai, ne fakaaogā ne ia a auala kese‵kese ke akoako atu ei te akoakoga fakavae e tasi fua tenā. Ne akoako atu a ia e auala i te fakasakosako atu, i te faiga o tala fakatusa, ke oko foki eiloa ki ana faifaiga. (Mataio 18:​1-4; 20:​25-​27; Ioane 13:​12-​15) Se mea fakaofoofogia me ne seki ‵fiu lele eiloa a Iesu. E penā foki loa a mātua, e ‵tau o ‵sala atu latou ki auala kolā e mafai ei o akoako atu ne latou a muna‵tonu fakavae ki olotou tama‵liki, kae fakafoki‵foki atu faeloa mo te kufaki a fakatakitakiga a Ieova ke oko ki te taimi ko malamalama ei a tama‵liki, kae fakaaogā foki ne latou.

13, 14. Ne a nisi taimi e mafai ei o faka‵goto ifo ne mātua a muna‵tonu i te Tusi Tapu ki olotou tama‵liki, kae ne a tusi e mafai o fakaaogā ne latou?

¹³ E aogā ‵ki eiloa a sukesukega faka-te-kāiga ki te faiga o vaegā akoakoga penā. E tonu, a te sukesukega faka-te-kāiga telā e fai faeloa, e fakamalosi loto, kae e fakafiafia foki, ko te auala tāua e tasi e maua ei ne te kāiga te malosi i te feitu faka-te-agaga. E fia‵fia loa a kāiga Kelisiano i te lalolagi kātoa ki vaegā sukesukega penā, mai te fakaaogāga faka‵lei o tusi kolā ne tuku mai e auala i te fakapotopotoga a Ieova kae fakafetaui aka te sukesukega ki manakoga o tama‵liki. A te tusi ko te Learn From the Great Teacher ne fai mo fai se fakamanuiaga tafasili i te gali i te feitu tenei, e pelā foki loa mo te tusi ko te Questions Young People Ask​​—Answers That Work.b Kae ko te sukesukega faka-te-kāiga e se ko te taimi fua e tasi e akoako atu ei a tama‵liki.

¹⁴ E pelā mo te mea e fakaasi mai i te Teutelonome 6:​7, e uke ‵ki eiloa a taimi e mafai ei o sau‵tala koutou mo otou tama‵liki e uiga ki mea faka-te-agaga. Faitalia me e faima‵laga fakatasi atu koutou, e ga‵lue fakatasi, io me e malōlō fakatasi, e mafai eiloa o maua ne avanoaga ke tausi atu ki manakoga faka-te-agaga o otou tama‵liki. E tonu, e se ‵tau o fai atu faeloa pelā me se “lauga” a muna‵tonu i te Tusi Tapu ki au tama‵liki. I lō te fai penā, taumafai ke fai a sau‵talaga a te kāiga e pelā me ne taimi fakafiafia kae fakamalosi loto. E pelā mo te mekesini ko te Awake! e maua i ei a mataupu kese‵kese e uke. E mafai o tuku mai i vaegā mataupu penā ne avanoaga mō sau‵talaga e uiga ki manu kolā ne faite ne Ieova, toe koga ‵gali i te lalolagi kātoa, mo mea fakaofoofogia e uiga ki tuu mo olaga a itukāiga tino kese‵kese. E mafai o fakamalosi atu a vaegā sau‵talaga penā ke momea aka te fia fai‵tau o tama‵liki ki tusi kolā e tuku mai ne te tavini fakamaoni kae poto.​​—Mataio 24:​45-​47.

15. E mafai pefea o fesoasoani atu a mātua ke matea ne olotou tama‵liki a te fakafiafia mo te aogā o te galuega talai?

¹⁵ A te aofia faeloa i sau‵talaga fakamalosi loto mo au tama‵liki ka fesoasoani atu ei ke fakamalie aka te suā manakoga faka-te-agaga. E ‵tau o iloa ne tama‵liki Kelisiano a te manakoga ke fakaasi atu te lotou fakatuanaki i se auala magoi ki nisi tino. Kafai ko sau‵tala koutou ki nisi manatu ‵gali i Te Faleleoleo Maluga io me ko te Awake!, e mafai o onoono atu ki avanoaga ke fakafetaui aka te mataupu tenā ki te galuega talai. E pelā mo te fesili atu, penei: “E a, e se se mea gali ke iloa ne tino e tokouke a te mea tenei e uiga ki a Ieova? E mafai pefea o fai ne tatou se tino ke fiafia ki te mataupu tenei?” E mafai o fesoasoani atu a vaegā sau‵talaga penā ki tama‵liki ke fakalasi aka te lotou fia‵fia o fakaasi atu ki nisi tino a mea kolā e tau‵loto ne latou. Telā la, kafai ko ‵kau atu au tama‵liki ki a koe i te galuega talai, ko lavea ei ne latou se fakaakoakoga tonu o vaegā sau‵talaga penā. E mafai foki o matea ne latou te fakafiafia o te galuega talai mo te lotomalie telā e maua mai i ei.​​—Galuega 20:35.

