Te Fakatasi Mai o Kelisoùse a Tena Uiga mo Koe?

“Se a te fakailoga o tou fakatasi mai mo te gataga o te olaga masei tenei?”​—MATAIO 24:​3, NW.

1. Se a te fesili tāua ne ‵sili atu ne apositolo o Iesu ki a ia?

KO TAI katoa nei te lua afe tausaga talu mai te taimi ne fakasae aka ei ne apositolo e tokofa a Iesu se fesili i se sau‵talaga mo te lotou Matai i luga i te Mauga o Olive. Ne fesili atu latou: “Ka ‵tupu māfea a mea konei, kae se a te fakailoga o tou fakatasi mai mo te gataga o te olaga masei tenei?” (Mataio 24:​3, NW) I te fesili tenā, ne fakaaogā ne apositolo a tugāpati tāua e lua, ko “tou fakatasi mai” mo “te gataga o te olaga masei tenei.” Ne a mea e fakasino atu ki ei a tugāpati e lua konā?

2. Se a te uiga fakavae o te pati “gataga”?

² Ke mafaufau muamua ki te lua o tugāpati ko te “gataga,” telā ne ‵fuli mai te pati Eleni ko te syn·teʹlei·a. I te New World Translation, e ‵fuli faeloa te pati tenei ki te “gataga,” a ko te pati Eleni ko te te’los, ki te “fakaotiga.” E mafai o maina i te ‵kese o uiga o te avā pati konei mai se fakamatalaga e uiga ki se lauga e fai i te Kingdom Hall. A te gataga o te lauga ko tena vaega fakaoti, telā e fakaaogā ne te failauga ke toe fakamasaua atu ei ki te kaulotu a mea kolā ko oti ne sau‵tala ki ei mo te auala e aogā ei a fakamatalaga konā ki a latou. A te fakaotiga o te lauga ko te taimi e fanaifo ei te failauga ki lalo mai te tulaga. E penā foki te uiga faka-te-Tusi Tapu o te tugāpati ko “te gataga o te olaga masei tenei,” e fakasino atu loa ki se vaitaimi telā ka iku atu kae aofia i ei tena fakaotiga.

3. Ne a nisi mea kolā e ‵tupu i te vaitaimi o te fakatasi mai o Iesu?

³ Kae se a te mea e fakasino atu ki ei te tugāpati ko “tou fakatasi mai” telā ne fesili atu a apositolo e uiga ki ei? Tenei eiloa te ‵fuliga o te pati Eleni ko te pa·rou·siʹa.a A te pa·rou·siʹa o Keliso, io me ko tena fakatasi mai, ne kamata eiloa i te taimi ne fakasopo ei a Iesu mo fai te Tupu i te lagi i te 1914 kae e faka‵soko atu eiloa ke oko ki te ‵toe “fakalavelave” lasi, ko te taimi telā ka vau ei a ia o fakaseai a tino amio matagā. (Mataio 24:21) E uke a mea kese‵kese e ‵tupu i te vaitaimi o te fakatasi mai o Iesu, e aofia i ei a “aso fakaoti” o te olaga masei tenei, te fakamaopoopomaiga o tino filifilia, mo te lotou faka‵tuakaga ke ola i te lagi. (2 Timoteo 3:1; 1 Kolinito 15:23; 1 Tesalonia 4:​15-​17; 2 Tesalonia 2:1) E mafai o fai atu me i te vaitaimi ko “te gataga o te olaga masei tenei” (syn·teʹlei·a) e ‵pau eiloa mo te vaitaimi telā e fakaigoa ki te fakatasi mai o Keliso (pa·rou·siʹa).

