E “Kilokilo” Kae Sukesuke ne Ieova a Tino Katoa

“E kilokilo mai a [Ieova] ki tino i koga katoa kae [“sukesuke,” NW] ne ia olotou mea e fai.”​​—SALAMO 11:4.

1. Ne a vaegā tino e fia fai taugasoa tatou ki ei?

NE A ou lagonaga e uiga ki tino kolā e ‵saga tonu atu ki a koe? E fakaasi atu olotou manatu ‵tonu māfai e fesili atu koe e uiga ki ei. Kafai e manako koe ki se fesoasoani, e loto fia‵fia eiloa latou o fesoasoani atu. Kafai e manako koe ki manatu fakatonutonu, e tuku atu eiloa ne latou mo te alofa. (Salamo 141:5; Kalatia 6:1) E mata, e se fia fai taugasoa koe ki vaegā tino penā? Ia, e fai eiloa penā a Ieova mo tena Tama. A te ‵tonuga loa, e sili fakafia atu te lā ‵saga tonu atu ki a koe i lō so se isi tino aka, kae e seai lele eiloa se uiga kaiū i lā lagonaga; e ma‵nako laua o fesoasoani atu ke puke ‵mau koe ki “te ola tonu.”​​—1 Timoteo 6:​19; Fakaasiga 3:​19.

2. E pefea te lasi o te saga tonu atu o Ieova ki ana tavini?

² Ne fakaasi mai ne te faisalamo ko Tavita te lasi o te saga tonu mai o Ieova ki a tatou i te taimi ne fai mai ei a ia: ‘E kilokilo mai a Ieova ki tino i koga katoa kae sukesuke ne ia olotou mea e fai.’ (Salamo 11:4) E tonu, e se kilo mai fua te Atua ki a tatou; e sukesuke foki ne ia tatou. Ne tusi mai foki Tavita: “E iloa ne koe toku loto. E asiasi mai koe ki au i te po. Ko oti ne sukesuke faka‵lei ne koe au, kae seki maua ne koe ne manatu ma‵sei i a au.” (Salamo 17:3) E manino ‵lei i ei, me ne iloa ‵lei ne Tavita a te lasi o te saga tonu atu o Ieova ki a ia. Ne iloa ne ia me ka fakalogo‵mae ne ia Ieova kae fakafanoanoa atu ki a Ia māfai e ati aka ne ia mafaufauga agasala i tena loto. E mata, a Ieova se tino tonu ki a koe e pelā eiloa mo Tavita?

E Lavea ne Ieova te Loto

3. Ne fakaasi mai pefea ne Ieova se kilokiloga paleni ki ‵tou tulaga sē ‵lei katoatoa?

³ A te mea muamua telā e saga atu ki ei a Ieova ko te loto o te tino. (Salamo 19:14; 26:2) Ona ko te alofa, e se saga atu a ia ki tamā vāivāiga. E pelā eiloa mo Sala, te avaga a Apelaamo, ne seki faipati ‵tonu atu a ia ki se agelu telā ne liutino, ne lavea ne te agelu me ne mataku kae mā a ia, telā ne polopoloki malie atu fua ei ne ia tou fafine. (Kenese 18:​12-​15) I te taimi ne taumafai ei te tagata mua ko Iopu “o fakasao a ia kae ‵lou ne ia me ko te Atua e pogai ei tena malaia,” ne fakamanuia eiloa ne Ieova a ia, me iloa ne ia me ne fakalogo‵mae malosi atu a Satani ki a Iopu. (Iopu 32:2; 42:12) Ne seki ita foki a Ieova ona ko pati ‵toko a te fafine ko mate tena avaga mai i Salefata ki te pelofeta ko Elia. Ne malamalama te Atua me ne loto māfatia tou fafine i te galo atu o tena tama eiloa e tokotasi.​​—1 Tupu 17:​8-​24.

4, 5. Ne fakaasi atu pefea ne Ieova te atafai i ana faifaiga ki a Apimeleko?

