Te Tāua o Koutou ke Maua te Malo

“Tenei a te fakatalitonuga o te fakamasinoga amiotonu a te Atua, me i te taui o mea katoa konei, ko te tāua o koutou i tena Malo.”—2 TESALONIA 1:5.

1, 2. Se a te fuafuaga a te Atua e uiga ki te fakamasinoga, kae ko oi ka fai ne ia te fakamasinoga?

KĀTI i te tausaga ko te 50 T.A., ne nofo atu ei a te apositolo ko Paulo i Atenai. Ona ko tena fanoanoa i te salalau atu o faifaiga ifo ki tupua i konā, ne fakamalosi aka ei ke tuku atu ne tou tagata se molimau sē fuafuagina eiloa. Ne fakaoti ana muna ki se folafolaga telā kāti ne fai ei ke ‵saga tonu atu a tino fapau‵pau kolā ne fakalogo‵logo ki a ia. Ana muna: “Nei ko fakatonu atu ne [te Atua] a tino katoa kolā e ‵nofo i so se koga ke ‵fuli keatea mai i olotou auala ma‵sei. I te mea ko oti ne fakamoe ne ia te aso ka fakamasino ei ne ia te lalolagi kātoa ki te amiotonu, e alatu i te tino telā ko oti ne filifili ne ia. Ko oti ne fakamaonia ne ia a te mea tenei ki tino katoa, i te ‵toe fakatumaiga o te tino tenei mai te mate.”—Galuega 17:30, 31.

² Ko oko eiloa i te tāua ke mafaufau ‵mafa ki te manatu me ko oti ne fakatoka ne te Atua se aso fakamasino mō tino i aso mai mua nei! A te fakamasinoga tenā ko te fakamasinoga telā ka fai ne te tino telā ne seki taku atu ne Paulo i tena lauga i Atenai, kae e iloa ne tatou me ko Iesu Keliso telā ko oti ne fakatu aka. E fakauiga eiloa a te fakamasinoga telā ka fai ne Iesu ki te mauaga o te ola io me ko te mate.

3. Kaia ne fai ei ne Ieova se feagaiga mo Apelaamo, kae ko oi ne maua ne latou se tulaga fakapito i te fakataunuga o te feagaiga tenā?

³ E ‵tusa mo te 1,000 tausaga te leva o te Aso Fakamasino tenā. Ka fai ne Iesu te fakamasinoga tenā i te igoa o Ieova e pelā me ko te Tupu i te Malo o te Atua, kae ka se fai tokotasi fua ne ia te galuega tenā. Ne filifili aka ne Ieova a nisi tino mai te lalolagi ke pule fakatasi mo Iesu kae fai foki te fakamasinoga i te aso o te meleniuma tenā. (Fakatusa ki te Luka 22:29, 30.) Toeitiiti kae katoa te 4,000 tausaga ko ‵teka, ne fakatoka ne Ieova te fakavae mō te Aso Fakamasino i te taimi ne fai ei ne ia se feagaiga mo tena tavini fakamaoni ko Apelaamo. (Faitau ki te Kenese 22:17, 18.) Ne kamata eiloa o fakagalue aka te feagaiga tenā i te 1943 T.L.M. E tonu, ne seki malamalama ‵lei a Apelaamo i te uiga o te feagaiga tenā mō tino. Kae e lavea atu ne tatou i aso nei, e ‵tusa mo fakanofonofoga i te feagaiga, me e isi eiloa se tulaga fakapito o te fanau a Apelaamo i te fakataunuga o te fuafuaga a te Atua ke fakamasino a tino.

4, 5. (a) Ko oi te vaega tāua o te fanau a Apelaamo, kae ne a ana muna e uiga ki te Malo? (e) Ne ‵tala mai anafea a te fakamoemoega ke fai mo fai se vaega i te Malo o te Atua?

⁴ A te vaega tāua o te fanau a Apelaamo ko Iesu, telā ne fakaeke ki te agaga tapu i te 29 T.A., kae ne fai mo fai te Mesia io me ko te Keliso telā ne folafola mai. (Kalatia 3:16) Ne toe fakamāumāu ne Iesu a te suā tolu mo te āfa tausaga i te talaiatuga o te tala ‵lei o te Malo ki te fenua o tino Iutaia. Mai tua o te puke fakapagotaga o Ioane te Papatiso, ne fakaasi atu ne Iesu me ne mafai eiloa o fakamoe‵moe a nisi tino ke aofia latou i te Malo tenā i te taimi ne fai mai ei a ia: “Kae mai te taimi ne talai atu ei ne Ioane tena talaiga ke oko mai ki te aso nei, a te Malo o te lagi ne logofiofio i puapuagā, mo tino ma‵losi foki ne taumafai o puke mālō a te Malo o te lagi.”—Mataio 11:12.

