‘Te Molimau ki Atufenua Katoa’

“Ka fai foki koutou mo molimau ki a au . . . ke oko eiloa ki kapakapalagi o te lalolagi.”​—GALUEGA 1:8.

1. Ko te taimi fea kae i fea foki ne lagona ei ne soko a te valoaga a Iesu i te Mataio 24:14 i te taimi muamua?

E MASANI kae iloa ‵lei ne tino e tokouke i a tatou a pati a Iesu i te Mataio 24:14. Kae ko tafaga la te gali o te valoaga tenā! Mafaufau ki manatu o soko kolā ne lagona ne latou te mea tenā i te taimi muamua! Te tausaga ko te 33 T.A. Ko oti ne ‵kau fakatasi a soko mo Iesu i loto i se tolu tausaga, kae ko oti ne olo atu latou mo ia ki Ielusalema i te taimi tenā. Ko oti ne lavea ne latou ana vavega kae fakalogo‵logo foki ki ana akoakoga. E tiga eiloa ne fia‵fia malosi latou ki muna‵tonu tāua kolā ne akoako atu ne Iesu, ne iloa ‵lei ne latou me e se ko tino katoa ne fia‵fia ki ei. Ne uke a fili lauiloa kae ma‵losi o Iesu.

2. Ne a mea fakama‵taku mo mea faiga‵ta ne ‵tau o fe‵paki mo soko?

² E toko fa a soko o Iesu ne ‵nofo fakatasi mo ia i luga i te Mauga o Olive, kae ne fakalogo‵logo faka‵lei latou ki ana pati e uiga ki mea fakama‵taku kolā ka oko mai mo mea faiga‵ta kolā ka fe‵paki mo latou. Mai mua atu i ei, ne fakailoa atu ne Iesu ki a latou i a ia ka tamate ne tino. (Mataio 16:21) Ne taku ‵tonu atu ne ia me ka fe‵paki foki latou mo ‵tekega fakama‵taku. “E puke fakapagota koutou ne tino o ave o fakasala, kae tamate foki,” ko ana pati. “E takalia‵lia a fenua katoa ki a koutou, ona ko toku igoa.” Kae ne seki gata fua i ei. Ka takitaki ‵se ne pelofeta ‵loi a tino e tokouke. Ka ‵siga a nisi tino kae ka fakatau fakalata kae fakatau takalia‵lia a latou i a latou eiloa. Kae e isi eiloa ne tino, ko “tino e tokouke,” ka se a‵lofa latou ki te Atua mo tena Muna.​—Mataio 24:​9-12.

3. Kaia e fakaofoofogia ei a pati a Iesu kolā e maua i te Mataio 24:14?

³ Ko te otiga eiloa o ana fakamatalaga e uiga ki tulaga ma‵sei konā kae fai atu ei ne Iesu se mea telā ne ‵tau o ōfo masei i ei ana soko. Ana muna: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki [“atufenua,” NW] katoa; ko oko mai ei te gataga.” (Mataio 24:14) Ao, a te galuega telā ne kamata ne Iesu i Isalaelu​—“ke molimau . . . ki te munatonu”​—ka faka‵soko kae fakasalalau atu foki ki te lalolagi kātoa. (Ioane 18:37) Ko oko eiloa i te fakaofoofogia o te valoaga tenā! Ke fakaoko atu te galuega tenei ki “atufenua katoa” e se se mea faigofie; kae ko te faiga o te mea tenā kae ke “takalia‵lia a fenua katoa” ki a latou e manakogina eiloa i ei te faiga o se vavega. Kae ko te fakataunuga o te ma‵tugā galuega tenei ka se fakamaluga aka fua i ei a te pulega sili a Ieova mo tena malosi kae e pelā foki mo tena alofa, alofa fakamagalo, mo tena loto kufaki. E se gata i ei, e tuku atu foki ki ana tavini se avanoaga ke fakaasi mai te lotou fakatuanaki mo te lotou loto finafinau o tavini atu ki a ia.

4. Ko oi kolā ne fakatonu atu ki ei ke fai ne latou te galuega ko te molimau atu, kae se a te fakamafanafanaga ne tuku atu ne Iesu ki a latou?

