Ke Talia Faeloa a Pati Polopoloki a Ieova

“Kafai e fakatonu ne te Aliki se mea ‵se a koe ne fai, e ‵tau mo koe o saga tonu ki ana muna e fai atu.”​​—⁠FAATAOTO 3:⁠11.

1. Kaia e ‵tau ei o talia ne tatou a pati polopoloki mai te Atua?

E TUKU mai ne te tupu mua o Isalaelu ko Solomona ki a tatou taki tokotasi, se pogai ‵lei ke talia ei ne tatou a polopolokiga mai te Atua. “Taku tama, kafai e fakatonu ne te Aliki se mea ‵se a koe ne fai, e ‵tau mo koe o saga tonu ki ana muna e fai atu,” ko pati a Solomona, “kae tausi ki ei ke fai mo akoakoga ki a koe. A te Aliki e fakatonu ne ia a mea ‵se a latou kolā e alofa a ia ki ei, e pelā me se tamana e fakatonu ne ia tena tama tagata telā e fakamatamata a ia ki ei.” (Faataoto 3:​11, 12) E tonu, e polopoloki ne tou Tamana faka-te-lagi a koe me e alofa ki a koe.

2. Se a te uiga o “pati polopoloki,” kae e maua pefea ne se tino a polopolokiga?

² E fakauiga eiloa a “pati polopoloki” ki te fakasalaga, fakatonutonuga mo akoakoga. “Kafai ko fakasala io me polopoloki tatou, e foliga mai i te taimi tenā, me isi se mea e fai ne ia ke fanoa‵noa tatou kae se fia‵fia,” ko pati a te apositolo ko Paulo, “kae fakamuli ifo, ko latou kolā e maua ne fakasalaga penei, e maua ne latou a te taui filemu o te olaga amiotonu.” (Epelu 12:11) A te talia mo te fakagaluegāga o pati polopoloki mai te Atua e mafai o fesoasoani mai ke ‵sala atu koe ki te auala o te amiotonu kae fai ei ke pili atu koe ki te Atua tapu, ko Ieova. (Salamo 99:⁠5) E mafai o maua ne koe a pati fakatonutonu e auala i taina tali‵tonu, mai mea e tauloto ne koe i fakatasiga a Kelisiano, e pelā foki mo au sukesukega ki te Muna a te Atua mo tusi a te “tavini fakamaoni.” (Luka 12:​42-​44) Ka pefea tou loto fakafetai māfai ko maua ne koe ne manatu fesoasoani e uiga ki mea kolā e manakogina ke fai ne fakamafulifuliga ki ei! Kae ne a polopolokiga e manakogina māfai ko fai ne koe se agasala matagā?

Te Pogai e Faka‵tea ei a Nisi Tino

3. Ko te taimi fea e fakatea ei se tino?

³ E sukesuke a tavini a te Atua ki te Tusi Tapu mo tusi faka-Kelisiano. E fai‵pati latou i olotou fakatasiga, tamā fono mo fono ‵lasi e uiga ki tulaga amio‵tonu o Ieova. Tela la, e iloa ne Kelisiano katoa a mea kolā e manako a Ieova ki ei mai i a latou. E fakatea fua se tino mai te fakapotopotoga māfai e fai ne ia se agasala matagā kae sē salamo.

4, 5. Se a te fakaakoakoga mai te Tusi Tapu e uiga ki te fakatea e fakaasi mai i konei, kae kaia ne fakamalosi atu ei ki te fakapotopotoga ke toe fakafoki mai te tagata tenā ki loto i ei?

⁴ Ke mafaufau ki se tala mai te Tusi Tapu e uiga ki se tino ne fakatea. Ne talia ne te fakapotopotoga i Kolinito a “amioga ma‵sei i te feitu ki tāgata mo fafine, ne vaegā amioga e se fai ne tino pouliuli. . . . me isi se tino . . . ko agasala mo te avaga fou a tona tamana!” Ne fakamalosi atu a Paulo ki tino Kolinito ke “tuku atu a te tino tenā ki a Satani, ke fakamasei ne ia tena foitino, ko te mea ke ola [“tena,” NW] agaga i te Aso o te Aliki.” (1 Kolinito 5:​1-5) I te taimi ne fakatea ei kae tuku atu ki a Satani, ko toe fai ei te tino agasala tenā mo fai se vaega o te lalolagi a te Tiapolo. (1 Ioane 5:19) E auala i tena fakatea, ne tapale foki i ei te mea matagā tenā mai te fakapotopotoga, kae fakatumau ei te “agaga” o te Atua io me ko tena uiga lauiloa i loto i ei.​​—⁠2 Timoteo 4:22; 1 Kolinito 5:​11-13.