⁵ A te ‵tonuga loa, mai mua faeloa o tena faipatiga e uiga ki tino kolā ka “puke” ne latou te Malo o te lagi, ne fai atu Iesu: “E tonu, au e fai atu ki a koutou, e seai se tama ne fanau i fāfine e sili atu i a Ioane te Papatiso, ka ko te tino tafa sē taulia i te Malo o te lagi, e sili atu i a Ioane.” (Mataio 11:11) Kaia ne fai atu ei penā? Ona ko te mea ne seki ‵tala katoatoa atu te fakamoemoega ki tino fakamaoni ke fai mo fai ne vaega i te Malo o te Atua, ke oko eiloa ki te taimi ne ‵ligi atu ei te agaga tapu i te Penitekoso i te 33 T.A. Kae ko oti ne mate atu a Ioane te Papatiso i te taimi tenā.—Galuega 2:1-4.

Ko Taku Amiotonugina te Fanau a Apelaamo

6, 7. (a) I te auala fea ne fai ei te fanau a Apelaamo ke “pelā mo te uke o fetu i te lagi”? (e) Se a te fakamanuiaga ne maua ne Apelaamo, kae se a te fakamanuiaga tai ‵pau ne maua ne tena fanau?

⁶ Ne fai atu ki a Apelaamo me ka fakatokouke tena fanau kae ka “pelā mo te uke o fetu i te lagi” mo one i te matafaga. (Kenese 13:16; 22:17) Ko tena uiga, ne seki mafai o iloa ne tino i aso o Apelaamo a te aofaki o tino kolā ka aofia i te fanau tenei. Kae ne fakaasi fakamuli mai eiloa te aofaki tonu o tena fanau faka-te-agaga. I tafa o Iesu, e ‵tusa eiloa mo te toko 144,000 a tino ka aofia i ei.—Fakaasiga 7:4; 14:1.

⁷ E ‵tusa mo te fakatuanaki o Apelaamo, e fai mai te Muna a te Atua: “Ne fakatuanaki a Apelaamo ki te Atua, tenā te pogai ne takua ei a ia ko te tino amiotonu.” (Kalatia 3:6) E tonu, e seai eiloa se tino e amiotonu katoatoa. (Iakopo 3:2) E tiga eiloa te feitu tenā, ona ko te tu ‵kese o te fakatuanaki o Apelaamo, ne kilo atu eiloa a Ieova ki a ia e pelā me se tino amiotonu kae ne taku foki ne ia tou tagata ko tena taugasoa. (Isaia 41:8) A tino kolā e aofia i te fanau faka-te-agaga a Apelaamo, ne taku amiotonugina latou fakatasi mo Iesu, kae e maua ei ne latou a fakamanuiaga e sili atu i lō fakamanuiaga ne maua ne Apelaamo.

8. Ne a fakamanuiaga e ‵tala atu ki tino kolā e aofia i te fanau a Apelaamo?

⁸ Ne taku amiotonugina a Kelisiano fakaekegina ona ko te lotou fakatuanaki ki te taulaga togiola a Iesu. (Loma 3:24, 28) I te kilokiloga a Ieova, ko oti ne fakasaoloto latou mai olotou agasala kae ne mafai o fakaekegina latou ki te agaga tapu ke fai mo fai ne tama faka-te-agaga a te Atua, ko taina o Iesu Keliso. (Ioane 1:12, 13) E fai latou mo fai te vaega o te feagaiga fou kae fakatu aka i ei se fenua fou, telā ko “te Isalaelu a te Atua.” (Kalatia 6:16; Luka 22:20) Ko tafaga la a te gali o te tauliaga tenā mo mea katoa kolā e fakaata mai i ei! E pelā mo te ikuga o gasuesuega konei a te Atua mō latou, e se fakamoe‵moe eiloa a Kelisiano fakaekegina ke ola latou i te lalolagi ki te se-gata-mai. E lotoma‵lie latou ke se maua te fakamoemoega tenā ona ko te fiafia telā e se mafai o fakamatalagina i te lotou ‵kau fakatasi mo Iesu i te Aso Fakamasino kae pule fakatasi foki mo ia i te lagi.—Faitau ki te Loma 8:17.