Se Vaitaimi Tai Mata Leva

4. E fetaui pefea a te fakatasi mai o Iesu mo mea kolā ne ‵tupu i aso o Noa?

⁴ A te fakasino atu o te pati pa·rou·siʹa ki se vaitaimi tai mata leva e fetaui ‵lei eiloa mo pati a Iesu e uiga ki tena fakatasi mai. (Faitau te Mataio 24:​37-​39.) Ke onoono me ne seki faka‵tusa ne Iesu tena fakatasi mai ki te taimi toetoe telā ne poko ei te Lolo i aso o Noa. I lō te fai penā, ne faka‵tusa ne ia tena fakatasi mai ki se vaitaimi tai leva atu telā ne iku atu ei ki te pokoga o te Lolo. Ne aofia i te vaitaimi tenā ko te fouga ne Noa o te vaka mo te faiga o tena galuega talai, ke oko eiloa ki te taimi ne oko atu ei te Lolo. Ne fai a mea konā i loto i se fia sefulu tausaga. E penā foki te fakatasi mai o Keliso, e aofia i ei a mea kolā ka iku atu kae aofia foki i ei te fakalavelave lasi.​—2 Tesalonia 1:​6-9.

5. E fakaasi mai pefea i pati i te Fakaasiga mataupu e 6 me i te fakatasi mai o Iesu se vaitaimi tai mata leva?

⁵ E manino foki te fakaasiga i nisi valoaga i te Tusi Tapu me e fakauiga eiloa te fakatasi mai o Keliso ki se vaitaimi tai mata leva kae e se ki tena vau fua o fakaseai a tino amio matagā. E fakaasi mai a Iesu i te tusi ko Fakaasiga me e tele i luga i se solofanua ‵kena kae ne tuku atu ki a ia se foualiki. (Faitau te Fakaasiga 6:​1-8.) I te otiga ne fakasopo mo fai te Tupu i te 1914, “ne fanatu a [Iesu] o tau e pelā mo se tino e manumalo sāle i taua.” Ne fakaasi mai ei i te tala tenā me ne ‵tele mai i ana tua a tino i luga solofanua kolā e lanu kese‵kese. A mea konei ne fakaasiga fakavaloaga e uiga ki taua, ogegā meakai, mo famai, ko mea kolā ko oti ne ‵tupu i se vaitaimi tai mata leva telā e fakaigoa ki “aso fakaoti.” E matea eiloa ne tatou te fakataunuga o te valoaga tenei i ‵tou aso nei.

6. Se a te mea e fesoasoani mai i te Fakaasiga mataupu e 12 ke malamalama tatou e uiga ki te fakatasi mai o Keliso?

⁶ E tuku mai foki i te Fakaasiga mataupu e 12 a nisi fakamatalaga e uiga ki te fakatuakaga o te Malo o te Atua i te lagi. E fai‵tau tatou i ei e uiga ki se taua ne fai i se koga telā e se matea ki mata. A Mikaele​—ko Iesu Keliso i tena tulaga i te lagi​—mo ana agelu ne taua atu ki te Tiapolo mo ana temoni. Ne iku atu i ei ki te ‵peiifoga a Satani te Tiapolo mo tena potukau ki te lalolagi. Ko te taimi eiloa tenā ne fai mai ei te tala me i te Tiapolo ko oko eiloa i te kaitaua “me e iloa ne ia ko se leva ona aso i te lalolagi.” (Faitau te Fakaasiga 12:​7-​12.) Tela la, e manino ‵lei me i te fakatuakaga o te Malo o Keliso i te lagi ka fai i ei ke ‘fakaa‵lofa’ malosi a te lalolagi mo tino i luga i ei.

7. Se a te mea e faipati ki ei te lua o salamo, kae se a te avanoaga telā e fakamatala mai i ei?

⁷ E penā foki a pati fakavaloaga i te lua o salamo e uiga ki te fakasopoga o Iesu mo fai te Tupu i luga i te Mauga o Siona faka-te-lagi. (Faitau te Salamo 2:​5-9; 110:​1, 2.) Kae e fakaasi mai foki i te salamo tenei me ka isi se vaitaimi e tuku atu ei se avanoaga ki pule o te lalolagi, mo tino kolā e pule ne latou, ke faka‵logo ki te pulega a Keliso. E fakamalosi atu “ke ‵poto latou” kae ke talia ne latou ke “faka‵tonu” aka olotou auala. E tonu, i te taimi tenā ka fia‵fia eiloa a “latou katoa kolā e olo atu ki a ia [te Atua] mō se puipuiga” mai te tavini atu ki a Ieova mo tena Tupu fakaekegina. Tela la, e tuku atu se avanoaga ki tupu mo tino kolā e pule ne latou ke fai a ‵fuliga e manakogina i te taimi e fakatasi mai ei a Iesu i tena malosi e pelā me se tupu.​—Salamo 2:​10-​12, NW.