⁵ I se taimi e se na lo ko leva mai tua ifo, ne fakamalosi atu a Paulo ki Kelisiano i Kolinito ke toe fakafoki mai te tino agasala tenā. Kaia? Ne fai penā ko te mea ke “faka‵mao Satani” mai i a latou, ko pati a te apositolo. E foliga mai me ko oti ne salamo a te tino agasala kae ko ‵ma foki tena olaga. (2 Kolinito 2:​8-​11) Moi fai ne ita a tino Kolinito ma toe fakafoki mai te tagata salamo tenā ki loto i te fakapotopotoga, penei ko oti ne oko atu a Satani ki a latou e auala i olotou uiga faiga‵ta kae sē a‵lofa fakamagalo, e pelā eiloa mo te mea e manako ki ei te Tiapolo. Kāti, ne ‘fakamagalo kae fakamafanafana’ fakavave atu latou ki te tino salamo tenā.​​—⁠2 Kolinito 2:​5-7.

6. Ne a mea aogā e maua mai te fakateaga o se tino?

⁶ Ne a mea aogā e maua mai i te fakatea o se tino? E tausi i ei te igoa tapu o Ieova ke ‵ma mai i fakamaseiga kae e puipui foki i ei te tulaga ‵lei o ana tino. (1 Petelu 1:​14-16) A te fakateaga o se tino agasala sē salamo mai te fakapotopotoga e ‵lago atu eiloa ki tulaga amio‵tonu o te Atua kae tausi foki i ei te fakapotopotoga ke ‵ma i te feitu faka-te-agaga. E mafai foki o fesoasoani atu ki te tino sē salamo ke matea ne ia te fakamataku o tena agasala.

Te Tāua o te Salamo

7. Ne pokotia pefea a Tavita i tena fakatamala o fakaasi ana agasala?

⁷ A te tokoukega o tino kolā ne fai ne latou a agasala matagā ne sala‵mo tonu kae ne seki faka‵tea mai te fakapotopotoga. E tonu, e se se mea faigofie ke salamo tonu se tino. Ke mafaufau ki te tupu o Isalaelu ko Tavita, telā ne ‵fatu ne ia te Salamo e 32. E fakaasi mai i te pese tenā, me ne ‵funa ne Tavita a tena agasala matagā i se taimi leva, kāti ko te lā agasala mo Patisepa. Ne iku atu i ei ki te gasoloifoga o vāivāi te malosi o tena foitino ona ko tena māfatia i tena agasala, e pelā eiloa mo te ‵miti ne te tau ‵vela te vai mai i se lakau. Ne logo‵mae a Tavita i te feitu faka-te-foitino mo te feitu faka-te-mafaufau, kae i te taimi ne ‘fakaasi atu ei tena agasala, ne fakamagalo ne Ieova a ia.’ (Salamo 32:​3-5) Ne usu mai a Tavita: “Amutia te tino telā e se taku‵segina ne te Aliki.” (Salamo 32:​1, 2) Ma‵faga o mea gali ke maua ne ia te fakamagaloga a te Atua!

8, 9. E fakaasi mai pefea a te salamo tonu, kae e pefea tena tāua e uiga ki te fakafokimaiga o se tino fakatea?

⁸ E manino ‵lei, me e ‵tau o salamo se tino māfai e fia maua ne ia te alofa fakamagalo. Kae ko te mā mo te mataku i te mea ma salalau tena agasala e se ko te salamo tenā. A te “salamo” ko te “‵fuliga o te mafaufau o se tino” e uiga ki ana amioga ma‵sei, ona ko tena fanoanoa e uiga ki tena agasala ne fai. A te tino salamo e maua ne ia te “loto māfatia mo te loto vāivāi” kae manako o ‘fakatonu aka te mea ‵se’ tenā māfai e mafai.​​—⁠Salamo 51:​17, NW; 2 Kolinito 7:11.