9, 10. (a) Ko te taimi fea ne fakaekegina muamua i ei a Kelisiano ki te agaga tapu, kae ne a mea ne ‵tau o fai ne latou mai tua ifo i ei? (e) Se a te fesoasoani ne maua ne Kelisiano fakaekegina?

⁹ I te Penitekoso i te 33 T.A., ne tuku atu eiloa te avanoaga ki se potukau o tino fakamaoni ke aofia i tino kolā ka pule fakatasi mo Iesu i te Aso Fakamasino. E ‵tusa mo te 120 o soko o Iesu ne papatiso ki te agaga tapu kae ne fai ei latou mo fai a Kelisiano fakaekegina muamua eiloa. Kae ki a latou, a te mea tenā ko te kamataga fua. Talu mai te taimi tenā, ne ‵tau o fakaasi atu ne latou te a‵lofa fakamaoni ki a Ieova faitalia a tofotofoga kolā ka fakaoko atu ne Satani ki luga i a latou. E ‵tau o fakamaoni latou ke oko eiloa ki te mate ko te mea ke maua ne latou a te kalauna o te ola i te lagi.—Fakaasiga 2:10.

¹⁰ Ona ko te fakamoemoega tenei, ne tuku atu ei ne Ieova ki Kelisiano fakaekegina e auala i tena Muna mo te fakapotopotoga Kelisiano a manatu aogā mo fakamalosiga kolā e ‵tau o maua ne latou. E pelā mo te tusi a te apositolo ko Paulo ki Kelisiano fakaekegina i Tesalonia: “E iloa ne koutou me ne atafai atu matou ki a koutou takitokotasi, e pelā eiloa mo se tamana e atafai ki tena fanau. Ne fakamalosi ne matou otou loto, ne fakamafanafana atu foki matou ki a koutou, kae ne fakatauanau atu matou ke ola koutou i te olaga e fiafia ki ei te Atua, telā e kalaga atu ke ‵kau fakatasi koutou ki tona Malo mo tona ‵malu.”—1 Tesalonia 2:11, 12.

11. Se a te tusi ne fakatoka ne Ieova mō sui o “te Isalaelu a te Atua”?

¹¹ I tausaga e sili atu i te onosefulu mai tua ifo o te filifiliga o sui muamua o te fakapotopotoga o Kelisiano fakaekegina, ne lavea atu ei ne Ieova a te tāua ke fakatoka se fakamaoniga tumau e uiga ki te taviniga a Iesu i te lalolagi e pelā foki mo Ana faifaiga mo pati polopoloki ki Kelisiano fakaekegina i te senitenali muamua. Tela la, ne fakaopoopo atu ei ne Ieova a te Tusi Tapu i te ‵gana Eleni ki te Tusi Tapu i te ‵gana Epelu telā ko leva ne fakaaogā. Ne tusi muamua eiloa a te Tusi Tapu i te ‵gana Epelu mō te fenua faka-te-foitino o Isalaelu i te taimi ne maua ei ne latou se fesokotakiga fakapito mo te Atua. Ne fakasino atu eiloa a te tusiga o te Tusi Tapu i te ‵gana Eleni ki “te Isalaelu a te Atua,” ko tino kolā ne fakaekegina e pelā me ne taina o Keliso mo tama faka-te-agaga a te Atua. E tonu, e se fakauiga i ei me ne seki mafai o maua ne tino o fenua fakaa‵tea a mea aogā e uke mai te sukesuke ki te Tusi Tapu i te ‵gana Epelu. E penā foki loa, e maua ne Kelisiano kolā e seki fakaekegina ki te agaga tapu a mea aogā e uke mai te sukesuke mo te ola e ‵tusa mo polopolokiga kolā e maua i te Tusi Tapu i te ‵gana Eleni.—Faitau ki te 2 Timoteo 3:15-17.

