E Tuku Atu ne Ieova A “Te Agaga Tapu ki Tino Kolā e Fakamolemole Atu ki a ia”
“Kafai koutou e ma‵sei, kae e iloa ne koutou o tuku atu a mea ‵lei ki otou tama‵liki, e se sili atu la te otou Tamana i te lagi, i te fia tuku atu o te Agaga Tapu ki tino kolā e fakamolemole atu ki a ia?”—LUKA 11:13.
1. Ko taimi fea e manakogina malosi ei ne tatou a te fesoasoani o te agaga tapu?
‘ESE mafai ne au o fakafesagai atu ki te mea tenei i a au eiloa tokotasi. E mafai fua ne au o kufaki i te tofotofoga tenei mai te fesoasoani o te agaga tapu!’ Kai fai aka eiloa ne koe se vaegā fakaasiga penā mai tou ‵kano loto? Ko oti eiloa ne fai penā a te tokoukega o Kelisiano. Kāti, ne fai koe penā mai tua o te iloaga ne koe me ko pokotia koe i se masaki lasi. Io, me kāti ko te taimi telā ne ‵moe ifo ei a mata o tau avaga i te mate. Io, me kāti ko te taimi telā ne ‵fuli fakakotua ei tou tulaga fiafia ki te fanoanoa. I vaegā taimi fakalogo‵mae penei i te olaga, kāti ne mafaufau koe, me ne tumau fua koe i te ola ona ko te “malosi telā e sili atu i te malosi masani” ne maua ne koe mai te agaga tapu o Ieova.—2 Kolinito 4:7-9, NW; Salamo 40:1, 2.
2. (a) Ne a mea faiga‵ta e fe‵paki mo Kelisiano ‵tonu? (e) Ne a fesili ka sau‵tala tatou ki ei i te mataupu tenei?
2 E fakafesagai atu a Kelisiano ‵tonu ki tofotofoga mo ‵tekemaiga kolā e gasolo aka faeloa mai te lalolagi sē amioatua i aso nei. (1 Ioane 5:19) E se gata i ei, e taua ‵tonu atu eiloa a Satani te Tiapolo ki soko o Keliso, ko latou kolā “e faka‵logo ki fakatonuga a te Atua, kae fakamaoni foki ki te mea tonu e fakaasi mai ne Iesu.” (Fakaasiga 12:12, 17) Tela la, e se se mea fakapoi ke ma‵nako tatou nei ki te fesoasoani o te agaga o te Atua i lō taimi mua. Ne a mea e mafai o fai ne tatou ke fakamautinoa aka i ei me maua ne tatou te fesoasoani lasi o te agaga tapu o te Atua? Kae, e fakamautinoa aka pefea ne tatou me e manako malosi a Ieova o tuku mai te malosi e manakogina i taimi o tofotofoga? E maua ne tatou a tali ki fesili konei i tala fakatusa a Iesu e lua.
‵Talo Faeloa
3, 4. Se a te tala fakatusa ne fai atu ne Iesu, kae ne fakaaogā ne ia pefea ki te faiga o ‵talo?
3 Ne fesili atu se soko e tokotasi o Iesu: “Te Aliki, akoako mai matou ke iloa o ‵talo.” (Luka 11:1) I tena tali ki ei, ne fai atu ne Iesu ki ana soko a tala fakatusa e lua kolā e tai ‵pau loa. A te tala muamua ko te tala e uiga ki se tagata telā e isi sena mālō, a ko te lua ko te tala e uiga ki se tamana telā ne fakalogo ki tena tama. Ke na mafau‵fau tatou ki tala fakatusa e lua konei.