⁴ Ne fai ne Iesu ke mo a eiloa e fakalotolotolua ana soko e uiga ki te ‵mafa o te galuega telā ka fai ne latou. A koituai o fanaka ki te lagi, ne fakasae atu a Iesu ki a latou kae fai atu: “Ka faka‵fonugina koutou i te ‵mana manafai e oko atu ki luga i a koutou a te Agaga Tapu. Ka fai foki koutou mo molimau ki a au i Ielusalema, i Iutaia kātoa mo Samalia, ke oko eiloa ki kapakapalagi o te lalolagi.” (Galuega 1:8) E tonu, ne ‵tau o ‵kau fakavave atu a nisi tino ki a latou. E tiga te feitu tenā, ne mu‵tana fua te lotou aofaki. Ne pefea te fakamafanafana loto ke iloa atu me ka fakamalosigina latou ne te agaga tapu mafi o te Atua ke fakataunu ei te lotou galuega tenā mai i a ia!

5. Ne a mea ne seki iloa ne soko e uiga ki te galuega talai?

⁵ Ne iloa ne soko te fakatonuga ke talai atu te tala ‵lei “ki fenua katoa” kae fai “a tino i ei mo . . . soko.” (Mataio 28:​19, 20) Kae ne seki iloa ne latou me pefea te māea ‵lei o te molimau telā ka tuku atu, kae ne seki iloa foki ne latou me ka oko mai māfea te gataga. Kae penā foki tatou. Ko Ieova fua e fakaiku aka ne ia a mea konei. (Mataio 24:36) Kafai ko lotomalie a Ieova ki te tulaga ko oko atu ki ei te molimau, ko aumai ei ne ia te gataga o te olaga matagā tenei. Ko te taimi foki tenā ka iloa ei ne Kelisiano me ko oti ne fakataunu a te galuega talai ki te mea telā ne manako a Ieova ki ei. Ne faigatā eiloa o matea ne Kelisiano mua a te lasi o te molimau telā ka fai i te taimi tenei o te gataga.

Te Galuega Talai i te Senitenali Muamua

6. Se a te mea ne tupu i te Penitekoso i te 33 T.A. kae mai tua ifo i ei?

⁶ Ne fakaofoofogia a mea kolā ne iku mai i te talaiatuga o te Malo mo te faiga o soko i te senitenali muamua. E nofo pelā ki se toko 120 o soko ne ‵nofo i luga i se falealuga i Ielusalema i te Penitekoso i te 33 T.A. Ne ‵ligi atu te agaga tapu o te Atua ki luga i a latou, ne fai atu ne te apositolo ko Petelu se fakamatalaga fakamalosi loto e uiga ki te vavega tenā, kae ne fai i ei ke tali‵tonu te toko 3,000 i konā kae papatiso ei. Kae ko te kamataga fua tenā. E tiga eiloa a taumafaiga matagā a takitaki lotu o fakagata te talaiatuga o te tala ‵lei, ne “fakaopoopo faeloa ne te Aliki ki te lotou potukau ne tino fou kolā ko fakaolagina” i aso takitasi. Ne seki leva “kae kāti ko tai katoa te lima afe o latou.” Mai konā, ne “gasolo eiloa o tokouke a tino e fakaopoopo atu ki a latou, ne tāgata mo fāfine kolā ko tali‵tonu ki te Aliki.”​—Galuega 2:​1-4, 8, 14, 41, 47; 4:4; 5:14.