12. Se a te fakamasauaga ne fai atu ne Paulo ki Kelisiano fakaekegina?

¹² Ne taku amiotonugina a Kelisiano i te senitenali muamua kae ne fakaeke foki ki te agaga tapu mō te fakamoemoega ke mafai ne latou o maua te lotou taui faka-te-lagi. Ne seki fakamaluga aka ne te lotou fakaekega ke fai latou mo tupu ki luga i olotou taina Kelisiano fakaekegina i te taimi koi ‵nofo mai ei latou i te lalolagi. E manino ‵lei me ne galo atu i nisi Kelisiano i aso mua a te manatu tenā, kae ne kamata o kausaki atu latou ki tulaga ma‵luga sē ‵tau i va o olotou taina i te fakapotopotoga. E pelā me ko te ikuga o te mea tenā, ne fakamalosi aka ei a Paulo ke tusi atu: “Ko leva ne maua ne koutou a mea katoa e ma‵nako koutou ki ei! Ko leva ne mauko‵loa koutou! Ne manatu koutou pelā i a koutou ko fai mo tupu, ka ko matou e se ne tupu. Ko ‵lei, aku muna eiloa i a koutou ne tupu, ko te mea ke mafai o fai mo tupu a tatou katoa.” (1 Kolinito 4:8) Tela la, ne fakamasaua atu a Paulo ki te kau fakaekegina i ana aso: “E se ko tona uiga i a au e manatu o fia pule mālō atu ki te otou talitonuga, i te mea e mautakitaki te otou fakatuanaki. Au e manako fua o fakalasi te otou fiafia ki te otou talitonuga.”—2 Kolinito 1:24.

Te Fakakātoaga o te Aofaki Telā ne ‵Valo Mai

13. Ne gasolo atu pefea ki mua te filifiliga o te kau fakaekegina mai tua ifo o te 33 T.A.?

¹³ Ne seki filifili aka katoa a te toko 144,000 o Kelisiano fakaekegina i te senitenali muamua. Ne tumau eiloa te lotou kalagaga i te vaitaimi o te kau apositolo kae i te fia selau o tausaga mai tua ifo i ei, ne fai malielie fua i ei te filifiliga. Kae ne tumau eiloa te filifiliga tenā ke oko mai eiloa ki aso nei. (Mataio 28:20) Fakamuli ifo, mai tua o te kamataga o pule mai Iesu i te 1914, ne gasolo fakavave atu eiloa a mea ki mua.

14, 15. Ne a mea ne ‵tupu i ‵tou aso nei e uiga ki te filifiliga o te kau fakaekegina?

¹⁴ Muamua la, ne ‵fulu faka‵ma ne Iesu a te lagi mai vaegā ‵tekeatuga katoa ki te pulega a te Atua. (Faitau ki te Fakaasiga 12:10, 12.) Mai tua i ei, ne saga atu a ia ki te fakamaopoopoga o te ‵toega o sui o tena Malo ko te mea ke fakakātoa ei te aofaki ko te 144,000. I tausaga i te kogāloto talu mai te 1930, ne fakamaoni mai i ei me ko pili eiloa o palele atu te galuega tenā, kae ko te tokoukega o tino kolā ne talia ne latou te galuega talai ne seki maua ne latou se manakoga ke olo atu latou ki te lagi. Ne seki molimau atu te agaga tapu ki a latou me ko fai latou mo tama a te Atua. (Fakatusa ki te Loma 8:16.) I lō te fai penā, ne iloa ne latou me e aofia latou i ‘nisi mamoe,’ kolā e maua ne latou te fakamoemoega ke ola ki te se-gata-mai i te lalolagi palataiso. (Ioane 10:16) Tela la, mai tua o te 1935 ne fakasino tonu atu eiloa te faiga o te galuega talai ki te fakamaopoopoga o “te vaitino tokouke,” ko latou kolā ne lavea ne te apositolo ko Ioane i se fakaasiga kae kolā ka ‵sao atu foki i ‘te fakalavelave lasi.’—Fakaasiga 7:9, 10, 14.

¹⁵ E tiga eiloa te feitu tenā, i tausaga mai tua ifo o te 1930, ne filifiligina eiloa a nāi tino ki te fakamoemoega i te lagi. Kaia? I nisi taimi, ne fai penā ko te mea ke sui aka ei a tino kolā ne filifiligina muamua kae ko se toe fakamaoni latou. (Fakatusa ki te Fakaasiga 3:16.) Ne faipati foki eiloa a Paulo e uiga ki ana taugasoa kolā ne tiakina ne latou te munatonu. (Filipi 3:17-19) Ko oi e filifili aka ne Ieova ke sui ki ei a tino penā? E tonu, i a Ia eiloa te filifiliga e ‵tau o fai. Kae e foliga tonu mai me ka filifili aka ne ia, e se ko tino ‵fou, kae ko tino kolā ko oti ne fakaasi atu te lotou a‵lofa fakamaoni i se auala lasi—e pelā mo soko kolā ne faipati atu ki ei a Iesu i te taimi ne kamata ei ne ia te Fakamanatuga o tena mate.a—Luka 22:28.

16. Ne a mea e ‵tau o fia‵fia tatou ki ei, kae ne a mea e mafai o tali‵tonu katoatoa tatou ki ei e uiga ki te kau fakaekegina?