⁴ Ona ko te mea e sukesuke ne Ieova te loto, ne fakaasi mai eiloa ne ia te alofa atafai ke oko foki loa ki tino sē tali‵tonu. Mafaufau la ki ana faifaiga ki a Apimeleko, te tupu o te fa‵kai o Filisitia, ko Kela. Ne puke ne Apimeleko a Sala mo fai tena avaga, e aunoa mo te iloa ne ia me e avaga laua mo Apelaamo. Kae koi tuai o fakapilipili atu Apimeleko ki tou fafine, ne fai atu a Ieova ki a ia i se moemiti: “E tonu, e iloa ne au me ne fai ne koe mo te loto ‵ma. Telā ne faka‵mao eiloa ne au a koe ke mo a e agasala mai ki a au. I te taimi tenei, tuku atu te fafine tenā ki tena avaga. A ia se pelofeta, kae kāti ka ‵talo foki mō koe, ke mo a koe e mate.”​​—Kenese 20:​1-7.

⁵ A te ‵tonuga loa, ne mafai o ma‵sei atu a faifaiga a Ieova ki a Apimeleko, se tino tapuaki ki atua ‵se. Kae ne lavea ne te Atua me ne fai eiloa ne te tagata a te mea tenei mo te fakamaoni. I tena mafaufau mo te atafai ki te mea tenei, ne fakaasi atu ne Ieova ki te tupu te auala e mafai ei o maua ne ia te fakamagaloga kae ‘ke mo a ma mate.’ E mata, tenā eiloa te vaegā Atua e fia tapuaki koe ki ei?

6. Ne a auala ne fakaakoako atu ei Iesu ki tena Tamana?

⁶ Ne fakaakoako atu Iesu ki tena Tamana i se auala ‵lei katoatoa, mai te saga tonu atu ki mea ‵lei i ana soko kae toka foki o fakamagalo olotou mea ‵se. (Maleko 10:​35-​45; 14:​66-72; Luka 22:​31, 32; Ioane 15:15) Ne fetaui ‵lei eiloa te kilokiloga a Iesu mo ana pati i te Ioane 3:​17: “Me ne seki uga mai ne te Atua tena Tama o fakamasino te lalolagi, kae o fakaola te lalolagi.” E tonu, e lasi ‵ki kae tumau foki a te alofa o Ieova mo Iesu ki a tatou. E lavea atu eiloa me e ma‵nako laua ke maua ne tatou te ola. (Iopu 14:15) E fakaasi mai i te vaegā alofa tenā a te pogai e sukesuke ei ne Ieova tatou, tena kilokiloga ki a tatou, mo te auala e gasuesue ei a ia e ‵tusa mo ana mea e lavea.​​—Faitau te 1 Ioane 4:​8, 19.

E Sukesuke Mai i se Auala Alofa

7. Se a te pogai e sukesuke ei ne Ieova tatou?

⁷ Ko oko eiloa i te ‵se ke mafaufau me e fai a Ieova pelā me se pulisimani telā e fatiotio ifo mai te lagi ko te mea ke ‵po ne ia tatou i te taimi e agasala ei tatou! A Satani ko te tino telā e ‵moli kae ‵losi mai foki me e maua ne tatou a uiga kaiū. (Fakaasiga 12:10) E fakasino atu foki a ia ki lagonaga ma‵sei kae e seai eiloa! (Iopu 1:​9-​11; 2:​4, 5) Ne tusi mai te faisalamo e uiga ki te Atua: “Kafai ne tusitusi ne koe omotou agasala, ko oi la te tino ka mafai o sao mai te fakasalaga?” (Salamo 130:3) E seai eiloa! Tenā eiloa te tali faigofie ki te fesili tenei. (Failauga 7:​20) I lō te fai penā, e kilokilo mai Ieova e pelā me se mātua alofa atafai telā e manako o puipui ana tama‵liki fagasele mai mea fakalogo‵mae. E fakamasaua mai faeloa a ia ke iloa ‵lei ne tatou ‵tou tulaga sē ‵lei katoatoa mo ‵tou vāivāiga ko te mea ke puipui ei tatou mai i te faiga o mea kolā e logo‵mae ei tatou.​​—Salamo 103:​10-​14; Mataio 26:41.