4 Ne fai atu Iesu: “Ko oi la se tino i a koutou e isi sona takaga, ko fanatu ki a ia i te valuapo, kae fai atu penei: ‘Takaga, ke kaitalafu ne au ne falaoa e tolu, i toku taugasoa ko oko mai tena malaga ki a au, kae e seai se mea e tali ei a ia.’ Ka ko ia telā i loto i te fale ne tali atu penei, ‘Sa fakalavelave mai ki a au! Ko ‵pono nei te mataloa, ko ‵moe matou mo aku tama‵liki. Ko se mafai ne au o tu ki luga o avatu ki a koe se mea.’ Au e fai atu ki a koutou, e se ko te la takaga e tu ei ki luga o avatu ki a ia se mea, kae mai luga o tena fakamolemole ‵soko, ka tu eiloa ki luga o tuku atu e ‵tusa mo te mea e manako a ia ki ei.” Ne fakamatala atu ei ne Iesu te aogā o te tala fakatusa tenei ki te faiga o ‵talo, i ana pati: “Tela la, au e fai atu ki a koutou: Akai atu, kae ka tuku mai ki a koutou; salasala atu, kae ka maua ne koutou; tukituki atu, kae ka ‵tala mai ki a koutou. So se tino e akai atu, e tuku mai ki a ia; a ia telā e salasala atu, e maua ne ia; a ia foki telā e tukituki atu, ka ‵tala mai ki a ia.”—Luka 11:5-10.
5. Se a te mea e akoako mai ne te tala fakatusa e uiga ki te tagata telā ne fakamolemole ‵soko atu e uiga ki ‵tou tulaga māfai e ‵talo tatou?
5 E fakaasi mai i te tala fakatusa manino tenei e uiga ki se tagata telā ne fakamolemole ‵soko atu, a ‵tou tulaga māfai e ‵talo tatou. Ke onoono me ne fai atu a Iesu me ne maua ne te tagata a te mea ne manako ki ei ona ko “tena fakamolemole ‵soko.” (Luka 11:8) E sae fakatasi mai fua i te Tusi Tapu a te tugāpati ko te “fakamolemole ‵soko.” Ne ‵fuli mai i te pati Eleni telā e fakauiga tonu eiloa ki te “matafatu.” A te matafatu e masani sāle o sē ‵lei tena uiga. Kae, kafai e matafatu io me fakamolemole ‵soko atu mō se mea ‵lei, e fai eiloa te mea tenā e pelā me se uiga ‵lei. Tenā loa te mea ne tupu ki te tino talimālō i te tala fakatusa. E seki mā eiloa a ia i te fakamolemole ‵soko atu ki te mea telā ne manako malosi a ia ki ei. Ona ko te mea ne fakaasi mai ne Iesu a te tagata talimālō tenei e pelā me se fakaakoakoga mō tatou, e ‵tau foki o fai penā ‵tou ‵talo. E manako a Ieova ke tumau tatou i te ‘akai atu, salasala atu mo te tukituki atu.’ E ‵tusa mo te mea tenā, ka tuku mai eiloa ne ia “te Agaga Tapu ki tino kolā e fakamolemole atu ki a ia.”
6. I aso o Iesu, ne ‵kilo atu pefea ki tuu mo aganuu e uiga ki te talimālō?
6 Ne seki fakaasi mai fua ne Iesu a te auala e ‵tau o ‵talo atu ei tatou—mai te fakamolemole ‵soko atu—kae penā foki loa mo te pogai e ‵tau ei o fai penā. Ke maina faka‵lei tatou i te akoakoga tenā, e ‵tau o mafau‵fau tatou ki te kilokiloga ne maua ne tino kolā ne fakalogo‵logo ki te tala fakatusa tenā e uiga ki tuu masani o te talimālō. E fakaasi mai i nisi tusi siki e uke i te Tusi Tapu me ne fai te tausiga o mālō e pelā me se tuu telā ne tāua ‵ki i aso o te Tusi Tapu, maise eiloa ki tavini a te Atua. (Kenese 18:2-5; Epelu 13:2) Se mea fakamasiasi māfai e se tali faka‵lei ne koe au mālō. (Luka 7:36-38, 44-46) Mai te mafaufau ki te mea tenā, ke toe onoono aka tatou ki te tala a Iesu.
7. Kaia ne seki mā ei te tagata i te tala fakatusa a Iesu o ‵fagu tena taugasoa?
7 Ne oko atu se mālō ki te tagata i te tala fakatusa tenā i te valuapo. Ne iloa ne te tagata i te fale me ‵tau o tuku atu ne ia ne meakai ki tena mālō kae “e seai se mea e tali ei a ia.” Ne kilo atu tou tagata ki te mea tenei e pelā me se mea tupu fakafuasei telā e ‵tau o saga ki ei! E ‵tau eiloa o maua ne ia ne falaoa faitalia te ‵togi ‵mafa. Tenā ne fanatu ei a ia ki sena taugasoa kae ‵fagu atu ki ei e aunoa mo te mā. Ne kalaga atu a ia: “Takaga, ke kaitalafu ne au ne falaoa e tolu.” Ne tumau eiloa a ia i te fakamolemole atu ke oko ki te taimi ne maua ei ne ia a te mea tenā. E mafai fua o fai a ia e pelā me se tino talimālō ‵lei māfai e maua ne ia a falaoa konā.
