A Ieova o te ‵Tou Fesoasoani

‘E maua toku fesoasoani mai i a Ieova, telā ne faite ne ia te lagi mo te lalolagi.’​—Salamo 121:2.

1, 2. (a) Kaia e mafai ei o fai atu me e ma‵nako katoa tatou ki se fesoasoani i nisi taimi? (e) A Ieova se vaegā Tino fesoasoani pefea?

KO OI te tino i a koutou e se manako ki se fesoasoani? A te tonuga loa, e ma‵nako eiloa a tatou katoa ki se fesoasoani i nisi taimi​—ke fakafesagai atu ki se fakalavelave faigata, ke kufaki i te logomae ona ko te mate o se tino pele, ke fa‵ki i se tofotofoga faigata. Kafai e ma‵nako ki se fesoasoani, e ‵fuli atu eiloa a tino ki olotou taugasoa atafai. A te fakaasi atu o tou fakalavelave ki se taugasoa e fakafaigofie aka ei te amoga tenā. Kae e isi se tapulā o te fesoasoani e mafai o maua mai i tino. E se gata i ei, e mafai o sē toka a nisi tino o fesoasoani atu ki a koe.

² Kae e isi se Tino Fesoasoani telā e seai se tapulā ki tena malosi mo mea kolā e mafai ne ia o fakaaogā. E se gata i ei, e fakatalitonu mai me ka sē tuku tiaki ne ia tatou. Ko ia ko te tino telā ne fakamatala mai ne te faisalamo mo te loto talitonu: ‘E maua toku fesoasoani mai i a Ieova.’ (Salamo 121:2) Kaia ne talitonu ei te faisalamo me ka fesoasoani atu eiloa a Ieova ki a ia? Ke tali te fesili tenā, ke na iloilo aka ne tatou a te Salamo 121. A te faiga penā e fai i ei ke iloa ne tatou te pogai e ‵tau ei o fakalago‵lago tatou ki a Ieova e pelā me ko te ‵tou Fesoasoani.

Se Fesoasoani Telā e Seai Sena Tapulā

3. Ko mauga fea kāti ne kilo atu ki ei te faisalamo, kae kaia?

³ Ne kamata ne te faisalamo ana pati mai te fakasino atu ki mea a Ieova ne faite e pelā me ko te fakavae o tena loto talitonu: “E kilo ake oku mata ki mauga; e a, e maua mai fea toku fesoasoani? E maua toku fesoasoani mai te Aliki [ko Ieova], telā ne faite ne ia te lagi mo te lalolagi.” (Salamo 121:​1, 2) Ne seki kilo atu fua a te faisalamo ki so se mauga. I te taimi ne tusi ei a pati konei, kae ko oti ne tu atu a te faletapu o Ieova i Ielusalema. A te fa‵kai tenā, telā e tu i luga i mauga ma‵luga o Iuta, ko te koga nofo o Ieova i se auala fakatusa. (Salamo 135:21) Kāti ne kilo atu a te faisalamo ki mauga o Ielusalema telā ne tu i ei te faletapu o Ieova, mo te loto talitonu me ka maua ne ia te fesoasoani mai i a Ieova. Kaia ne talitonu katoatoa ei te faisalamo me ka fesoasoani atu eiloa a Ieova ki a ia? Me “ne faite ne ia te lagi mo te lalolagi.” A te tonuga loa, ne fai mai eiloa te faisalamo, ‘E seai eiloa se mea e mafai o taofi ne ia a te Atua malosi katoatoa mai te fesoasoani mai ki a au!’​—Isaia 40:26.

4. Ne fakaasi mai pefea ne te faisalamo me e lavea faeloa ne Ieova a manakoga o ana tino, kae kaia e fakamafanafana mai ei te manatu tenā?

⁴ Ne toe fakamatala mai te faisalamo me e lavea faeloa ne Ieova a manakoga o ana tavini: “Ka se tuku ne ia koe ke siga; i tou tausi e mataalaala faeloa. A te leoleo o Isalaelu e se ti moe.” (Salamo 121:​3, 4) E se mafai eiloa o talia ne te Atua “ke siga” io me tuku tiaki ne ia a te tino telā e talitonu ki a ia. (Faataoto 24:16) Kaia? Me i a Ieova e fai pelā me se tausi mamoe mataalaala telā e tausi atu ki ana mamoe. E a, e se se manatu fakamafanafana loto tenā? Ka sē mafai eiloa o ‵moe ana mata ki manakoga o ana tino. A latou ko mea kolā e tausi faka‵lei ne ia i po mo ao.

