A Ieova e Fiafia ki te Fai Mea Tonu
“Au [Ieova], e fiafia ki te fai mea tonu.”—ISAIA 61:8.
1, 2. (a) Ne a uiga o pati ko te “fai mea tonu” mo “faifaiga sē ‵tonu”? (e) Ne a pati i te Tusi Tapu e uiga ki a Ieova mo tena uiga fai mea tonu?
ATE fai mea tonu e fakamatala mai e pelā me ko te ‘sē fakailoga tino, te ‵lei, te faiga o amioga ‵lei kae ‵tonu.’ Kae e aofia i faifaiga sē ‵tonu a te se ‵lei, te fāpito, faifaiga ma‵sei, mo te sōna fakalogo‵mae atu fua ki nisi tino.
2 Ne tusi mai a Mose, kāti i tausaga toeitiiti ko katoa te 3,500 ko ‵teka, e uiga ki te Pule o te Lagi mo te Lalolagi, ko Ieova: “E tonu kae amiotonu ana auala katoa. A te otou Atua e fakamaoni kae amiotonu.” (Teutelonome 32:4) I se fitu senitenali mai tua ifo, ne fakamalosi atu te Atua ki a Isaia ke tusi ne ia a pati konei: “Au, [Ieova], e fiafia ki te fai mea tonu.” (Isaia 61:8) Kae i te senitenali muamua, ne folafola mai a Paulo penei: “E isi te se fai mea tonu o te Atua? Ikai, e se penā!” (Loma 9:14) Kae i te senitenali eiloa tenā, ne folafola atu a Petelu, penei: “Se mea tonu i te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.” (Galuega 10:34, 35) Ao, “a Ieova e fiafia ki te fai mea tonu.”—Salamo 37:28; Malaki 3:6.
Ko Lauiloa a Faifaiga sē ‵Tonu
3. Ne māfua mai pefea a faifaiga sē ‵tonu ki te lalolagi?
3 A te fai mea tonu e se se uiga lauiloa i aso nei. E mafai o pokotia tatou i faifaiga sē ‵tonu i so se tulaga o te olaga—i ‵tou koga ga‵lue, i akoga, i ‵tou faifaiga ki tino pule, mo nisi auala aka—ke oko foki loa ki te kāiga. E tonu, a faifaiga sē ‵tonu konā e se ne mea ‵fou. Ne māfua mai a faifaiga penā i te taimi ne ‵teke atu ei ‵tou mātua muamua kae se faka‵logo foki, ona ko fakamalosiga a te agaga ‵teke telā ne fai mo fai a Satani te Tiapolo. Se faifaiga sē tonu eiloa ke fakaaogā ‵se ne Atamu, Eva, mo Satani a te meaalofa gali ko te saolotoga telā ne tuku atu ne Ieova ki a latou ke fai olotou filifiliga. Ne iku atu olotou faifaiga ‵se konā ki te logo‵mae mo te ‵mate o tino.—Kenese 3:1-6; Loma 5:12; Epelu 2:14.
4. E pefea te leva ne fai ei a faifaiga sē ‵tonu e pelā me se vaega o te olaga o tino?
4 I tausaga kāti e 6,000 talu mai te kinauga i Etena, ne fai a faifaiga sē ‵tonu e pelā me se vaega o te olaga o tino. E ‵tau eiloa o fai penei me i a Satani ko te atua o te lalolagi nei. (2 Kolinito 4:4) A ia se tino loi kae ko te tamana foki o te loi, se tino fatufatu kae se tino e ‵teke ki a Ieova. (Ioane 8:44) E fai faeloa ne ia a amioga matagā sē ‵tonu. E pelā me se fakaakoakoga, ona ko fakamalosiga ma‵sei a Satani mai mua o te Lolo i aso o Noa, ne iloa ne te Atua “te amio ma‵sei o tino katoa i te lalolagi, mo te lai‵lai o olotou mafaufauga.” (Kenese 6:5) Ne lauiloa foki a te tulaga tenā i taimi o Iesu. Ana muna: “Ke faitalia eiloa te aso ke nofo mo ana fakalavelave,” ko tena uiga ko fakalavelave faiga‵ta, e pelā mo faifaiga sē ‵tonu. (Mataio 6:34) E taku tonu mai a te Tusi Tapu penei: “I mea katoa ne faite, ne ma‵nava fi‵ta; e pelā eiloa mo te ‵mae o te fafine fanau, ke oko mai eiloa ki aso nei.”—Loma 8:22.