Ko te Lasi o te Manakoga—Ko te Lasi Foki o te Fakamolemole ‵Soko ki ei
8. Se a te mea ka fakamalosi mai ke ‵talo atu faeloa ke maua ne tatou te agaga tapu?
8 Se a te mea e fakaasi mai i te tala fakatusa tenei e uiga ki te pogai e ‵talo ‵soko atu ei tatou? Ne tumau a te tagata i te fakamolemole atu ki falaoa me e iloa ne ia a te lasi o te tāua o te mauaga o falaoa konā, ki te faiga o tena tiute e pelā me se tino talimālō. (Isaia 58:5-7) E aunoa mo falaoa, e se mafai o fai a ia mo fai se tino talimālō ‵lei. E penā foki loa te iloa ne tatou me e tāua ‵ki eiloa te mauaga o te agaga o te Atua ke fakataunu ei te ‵tou galuega e pelā me ne Kelisiano ‵tonu, e tumau eiloa tatou i te ‵talo atu ki te Atua o fakamolemole atu mō tena agaga tapu. (Sakalia 4:11) E aunoa mo te mea tenā, ka taka‵vale eiloa tatou. (Mataio 26:41) E mata, e lavea ne koe te mea tāua e maua ne tatou mai te tala fakatusa tenei? Kafai e ‵kilo atu tatou ki te agaga o te Atua e pelā me se mea telā e ‵tau o maua fakavave ne tatou, ka fia fakamolemole ‵soko atu eiloa tatou e uiga ki ei.
9, 10. (a) Fakamatala mai te pogai e manakogina ei ke tumau i te fakamolemole atu ke maua ne tatou te agaga o te Atua. (e) Se a te fesili e ‵tau o fesili ifo ne tatou, kae kaia?
9 Ke fakaaogā te akoakoga tenei i aso nei, ke fakaataata i tou mafaufau me ko masaki se tino o tou kāiga i te valuapo. E mata, ka ‵fagu ne koe se tokita mō se fesoasoani? Ikai, māfai se masaki foliki fua. Kae, kafai ne fakatu te koga o te tino tenā, ka sē mā eiloa koe o fanatu ki te tokita. Kaia? Me se fakalavelave tupu fakafuasei. E iloa ne koe me ko manakogina eiloa se tino apo. Kafai e se ‵sala atu koe ki se fesoasoani, e mafai o iku atu ki te mate o te tino. I se auala foki penā, e fe‵paki a Kelisiano ‵tonu mo se fakalavelave tupu fakafuasei, i se auala fakatusa. Me e sasale a Satani e pelā me se “leona fekai,” o taumafai ke kai ne ia tatou. (1 Petelu 5:8) Ko te mea ke tumau tatou i te ola i te feitu faka-te-agaga, e ma‵nako malosi eiloa tatou ki te fesoasoani o te agaga o te Atua. A te se fakamolemole atu ki te fesoasoani o te Atua e mafai eiloa o iku atu ki te mate. Tela la, ke loto ‵toa tatou o fakamolemole atu faeloa ki te Atua mō tena agaga tapu. (Efeso 3:14-16) Ko te faiga fua tenā e fakatumau ei ne tatou te malosi telā e manakogina ‘ke oko atu tatou ki te fakaotiga.’—Mataio 10:22; 24:13.
10 Tela la, se mea tāua ‵ki mō tatou ke manava malie i se taimi kae fesili ifo ki a tatou eiloa, ‘E pefea toku tumau i te faiga o aku ‵talo?’ Ke masaua la, kafai ko iloa ‵lei ne tatou me manakogina eiloa te fesoasoani o te Atua, ka tumau faeloa tatou i te ‵talo atu ke maua te agaga tapu.
Se a te Mea ka Fakamalosi Mai ke ‵Talo Atu Tatou mo te Loto Talitonu?