¹⁶ Kae e foliga mai me e se ko tino katoa kolā ne kalagagina i tausaga talu mai te 1930, ne fai mo fai ne sui o latou kolā ko oti ne ‵to atu keatea. Ko oti eiloa ne fakamaoni faka‵lei mai ne Ieova me ka isi faeloa ne Kelisiano fakaekegina i va o tatou katoa i aso fakaoti o te olaga masei tenei ke oko eiloa ki te fakaseaiga o ‘Papelonia te Sili.’b (Fakaasiga 17:5) Kae e mafai eiloa o tali‵tonu tatou me ka kātoa eiloa te aofaki o sui e toko 144,000 i te taimi tonu o Ieova kae ka pule fakamuli mai latou i te Malo. E mafai foki o tali‵tonu tatou ki te Muna fakapelofeta me ka tumau eiloa a te vaitino tokouke i te fakamaoni, e pelā me se potukau, telā e gasolo aka faeloa o tokouke. Ka ‘‵sao atu eiloa latou i te fakalavelave lasi’ telā ko pili o fakaoko atu ki luga i te lalolagi a Satani kae ka ulu atu ei latou mo te fia‵fia ki loto i te lalolagi fou a te Atua.

Ko Pili o Kātoa te Malo Faka-te-Lagi o te Atua!

17. E ‵tusa mo te 1 Tesalonia 4:15-17 mo te Fakaasiga 6:9-11, se a te mea ne ‵tupu ki Kelisiano fakaekegina kolā ko oti ne ‵mate mo te fakamaoni?

¹⁷ Talu mai te 33 T.A., e lau eiloa i sefulu o afe o Kelisiano fakaekegina ko oti ne fakaasi atu te lasi o te lotou fakatuanaki kae ne kufaki foki mo te fakamaoni ke oko eiloa ki te mate. Ko oti eiloa ne ‵kilo atu ki a latou e pelā me e ‵tau o maua ne latou te Malo—e manino ‵lei me ne kamata mai eiloa i aso muamua o te fakatasimaiga a Keliso—kae ko oti foki ne maua te lotou taui i te lagi.—Faitau ki te 1 Tesalonia 4:15-17; Fakaasiga 6:9-11.

18. (a) Se a te mea e tali‵tonu katoatoa ki ei a te kau fakaekegina kolā koi ‵toe mai? (e) E pefea te kilokiloga a nisi mamoe ki olotou taina Kelisiano fakaekegina?

¹⁸ E tali‵tonu katoatoa eiloa a te ‵toega o te kau fakaekegina kolā koi ‵nofo i te lalolagi, me kafai e tumau latou i te fakamaoni, ka maua foki ne latou te lotou taui i te lagi i se taimi pili mai ona ko te lotou fakamaoni. E lotoma‵lie eiloa a te fia miliona o nisi mamoe, māfai e mafaufau ‵loto latou ki te fakatuanaki o olotou taina fakaekegina, ki pati a te apositolo ko Paulo, telā ne fai atu e uiga ki taina fakaekegina i Tesalonia: “Tenā te pogai e fakamata‵mata ei matou ki nisi ekalesia a te Atua ona ko koutou. E fakamata‵mata matou i te otou lotomau mo te otou tali‵tonu, i fakasauāga mo puapuagā katoa ne fetaui mo koutou. Tenei te fakatalitonuga o te fakamasinoga a te Atua, me i te taui o mea katoa konei, ko te tāua o koutou i tena Malo, telā ko ala ei o puapuagātia koutou.” (2 Tesalonia 1:3-5) I te taimi e oti atu ei te olaga o te ‵toe sui tokotasi o te kau fakaekegina mai te lalolagi, faitalia me se a te taimi tenā, ka katoatoa ei te malo faka-te-lagi o te Atua. Ko tafaga la te gali o te fiafia ka maua i te taimi tenā—i te lagi mo te lalolagi!

[Fakamatalaga mai lalo]

E Mafai o Fakamatala Mai ne Koe?

• Se a te mea ne fakaasi atu ne te Atua ki a Apelaamo telā e fakasino atu foki ki te Aso Fakamasino?

• Kaia ne taku amiotonugina ei a Apelaamo?

• Se a te ikuga ka maua ne te fanau a Apelaamo ona ko te lotou taku amiotonugina?

• Se a te mea e tali‵tonu katoatoa ki ei a Kelisiano katoa?

[Ata i te itulau e 23]

I te Penitekoso i te 33 T.A., ne kamata ei o filifili ne Ieova a sui i te vaega i te lua o te fanau a Apelaamo