5. Kaia ko uke ei a faifaiga sē ‵tonu i ‵tou aso nei i lō aso mua?
5 Tela la, ne ‵tupu faeloa a mea ma‵sei kolā ne iku atu ki faifaiga matagā i olaga o tino. Kae nei la, ko gasolo o na masei atu te tulaga i aso nei. Kaia? Me ko oko atu nei te tulaga o te olaga sē amioatua tenei ki ona “aso fakaoti” i te fia sefulu tausaga ko ‵teka, kae ko fepaki nei mo toe “taimi faiga‵ta” me ko pili atu ki te gataga. Ne ‵valo mai te Tusi Tapu me i te vaitaimi tenei o te olaga o tino, a tino ka “ma‵natu fakapito, kaima‵nako, fakamata‵mata, fia ma‵luga, pati masei, . . . e se loto fakafetai, e se fia‵fia ki lotu, e se kaima‵lie, e se loto a‵lofa, e gutu fatufatu, e faka‵tupu taua, e mata kaitaua, e ita ki te ‵lei, ka fakatupu masei, e se ‵poi i te masei, ko ‵fete i te fakamatamata.” (2 Timoteo 3:1-5) E iku atu a vaegā amioga ma‵sei penā ki faifaiga sē ‵tonu e uke.
6, 7. Ne a faifaiga sē ‵tonu e uke e pokotia ei a tino i aso nei?
6 Ne oko atu a te tulaga o faifaiga sē ‵tonu i te fia selau tausaga ko ‵teka ki se tulaga masei ‵ki i lō aso mua. A te pogai e tasi, ona ko te uke o taua ne ‵tupu i tausaga konei. E pelā loa mo fakatautauga a nisi tino tusi tala fakasolopito me e nofo ki se 50 miliona ki te 60 miliona a tino ne ‵mate i te Taua i te Lua a te Lalolagi, kae ko te tokoukega o latou ne tino kolā e se ‵kau i taua—tāgata, fāfine, mo tama‵liki fakaa‵lofa. Talu mai te taimi ne oti atu ei te taua tenā, e lau i te fia miliona o tino ne tamate i vaegā kinauga valevale, a te tokoukega foki o latou ne tino kolā e se ‵kau i kinauga konā. E fakamalosi aka ne Satani a vaegā faifaiga sē ‵tonu penā ona ko te lasi o tena kaitaua, me iloa ne ia me ko pili o fakatakavale a ia ne Ieova. E fakamatala mai a valoaga i te Tusi Tapu penei: “I te Tiapolo ko oti ne fanaifo ki a koulua, ka ko oko eiloa i te kaitaua, me e iloa ne ia ko se leva ona aso i te lalolagi.”—Fakaasiga 12:12.
7 E fakamāumāu ne kautau i te lalolagi kātoa se tiliona tālā i tausaga takitasi. E lau i selau miliona o tino e se maua ne latou a mea e lava mō ola latou, kae mafau‵fau la ki mea aogā o te olaga e mafai o maua ne tino mai tupe konā. Kāti e nofo ki se tasi piliona tino e se lava olotou meakai, kae lava kae ‵toe a meakai a nisi tino. E ‵tusa mo te fakamatalaga mai Malo ‵Soko, e nofo ki se lima miliona o tama‵liki e ‵mate i tausaga takitasi ona ko te likiliki i te fia ‵kai. Ma‵faga o mea masei! Kae mafaufau aka foki ki tama‵liki fakaa‵lofa e tokouke kolā e ‵mate e auala i te fakatōga o pepe. E fakatautau pelā me e nofo ki se 40 miliona ki te 60 miliona o mea penā e ‵tupu i te lalolagi kātoa i tausaga takitasi! Ko tafaga la te matagā o faifaiga sē ‵tonu konei!
8. Se a te auala fua e tasi e mafai ei o ‵toe maua ne tino a te fai mea tonu?
8 E se mafai ne tino pule o faka‵lei aka a fakalavelave e uke kolā e puapuagātia i ei a tino i aso nei; io me gasolo o ‵lei atu a fakalavelave konā ona ko taumafaiga a tāgata. Ne folafola mai a te Muna a te Atua me kafai ko oko mai ki ‵tou taimi nei “ka ko tino ma‵sei mo te fakaloiloi tino, ka kamata eiloa latou mai te masei o fakasolo o na ma‵sei atu, i te fakaloiloi ki nisi tino, kae toe pa‵kia foki eiloa latou i olotou ‵loi.” (2 Timoteo 3:13) Ko aofia malosi nei a faifaiga sē ‵tonu i te olaga i aso takitasi telā ko sē mafai ne tino o ave keatea. Ko te Atua fua o te fai mea tonu e mafai o ave keatea ne ia. Ko ia fua e mafai o ave keatea ne ia a Satani, temoni, mo tino amio ma‵sei.—Ielemia 10:23, 24.