11. Ne fakaaogā pefea ne Iesu a te tala fakatusa o te tamana mo tena tama ki te faiga o ‵talo?
11 E faka‵mafa mai i te tala fakatusa a Iesu e uiga ki te tagata talimālō a te tulaga o te tino telā e ‵talo—ko te tino talitonu. A te suā tala fakatusa e faka‵mafa mai i ei te tulaga o te tino telā e fakalogologo ki ‵talo—ko Ieova te Atua. Ne fesili atu a Iesu: “Ko oi se tamana i a koutou na, e mafai o tuku atu se gata ki tena tama manafai e fakamolemole mai ki se ika? Io, me fakamolemole mai ki se fuamoa, kae tuku atu ki a ia se akalava?” Ne fai atu ne Iesu te aogā o te tala, i ana pati: “Tela la, kafai koutou e ma‵sei, kae e iloa ne koutou o tuku atu a mea ‵lei ki otou tama‵liki, e se sili atu la te otou Tamana i te lagi, i te fia tuku atu o te Agaga Tapu ki tino kolā e fakamolemole atu ki a ia?”—Luka 11:11-13.
12. E faka‵mafa mai pefea i te tala fakatusa e uiga ki te fakalogo o se tamana ki te fakamolemole a tena tama a te loto fiafia o Ieova o tali mai ki ‵tou ‵talo?
12 Mai te fakaakoakoga tenei e uiga ki te saga atu o se tamana ki tena tama, e fakaasi mai i ei ne Iesu a te auala e saga atu ei a Ieova ki tino kolā e ‵talo atu ki a ia. (Luka 10:22) Muamua la, ke onoono ki te mea e ‵kese ei te avā tala fakatusa konei. E ‵kese mo te tagata i te tala fakatusa muamua telā ne seki fia saga atu ki te fakamolemole mō se fesoasoani, e fai a Ieova e pelā me se mātua atafai telā e saga atu mo te fiafia ki te fakamolemole a tena tama. (Salamo 50:15) Ne toe fakaasi mai ne Iesu a te tulaga o Ieova e uiga ki a tatou mai i te kilokiloga a se tino malalo, se tamana i te lalolagi, ki te kilokiloga a se tino maluga, se tamana i te lagi. Ne fai mai a ia me e ui eiloa e mafai ne se tamana telā e “masei,” ona ko tena tulaga agasala, o tuku atu a mea ‵lei ki tena tama, kae pefea te faigofie o tuku mai ne te ‵tou Tamana faka-te-lagi, telā e alofa kaimalie, a te agaga tapu ki te kāiga o ana tino tapuaki!—Iakopo 1:17.
13. Se a te mea e mafai o mautinoa i a tatou i te ‵tou ‵talo atu ki a Ieova?
13 Se a te akoakoga mō tatou i konei? E mafai o tali‵tonu tatou me kafai e akai atu tatou ki ‵tou Tamana faka-te-lagi mō tena agaga tapu, e sili atu tena loto fiafia ke talia ne ia te ‵tou fakamolemole. (1 Ioane 5:14) Kafai e ‵talo atu faeloa tatou ki a ia, ka se mafai eiloa o fai mai a Ieova, i se auala fakatusa, penei: “Sa fakalavelave mai ki a au! Ko ‵pono nei te mataloa.” (Luka 11:7) E ‵kese mo te mea tenā, ne fai mai Iesu: “Akai atu, kae ka tuku mai ki a koutou; salasala atu, kae ka maua ne koutou; tukituki atu, kae ka ‵tala mai ki a koutou.” (Luka 11:9, 10) E tonu, ka “tali” mai eiloa a Ieova ki a tatou “i te taimi e ka‵laga atu ei [tatou].”—Salamo 20:9; 145:18.
14. (a) Se a te mafaufauga sē ‵tonu e fakalavelave atu ki nisi tino kolā e fe‵paki mo tofotofoga? (e) Kafai e fe‵paki tatou mo tofotofoga, kaia e mafai ei o ‵talo atu mo te loto talitonu ki a Ieova?