8. E akoako kae polopoloki pefea ne Ieova ana tavini?

⁸ E lavea atu te alofa o te Atua e auala i akoakoga mo pati polopoloki kolā e tuku mai i te Tusi Tapu mo mea‵kai faka-te-agaga kolā e fakasoa mai ne “te tavini fakamaoni kae poto.” (Mataio 24:45; Epelu 12:​5, 6) E tuku mai foki ne Ieova te fesoasoani e auala i te fakapotopotoga Kelisiano mo ‘meaalofa tino’ i ei. (Efeso 4:8) E se gata i ei, e kilokilo mai Ieova ke lavea ne ia te auala e ‵saga atu ei tatou ki ana akoakoga fakatamana, kae ke iloa foki a nisi fesoasoani e mafai o tuku mai ne ia. E fai mai te Salamo 32:8: “Ka akoako atu ne au ki a koe te auala e ‵tau o fano koe i ei; ka fakatonutonu kae akoako ne au a koe.” Ko oko eiloa i te tāua ke faka‵logo faeloa tatou ki a Ieova! E ‵tau o tumau tatou i te loto maulalo i ana mua, mai te taliaga o te manatu me i a ia ko te ‵tou Faiakoga mo te Tamana alofa.​​—Faitau te Mataio 18:4.

9. Ne a uiga e ‵tau o ‵kalo keatea tatou mai i ei, kae kaia?

⁹ I te suā feitu la, ke mo a eiloa ma loto ma‵keke tatou ona ko te fakamatamata, te sē lava o te fakatuanaki, io me ‘faka‵segina ne te agasala.’ (Epelu 3:​13; Iakopo 4:6) E masani eiloa o ‵sae aka a uiga konei māfai e fakamalosi aka ne se tino a manatu io me ko manakoga ma‵sei. Kāti e mafai o iku atu i ei ki tena ‵teke atu ki pati fakatonutonu ‵lei i te Tusi Tapu. Kae sili atu i te masei, e mafai eiloa o puke ‵mautakitaki a ia ki ana kilokiloga io me ko auala ma‵sei telā ko fai ei a ia mo fai se fili o te Atua​​—se tulaga fakamataku tonu eiloa! (Faataoto 1:​22-​31) Mafaufau ki te fakaakoakoga a Kaino, te tama matua a Atamu mo Eva.

E Lavea ne Ieova Mea Katoa Kae Gasuesue e ‵Tusa mo Mea Konā

10. Kaia ne seki talia ei ne Ieova te taulaga a Kaino, kae ne saga atu pefea a Kaino ki ei?

¹⁰ I te taimi ne tuku atu ei ne Kaino mo Apelu lā taulaga ki a Ieova, ne seki saga atu fua a Ia ki lā meaalofa kae ki lā lagonaga foki. Ne talia i ei ne te Atua te taulaga a Apelu, telā ne ofo atu i te fakatuanaki, kae ne seki talia ne ia te taulaga a Kaino, telā ne seki lava tena fakatuanaki. (Kenese 4:​4, 5; Epelu 11:4) E seai se akoakoga ne tauloto ne ia mai te mea ne tupu telā ne seki ‵fuli foki tena kilokiloga, kae ne kamata o kaitaua malosi a Kaino ki tena taina.​​—Kenese 4:​6.