7. Kaia ne fai ei te ‵fuliga o Konelio mo fai se mea fakaofoofogia?

⁷ Ne toe matea atu foki se isi mea fakaofoofogia i te 36 T.A.​—ko te ‵fuliga mo te papatisoga a Konelio, se tino mai Fenua Fakaa‵tea. I te ‵takiatuga o te apositolo ko Petelu ki te tino e mataku ki te Atua tenei, ne fakaasi mai ei ne Ieova i te fakatonuga a Iesu ke fai a soko i “fenua katoa,” ne seki fakapitoa fua ki tino Iutaia kolā e salalau i fenua kese‵kese. (Galuega 10:​44, 45) Ne ‵saga atu pefea a tino kolā ne fai ne latou te takitakiga? I te taimi ne iloa ei ne apositolo mo toeaina i Iutaia me ne ‵tau foki o fakailoa atu te tala ‵lei ki fenua fakaa‵tea​—ko tino kolā e se ne tino Iutaia​—ne ‵viki atu ei latou ki te Atua. (Galuega 11:​1, 18) Kae i te vaitaimi tenā, ne fua malosi mai ei te galuega talai i tino Iutaia. I tausaga fakamuli ifo, kāti ko te 58 T.A., “e tokouke tino Iutaia ko fai mo tino tali‵tonu” i tafa o soko mai Fenua Fakaa‵tea.​—Galuega 21:20.

8. E pokotia pefea a tino taki tokotasi i te tala ‵lei?

⁸ E tiga eiloa ne fakaofoofogia te gasoloakaga o te aofaki o Kelisiano i te senitenali muamua, ke se puli lele i a tatou a tino taki tokotasi kolā e aofia i aofaki konā. Ne malosi ‵ki te fekau mai te Tusi Tapu telā ne lagona ne latou. (Epelu 4:12) Ne ‵fuli malosi i ei a olaga o latou kolā ne ‵piki ‵mau ki ei. Ne faka‵ma ne tino taki tokotasi olotou olaga, faka‵fou olotou uiga, kae maua ei olotou fesokotakiga ‵lei mo te Atua. (Efeso 4:​22, 23) E penā foki i aso nei. Kae ko tino katoa kolā e talia ne latou te tala ‵lei, e maua ne latou te fakamoemoega sē fuafuagina ke ola ki te se-gata-mai.​—Ioane 3:16.

Tino e Ga‵lue Fakatasi mo te Atua

9. Se a te tauliaga mo te tiute telā ne matea ne Kelisiano mua me i o latou?

⁹ Ne seki fai mai a Kelisiano mua me i a latou eiloa a galuega kolā ko oti ne fakataunu. Ne matea ne latou me ne ‵lago atu “te Agaga Tapu” ki te lotou galuega e pelā me ne faifeau. (Loma 15:​13, 19) Ko Ieova eiloa telā ne māfua mai i ei te gasoloakaga faka-te-agaga tenā. I te taimi foki eiloa tenā ne iloa ei ne Kelisiano me ne maua foki ne latou te tauliaga mo te tiute ke “ga‵lue fakatasi [latou] mō te Atua.” (1 Kolinito 3:​6-9) Mai i konā eiloa, ne fakapalele ei olotou mafi o fai te galuega telā ne tuku atu ki a latou, e ‵tusa mo te fakamalosiga a Iesu.​—Luka 13:24.

10. Ne a taumafaiga ne fai ne nisi Kelisiano mua ke tuku atu se molimau ki atufenua katoa?

¹⁰ E pelā me “se apositolo mō tino o fenua fakaa‵tea,” ne faimalaga atu a Paulo i te fia afe maila i te laukele mo te tai, kae faka‵tu aka ne ia a fakapotopotoga e uke i kogā fenua o Loma i Asia mo Eleni. (Loma 11:13) Ne fanatu foki a ia ki Loma kae kāti e pelā foki mo Sepania. I te vaitaimi tenā, a te apositolo ko Petelu telā ne tuku atu ki a ia “a te talaiga o te tala ‵lei . . . ki tino pilitome,” ne faimalaga atu ki te suā feitu ke tavini atu i Papelonia, telā ne tokouke i ei a tino Iutaia i te vaitaimi tenā. (Kalatia 2:​7-9; 1 Petelu 5:13) E aofia i nisi tino e tokouke kolā ne ga‵lue malosi i te galuega a te Aliki ko fāfine pelā mo Tufaina mo Tufosa. A te suā fafine, ko Peseti, e “uke ana galuega ne fai mō te Aliki.”​—Loma 16:12.