14 E faka‵mafa mai foki i te tala fakatusa a Iesu e uiga ki te lasi fakafia atu o te aga‵lei o Ieova i lō te aga‵lei o so se mātua. Tela la, e se ‵tau lele eiloa o mafau‵fau tatou me i tofotofoga kolā e fe‵paki mo tatou se fakaasiga tenā o te sē fiafia o te Atua ki a tatou. Ko te ‵tou fili sili ko Satani tenā e manako ke mafau‵fau tatou penā. (Iopu 4:1, 7, 8; Ioane 8:44) E se fakavae ki te Tusi Tapu a vaegā mafaufauga sē aogā penā. E se tofotofo ne Ieova a tatou ke fai “te masei.” (Iakopo 1:13) E se tuku mai ne ia ki a tatou se tofotofoga e poisini pelā me se gata io me ū‵kati e pelā me se akalava. E tuku mai eiloa ne te ‵tou Tamana faka-te-lagi a “mea ‵lei ki tino kolā e akai atu ki a ia?” (Mataio 7:11; Luka 11:13) E tonu, ko te lasi o ‵tou loto fakafetai ki te aga‵lei o Ieova mo tena loto fiafia o fesoasoani mai ki a tatou, ko te lasi foki o ‵tou loto talitonu o ‵talo atu ki a ia. Kafai e fai tatou penā, ka mafai ei o fai atu a tatou e pelā mo te faisalamo, telā ne tusi mai, penei: “Ka ko te Atua ne saga tonu mai eiloa ki a au; ne fakalogo mai eiloa ki taku ‵talo.”—Salamo 10:17; 66:19.
Te Auala e Fai ei te Agaga Tapu e Pelā me se Fesoasoani
15. (a) Se a te tautoga ne fai ne Iesu e uiga ki te agaga tapu? (e) Se a te auala e tasi e fesoasoani mai ei te agaga tapu ki a tatou?
15 Mai mua malie o tena mate, ne toe fakatalitonu atu ne Iesu ana pati kolā ne fai i ana tala fakatusa. E uiga ki te agaga tapu, ne fai atu a ia ki ana apositolo: “Ka fakatagi atu foki au ki te Tamana, ko uga mai ei ne ia ki a koutou te suā Fesoasoani . . . Ko te mea ke nofo mau i a koutou ki te se gata mai.” (Ioane 14:16) Tela la, ne tauto atu a Iesu me i te fesoasoani tenā, io me ko te agaga tapu, ka maua ne ana soko i taimi mai mua nei, e aofia i ei ‵tou aso nei. Se a te auala tāua e tasi e maua ei ne tatou te fesoasoani tenei? E fesoasoani mai te agaga tapu ke kufaki ne tatou a tofotofoga kese‵kese. E pefea la? Ne fakamatala mai ne te apositolo ko Paulo, telā ne fepaki foki mo tofotofoga, i tena tusi ki Kelisiano i Kolinito a te auala ne fesoasoani atu ei a te agaga o te Atua ki a ia. Ke sau‵tala malie aka tatou ki ana pati ne tusi.
16. E mafai pefea o ‵pau ‵tou tulaga mo Paulo?
16 Muamua la, ne fakaasi tonu atu ne Paulo ki ana taina tali‵tonu me ne fepaki a ia mo “te logo‵mae o te foitino,” kāti se vaegā tofotofoga e uiga ki se mea. Ne fai mai a ia: “Ne fakamolemole fakatolu atu au ki te Aliki [ko Ieova] e uiga ki te mea nei, kae fakatagi atu ki a ia ke ave ne ia keatea mai i a au.” (2 Kolinito 12:7, 8) E ui eiloa ne fakatagi atu a Paulo ki te Atua ke ave keatea tena masaki, ne tumau eiloa te masaki tenā. Kāti e fepaki foki koe mo se tulaga tai penā i aso nei. E pelā mo Paulo, kāti ko oti ne ‵talo faeloa koe mo te loto talitonu, o fakamolemole atu ki a Ieova ke ave keatea se tofotofoga penā. Faitalia tou fakamolemole ‵soko atu, koi tumau eiloa te fakalavelave tenā. E mata, e fakauiga i ei me e se saga mai a Ieova ki au ‵talo, kae e se fesoasoani atu foki tena agaga ki a koe? Ikai loa! (Salamo 10:1, 17) Ke onoono ki pati ne fai fakamuli mai ne te apositolo ko Paulo.