Te Manavase Tonu
9, 10. Kaia ne loto vāivāi i ei a Asafo?
9 I taimi mua, ke oko foki loa ki tino ne tusi ne latou te Tusi Tapu, ne mafau‵fau sāle latou me kaia ne seki na faka‵lei aka ei ne te Atua a fakalavelave o tino kae tuku mai te fai mea tonu mo te amiotonu. Ke mafaufau ki se tagata e tokotasi i taimi ne tusi ei te Tusi Tapu. E fakaasi mai i te fakatomuaga ki te Salamo 73 i te Tusi Paia, Samoa, a te igoa o Asafo, kae fakasino atu ki ei pelā me se tino usuusu lauiloa mai te matakāiga o Levi i te vaitaimi o te pulega a te Tupu ko Tavita io me ko tino usuusu i te kāiga telā e pule ne Asafo. Ne tusi ne Asafo mo tino mai tena gafa a pese e uke kolā e fakaaogā mō tapuakiga. Kae, i se taimi e tasi o tena olaga, ne vāivāi a Asafo te tino telā ne tusi ne ia te salamo tenei i te feitu faka-te-agaga. Ne lavea ne ia a te manuia o te olaga o tino amio ma‵sei, kae e foliga mai me e fia‵fia eiloa latou ki te olaga, kae seai ne fakalavelave e fepaki mo latou.
10 E fai‵tau tatou penei: “Au ne loto masei ki tino fia‵sili i te mateaga ne au te solosolo ‵lei o tino amio ma‵sei. Seai ne mea ‵mae e oko ki olotou foitino; e ola ‵lei olotou foitino, kae ma‵losi foki. E se puapuagātia latou pelā mo nisi tino; kae se maua foki ne latou ne fakalavelave kolā e maua ne nisi tino.” (Salamo 73:2-8) Kae ne oko mai te taimi ne iloa aka ei ne te tino tusi tala tenei o te Tusi Tapu a te ‵se o tena kilokiloga tenā. (Salamo 73:15, 16) Ne taumafai a te faisalamo o ‵fuli ana mafaufauga, kae ne seki maina katoatoa a ia me kaia e se fakasala ei a tino amio ma‵sei ona ko olotou mea ‵se, kae logo‵mae a tino amio ‵lei.
11. Se a te mea ne fatoā malamalama i ei a te faisalamo ko Asafo?
11 Ne fatoā malamalama a te tagata fakamaoni tenā i te ikuga ka oko atu ki tino amio ma‵sei.—ko Ieova fua ka faka‵tonu ne ia a tulaga konā. (Salamo 73:17-19) Ne tusi mai a Tavita penei: “Ke fakamoemoe koe ki te Aliki kae fakalogo ki ana fakatonuga; ka fakamanuia ne ia a koe o tuku atu mō koe te fenua, kae lavea foki ne koe a tino amio ma‵sei ka afuli keatea.”—Salamo 37:9, 11, 34.
12. (a)Se a te fuafuaga a Ieova ki tino amio ma‵sei mo faifaiga sē ‵tonu? (e) E pefea ou lagonaga e uiga ki te faka‵leiga o te fakalavelave ki faifaiga sē ‵tonu?
12 E mautinoa eiloa me ko te fuafuaga eiloa a Ieova ke fakaseai atu a amioga matagā fakatasi mo faifaiga sē ‵tonu mai te lalolagi nei i tena taimi tonu. Tenā eiloa te mea e ‵tau o fakamasaua ifo ne Kelisiano fakamaoni ki a latou eiloa i taimi katoa. Ka tapale keatea ne Ieova a tino kolā e ‵teke ki tena loto, kae ka fakamanuia ne ia latou kolā e ola e ‵tusa mo tena loto. “E kilokilo mai a ia ki tino i koga katoa kae e iloa foki ne ia olotou mea e fai. Ka sukesuke ne te Aliki a tino ‵lei mo tino amio ma‵sei; a tena loto katoatoa e se fiafia ki tino ofa tulafono. E faka‵to ifo ne ia ki tino amio ma‵sei te malala ‵ka mo pauta ‵ka; e fakasala foki ne ia latou ki te matagi vela. E amiotonu te Aliki kae fiafia ki te amio ‵lei.”—Salamo 11:4-7.