11. Ne fakamanuia pefea ne Ieova a taumafaiga a soko?

¹¹ Ne tuku atu ne Ieova se fakamanuiaga lasi ki taumafaiga a tino konā e pelā foki mo nisi tino loto finafinau. E seki kātoa te 30 tausaga talu mai te valoaga a Iesu e uiga ki te molimau atu ki atufenua katoa, ne tusi mai ei a Paulo i “te tala ‵lei . . . ko oti ne folafolagina ki tino katoa mai lalo o te lagi.” (Kolose 1:23) E mata, ne oko atu te gataga i te taimi tenā? Ao, i se isi feitu. Ne oko atu eiloa te gataga ki te kau Iutaia i te 70 T.A. i te taimi ne lepe ei ne kautau a Loma a Ielusalema fakatasi mo te faletapu. Kae ko oti ne fakaiku aka ne Ieova ke tuku atu se molimau telā e lasi fakafia atu a koituai o aumai ne ia te gataga ki te fakanofonofoga telā e pule ki ei a Satani i te lalolagi kātoa.

Te Molimau e Tuku Atu i Aso Nei

12. Ne maina pefea a Tino A‵koga i te Tusi Tapu i aso mua i te fakatonuga ke talai?

¹² I tausaga fakaoti o te 19 senitenali, i te fakaotiga o se vaitaimi leva ‵ki o te aposetasi fakalotu, ne toe fakatu aka ei te tapuakiga tonu. Ne maina faka‵lei a Tino A‵koga i te Tusi Tapu, ko te igoa o Molimau a Ieova i te taimi tenā, i te fakatonuga ke fai a soko i te lalolagi kātoa. (Mataio 28:​19, 20) I te tausaga e 1914, ne nofo pelā ki se toko 5,100 ne ‵kau malosi atu ki te galuega talai, kae ne oko atu ei te tala ‵lei ki se 68 o atufenua. Kae ne seki maina ‵lei a Tino A‵koga i te Tusi Tapu i te tāua o te Mataio 24:14. I te fakaotiga o te 19 senitenali, ne oti ei te ‵fuliga mo te ‵lomiga o te Tusi Tapu, telā e maua i ei te tala ‵lei, ne sosaiete o te Tusi Tapu ki ‵gana e uke kae tufa atu ki te lalolagi kātoa. Ne tali‵tonu ei a Tino A‵koga i te Tusi Tapu me ko oti ne tuku atu se molimau ki atufenua katoa.

13, 14. Se a te mainaga manino e uiga ki te loto o te Atua mo ana fuafuaga telā ne tuku mai i te lomiga o The Watch Tower i te 1928?

¹³ Ne tuku malielie atu ne Ieova te malamalama ki ana tino e uiga ki te faiga o tena loto mo ana fuafuaga. (Faataoto 4:18) E penei a pati i The Watch Tower i a Tesema 1, 1928: “E mata, e mafai o fai atu me i [te] tufaatuga o Tusi Tapu ne fakataunu i ei te talaiga telā ne ‵valo mai e uiga ki te tala ‵lei o te malo? Ikai loa! Faitalia te tufaatuga o Tusi Tapu, ne manakogina eiloa ke ‵lomi a tusi ne te tamā potukau o molimau a te Atua i te lalolagi, o fakamalamalama atu a [fuafuaga] a te Atua kae āsi atu foki ki fale kolā ne tufa atu ki ei a Tusi Tapu. Me kafai e se fai penā, ka se mafai o malamalama a tino i te fakatuakaga o te malo Faka-Mesia i ‵tou aso nei.”

¹⁴ Ne toe fai mai foki The Watch Tower tenā: “I te 1920, . . . ne maua ei ne Tino A‵koga i te Tusi Tapu a te malamalama tonu e uiga ki te valoaga a te Aliki i te Mataio 24:14. Ne iloa ne latou i ei me i te ‘tala ‵lei tenei,’ telā ne ‵tau o talai atu ki te lalolagi kātoa ke fai mo molimau ki Fenua Fakaa‵tea mo atufenua katoa, e se ko te tala ‵lei e uiga ki se malo koi fai o oko mai kae ko te tala ‵lei eiloa e uiga ki te Mesia te Tupu telā ko oti ne kamata tena pulega ki te lalolagi.”