Ke Matea te Fakailoga

8, 9. Ko oi ka matea ne latou te fakailoga o te fakatasi mai o Keliso kae malamalama foki i tena uiga?

⁸ I te fesiliatuga a Falesaio e uiga ki te taimi ka oko mai i ei te Malo, ne tali atu a Iesu me i “te Malo o te Atua e se oko mai mo ni fakailoga ke lavea atu” e ‵tusa mo te lotou kilokiloga. (Luka 17:​20, 21) Ka se malamalama eiloa i ei a tino se tali‵tonu. E mafai pefea o tali‵tonu latou? Ne seki matea ne latou i a Iesu ka fai mo fai te lotou Tupu i aso mai mua. Ko oi la ka matea ne latou te fakailoga o te fakatasi mai o Keliso kae malamalama i tena tulaga tāua?

⁹ Ne fai atu a Iesu me ka matea ‵lei ne ana soko te fakailoga e pelā mo te lavea atu ne latou a te “lapa mai o te uila, kae maina ei te lagi mai te suā feitu ke oko atu ki te suā feitu.” (Faitau te Luka 17:​24-​29.) Se mea ‵lei ke matea atu me e ‵soko fakatasi ne te Mataio 24:​23-​27 a te manatu tenā mo te fakailoga o te fakatasi mai o Keliso.

Te Kautama ka Matea ne ia te Fakailoga

10, 11. (a) Se a te fakamatalaga ne fai muamua mai e uiga ki te “kautama” telā e faipati ki ei te Mataio 24:34? (e) Ko oi a soko o Iesu kolā e mautinoa me ka aofia i te “kautama” tenā?

¹⁰ Ko oti ne fakamatala atu i te mekesini tenei me i te senitenali muamua, a “te kautama tenei” telā e fakaasi mai i te Mataio 24:34 e fakauiga loa ki “te kautama i aso konā o tino Iutaia se tali‵tonu.”b E pelā me ne ‵lei loa te fakaaogāga o te pati tenā i te fakamatalaga tenā, me i te fakaaogāga ne Iesu o te pati “kautama” i nisi koga i te Tusi Tapu e fakauiga eiloa ki mea se ‵lei, kae i te ukega o taimi, ne fakaaogā ne Iesu a pati se ‵lei ke fakamatala mai ei te kautama tenā, e pelā mo te pati “masei.” (Mataio 12:39; 17:17; Maleko 8:​38) Tela la, ne iloa aka me i tena fakataunuga i aso nei, ne fakasino atu eiloa a Iesu ki te “kautama” masei o tino se tali‵tonu kolā ka matea ne latou a fakailoga o “te gataga o te olaga masei tenei” (syn·teʹlei·a) mo tena fakaotiga (teʹlos).

¹¹ E tonu eiloa me i te fakaaogāga ne Iesu o te pati “kautama” i se auala se ‵lei, ne faipati eiloa a ia e uiga ki tino amio ma‵sei i ana aso. Kae e mata, e penā foki tena fakamatalaga i te Mataio 24:34? Ke masaua me ne olo atu a soko e tokofa o Iesu ki a ia i a “latou ake eiloa.” (Mataio 24:3) Ona ko te mea ne seki fakaaogā ne Iesu a pati se aogā i tena faipatiatuga ki a latou e uiga ki te “kautama tenei,” e seai se fakalotolotolua me ne maina ana apositolo me ka aofia latou mo olotou nisi taina i te “kautama” telā ka se palele ne ‵mate ‘a ko oti ne fakataunu a mea katoa konei.’

12. Se a te mea e fakaasi mai i te tala saukātoa e uiga ki tino kolā ne fakasino atu Iesu ki ei, i te fakaaogāga ne ia o te pati “kautama”?