11. Ne fakaasi atu pefea ne Kaino me ne faka‵se a ia ne tena loto, kae se a te akoakoga mō tatou?

¹¹ Ne lavea ne Ieova te fakamataku o te kilokiloga a Kaino telā ne faipati faka‵lei atu ei ki tou tagata, kae faka‵mafa atu te manatu me kafai ne fai ne ia te mea ‵lei, ne mafai eiloa o fiafia a ia. Se mea fakafanoanoa me ne fulitua atu a Kaino ki pati fakatonutonu a te Atua kae ne tamate ne ia tena taina. Ne toe fakaasi mai foki te masei o te loto o Kaino i te taimi ne tali atu ei a ia mo te sē āva ki te fesili a te Atua: “E se iloa ne au. Ai a ko au nei se tino tausi o toku taina?” (Kenese 4:​7-9) Ko oko eiloa i te faka‵se tino a te loto​​—telā e mafai loa o ‵teke tonu atu ki pati fakatonutonu a te Atua! (Ielemia 17:9) Tela la, ke na iloa ne tatou a akoakoga tāua mai i vaegā tala penā kae ke vave o ‵teke atu ki manatu mo manakoga ‵se. (Faitau te Iakopo 1:​14, 15.) Kafai e maua ne tatou a pati fakatonutonu kolā e fakavae ki te Tusi Tapu, ke na fakatāua ne tatou kae ke ‵kilo atu ki ei e pelā me se fakamaoniga o te alofa o Ieova.

E se Mafai Eiloa o ‵Funa se Agasala

12. E saga atu pefea a Ieova ki mea ‵se e fai ne tatou?

¹² E mafau‵fau a nisi tino me kafai e seai se tino e lavea ne ia latou e fai se mea ‵se, e mafai eiloa o ‵sao atu latou i te fakasalaga. (Salamo 19:12) A te ‵tonuga loa, e seai eiloa se agasala e mafai o ‵funa. “E seai se mea e mafai o ‵funa mai i te Atua. A mea katoa ne faite i te lalolagi, e fakaasi kae tuku faka‵sau eiloa i ona mata; ko ia foki e ‵tau o avatu ki ei ne tatou a tala e uiga mō tatou.” (Epelu 4:​13) A Ieova ko te Famasino telā e sukesuke ne ia ‵tou lagonaga ‵loto, kae e saga mai a ia ki mea ‵se e fai ne tatou i se auala telā e fakaata mai i ei tena fakamaoni katoatoa. A Ia se “Atua telā e ‵fonu i te alofa mo te kaimalie, e tuai o ita kae lasi tena alofa mo tena fakamaoni.” Ka “fakasala eiloa” ne ia a tino sē sala‵mo kolā e “agasala ka ko oti ne talia ne [latou] te munatonu” io me fakaasi atu ne latou se kilokiloga masei kae faitogafiti. (Esoto 34:​6, 7; Epelu 10:26) Ne fakaasi mai eiloa te manatu tonu tenei i faifaiga a Ieova ki a Akana, Anania mo Safaila.

13. Ne iku atu pefea a mafaufauga ‵se ki te faiga ne Akana o se amioga masei?

¹³ I te ‵teke tonu atu ki te fakatonuga a te Atua, ne puke ne Akana a nāi mea tāua mai te fa‵kai o Ieliko kae ne ‵funa ne ia i tena faleie, kae kāti ne ‵lago atu foki tena kāiga. I te taimi ne fakaasi faka‵sau atu ei tena agasala, ne fakaasi atu ei ne Akana me ko iloa ne ia te masei o tena mea ne fai, me ne fai mai tou tagata: “Au ko oti ne agasala ki te Aliki [ko Ieova].” (Iosua 7:​20) E pelā mo Kaino, ne ati aka ne Akana se loto telā e masei. I te tala o Akana, ne fai loa te matakanokano mo fai se fakalavelave lasi i ei, me ne fai ei tou tagata ke amio kaisoa. I a Ieova eiloa a mea kolā ne kaisoa ne Akana mai i Ieliko telā ne iku atu ei ki te tamate o ia mo tena kāiga.​​—Iosua 7:​25.

14, 15. Kaia ne seki fiafia ei a te Atua ki a Anania mo Safaila, kae se a te akoakoga e maua ne tatou mai i ei?