Se Lalolagi Fou o te Fai Mea Tonu
13, 14. Kaia ko lauiloa i ei a te fai mea tonu mo te amiotonu i te lalolagi fou?
13 Kafai ko fakaseai atu ne Ieova a te olaga fai mea sē tonu tenei telā e pule ne Satani, ka aumai ei ne Ia se lalolagi fou kae ‵malu. Ka pule atu ki ei te Malo faka-te-lagi o te Atua, telā ne fakaakoako ne Iesu ana soko ke ‵talo ki ei. Ka sui ne te amiotonu mo te fai mea tonu a amioga ma‵sei mo faifaiga sē ‵tonu, kae ka tali katoatoa mai foki loa i ei a te ‵talo: “Ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.”—Mataio 6:10.
14 E fakamatala mai i te Tusi Tapu a te vaegā pulega telā e fakamoe‵moe tatou ki ei, se pulega telā e faka‵tali mai mō tino fakamaoni. Ko mafai ei o lavea atu te fakataunuga o te Salamo 145:16: “E tuku ne koe [Ieova te Atua] ki ei a mea e lava mō latou, kae fakamalie ne koe olotou manako.” E se gata i ei, e fai mai te Isaia 32:1 penei: “I se aso fakamuli kae ka isi se tupu [ko Keliso Iesu i te lagi] telā ka pule mo te fakamaoni, mo takitaki o te fenua [ko sui o Keliso i te lalolagi] kolā ka pulepule mo te fai mea tonu.” E uiga ki te Tupu ko Iesu Keliso, e ‵valo mai te Isaia 9:7 penei: “A tena malosi fakatupu e gasolosolo eiloa o lasi; a tena malo ka tumau faeloa i ei a te filemu. Ka sui ne ia a te Tupu ko Tavita, ka ko tena pulega e fakavae ki mea tonu mo te fai mea tonu, mai te taimi nei ke oko atu ki te gataga o te lalolagi. A te Aliki Malosi, ko toka eiloa o fakataunu a mea katoa konā.” E mata, e fakaataata ne koe a te olaga ka maua ne koe mai te pulega tonu tenā?
15. Se a te mea ka fai ne Ieova mō tino i te lalolagi fou?
15 I te lalolagi fou a te Atua, ka se ‵toe ai se pogai e ‵tau ei mo tatou o fai atu a muna i te Failauga 4:1: “Tenā, ne toe kilokilo atu au ki amioga ma‵sei katoa konei e fai i te lalolagi tenei. A tino puapuagā e ‵tagi, kae seai se tino e fesoasoani ki a latou, me i tino kolā e fakapuapuagā ne latou a tino konā ne tino ma‵luga kae malosi.” E tonu, ona ko te se ‵lei katoatoa o ‵tou mafaufau, se mea faigata ke fakaataata i ‵tou mafaufau a te gali o te lalolagi fou kae amiotonu. Ka se toe ai ne amioga ma‵sei, kae ka maua faeloa a mea ‵gali i aso katoa. Ao, ka faka‵tonu katoa ne Ieova a mea ‵se katoa, i se auala telā e ‵kese ‵ki mo te mea telā ne fakamoe‵moe tatou ki ei. Ko tafaga te fetaui ‵lei o pati kolā ne fakaosofia ne Ieova te Atua ke tusi ne te apositolo ko Petelu penei: “Ka ko te Atua, ko oti ne folafola mai ne ia te lagi fou mo te lalolagi fou, e nofo i ei a te amiotonu, kae tenei eiloa e fakatalitali tatou ki ei”!—2 Petelu 3:13.