⁹ A te salamo se mea tāua ‵ki e uiga ki te fakafokimaiga o se tino ki loto i te fakapotopotoga Kelisiano. E se sōna fakafoki mai se tino fakatea ki loto i te fakapotopotoga mai tua o se vaitaimi mautinoa. A koituai o toe fakafoki mai se tino, e ‵tau o ‵fuli te tulaga o tena loto i se auala lasi ‵ki. E ‵tau o matea ne ia te matagā o tena agasala mo te masiasi ne fai ne ia ki a Ieova mo tena fakapotopotoga. E ‵tau o salamo te tino agasala, ‵talo mo te loto kātoa mō se fakamagaloga, kae tautali i tulaga amio‵tonu o te Atua. Kafai ko fakamolemole atu ke toe foki a ia, e ‵tau o tuku atu ne ia se fakamaoniga i a ia ko salamo kae fakaasi mai foki a “faiga kolā e fakaasi mai me ko oti ne salamo” a ia.​​—⁠Galuega 26:⁠20.

Kaia e ‵Tau ei o Fakaasi a Agasala?

10, 11. Kaia e se ‵tau ei o ‵funa ne tatou se agasala?

¹⁰ Kāti e fai mai a fakamasakoga a nisi tino kolā ne agasala: ‘Kafai e fakaasi ne au ki se tino taku agasala, ko ‵tau ei o tali ne au a fesili fakamasiasi tino kae kāti ka fakatea eiloa au. Kae kafai e se fakaasi ne au, ka se masiasi au kae ka seai eiloa se tino i te fakapotopotoga e mafai o iloa ne ia te mea tenā.’ E fai ne vaegā mafaufauga penā ke se lavea atu a nisi mea tāua. Ne a mea konei?

¹¹ A Ieova se “Atua telā e ‵fonu i te alofa mo te kaimalie, e tuai o ita kae lasi tena alofa mo tena fakamaoni. E tausi ne [ia tena] feagaiga i afe o tupulaga, e fakamagalo fua ne [ia] agasala mo amioga ma‵sei katoa.” Kae, e fakatonutonu ne ia ana tino “i te mea ‵tau.” (Esoto 34:​6, 7; Ielemia 30:11) Kafai ne fai ne koe se agasala matagā, e mafai pefea o maua ne koe te alofa fakamagalo o te Atua māfai e taumafai koe o ‵funa tau agasala? E iloa ‵lei ne Ieova te mea tenā, kae e se sōna fakapuli ne ia a te mea ‵se tenā.​​—⁠Faataoto 15:3; Sapakuka 1:​13.

12, 13. Ne a mea e mafai o iku mai i te taumafai o ‵funa aka agasala?

¹² Kafai ko oti ne fai ne koe se agasala matagā, e mafai o fesoasoani atu te faipati ‵tonu ke toe maua ei ne koe se loto lagona ‵lei. (1 Timoteo 1:​18-​20) Kae ko te fakatamala o fakaasi tau agasala e mafai o fakavāivāi atu ki te loto lagona kae e mafai o iku atu ki te faiga o nisi agasala e uke. Ke masaua me e se agasala fua koe ki se isi tino io me ko te fakapotopotoga. E agasala eiloa koe ki te Atua. Ne usu mai te faisalamo: “A te Aliki e i loto i tena faletapu; e i te lagi tena nofogaaliki. E kilokilo mai a ia ki tino i koga katoa kae iloa foki ne ia olotou mea katoa e fai. Ka sukesuke ne te Aliki a tino ‵lei mo tino amio ma‵sei; a tena loto katoatoa e se fiafia ki tino ofa tulafono.”​​—⁠Salamo 11:​4, 5.

¹³ E se fakamanuia ne Ieova so se tino telā e ‵funa tena agasala matagā kae taumafai o nofo i loto i te fakapotopotoga Kelisiano ‵ma. (Iakopo 4:⁠6) Tela la, kafai ko oti ne agasala koe kae manako o fai te mea tonu, ke se fakatalave o fakaasi ‵tonu tau agasala. Kafai e se fai te mea tenā, ka masaki faeloa tou loto lagona, maise māfai ko faitau io me fakalogologo koe ki pati fakatonutonu e uiga ki mea fakama‵taku konā. Kae pefea la māfai ko tapale ne Ieova tena agaga mai i a koe, e pelā mo tena mea ne fai e uiga ki te tupu ko Saulo? (1 Samuelu 16:14) Kafai ko ave keatea te agaga o te Atua, e mafai o fai ne koe ne agasala e matagā atu.