¹⁴ A Anania mo tena avaga, ko Safaila, ne tino i te fakapotopotoga Kelisiano mua i Ielusalema. Mai tua ifo o te Penitekoso i te 33 T.A., ne fakaputu aka ei a tupe ke tausi atu ki manakoga faka-te-foitino o tino tali‵tonu ‵fou mai fenua ‵mao kolā koi ‵nofo i Ielusalema. Ne maua eiloa a tupe konā mai i meaalofa kolā ne tuku atu mo te lotomalie. Ne ‵togi atu ne Anania se laumanafa kae tuku fakameaalofa atu se vaega o te tupe tenā. Kae ne iloa foki ne tena avaga i tou tagata ne fakaloiloi atu me ne tuku fakameaalofa atu ne ia a tupe katoa. E seai se fakalotolotolua, me ne ma‵nako te tauavaga tenei ke maua ne laua se tulaga fakaaloalo fakapito i te fakapotopotoga. Kae ne ‵loi eiloa laua. I se auala fakavavega, ne fakaasi atu ne Ieova te amioga faitogafiti tenei ki te apositolo ko Petelu, telā ne fesili atu ki a Anania ke fakaasi mai tena amioga loi. E seki leva, ne siga ki lalo a Anania kae ne mate atu. Mai tua malie ifo i ei, ne mate foki a Safaila.​​—Galuega 5:​1-​11.

¹⁵ Ne seki faka‵segina a Anania mo Safaila ne se vāivāiga telā ne sae fakavave aka. Ne aofaga faka‵lei laua kae ne ‵pelo foki i te taumafai ke fakaloiloi te kau apositolo. Kae e sili atu i te masei, ‘ne fakaloiloi ne laua te agaga tapu mo te Atua.’ E fakaasi faka‵lei mai eiloa i te auala ne saga atu ei Ieova ki te mea tenei me e toka faeloa a ia o puipui te fakapotopotoga mai tino amio ‵pelo. E tonu, “se mea fakamataku mana maua koe ne te fakasalaga a te Atua ola!”​​—Epelu 10:31.

Tumau i te Fakamaoni i Taimi Katoa

16. (a) E taumafai pefea Satani o fakamasei a tino o te Atua? (e) Ne a auala e fakaaogā ne te Tiapolo ke fakamasei ei a tino i te koga e nofo koe i ei?

¹⁶ E fai eiloa ne Satani a mea katoa e mafai ne ia o fai ke fakamasei ei tatou kae ke se fiafia mai foki Ieova. (Fakaasiga 12:​12, 17) E lavea faka‵lei atu eiloa a faifaiga matagā a te Tiapolo i te lalolagi, telā e lauiloa i ei a amioga finalalolagi mo fakasauāga. Ko faigofie nei ke onoono ki ata ma‵sei i komupiuta io me ko nisi mea penā. Ke mo a eiloa ma taka‵vale tatou i osomaiga a Satani. I lō te fai penā, ke na ‵pau eiloa ‵tou kilokiloga mo te faisalamo ko Tavita, telā ne tusi mai: “A taku amio e seai eiloa se ‵se i ei. . . . Ka ola au i se olaga ‵ma i loto i toku fale.”​​—Salamo 101:2.

17. (a) Kaia e fakaasi faka‵sau fakamuli mai ei ne Ieova a agasala ‵funa? (e) Se a te mea telā e ‵tau o fakaiku aka ne tatou ke fai?

¹⁷ I aso nei, e se fakaasi fakavavega mai ne Ieova a agasala matagā mo amioga faitogafiti e pelā mo mea ne fai ne ia i nisi taimi i aso ko ‵teka. Koi lavea eiloa ne ia a mea katoa kae ka fakaasi faka‵sau mai ne ia a agasala ‵funa i tena taimi tonu. Ne fai mai Paulo: “E matea gofie agasala a nisi tino, ka ko muamua atu i a latou olotou agasala ki te fakamasinoga; ka ko agasala a nisi tino ka matea fakamuli ifo.” (1 Timoteo 5:​24) A te pogai tāua e fakaasi faka‵sau mai ei ne Ieova a agasala ma‵sei ko te alofa. E alofa a Ia ki te fakapotopotoga kae e manako foki ke puipui ne ia te ‵ma o te fakapotopotoga. E se gata i ei, e fakaasi atu ne ia te alofa fakamagalo ki tino kolā ne agasala kae ko sala‵mo tonu nei. (Faataoto 28:13) Tela la, ke na taumafai tatou o fakatumau se loto fakamaoni katoatoa ki te Atua kae ‵teke atu ki fakamalosiga ma‵sei katoa.