¹² Se a te mea e mafai o fakavae ki ei te manatu tenā? Mai te mafaufau ‵loto ki te mataupu saukātoa. E pelā mo te mea e fakaasi mai i te Mataio 24:​32, 33, ne fai atu a Iesu: “Mafaufau ki te mati mo ona uiga. I te taimi e lavea ei ne koutou ona kaula ko ola ake mo ona lau foki ko ‵somo, ko iloa ei ne koutou me ko pili mai aso ‵vela. E penā foki koutou, i te taimi e lavea ei ne koutou a mea katoa konei, ke iloa ne koutou i te Tama a te Tagata ko pilipili mai eiloa.” (Faka‵tusa ki te Maleko 13:​28-​30; Luka 21:​30-​32.) Kae e fai‵tau tatou penei i te Mataio 24:34: “Ke masaua foki ne koutou a te mea tenei, me i mea katoa konei, e fakataunu ka koi tuai o palele atu a te kautama tenei.”

13, 14. Kaia e mafai ei o fai atu tatou me i te “kautama” telā ne faipati ki ei a Iesu kāti e fakasino atu ki ana soko?

¹³ Ne fai atu a Iesu me ka isi ne mea e iloa ne ana soko, kolā ka pili o fakaeke ki te agaga tapu, māfai ko matea ne latou a “mea katoa konei” ko ‵tupu. Tela la, ne fakasino atu eiloa a Iesu ki ana soko i ana pati konei, “Me i mea katoa konei, e fakataunu ka koi tuai o palele atu a te kautama tenei.”

¹⁴ E se pelā mo tino se tali‵tonu, ka se matea fua ne soko o Iesu a te fakailoga kae ka malamalama foki latou i te tāua o tena uiga. Ka “iloa” ne latou a vaega kese‵kese o te fakailoga tenā kae ka “iloa” foki ne latou olotou uiga ‵tonu. Ka iloa ‵lei ei ne latou me “ko pilipili mai eiloa” a ia. E tonu, e tiga eiloa ne lavea ne tino Iutaia se tali‵tonu fakatasi mo Kelisiano fakaekegina kae fakamaoni se fakataunuga foliki o pati a Iesu i te senitenali muamua, ko ana soko fakaekegina fua ne tauloto mai mea konā i te taimi tenā​—ne malamalama i uiga ‵tonu o mea kolā ne matea ne latou.

15. (a) Ko oi e aofia i te “kautama” i aso nei telā ne fakasino atu a Iesu ki ei? (e) Kaia e se mafai ei o iloa ne tatou te leva o te vaitaimi o te “kautama tenei”? (Ke onoono ki te pokisi i te itulau e 29.)

¹⁵ E ma‵natu aka a tino kolā e seai se lotou mainaga faka-te-agaga i aso nei me e seki ai eiloa ne ‘mea fakaofoofogia’ kai ‵tupu e uiga ki te fakailoga o te fakatasi mai o Iesu. E fai mai latou me e seai se ‵fuliga ki te olaga e pelā eiloa mo aso ko ‵teka. (2 Petelu 3:4) Kae i te suā feitu la, ko oti ne matea faka‵lei ne taina fakaekegina kae fakamaoni o Keliso, ko te potukau e pelā mo Ioane i aso nei, a te fakailoga tenei e pelā eiloa mo te mainaga o se uila kae ko oti ne iloa ne latou a tena uiga tonu. E pelā me se potukau, e aofia a tino fakaekegina i te “kautama” o tino katoa kolā ka se palele atu kae ko oti ne ‘fakataunu a mea katoa konei.’c E fakaasi mai i te mea tenei me e isi ne taina fakaekegina o Keliso koi ola i te lalolagi māfai ko kamata ²te fakalavelave lasi telā ne ‵valo mai.

‘Ke Matapula‵pula Faeloa’

16. Se a te mea e ‵tau o fai ne soko katoa o Keliso?

¹⁶ Kae e uke atu a mea e manakogina ke fai i lō te mateaga fua o te fakailoga. Ne toe fai mai a Iesu: “Ko te muna e fai atu ne au ki a koutou, e tenā foki taku muna e fai atu ki tino katoa: Ke matapula koutou!” (Maleko 13:37) Tenei eiloa te ‵toe mea tāua mō tatou katoa i aso nei faitalia me ne tino fakaekegina io me mai te vaitino tokouke. Ko silia atu nei i te 90 tausaga talu mai te taimi ne fakasopo ei a Iesu mo fai te Tupu i te lagi i te 1914. E tiga eiloa e faigata, e ‵tau eiloa mo tatou o toka kae matapula‵pula faeloa. A te ‵tou malamalama me ko pule mai nei a Keliso i se auala se matea i te malosi o te Malo ka fesoasoani mai ke matapula‵pula tatou. E fakaala foki ne ia tatou me ko pili o vau a ia o fakaseai ana fili “i se itula e seki fakamoemoegina ne [tatou].”​—Luka 12:40.