16. Ne a mea e mafai o tauloto ne tama‵liki mai te fakalogo‵logo atu ki ‵talo a olotou mātua?

¹⁶ E tausi atu foki a mātua ki manakoga faka-te-agaga o olotou tama‵liki māfai ko ‵talo latou. Ne akoako ne Iesu ana soko ke iloa ne latou o ‵talo, kae ne ‵talo fakatasi foki latou i taimi e uke. (Luka 11:​1-​13) Mafaufau la ki te uke o mea ne tau‵loto ne latou mai te lotou ‵kau fakatasi mo te Tama eiloa e tokotasi a Ieova i te faiga o ‵talo! E penā foki eiloa te auala e iloa ei ne au tama‵liki a mea e uke atu mai i au ‵talo. E pelā mo te iloa ne latou me e manako a Ieova ke fai‵pati atu tatou ki a ia mai ‵tou ‵kanoloto, kae fakaasi atu ki a ia so se mea telā e manava‵se tatou ki ei. E tonu, e mafai o fesoasoani atu au ‵talo ke iloa ne au tama‵liki te mea tonu faka-te-agaga tāua tenei: E mafai o maua ne latou se fesokotakiga ‵lei mo te lotou Tamana faka-te-lagi.​​—1 Petelu 5:7.

Te Tausi Atu ki Olotou Lagonaga

17, 18. (a) E fakaasi mai pefea i te Tusi Tapu a te tāua o te fakaasi atu o te alofa ki tama‵liki? (e) E ‵tau o fakaakoako atu pefea a tamana ki a Ieova i te fakaasiatuga o te alofa ki olotou tama‵liki?

¹⁷ E tonu, e maua foki ne tama‵liki a fakalavelave i olotou lagonaga. E fakaasi atu i te Muna a te Atua ki mātua a te tāua o te tausi atu ki tama‵liki i te feitu tenei. E pelā mo te fakamalosi atu ki fāfine koi fo‵liki ke ‘a‵lofa ki olotou tama‵liki.’ (Tito 2:4) E fetaui eiloa te faiga tenā mo te mauaga ne mātua kolā koi fo‵liki konei te mafaufau ‵lei. Ao, a te fakaasiatuga o te alofa ki se tamaliki e fakaasi atu ei te ‵lei o te mafaufau. E akoako atu i ei ki te tamaliki ke iloa ne ia o alofa kae e maua ei ne ia a mea aogā i tena olaga kātoa. I te suā feitu la, se mea valea ke fakatamala o fakaasi atu te alofa ki se tamaliki. E māfua mai i ei a logo‵maega matagā kae e fakaasi mai i ei te fakatamala o fakaakoako atu ki a Ieova, telā e fakaasi mai ne ia te alofa lasi faitalia ‵tou vāivāiga.​​—Salamo 103:​8-​14.

¹⁸ E gasuesue muamua foki a Ieova o fakaasi mai te alofa ki ana tama‵liki i te lalolagi nei. E pelā mo muna i te 1 Ioane 4:​19, “i te Atua ne mua o alofa mai ki a tatou.” Kae maise eiloa koutou e tamana, e ‵tau o tau‵tali atu ki te fakaakoakoga a Ieova, mai te gasuesue muamua o ati aka se fesokotakiga alofa i te vā o koutou mo otou tama‵liki. E fakamalosi atu te Tusi Tapu ki tamana ke mo a ma fakaitaita atu ki olotou tama‵liki, “i te mea mana loto vāivāi ei latou.” (Kolose 3:​21) E se uke a mea e silia atu te lotou fakaitaita atu ki tama‵liki i lō te iloa ne latou me e se a‵lofa io me e se fakatāua ne mātua a latou. E ‵tau o masaua ne tamana kolā e faigata o fakaasi atu olotou lagonaga, a te fakaakoakoga a Ieova. Ne faipati mai eiloa a Ieova mai te lagi ke fakaasi mai ei tena taliaga mo tena alofa ki tena Tama. (Mataio 3:​17; 17:5) Ko tafaga la te lasi o te fakamalosiga ne maua ne Iesu mai i ei! E mafai foki o maua ne tama‵liki te malosi mo te loto toa māfai e fakaasi ‵tonu atu ne mātua te lotou a‵lofa mo te lotou fia‵fia ki a latou.