5. Kaia e fai i ei pelā me tu atu a Ieova i te “feitu fakaatamai”?

⁵ Ona ko tena loto talitonu me ka puipui mo te fakamaoni ne Ieova ana tino, ne tusi mai ei te faisalamo: “A Ieova e leoleo ne ia koe; a Ieova ko tou malūga i tou feitu fakaatamai. E se fi‵ta koe i te ‵vela o te la i te ao e pelā foki te masina i te po.” (Salamo 121:​5, 6, Tusi Paia, Samoa) Ki se tino faimalaga telā e sasale i te Middle East, e fai se koga malu e pelā me se puipuiga mai te ‵vela o te la. Koi fai eiloa a Ieova mo fai se koga malu ki ana tino, e puipui ei latou mai fakalavelave kolā e fai pelā mo te ‵vela o te la. E fai mai foki pelā me nofo atu a Ieova i te “feitu fakaatamai.” I taua i aso mua, e se puipui katoatoa a te lima fakaatamai o sotia ne te talitā telā e puke i tena lima fakamaui. E mafai o maua sena puipuiga mai se taugasoa fakamaoni telā e taua mai i tena feitu fakaatamai. E pelā mo te taugasoa tenā, e toka faeloa a Ieova o fesoasoani atu ki ana tino tapuaki fakamaoni i taimi katoa.

6, 7. (a) E fakamaoni mai pefea ne te faisalamo me e se mafai o gata te fesoasoani o Ieova ki ana tino? (e) Kaia e mafai ei o ‵pau ‵tou loto talitonu mo te faisalamo?

⁶ E mata, e mafai o fakagata ne Ieova tena fesoasoani atu ki ana tino? E se mafai eiloa o tupu te mea tenā. Ne fakaoti ne te faisalamo ana pati penei: “A te Aliki ka ‵pui ne ia koe mai i mea faiga‵ta katoa; ka tausi faka‵lei ne ia koe ke malu ‵lei. Ka tausi ne ia koe i tou vau mo tou fano, nei ke oko eiloa ki te se gata mai.” (Salamo 121:​7, 8) I te fuaiupu e 5, ne fai mai te faisalamo: ‘A Ieova e leoleo ne ia koe,’ telā e fakasino atu ki te vaitaimi tenā. Kae i fuaiupu konei, ne tusi mai te faisalamo: ‘A Ieova ka ‵pui ne ia koe,’ telā e fakasino atu i ei ki aso mai mua. E tonu, e fakamaoni atu i ei ki tino tapuaki ‵tonu me ka fesoasoani atu eiloa a Ieova ki a latou i aso mai mua. Faitalia te koga e olo latou i ei, faitalia a fakalavelave e fe‵paki mo latou, e oko atu faeloa tena fesoasoani ki a latou.​—Faataoto 12:21.

⁷ E tonu, ne talitonu katoatoa a te tino ne tusi ne ia te Salamo 121 me e tausi faeloa ne te Atua Malosi Katoatoa ana tavini e pelā me se tausi mamoe atafai kae e pelā foki me se leoleo mataalaala. E uke a pogai e ‵tau ei o maua ne tatou a te loto talitonu telā ne maua ne te faisalamo, me i a Ieova e se mafai o ‵fuli. (Malaki 3:6) E mata, e fakauiga i ei me ka maua faeloa ne tatou te puipuiga i te feitu faka-te-foitino? Ikai, kae kafai e ‵kilo atu faeloa tatou ki a ia e pelā me ko te ‵tou Fesoasoani, ka puipui eiloa ne ia tatou mai mea katoa kolā e mafai o aumai i ei se fakamaseiga faka-te-agaga ki a tatou. Se mea ‵lei ke fesili ifo penei, ‘E fesoasoani mai la pefea a Ieova ki a tatou?’ Ke na iloilo nei ne tatou a auala e fa e fai ei penā. Ka sau‵tala tatou i te mataupu tenei ki auala ne fesoasoani atu ei a ia ki ana tavini i aso o te Tusi Tapu. I te suā mataupu, ka onoono tatou ki auala e fesoasoani mai ei a ia ki ana tino i aso nei.