15. Ne fakalauefa atu pefea te galuega talai talu mai te 1920?

¹⁵ Ne seki tumau te mu‵tana o te “tamā potukau o molimau” tenā talu mai te 1920. I te fia sefulu o tausaga mai tua ifo i ei, ne matea atu i ei se “vaitino tokouke” o ‘nisi mamoe’ kolā ne kamata o fakamaopoopo mai. (Fakaasiga 7:9; Ioane 10:16) I aso nei, e ‵tusa mo te 6,613,829 a tino talai o te tala ‵lei i atufenua e 235 i te lalolagi kātoa. Ko tafaga la te gali o te fakataunuga o te valoaga tenā! E seki talai aka eiloa te “Tala ‵Lei tenei e uiga ki te Malo” i se koga lasi penei. E seki tokouke aka foki eiloa penei a tavini fakamaoni a Ieova i te lalolagi.

16. Ne a mea ko oti ne fakataunu i te tausaga faka-te-taviniga ko teka? (Ke onoono ki te fakasologa i te itulau e 20-23.)

¹⁶ Ko oti ne fakalavelave malosi te potukau tokouke tenei o Molimau i loto i te tausaga faka-te-taviniga ko te 2005. E silia atu i te piliona o itula ne fakamāumau i te folafolaatuga o te tala ‵lei i atufenua e 235. E lau i miliona o toe āsiga, kae e lau i miliona a akoga faka-te-Tusi Tapu ne fai i ei. Ne fakataunu eiloa ne Molimau a Ieova te galuega tenei, mai te fakaaogāga o olotou taimi mo kope totino ke fakamaina atu ei te Muna a te Atua ki nisi tino. (Mataio 10:8) Mai te fakaaogāga o tena agaga tapu mafi, e tumau eiloa a Ieova i te fakamalosi atu ki ana tavini i te fakataunuga o tena loto.​—Sakalia 4:11.

Te Galue Malosi o Tuku Atu se Molimau

17. E ‵saga atu pefea a tino o Ieova ki pati a Iesu e uiga ki te talaiatuga o te tala ‵lei?

¹⁷ E tiga eiloa ko tai kātoa nei te 2,000 tausaga talu mai te taimi ne fai mai ei a Iesu ke talai atu te tala ‵lei, ne seki gasolo ifo eiloa o vāivāi te loto finafinau o tino o te Atua e uiga ki te galuega. E iloa ne tatou me i te ‵tou fa‵ki i te faiga o mea ‵lei, e fakaasi atu ei ne tatou a uiga o Ieova ko te alofa, te alofa fakamagalo, mo te kufaki. E pelā eiloa mo ia, e se ma‵nako tatou ke malaia so se tino kae e ma‵nako tatou ke sala‵mo a tino kae ke maua se vā ‵lei mo Ieova. (2 Kolinito 5:​18-20; 2 Petelu 3:9) Mai te malosi o te agaga o te Atua, e tumau eiloa a Molimau a Ieova loto finafinau o folafola atu te tala ‵lei ki feitu e fa o te lalolagi. (Loma 12:11) Ne iku atu ei ki te talia ne tino i koga e uke a te munatonu kae tau‵tali atu ei ki te takitakiga alofa a Ieova. Ke onoono aka ki ne nāi fakaakoakoga.

18, 19. Ne a tala e mafai o fakamatala mai ne koe e uiga ki nisi tino kolā ne talia ne latou te tala ‵lei?

¹⁸ A Charles se tino fai fatoaga i Kenya. I te 1998 ne fakatau atu ne ia a pauna e silia i te 18,000 o mea ‵pusi kae ne maua ne ia se setifiketi mō te ‵lei o ana paka. Ko te taimi foki tenā ne kamata ei o sukesuke a ia ki te Tusi Tapu. Ne seki leva kae matea ne ia i te tino telā e aofia i te fakaolaga o paka e soli ne ia te fakatonuga a Iesu ke alofa atu ki tou tuakoi. (Mataio 22:39) I te iloaga ne ia ‘i te ‵toe tino apo i te ‵toki paka’ ko ‘te ‵toe tino apo foki eiloa i te tatino,’ ne faka‵si ei ne ia a tena fatoaga paka ki te vailakau ‵poisini ke ‵mate. Ne gasolo a ia ki mua ki tena tukuatuga kae papatiso kae ko fai nei a ia mo fai se paenia mo se tavini fakafaifeau.