17. Ne tali atu pefea a Ieova ki ‵talo a Paulo?
17 I te tali atu ki te ‵talo a Paulo, ne fai atu te Atua: “A toku alofa tauanoa ko lava ‵lei eiloa mo koe, me i toku ‵mana e sili atu io me e katoatoa toku ‵mana i tou vāivāi.” Ne fai atu a Paulo: “Tela la, ka lasi toku fiafia o fakamatamata i oku feitu vāivāi, ko te mea ke i luga i a au te ‵mana o Keliso.” (2 Kolinito 12:9; Salamo 147:5) Tela la, ne maua ne Paulo te mea tenā e auala i a Keliso, ko te lasi o te puipuiga a te Atua ki luga i a ia e pelā me se faleie telā e fakapulou i luga i a ia. E tali mai foki a Ieova ki ‵tou ‵talo i se auala penā i aso nei. E fakapulou ne ia tena puipuiga ki luga i ana tavini.
18. Kaia e mafai ei o kufaki ne tatou a tofotofoga?
18 E tonu e se fakalaufie ne te faleie a te vaiua, io me taofi ne ia te matagi ke se agi, kae e maua mai loa i ei se puipuiga mai mea konā. E penā foki te mauaga o se puipuiga e auala i te “‵mana o Keliso,” e se fakagata ne ia a tofotofoga mo mea faiga‵ta kolā e oko mai ki a tatou. Kae, e tuku mai i ei se puipuiga faka-te-agaga mai mea fakama‵taku o te lalolagi nei mo taua kolā e laga mai ne tena pule, ko Satani. (Fakaasiga 7:9, 15, 16) Tela la, kafai e fepaki koe mo se tofotofoga telā e foliga mai me se fano ‘keatea mai i a koe,’ e mafai eiloa o mautinoa i a koe me iloa ‵lei ne Ieova tou fakalavelave kae ko oti eiloa ne saga atu ki tau ‘tagi atu mō se fesoasoani.’ (Isaia 30:19; 2 Kolinito 1:3, 4) Ne tusi mai a Paulo: “Me i te Atua e tausi tena folafolaga, kae se mafai foki o talia ne ia ke fakaosoosogina koutou ke sili atu i te otou malosi o ‵teke te fakaosoosoga; kae i te taimi e fakaosoosogina ei koutou, ka tuku atu ne ia a te malosi e kufaki ei ne koutou, kae fai foki ne ia se ala e ‵sao ei koutou.”—1 Kolinito 10:13; Filipi 4:6, 7.
19. Se a te mea ka fakaiku aka ne koe ke fai, kae kaia?
19 E tonu, a “aso fakaoti” konei o te lalolagi sē amioatua tenei e fakamailogagina ki “taimi faiga‵ta.” (2 Timoteo 3:1) E tiga te feitu tenā, e se tō faiga‵ta ki tavini a te Atua ke fakafesagai atu ki taimi konei. Kaia? Ona ko te ‵lago mo te puipuiga a te agaga tapu o te Atua, telā e tuku mai ne Ieova mo te loto fiafia ki tino katoa kolā e fakamolemole atu faeloa ki ei mo te loto tali‵tonu. Tela la, ke na fakaiku aka ne tatou ke tumau faeloa i te ‵talo atu mō te agaga tapu i aso katoa.—Salamo 34:6; 1 Ioane 5:14, 15.
Ka Tali Mai Koe Pefea?
• Ne a mea e ‵tau o fai ne tatou ke maua ei te agaga tapu o te Atua?
• Kaia e mafai ei o loto tali‵tonu tatou me ka tali mai eiloa a Ieova ki ‵tou talo mō te agaga tapu?
• E fesoasoani mai pefea a te agaga tapu ke kufaki tatou i fakalavelave?
[Fakamatalaga o te Ata i te itulau e 13]
Ne a mea e tauloto ne tatou mai te tala fakatusa a Iesu e uiga ki te tagata talimālō telā ne fakamolemole ‵soko atu?
[Fakamatalaga o te Ata i te itulau e 14]
E mata, e ‵talo atu faeloa koe mō te agaga tapu o te Atua?
[Fakamatalaga o te Ata i te itulau e 15]
Ne a mea e tauloto ne tatou e uiga ki a Ieova mai te tala fakatusa e uiga ki se tamana alofa atafai?