Fesoasoani Mai te Kau Agelu

8. Kaia e se ‵poi ei tatou me e fia‵fia lasi a agelu o fesoasoani atu ki tavini a te Atua i te lalolagi?

⁸ E ‵nofo mai lalo i te pulega a Ieova a te fia miliona o agelu. (Tanielu 7:​9, 10) E fai eiloa ne tama faka-te-agaga fakamaoni konei a tena loto. (Salamo 103:20) E iloa ‵lei ne latou me e alofa malosi a Ieova ki ana tino tapuaki kae e manako foki o fesoasoani atu ki a latou. E se se mea fakapoi me e ma‵nako foki a agelu ke maua ne tavini a te Atua i te lalolagi nei a mea ‵lei. (Luka 15:10) E mautinoa eiloa me e ‵tau o fia‵fia a agelu ke fakaaogā latou ne Ieova ke fesoasoani atu ki tino. I auala fea ne fakaaogā ei ne Ieova a agelu ke fesoasoani atu ki ana tavini i aso mua?

9. Ke fai mai se tala e uiga ki te auala ne fakamalosi aka ei a agelu ne te Atua ke puipui ne latou ana tino fakamaoni.

⁹ Ne tuku atu ne te Atua ki agelu a te malosi ke puipui kae faka‵sao ne latou ana tavini fakamaoni. Ne fesoasoani atu a agelu e tokolua ki a Lota mo ana tama‵liki fa‵fine ke ‵sao i te fakaseaiga o Sotoma mo Komolo. (Kenese 19:​1, 15-17) Ne tamate ne se agelu e tokotasi fua a sotia Asulia e toko 185,000 kolā ne fakamataku‵taku atu ki tino i Ielusalema. (2 Tupu 19:35) I te taimi ne ‵pei ei a Tanielu ki te lua o leona, “ne uga mai ne te Atua tena agelu ke pono a gutu o leona.” (Tanielu 6:​21, 22) Ne fakasaoloto ne se agelu a te apositolo ko Petelu mai te falepuipui. (Galuega 12:​6-11) E fakamatala mai foki i te Tusi Tapu a nisi puipuiga e uke ne fai ne agelu, e fakamaoni mai i ei te ‵tonu o pati i te Salamo 34:7: “E leoleo ne tena agelu a latou kolā e ma‵taku ki te Aliki kae faka‵sao ne ia latou mai mea faiga‵ta.”

10. Ne fakaaogā pefea ne Ieova se agelu ke fakamalosi atu ki te pelofeta ko Tanielu?

¹⁰ I nisi taimi e fakaaogā ne Ieova a agelu ke fakamalosi atu ki ana tavini fakamaoni. E maua atu i te Tanielu mataupu e 10 se fakaakoakoga fakaotia loto o te mea tenā. I te vaitaimi tenā, ko tai katoa ei te 100 tausaga o Tanielu. Ne loto vāivāi a te pelofeta tenā ona loa ko te sē ‵lei o te tulaga o Ielusalema mo te tuai o te toe fakatuakaga o te faletapu. Ne manavase foki tou tagata i te otiga ne lavea ne ia se fakaasiga fakamataku. (Tanielu 10:​2, 3, 8) Ne uga atu ei ne te Atua alofa se agelu ke fakamalosi atu ki a ia. Ne fakamasaua atu faeloa ne te agelu ki a Tanielu me e ‘alofagina’ a ia ne te Atua. Se a te ikuga? Ne fai atu te pelofeta matua tenā ki te agelu: “Au ko gasolo o malosi ne fai ne koe.”​—Tanielu 10:​11, 19.

11. Se a te fakaakoakoga e tasi ne fakaaogā ei a agelu ke takitaki ne latou te talaiatuga o te tala ‵lei?

¹¹ Ne fakaaogā foki ne Ieova a agelu ke takitaki ne latou te faiga o te galuega ko te talaiatuga o te tala ‵lei. Ne fakatonu atu se agelu ki a Filipo ke talai atu ki te eunuka mai Aitiope e uiga ki te Keliso, papatiso ei a ia fakamuli. (Galuega 8:​26, 27, 36, 38) I se taimi toetoe mai tua ifo i ei, ne manako te Atua ke folafola atu te tala ‵lei ki tino o Fenua Fakaa‵tea kolā e seki pilitome. E auala i se fakaasiga, ne fakasae atu se agelu ki a Konelio, se tino o fenua fakaatea telā ne mataku ki te Atua, kae fakatonu atu ke fai sena fekau ki a Petelu ke fanatu ki a ia. I te taimi ne maua ei a Petelu ne avefekau a Konelio, ne fai atu latou: “Ko Konelio . . . ne fakatonu . . . ne se agelu a te Atua, ke ami mai koe ki tona fale, ko te mea ke fakalogologo a ia ki au muna.” Ne fanatu ei a Petelu o fai te mea tenā, kae ne fai i ei a tino muamua eiloa mai fenua fakaa‵tea kolā ne seki pilitome mo fai ne vaega o te fakapotopotoga Kelisiano. (Galuega 10:​22, 44-48) Ke mafaufau la ki ou lagonaga māfai e iloa ne koe me ne fesoasoani atu se agelu ke fesokotaki atu koe ki se tino telā e ‵tau i ei!