19. Kaia e tāua ei a te faiga o polopolokiga, kae se a te kilokiloga paleni telā e ‵tau o taumafai ki ei a mātua Kelisiano?

¹⁹ E tonu, e sili atu te alofa o te mātua i lō te faiatuga fua o pati. E sili atu te tāua ke fakaasi atu te alofa e auala i faiga. A te tausi atu i te feitu faka-te-foitino mo te feitu faka-te-agaga e mafai o fai mo fai se fakaasiga o te alofa o mātua, kae maise eiloa māfai e fai penā ne mātua i se auala telā e fakaasi atu i ei me i te alofa ko te pogai tāua e fai ei ne latou a mea konā. E se gata i ei, a te polopolokiga o tama‵liki se fakaasiga tāua foki tenā o te alofa o te mātua. E tonu, a Ieova “e fakasala io me polopoloki ne ia tino katoa kolā e alofa a ia ki ei.” (Epelu 12:6) I te suā feitu la, a te fakatamala o polopoloki atu, se fakamaoniga tenā o te takalia‵lia o mātua ki olotou tama‵liki! (Faataoto 13:24) E paleni faeloa a Ieova i te avatuga o polopolokiga ‵tau “i te auala tonu.” (Ielemia 46:28) E se faigofie ke maua ne mātua sē ‵lei katoatoa te vaegā paleni tenā i te faiga o polopolokiga. Kae e aogā ‵ki eiloa ke taumafai malosi koutou ki ei. A polopolokiga kolā e fai mo te alofa e aunoa mo te gutugutulua e fesoasoani atu eiloa ke tupu aka se tamaliki i se olaga fiafia kae aogā. (Faataoto 22:6) E mata, e se tenā loa te mea e ma‵nako ki ei a mātua Kelisiano katoa?

20. E mafai pefea o tuku atu ne mātua ki olotou tama‵liki te ‵toe avanoaga ‵lei ke filifili ne latou te “ola”?

²⁰ Kafai e fai ne koutou mātua te galuega tāua telā ne tuku atu ne Ieova ki a koutou​​— ko te tausi atu ki manakoga o otou tama‵liki i te feitu faka-te-foitino, te feitu faka-te-agaga, mo olotou lagonaga​​—ka lasi ‵ki eiloa te taui e maua ne koutou mai ei. E tuku atu i ei ne koutou ki otou tama‵liki te ‵toe avanoaga ‵lei ke “filifili” ne latou te “ola” kae ke tumau foki i te “ola.” (Teutelonome 30:19) A tama‵liki kolā e filifili ke tavini atu ki a Ieova kae tumau i te sa‵sale i te auala ki te ola i te taimi e ‵tupu aka ei latou, e fai ei olotou mātua ke fia‵fia malosi ‵ki. (Salamo 127:​3-5) Ka tumau eiloa ki te se-gata-mai a te vaegā fiafia tenā! Kae e mafai la pefea o tavae atu nei a talavou ki a Ieova? Ka onoono tatou ki te fesili tenā i te suā mataupu.

[Fakamatalaga mai lalo]

Ka Tali Mai Pefea ne Koe?

Ne a mea e mafai o fai ne mātua ke tausi atu ki olotou tama‵liki

• i te feitu faka-te-foitino?

• i te feitu faka-te-agaga?

• mo olotou lagonaga?

[Ata i te itulau e 8]

E ga‵lue malosi a manu eva e uke ke tausi atu ki olotou punua

[Ata i te itulau e 10]

E ‵tau o ati aka mua ne mātua te lotou tulaga faka-te-agaga

[Ata i te itulau e 11]

E maua ne mātua a taimi e uke ke akoako atu ei olotou tama‵liki e uiga ki te Māfuaga

[Ata i te itulau e 12]

E maua ne tama‵liki a te malosi mo te loto toa mai te lotou iloa me e fia‵fia olotou mātua ki a latou