Talitonu ki ou Taina Fakamaoni

14. Kaia e ‵tau ei o tautali se tino agasala ki pati fakatonutonu i te Iakopo 5:​14, 15?

¹⁴ Tela la, ne a mea e ‵tau o fai ne se tino agasala telā ko salamo? “E ‵tau mo ia o fai atu ki toeaina o te ekalesia ke ‵talo mō ia, kae ‵mili te sinu ki luga i a ia i te igoa o te Aliki. A te ‵talo tenei, se ‵talo e fai i te fakatuanaki, kae ka fakaola ne ia te tino masaki: ka toe fakafoki atu ne te Aliki te malosi ki a ia.” (Iakopo 5:​14, 15) A te faipati atu ki toeaina se auala e tasi e fakaasi mai ei ne se tino a “faiga e iloa i ei me ko salamo” a ia. (Mataio 3:⁠8) A tino fakamaoni kae loto a‵lofa konei ka ‘‵talo mō ia, kae ‵mili atu te sinu ki luga i a ia i te igoa o Ieova.’ E pelā mo te logotonu o te sinu, e fai olotou pati fakatonutonu mai te Tusi Tapu e pelā me ne fakamafanafanaga ki so se tino telā e salamo tonu.​​—⁠Ielemia 8:​22.

15, 16. E tau‵tali atu pefea a toeaina Kelisiano ki te fakaakoakoga a te Atua, telā ne tusi i te Esekielu 34:​15, 16?

¹⁵ Ma‵faga o fakaakoakoga gali ne tuku mai ne te ‵tou Tausi Mamoe, ko Ieova, i te taimi ne fakasaoloto ei ne ia a tino Iutaia mai te ‵nofo pologa i Papelonia i te 537 T.L.M., mo te taimi ne fakasaoloto ei ne ia a te Isalaelu faka-te-agaga mai “Papelonia Takutakua” i te 1919 T.A.! (Fakaasiga 17:​3-5; Kalatia 6:​16) Ne fakataunu i ei ne ia i konā a tena folafolaga: “Ko au eiloa ka [“fagai ne au,” NW] aku mamoe, kae ka ‵sala ne au se koga mo fakamanava latou. . . . Ka ‵sala ne au a latou kolā ne ‵galo, toe faka‵foki mai latou kolā ne takase‵se ki koga fakaatea, fusi a pakiaga o latou kolā e pakia, kae faka‵lei io me e fakamalosi aka a latou kolā e ma‵saki.”​​—⁠Esekielu 34:​15, 16.

¹⁶ Ne fagai ne Ieova ana mamoe fakatusa, ne fakamanava ne ia i se koga e tokagamalie, kae ‵sala atu ki a latou kolā ne ‵galo. I se auala foki penā, e fakamautinoa aka ne tausi mamoe Kelisiano me e fagai kae tausi faka‵lei a te lafu a te Atua, i te feitu faka-te-agaga. E ‵sala atu a toeaina ki mamoe kolā ko takase‵se keatea mo te fakapotopotoga. E pelā eiloa mo te ‘fusi ne te Atua a pakiaga o latou kolā e pakia,’ e “fusi” foki ne ovasia a pakiaga o mamoe kolā ne pakia i pati a se tino io me ko olotou faifaiga eiloa. Kae e pelā mo te ‘fakamalosi ne te Atua a tino ma‵saki,’ e fesoasoani atu a toeaina ki tino kolā ko ma‵saki faka-te-agaga, kāti ona ko olotou mea ‵se ne fai.