16. Ne faka‵tu aka pefea a te “lagi fou,” kae i se auala fea ne fakatoka ei te “lalolagi fou” i aso nei?
16 E tonu, a te “lagi fou” tenā, telā ko te malo faka-te-lagi o te Atua i lima o Keliso, ko oti ne fakatu aka. A te “lalolagi fou,” ko te fakavae o te fakapotopotoga o tino amio ‵lei i te lalolagi, ko oti ne fakamaopoopo aka i aso fakaoti konei. Ko tai kātoa nei te fitu miliona o latou, i atufenua e 235 mo fakapotopotoga e 100,000. Ko oti ne tauloto te fia miliona konei ki auala amio‵tonu kae fai mea tonu o Ieova, kae ona ko te mea tenā, ko maua ne latou se vā fealofani fiafia telā e fusi ne te alofa faka-Kelisiano. E laveagofie fua latou ona ko te lotou vā fealofani talu mai te kamataga o tala fakasolopito o te lalolagi, ko te vā fealofani telā e sili atu i so se mea i lalo o te pulega a Satani. A te alofa mo te vā fealofani tenā se ata fakavaloaga o se taimi fakaofoofogia kae gali, telā ka oko mai i aso mai mua nei i te lalolagi fou a te Atua, kae ka pule mai i ei te amiotonu mo te fai mea tonu.—Isaia 2:2-4; Ioane 13:34, 35; Kolose 3:14.
Ka se Manuia te Osoatuga a Satani
17. Kaia e mautinoa i ei me ka se manuia a te osoatuga fakaoti a Satani ki tino o Ieova?
17 Ko pili o taua atu nei a Satani mo tena kau ki tino tapuaki o Ieova mai te taumafai ke fakaseai atu latou. (Esekielu 38:14-23) Tenā te mea ne taku ne Iesu e pelā me ko te ‵toe “fakalavelave . . . e tafa sili i te masei i fakalavelave katoa ko oti ne ‵tupu mai i te kamataga o te lalolagi, ke oko mai eiloa ki te aso tenā. E seai foki eiloa se fakalavelave penā e toe tupu.” (Mataio 24:21) E mata, ka manuia a te osoatuga a Satani tenā? Ikai. E fakatalitonu mai te Muna a te Atua ki a tatou penei: “Me i te Aliki e fiafia ki te mea tonu, e se mafai foki o tuku tiaki ne ia ona tino fakamaoni. E puipui faeloa ne ia a latou, ka ko fanau a tino amio ma‵sei ka afuli ne ia keatea. A tino amio‵tonu ka fai mo latou te fenua, kae ka ‵nofo faeloa i ei ki te se gata mai.”—Salamo 37:28, 29.
18. (a) Ka saga atu pefea a te Atua ki te osoatuga a Satani ki Ana tino? (e) Kaia e aogā ei ke onoono koe ki fakamatalaga fakavae i te Tusi Tapu e uiga ki te manumalo o te fai mea tonu?
18 A te osoatuga a Satani mo tena potukau ki tavini a Ieova e fai pelā me ko toe pati fakaitaita fakaoti eiloa. Ne ‵valo mai a Ieova e auala i a Sakalia penei: “So se tino e fakapatele atu ki a koutou, ko fakapatele a ia ki toku ‵kanomata.” (Sakalia 2:8, Tusi Paia, Samoa) E fai eiloa pelā me e ‵soka ne se tino a te ‵kanomata o Ieova. Ka saga fakavave mai a ia kae ‵solo faka‵ma ne ia a tino amio ma‵sei. A tavini a Ieova ko toe tino a‵lofa, ‵kau fakatasi, filemu, kae faka‵logo ki tulafono, i te lalolagi. Tela la, e se ‵tau eiloa o taua atu ki a latou, kae se faifaiga sē tonu foki māfai e fai penā. Ka sē talia eiloa ne te tino telā e “fiafia ki te mea tonu” a te mea tenā. A te taua atu mō latou ka iku atu ki te fakaseaiga katoatoa o fili o ana tino, ka manumalo i ei te fai mea tonu, mo te fakaolataga o tino kolā e tapuaki atu ki te Atua tonu e tokotasi. Ko tafaga la te fakaofoofogia o mea kolā ka ‵tupu i aso mai mua nei!—Faataoto 2:21, 22.
Ka Tali Mai Koe Pefea?
• Kaia ko lauiloa i ei a faifaiga sē ‵tonu?
• Ka faka‵lei aka pefea ne Ieova a faifaiga sē ‵tonu i te lalolagi nei?
• Ne a mea ‵gali ne fiafia koe ki ei i te mataupu tenei e uiga ki te manumalo o te fai mea tonu?
[Fakamatalaga o te Ata i te itulau e 9]
Ne ‵fonu a te lalolagi i amioga ma‵sei mai mua o te Lolo, kae ko siliga atu i “aso fakaoti” konei
[Fakamatalaga o te Ata i te itulau e 10]
I te lalolagi fou a te Atua, ka sui ne te amiotonu mo te fai mea tonu a amioga ma‵sei katoa