Fesoasoani e Auala i te Agaga Tapu

12, 13. (a) Kaia ne maua ei ne apositolo a Iesu a pogai ‵lei ke tali‵tonu me ka fakatasi atu te agaga tapu ki a latou? (e) I te auala fea ne fakamalosi atu ei te agaga tapu ki Kelisiano i te senitenali muamua?

¹² Mai mua malie o tena mate, ne fakamaoni atu ne Iesu ki ana apositolo me ka isi eiloa se lotou fesoasoani. Ka tuku atu ne te Tamana ki a latou a “te Fesoasoani, ko te Agaga Tapu tenā.” (Ioane 14:26) Ne maua ne te kau apositolo a pogai ‵lei ke tali‵tonu ei latou me ka fesoasoani atu te agaga tapu ki a latou. E se gata i ei, e ‵fonu a te Tusi Tapu i fakaakoakoga e uiga ki te auala ne fakaaogā ei ne Ieova tena agaga tapu, te ‵toe malosi sili, ke fesoasoani atu ki ana tino.

¹³ I taimi e uke, ne fakaaogā te agaga tapu ke fakamalosi atu ki tino ke fai ne latou te loto o Ieova. Ne fakamalosi ne te agaga tapu a Famasino ke faka‵sao ne latou a Isalaelu. (Famasino 3:​9, 10; 6:34) Ne fakamalosi atu foki ne te agaga tapu eiloa tenā a Kelisiano i te senitenali muamua ke tumau i te talai atu mo te loto toa faitalia a ‵tekemaiga kese‵kese. (Galuega 1:8; 4:31) E fakamaoni mai ne te manuia o te lotou galuega a te malosi o te agaga tapu. Ne mafai pefea o fakasalalau atu a te fekau e uiga ki te Malo i te lalolagi i aso konā ne “tino e seki a‵koga” e aunoa mo te fesoasoani o te agaga tapu?​—Galuega 4:13; Kolose 1:23.

14. Ne fakaaogā pefea ne Ieova a tena agaga tapu ke fakalauefa aka ei te malamalama o ana tino?

¹⁴ Ne fakaaogā foki ne Ieova a tena agaga tapu ke fakalauefa atu te malamalama o ana tino. Ona ko te fesoasoani o te agaga o te Atua, ne mafai ei ne Iosefa o fakamatala atu te uiga o moemiti a Falao. (Kenese 41:​16, 38, 39) E auala i tena agaga tapu, ne fai i ei ne Ieova ke fakaasi atu ana fuafuaga ki tino loto mau‵lalo kae ke ‵funa aka mai tino fakamata‵mata. (Mataio 11:25) Tela la, e uiga ki mea ne fakatoka ne Ieova “mō latou kolā e a‵lofa ki a ia,” ne fai mai ei te apositolo ko Paulo: “Ka ko tatou tonu eiloa ne fakaasi ki ei ne te Atua, . . . ana mea ‵funa e alatu i tena Agaga.” (1 Kolinito 2:​7-10) Ko te fesoasoani fua o te agaga tapu e mafai ei ne se tino o malamalama ‵lei i te loto o te Atua.

Fesoasoani Mai te Muna a te Atua

15, 16. Ne a mea ne fai atu ki a Iosua ke fai ne ia ko te mea ke poto a ia i ana mea e fai?

¹⁵ A te Muna a Ieova e “aogā ki te akoakoga,” kae fai i ei te tavini a te Atua ke “maua ne ia te fakamaoniga, ke lava tena uta e fai ei ne ia so se galuega ‵lei.” (2 Timoteo 3:​16, 17) E maua i te Tusi Tapu a fakaakoakoga e uke e uiga ki te auala ne fesoasoani atu ei ki tino o te Atua a nisi vaega o tena Muna kolā ko oti ne tusi ki lalo.