Te Auala e Fesoasoani Mai ei a Tausi Mamoe

17. Kaia e se ‵tau ei o fakatalave tatou i te ‵sala atu ki te fesoasoani faka-te-agaga mai toeaina?

¹⁷ E tau‵tali eiloa a toeaina mo te fia‵fia ki pati fakatonutonu konei: “Ke tumau i te fakaasi atu o te alofa fakamagalo . . . , kae ke fai penā mo te mataku.” (Iuta 23, NW) Mai te faiga o faifaiga finalalolagi, ko aofia ei a nisi Kelisiano i agasala matagā. Kae kafai e sala‵mo tonu latou, e mafai o loto tali‵tonu latou me ka fakamagalo kae fai faka‵lei latou ne toeaina kolā e fia‵fia o fesoasoani ki a latou i te feitu faka-te-agaga. E uiga ki a ia mo toeaina pelā mo ia, ne fai mai a Paulo: “E se ko tena uiga i a [matou] e manatu fia pule mālō atu ki te otou talitonuga, . . . [Matou] e ma‵nako fua o fakalasi te otou fiafia ki te talitonuga.” (2 Kolinito 1:​24) Tela la, ke se fakatalave o ‵sala atu ki te lotou fesoasoani i te feitu faka-te-agaga.

18. E pefea a faifaiga a toeaina ki mea ‵se a taina tali‵tonu?

¹⁸ Kafai ko oti ne fai ne koe se agasala matagā, kaia e ‵tau ei o talitonu koe ki toeaina? Muamua la, a latou ko tausi mamoe o te lafu a te Atua. (1 Petelu 5:​1-4) E seai se tausi mamoe alofa e fai fakamasei ne ia se mamoe telā ko vāivāi kae tagitagi ona ko te pakiaga ne fai ne ia ki a ia eiloa. Tela la, i te taimi e ‵saga atu ei a toeaina ki te agasala a se taina talitonu, e se ko te mea ‵se mo te fakasalaga e tāua kae ko te agasala mo tena faka‵leiga i te feitu faka-te-agaga, māfai e mafai. (Iakopo 5:​13-20) E ‵tau o fai ne toeaina olotou fakamasinoga mo te amiotonu kae “atafai ki te lafu.” (Galuega 20:​29, 30, NW; Isaia 32:​1, 2) E pelā mo nisi Kelisiano katoa, e ‵tau o fakaasi atu ne toeaina te ‘fai mea tonu, te alofa atafai, kae sa‵sale mo te loto maulalo i mua o te Atua.’ (Mika 6:⁠8) E tāua ‵ki eiloa a uiga konā i te faiga o fakaikuga e uiga ki te ola mo te taviniga tapu a te “lafu mamoe [a Ieova].”​​—⁠Salamo 100:⁠3.

19. Ne a uiga e ‵tau o maua ne toeaina Kelisiano i olotou taumafaiga ke fakatonu aka se tino?

¹⁹ E filifili a tausi mamoe Kelisiano ne te agaga tapu kae e ‵sala atu eiloa ke takitaki latou ne ia. “Kafai se tino e maua i so se agasala”​​—⁠i se auala fakapoi​​—⁠e taumafai a tāgata ata‵mai i te feitu faka-te-agaga o ‘fakatonutonu latou kae ke fai penā i te agaga o te loto maulalo.’ (Kalatia 6:1; Galuega 20:28) Mai te atafai kae ‵piki ‵mau foki ki tulaga amio‵tonu o te Atua, e taumafai a toeaina o fakatonutonu aka ana mafaufauga, e pelā eiloa mo se tokita atafai telā e taumafai o faka‵tonu aka se ivi fati, e aunoa mo te sōna fakalogo‵mae ki te tino kae saga tonu atu fua o faka‵lei te fakalavelave. (Kolose 3:​12) Ona ko te mea e fakalagolago a toeaina ki te ‵talo mo te Tusi Tapu i te fakaaogāga o te alofa fakamagalo, e fakaasi mai eiloa i fakaikuga a toeaina a te kilokiloga a te Atua ki mea konā.​​—⁠Mataio 18:⁠18.

