Ne a “Aso Fakaoti”?

E MATA, e mafaufau sāle koe ki mea e mafai o ‵tupu ki a koe mo ou tino pele i aso mai mua nei? E ‵saga tonu atu a tino e tokouke ki tala i mea fakasalalau ke matea aka me mafai pefea o pokotia olotou olaga i mea kolā e ‵tupu i te lalolagi. Kae ko te ‵saga tonu atu ki te Muna fakaosofia a te Atua, e tuku mai i ei ki a tatou te mainaga tonu e uiga ki ei. Te pogai, me ko leva ne ‵valo mai i te Tusi Tapu a mea konei e ‵tupu i te lalolagi mo mea foki kolā ka ‵tupu i aso mai mua.

E pelā mo te taimi ne nofo mai ei a Iesu Keliso i te lalolagi, ne faipati malosi eiloa a ia e uiga ki te Malo o te Atua. (Luka 4:​43) E pelā mo te masani, ne fia iloa ne tino kolā ne fakalogo‵logo ki a ia a te taimi e oko mai ei te Malo tafasili i te gali tenā. E tonu, i te tolu o aso mai mua o te tamatega o Iesu i se auala ‵se, ne fesili atu ana soko ki a ia: “Ne a foki a fakailoga e iloa ei tou foki mai [i te malosi o te Malo] mo te gataga o te lalolagi?” (Mataio 24:⁠3) Ne fai atu a Iesu ki a latou me ko Ieova te Atua fua e iloa ne ia te taimi tonu ka pule katoatoa mai ei te Malo ki te lalolagi. (Mataio 24:36; Maleko 13:32) Kae ne ‵valo mai foki ne Iesu mo nisi tino a nisi mea kolā e ‵tau o ‵tupu i te lalolagi ke fakamaoni aka ei me ko pule mai a Keliso i te malosi o te Malo tenā.

A koi tuai o iloilo ne tatou a fakamaoniga matea me ko ola nei tatou “i aso fakaoti” o te olaga masei tenei, ke na mafau‵fau malie aka tatou ki se mea tāua telā ne tupu i te lagi. (2 Timoteo 3:⁠1) Ne fai a Iesu mo fai te Tupu i te lagi i te tausaga ko te 1914.a (Tanielu 7:​13, 14) Mai tua malie ifo o te mauaga ne ia o te Malo, ne gasuesue ei a Iesu. E fai mai te Tusi Tapu ki a tatou: “Ne tau te taua i te lagi. Ko Mikaele mo ana agelu ne taua mo te talako mo ana agelu.” (Fakaasiga 12:⁠7) “A Mikaele te agelu pule” ko Iesu Keliso tenā i tena tulaga i te lagi.b (Iuta 9; 1 Tesalonia 4:​16) A te talako ko Satani te Tiapolo. Ne pefea te tulaga o Satani mo ana agelu ma‵sei, kolā ne fakaigoa ki temoni, i te taua tenā? Ne taka‵vale latou i te taua tenā kae “ne ‵pei ifo,” io me ne ‵tuli keatea mai te lagi, ki te lalolagi. (Fakaasiga 12:⁠9) Ona ko te mea tenei, ne fia‵fia ei “te lagi, pelā foki mo tino katoa e ‵nofo i ei,” ko tama faka-te-agaga fakamaoni konā a te Atua. Kae ne seki maua ne tino i te lalolagi te vaegā fiafia tenā. “Kae kalofa eiloa i te lalolagi mo te tai,” ne ‵valo mai te Tusi Tapu, “i te Tiapolo, ko oti ne fanaifo ki a koulua, ka ko oko eiloa i te kaitaua, me e iloa ne ia ko se leva ona aso i te lalolagi.”​​—⁠Fakaasiga 12:⁠12.

Ona ko tena kaitaua, ne aumai ei ne Satani a fakalavelave​​—⁠logo‵maega mo puapuagā​​—⁠ki tino kolā e ‵nofo i te lalolagi. Kae ka “se leva” te vaitaimi tenā o fakalavelave. E fakasino atu eiloa te Tusi Tapu ki te taimi tenei me ko “aso fakaoti.” E mafai eiloa o fia‵fia tatou me ko pili fua o fakaseai katoatoa atu a fakamalosiga ma‵sei a te Tiapolo ki luga i te lalolagi. Kae ne a fakamaoniga me ko ola nei tatou i aso fakaoti?

[Fakamatalaga mai lalo]