¹⁶ E fesoasoani mai te Tusi Tapu ke maua ne tino tapuaki o te Atua a fakatakitakiga ‵lei katoatoa. I te taimi ne tuku atu ei ki a Iosua te tiute ke takitaki ne ia a tino Isalaelu, ne fai atu ki a ia: “Masaua ke faitau faeloa te tusi o te Tulafono [telā ne tusi ne Mose] i taimi e fai otou tapuakiga. Masaua o tauloto faka‵lei i ao mo po, kae taumafai o tau‵tali i mea katoa e tusi i ei. Kafai e fai ne koe te mea tenā, ko koe ka maumea kae manuia.” E lavea ne tatou me ne seki tauto atu a te Atua me ka tuku fakavavega atu ki a Iosua a te poto. I lō te fai penā, kafai e faitau kae mafaufau ‵loto a Iosua ki te “tusi o te Tulafono,” kae ka poto a ia i ana mea e fai.​—Iosua 1:8; Salamo 1:​1-3.

17. Ne fesoasoani atu pefea te vaega mua o te Tusi Tapu ki a Tanielu mo te tupu ko Iosia?

¹⁷ Ne fesoasoani foki a te Muna tusia a te Atua ke fakaasi mai i ei tena loto mo ana fuafuaga. E pelā mo Tanielu, ne iloa ne ia mai i te tusi ko Ielemia a te leva ne tuku tiaki ei a Ielusalema. (Ielemia 25:11; Tanielu 9:2) Ke mafaufau foki ki mea ne ‵tupu i te taimi ne pule ei te tupu ko Iosia i Iuta. I te taimi tenā, ko oti ne tiakina ne te fenua tenā a Ieova, kae ko oti ne seki fakamaoni a tupu o fai ne ‵kopi totino o te Tulafono ma latou kae tau‵tali atu i ei. (Teutelonome 17:​18-20) Kae i te taimi koi fakafou ei te faletapu, ne maua i ei a “te tusi o te Tulafono” telā kāti ne tusi eiloa ne Mose. Kāti a te tusi tenei ko te ‵kopi muamua eiloa, telā ne fakaoti i se 800 tausaga mai mua atu i ei. I te otiga ne fakalogologo ki mea i loto i ei, ne iloa ne Iosia a te ‵mao o te fenua mai te faiga o te loto o Ieova, kae ne gasuesue a te tupu o fai a mea mautinoa ke fai ei a mea kolā e tusi i te tusi. (2 Tupu 22:8; 23:​1-7) E manino ‵lei eiloa me ne fesoasoani atu ki tino o te Atua i aso mua a te vaega mua tenā o te Muna a te Atua telā ne maua ne latou, i ne?

Fesoasoani e Auala i Taina Tali‵tonu

18. Kaia e fai atu ei tatou me ko Ieova eiloa te māfuaga o te fakatau fesoasoani o ana tavini?

¹⁸ A te fesoasoani telā e tuku mai ne Ieova e masani o maua e auala i taina tali‵tonu. E tonu, ko Ieova eiloa te māfuaga o te fesoasoani telā e tuku atu ne se tino tapuaki tonu e tokotasi ki se isi tino. Kaia e fai atu ei tatou penā? Ona ko pogai e lua. Muamua la, me e aofia i ei te agaga tapu o Ieova. E ‵fua mai i te agaga tenā a fuataga, e aofia i ei te alofa mo te aga‵lei, i tino kolā e ‵sala atu ki ei. (Kalatia 5:​22, 23) Tela la, kafai e fakamalosigina se tavini a te Atua ke fesoasoani atu ki se isi tavini, se fakamaoniga eiloa tenā o galuega a te agaga o Ieova. A te lua o mea, ne faite tatou ki foliga o te Atua. (Kenese 1:26) E fakauiga i ei me e mafai o fakaasi atu ne tatou ana uiga, e pelā mo tena aga‵lei mo tena alofa. Tela la, kafai e fakatau fesoasoani a tavini a Ieova, e māfua mai eiloa a te fesoasoani tenā mai te Māfuaga o te uiga tenā.

19. E ‵tusa mo mea e fakaasi mai i te Tusi Tapu, ne fesoasoani atu pefea a Ieova e auala i taina tali‵tonu?

¹⁹ Ne fesoasoani atu pefea a Ieova ki taina tali‵tonu i aso o te Tusi Tapu? E masani sāle o fai ne Ieova se tokotasi o ana tavini ke polopoloki atu se isi tino, e pelā mo pati polopoloki fakaola tino ne fai ne Ielemia ki a Paluka. (Ielemia 45:​1-5) I nisi taimi, ne fakamalosi atu ki tino tapuaki ‵tonu ke fesoasoani atu i te feitu faka-te-foitino ki olotou taina, e pelā mo te uiga fia fesoasoani telā ne fakaasi atu ne Kelisiano i Maketonia mo Akaia ki olotou taina puapuaga i Ielusalema. Ne fai mai a Paulo me i te uiga kaimalie tenā se fakaasiga eiloa o te loto “fakafetai . . . ki te Atua.”​—2 Kolinito 9:11.