Ke Fakatumau se Loto Fakamaoni Katoatoa

18. Se a te lagonaga e uiga ki te Atua ne manako te tupu ko Tavita ke maua ne tena tama?

¹⁸ Ne fai atu te tupu ko Tavita ki tena tama ko Solomona: “Taku tama, au e fai atu ki a koe, ke talitonu koe ki te Atua o tou tamana, kae tavini atu ki a ia mo tou loto kātoa mo tou mafaufau kātoa. E iloa ne ia a ‵tou mafaufauga mo ‵tou manakoga katoa.” (1 Nofoaiga Tupu 28:9) Ne manako Tavita ke uke atu a mea e fai ne tena tama i lō te talitonu fua ki te Atua. Ne manako a ia ke fakatāua ne Solomona te lasi o te saga tonu mai o Ieova ki Ana tavini. E mata, e fakatāua ne koe a Ieova i te auala tenā?

19, 20. E ‵tusa mo te Salamo 19:​7-​11, ne a mea ne fesoasoani atu ki a Tavita ke fakapilipili atu ei ki te Atua, kae e mafai pefea o fakaakoako tatou ki a ia?

¹⁹ E iloa ne Ieova me i tino kolā e maua ne latou se kilokiloga ‵lei ka fakapili‵pili atu ki a ia kae kafai ko iloa ne latou ana uiga ‵gali ka fai ei ke fia‵fia malosi latou ki a ia. Tela la, e manako Ieova ke iloa ne tatou a ia kae ke fakamasani foki ki ana uiga ‵gali. E mafai pefea o fai tatou penā? Mai te sukesuke ki tena Muna mo te mafau‵fau ki ana fakamanuiaga i ‵tou olaga.​​—Faataoto 10:22; Ioane 14:9.

²⁰ E mata, e faitau koe ki te Muna a te Atua mo te loto talitonu i aso katoa kae ‵talo atu ke fakagalue aka ne koe a mea konā? E mata, e lavea ne koe te tāua o te ola e ‵tusa mo akoakoga fakavae i te Tusi Tapu? (Faitau te Salamo 19:​7-​11.) Kafai e penā loa, ka tumau eiloa i te gasolo aka ki luga tou fakatuanaki mo tou alofa ki a Ieova. Kae ka fakapilipili malosi mai eiloa a ia ki a koe, e pelā eiloa me e sa‵sale fakatasi koulua. (Isaia 42:6; Iakopo 4:8) E tonu, ka fakamaoni atu eiloa te alofa o Ieova ki a koe mai te fakamanuia mo te puipui ne ia o koe i te feitu faka-te-agaga i te taimi e sasale atu ei koe i te auala mataliki ki te ola.​​—Salamo 91:​1, 2; Mataio 7:​13, 14.

Ka Tali Mai Pefea ne Koe?

• Kaia e sukesuke ei ne Ieova tatou?

• Ne a mea ne fai ei a nisi tino ke fai mo fai ne fili o te Atua?

• E mafai pefea o fakaasi atu ne tatou me e fai Ieova e pelā me se tino tonu ki a tatou?

• E mafai pefea o fakatumau ne tatou a te fakamaoni katoatoa ki te Atua?

[Fakamatalaga o te Ata i te itulau e 9]

E kilokilo mai pefea a Ieova ki a tatou e pelā me se mātua atafai?

[Fakamatalaga o te Ata i te itulau e 10]

Se a te akoakoga e maua ne tatou mai te tala o Anania?

[Fakamatalaga o te Ata i te itulau e 11]

Ne a mea ka fesoasoani mai ke tumau tatou i te tavini atu ki a Ieova mo te fakamaoni katoatoa?