17. E ‵tau o pefea ‵tou lagonaga ona ko te malamalama e uiga ki te mea tenei, kae se a te mea e fakaiku aka ne tatou ke fai?

¹⁷ Ka fesoasoani mai te ‵tou malamalama i te uiga o te fakatasi mai o Keliso ke matea ne tatou te tāua o te mea tenā ki a tatou. E iloa ne tatou me ko oti ne fakatasi mai a Iesu kae ko oti ne pule mai a ia i se auala se matea e pelā me se Tupu i te lagi talu mai te 1914. E se leva kae ka vau a ia o fakaseai a tino amio matagā kae fai foki a ‵fuliga ‵lasi ki te lalolagi kātoa tenei. Tela la, e ‵tau o fakaiku aka ne tatou ke fai se ‵tou tusaga magoi i te galuega telā ne ‵valo mai ne Iesu i ana pati konei: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te [“fakaotiga,” NW].”​—Mataio 24:14.

[Fakamatalaga mai lalo]

Ka Tali Mai Koe Pefea?

• E iloa pefea ne tatou i te fakatasi mai o Iesu se vaitaimi tai mata leva?

• Ko oi ka matea ne latou te fakatasi mai o Iesu kae malamalama i tena uiga?

• Ko oi e aofia i te kautama telā e faipati ki ei te Mataio 24:34 i aso nei?

• Kaia e se mafai ei o iloa tonu ne tatou te leva o te taimi o te “kautama tenei”?

[Pokisi i te itulau e 29]

E Mata, e Mafai o Iloa ne Tatou te Leva o te Taimi o te “Kautama Tenei”?

E fakauiga sāle te pati “kautama” ki tino o tupulaga kese‵kese kolā e ola i se vaitaimi fakapito io me i se taimi e tupu ei se mea tāua. E pelā mo pati i te Esoto 1:6: “I aso konā, ne mate atu Iosefa, fakatasi mo ona taina katoa pelā foki mo te kautama tenā.” Ne kese‵kese te ma‵tua o Iosefa mo ana taina, kae ne matea ne latou katoa a mea ne ‵tupu i te vaitaimi eiloa e tasi tenā. Ne aofia i te “kautama tenā” ko nisi taina o Iosefa kolā ne fa‵nau mai mua atu i a ia. Ne mate mua atu a Iosefa i nisi o ana taina. (Kenese 50:24) Ne fa‵nau mai a nisi tino o te “kautama tenā,” e pelā mo Peniamina, mai tua o Iosefa kae kāti ne ola mai tua o te matega a Iosefa.

Tela la, kafai e fakaaogā te pati “kautama” ki tino kolā e ola i loto i se vaitami fakapito, e se mafai o iloa te leva o te vaitaimi tenā kae e isi eiloa sena gataga telā e se na lo ko leva. Tela la, mai te fakaaogāga o te tugāpati ko te “kautama tenei,” e pelā mo pati i te Mataio 24:​34, ne seki tuku atu ne Iesu se fakavae ke mafai ei ne ana soko o iloa me ka oti māfea a “aso fakaoti.” I lō te fai penā, ne faka‵mafa mai ne Iesu me ka se iloa ne latou “te aso tenā mo te itula tenā.”​—2 Timoteo 3:1; Mataio 24:36.

[Ata i te itulau e 26]

I tena otiga ne fakasopo mo fai te Tupu i te 1914, ne fakaata mai a Iesu me e “manumalo”

[Ata i te itulau e 28]

“Me i mea katoa konei, e fakataunu ka koi tuai o palele atu a te kautama tenei”