20, 21. Ko fakanofonofoga fea ne fakamalosi aka ei a Paulo ne taina mai Loma?

²⁰ Kae sili atu i ei ko tala o tavini a Ieova kolā ne taumafai o fakatau fakama‵losi aka latou i a latou eiloa. Ke mafau‵fau ki te fakaakoakoga telā ne aofia i ei te apositolo ko Paulo. I tena auala ki Loma e pelā me se pagota, ne faimalaga atu a Paulo i te auala o te kau Loma telā ne fakaigoa ki te Appian Way. A te vaega fakaoti o te malaga ne masei ‵ki me ne ‵tau o faima‵laga atu latou i se koga pelapelā kae malalo.a Ne iloa ne taina i te fakapotopotoga i Loma i a Paulo ka fanatu i konā. Ne a mea ne fai ne latou? E mata, ne fakatalitali fua latou i loto i olotou fale ‵gali i te fa‵kai ke oko atu a Paulo ko fakafetaui atu ei latou ki a ia?

²¹ Ne fakamatala mai ne Luka, se tino e tokotasi ne tusi ne ia se vaega o te Tusi Tapu kae ne olo fakatasi atu mo Paulo i te malaga tenā, a te mea ne tupu: “Ne logo tala a taina tali‵tonu i Loma e uiga ki a matou. Nisi ne ma‵laga mai i te Maketi o Apiasi, nisi ne ma‵laga mai i Fale Talimālō e Tolu o fakafetaui ki a matou.” E mafai o fakaataata ne tatou te mea tenā? I te iloaga ne latou i a Paulo e fanatu, ne faima‵laga atu se potukau o taina mai Loma o fakafetaui ki a ia. Ne faitali te suā potukau i te Maketi o Apiasi, se koga e masani o ma‵nava i ei a tino kae e ‵tusa mo te 74 kilomita te ‵mao mai Loma. Kae ko te ‵toega o taina ne fai‵tali i Fale Talimālō e Tolu, ne koga ma‵nava kāti e 58 kilomita te ‵mao mo te fa‵kai. Ne a lagonaga o Paulo e uiga ki ei? Ne tusi mai a Luka: “I te mateaga ne Paulo a latou, siki ei tena fakafetai ki te Atua, malosi ei mo tena loto.” (Galuega 28:15) Ke mafaufau la ki te lasi o te fakamalosiga mo te fakamafanafanaga ne maua ne Paulo i te laveaga fua ne ia a taina kolā ne loto ma‵losi o faima‵laga atu ki te koga tenā! Kae ko oi ne fakafetai atu ki ei a Paulo ona ko te fesoasoani tenā? Ne fakafetai a ia ki te māfuaga o te mea tenā, ko Ieova te Atua.

22. Se a te ‵tou tusi siki fakavae mō te 2005, kae ne a mea ka sau‵tala ki ei i te suā mataupu?

²² E manino ‵lei, me e fakamaoni mai eiloa i te Tusi Tapu a faifaiga fesoasoani a te Atua. E seai eiloa sena nafa e pelā me se Tino fesoasoani. E fetaui ‵lei eiloa te mea tenā mo te tusi siki fakavae a Molimau a Ieova i te 2005, ko pati i te Salamo 121:2: ‘E maua toku fesoasoani mai i a Ieova.’ Kae e fesoasoani mai pefea a Ieova ki a tatou i aso nei? Ka sau‵tala tatou ki te mea tenei i te suā mataupu.

[Fakamatalaga mai lalo]

Koi Masaua ne Koe?

I auala fea ne fesoasoani mai ei a Ieova–

• e auala i agelu?

• e auala i tena agaga tapu?

• e auala i tena Muna?

• e auala i taina tali‵tonu?

[Ko manatu tāua i te itulau e 11]

Te tusi siki fakavae mō te 2005 ko te: ‘E maua toku fesoasoani mai i a Ieova.’​—Salamo 121:2.

[Ata i te itulau e 12]

Ne fakafetai atu a Paulo ki te Atua e uiga mō te fesoasoani ne maua ne ia mai i ana taina i Loma