20. Ko te taimi fea e ‵lei ei ke faka‵pula atu ki te fakapotopotoga me ko oti ne polopoloki ‵mafa se tino?

²⁰ Kafai ko salalau io me e mautinoa me ka salalau eiloa se agasala, se mea ‵lei ke fai se faka‵pulaga i te fakapotopotoga ko te mea ke puipui ei tena tulaga ‵ma. E ‵tau foki o fai se faka‵pulaga ki te fakapotopotoga māfai e ‵tau o fai penā. I te taimi e gasolo aka ei o malosi i te feitu faka-te-agaga se tino telā ne fakamasino kae polopoloki ‵mafa, e mafai o faka‵tusa a ia ki se pakiaga o se tino ko fano o mafu, telā ne faka‵lave malie atu ki te faiga o ana galuega i se taimi toetoe. Mō se vaitaimi, kāti se mea ‵lei ke fakalogologo fua a te tino salamo tenā, i taimi o fakatasiga, i lō te fai o ana manatu. E mafai o fakatoka ne toeaina se tino ke fai ne ia se akoga faka-te-Tusi Tapu mo ia ke fakamalosi atu ei i mea kolā e vāivāi a ia i ei, ko te mea ke toe malosi tena “fakatuanaki.” (Tito 2:⁠2) A mea katoa konei e fai mo te alofa kae e se fai mo fai se fakasalaga o te tino agasala.

21. E fai pefea a faifaiga ki nisi mea ‵se?

²¹ E mafai o fesoasoani mai a toeaina i te feitu faka-te-agaga i auala kese‵kese. E pelā me se fakaakoakoga, kāti ne konā fakatasi io me fakalua se taina telā ne pokotia mua i te fakalavelave ko te konā, i tena fale eiloa. Io me se tino ko leva ne tiaki ne ia te ‵pusi, ne ‵pusi ‵funa fakatasi io me fakalua i se taimi toetoe ne vāivāi ei a ia. E ui eiloa ko oti ne ‵talo kae talitonu me ka fakamagalo a ia ne te Atua, e ‵tau o ‵sala atu ki se fesoasoani o toeaina ko te mea ke se fai ne ia te mea tenā mo fai se mea masani. E mafai o onoono se toeaina e tokotasi io me tokolua ki te tulaga tenā. Kae, e ‵tau mo te toeaina io me ko toeaina konā o fakailoa atu te mea tenā ki te toeaina tausi, me e mafai o aofia i ei a nisi mea.

Ke Talia Faeloa a Polopolokiga a te Atua

22, 23. Kaia e ‵tau ei o talia faeloa ne koe a polopolokiga a te Atua?

²² Ke maua te taliaga a te Atua, e ‵tau mo Kelisiano taki tokotasi o ‵saga tonu ki polopolokiga a Ieova. (1 Timoteo 5:​20) Tela la, ke fakalogo ki so se fakatonutonuga e maua ne koe i au sukesukega ki te Tusi Tapu mo tusi faka-Kelisiano io me ko pati fakatonutonu kolā e lagona ne koe i fakatasiga, tamā fono, mo fono ‵lasi a tino o Ieova. Ke matapula‵pula faeloa e uiga ki te faiga o te loto o Ieova. Ka fesoasoani atu ei a pati polopoloki a te Atua ke fakatumau tou malosi faka-te-agaga​—⁠se ‵pui telā e ‵teke atu ki te agasala.

²³ A te taliaga o polopolokiga a te Atua ka fai ne ia koe ke tumau i loto i te alofa o te Atua. E tonu, ko oti ne faka‵tea a nisi tino mai te fakapotopotoga Kelisiano, kae e se ‵tau o tupu te mea tenei ki a koe māfai e “puipui ne koe tou loto” kae ‘ola e pelā me se tino poto.’ (Faataoto 4:​23, NW; Efeso 5:​15) Kafai koe se tino fakatea, kaia e se gasuesue ei koe ke na foki mai koe ki loto i te fakapotopotoga? E manako a te Atua ki tino katoa kolā ko oti ne tukugina atu ki a ia ke tapuaki ki a ia mo te fakamaoni mo te “loto fiafia.” (Teutelonome 28:47) E mafai o fai koe penā ki te se-gata-mai māfai e talia faeloa ne koe a polopolokiga a Ieova.​​—⁠Salamo 100:⁠2.

Ka Tali Mai Koe Pefea?

• Kaia ne faka‵tea ei a nisi tino mai te fakapotopotoga Kelisiano?

• Ne a mea e aofia i te salamo tonu?

• Kaia e ‵tau ei o fakaasi ‵tonu atu a agasala matagā?

• I auala fea e fesoasoani atu ei a toeaina Kelisiano ki tino agasala loto sala‵mo?

[Ata i te itulau e 15]

E pelā mo tausi mamoe i aso mua, e “fusi” ne toeaina Kelisiano a mamoe a te Atua kolā ko pa‵kia