¹⁹ E seai se fakalotolotolua me e lūlū nei ne Ieova a atufenua e auala i te galuega talai telā e fai i te lalolagi kātoa, kae ko koloa tāua​—ko tino​—ka o‵mai ki loto. (Hakai 2:7) Ne ulu atu a Pedro, telā e nofo i Potukale, ki se akoga fakafaifeau a ko 13 ana tausaga. Ne fakamoemoe a ia ke fai a ia mo fai se misionale kae ke akoako atu a mea e uiga ki te Tusi Tapu. Kae ne tiaki ne ia te akoga tenā i se taimi toetoe mai tua ifo ona ko te mu‵tana o mea e uiga ki te Tusi Tapu e akoako i ei. I te ono tausaga mai tua ifo, ne fai ana sukesukega ki te mataupu ko te psychology i se iunivesiti i Lisbon. Ne ‵nofo fakatasi laua mo tena fakamātua, se Molimau a Ieova e tokotasi, telā ne fakamalosi atu ke sukesuke a ia ki te Tusi Tapu. I te taimi tenā, ko oti ne fakalotolotolua a Pedro e uiga ki te isi o te Atua, kae ne faigatā o fai sena fakaikuga me fai tena akoga faka-te-Tusi Tapu io me ikai. Ne faipati atu a ia ki tena polofesa i te mataupu ko te psychology e uiga ki te faigatā o fai se fakaikuga. Ne fai atu te polofesa me e akoako mai i te mataupu ko te psychology me i tino kolā e se mafai o fai olotou fakaikuga e fakamasei eiloa ne te mea tenā a latou. I konā eiloa ne fakaiku aka ei ne Pedro ke fai tena akoga faka-te-Tusi Tapu. Ne papatiso a ia fakamuli nei kae ko fai foki ne ia ana akoga faka-te-Tusi Tapu.

20. Kaia e fia‵fia ei tatou me e tuku atu nei se molimau ki atufenua i se tulaga lasi ‵ki?

²⁰ E se iloa ne tatou me e pefea te lasi o te molimau koi ‵tau o tuku atu ki atufenua, kae e se iloa foki ne tatou te aso mo te itula ka oko mai ei te gataga. E iloa fua ne tatou me ko pili te taimi tenā. E fia‵fia eiloa tatou me i te talaiatuga o te tala ‵lei i se tulaga lasi penei se mea fua e tasi mai i fakailoga e uke e uiga ki te pili mai o te taimi ka sui ei ne te Malo o te Atua a malo o tāgata. (Tanielu 2:44) E tuku atu se avanoaga i tausaga takitasi ki te fia miliona o tino ke talia ne latou te tala ‵lei, kae e faka‵malu atu ei te mea tenā ki te ‵tou Atua, ko Ieova. Ke na fai se ‵tou fakaikuga mautinoa ke tumau i te fakamaoni fakatasi mo ‵tou taina i te lalolagi kātoa kae ke fakalavelave faeloa i te faiga o te galuega ko te tukuatuga o se molimau ki atufenua katoa. Mai te faiga o te mea tenā, ka faka‵sao ei ne tatou a tatou eiloa fakatasi mo latou kolā e faka‵logo mai ki a tatou.​—1 Timoteo 4:16.

E Masua ne Koe?

• Kaia e fakaofoofogia ei te valoaga i te Mataio 24:14?

• Ne a taumafaiga ne fai ne Kelisiano mua i te talaiga, kae ne a mea ne iku mai i ei?

• Ne malamalama pefea a Tino A‵koga i te Tusi Tapu e uiga ki te manakoga ke tuku atu se molimau ki atufenua katoa?

• I te mafaufau ki galuega a tino o Ieova i te tausaga faka-te-taviniga ko teka, ne a mea e ofo koe i ei?

[Ata i te itulau e 17]

Ne faimalaga atu a Paulo i te fia maila i te tai mo te laukele o talai te tala ‵lei

[Te Fakasologa i te itulau e 20-23]

Te Lipoti a Molimau a Ieova i te Lalolagi Kātoa i te Tausaga Faka-Te-Taviniga ko te 2005

(Ke onoono ki te tusi)