Kaia e ‵Tau ei o Tumau Tou Fakamaoni?

“Te Aliki [ko Ieova], . . . fakamasino mai mo te alofa ki a au, e iloa ne koe i a au e ‵ma kae ‵lei [io me “fakamaoni,” NW].”​​—SALAMO 7:8.

1, 2. Ne a nisi tulaga masani kolā e mafai o fakafaigata aka ei te fakamaoni o se Kelisiano?

KE FAKAATAATA i tou mafaufau a tulaga kese‵kese e tolu konei: Ko fakatauemu atu a tama‵liki i te akoga ki se tamaliki tagata. E fakaitaita ne latou tou tagata, kāti ko te mea ke pati masei io me ke fia fusu atu. E mata, ka taua atu a ia, io me ka se fia saga atu a ia kae fano keatea? Ko fai ne se avaga tagata ana sukesukega i a ia eiloa i te Itaneti. E sae aka se faka‵pulaga i tena komupiuta, telā e fakasalalau atu ei se fakatuātusi masei i te Itaneti. E mata, ka tofotofogina a ia ke onoono atu ki te fakatuatusi masei tenā, io me ka fakamautinoa aka ne ia me e ‵teke atu a ia ki ei? Ko sau‵tala se fafine Kelisiano mo nisi tuagane kae ko kamata o mafuli te mataupu ki mea sē aoga, telā ko fatufatu fakamasei ei ne latou se tuagane i te fakapotopotoga. E mata, ka ‵lago atu a ia ki ei, io me ka taumafai tou fafine ke ‵fuli te mataupu?

² E tiga eiloa te kese‵kese o tulaga konā, e isi se mea e ‵pau ei latou katoa. E aofia katoa latou i te taumafai ke tumau i te fakamaoni e pelā me se Kelisiano. E mata, e mafaufau koe ki tou fakamaoni i te taimi e fe‵paki ei mo mea e manavase ki ei, manakoga, mo fakamoemoega i te olaga? I aso katoa, e mafau‵fau a tino e uiga ki olotou foliga, olotou malosi ‵lei, tulaga faiga‵ta i te tausiga o te olaga, ko taimi ‵lei mo taimi sē ‵lei mo olotou taugasoa, kae kāti ko olotou famau foki. E mafai eiloa o ‵saga malosi atu tatou ki vaegā mea penā. Kae se a eiloa te ‵toe mea tāua ki a Ieova i te taimi e sukesuke ei ne ia ‵tou loto? (Salamo 139:​23, 24) Ko te ‵tou fakamaoni.

3. Se a te tauliaga e tuku mai ne Ieova ki a tatou, kae se a te mea ka mafau‵fau tatou ki ei i te mataupu tenei?

³ A Ieova, ko te Tino telā e tuku mai ne ia a ‘mea ‵lei katoa mo meaalofa katoatoa takitasi,’ ko oti foki ne tuku mai ne ia ki a tatou a vaegā meaalofa kese‵kese. (Iakopo 1:​17) E fakafetai eiloa tatou ki a ia, me e maua ne tatou a vaegā meaalofa pelā mo te foitino, te mafaufau, te malosi ‵lei, mo atamai kese‵kese. (1 Kolinito 4:7) Kae e se faimālō eiloa ne Ieova tatou ke fakaasi atu te fakamaoni. E talia ne ia ke filifili aka ne tatou me ka fakamalosi aka ne tatou te uiga tenei io me ikai. (Teutelonome 30:19) Tela la, e ‵tau eiloa o iloilo aka ne tatou a te uiga o te fakamaoni. Ka mafau‵fau foki tatou ki pogai e tolu e tāua ‵ki ei te uiga tenei.

Se a te Fakamaoni?

4. Ne a mea e aofia i te fakamaoni, kae se a te mea e tauloto ne tatou mai te tulafono a Ieova e uiga ki taulaga manu?

⁴ E se iloa tonu ne tino e tokouke a te uiga o te fakamaoni. E pelā mo te fai‵pati fakamata‵mata o te kau politiki e uiga ki te lotou fakamaoni, e foliga mai me e fakauiga sāle latou ki te fai mea tonu. E tāua te uiga tenā, kae se vaega fua o te fakamaoni. E ‵tusa mo te fakaaogaga i te Tusi Tapu, e aofia i te fakamaoni a te katoatoa mo te ‵lei i mea tau amioga. A pati Epelu kolā e tai ‵pau mo te “fakamaoni” ne māfua mai i te pati mua telā e fakauiga ki te ‵lei, katoatoa, io me ko te seai o se mea ‵se i ei. E fakaaoga eiloa se pati e tasi i pati konei e uiga ki taulaga kolā ne ofo atu ki a Ieova. Ne talia fua ne ia se manu e pelā me se taulaga māfai ne ‵lei, io me katoatoa te manu tenā. (Faitau te Levitiko 22:​19, 20.) Ne polopoloki ‵mafa eiloa ne Ieova a latou kolā e ‵teke atu mo te iloa tonu ki tena fakatonuga mai te ofo atu o manu vae ma‵sei, ma‵saki, io me e ‵kivi e pelā me ne taulaga.​​—Malaki 1:​6-8.

5, 6. (a) Ne a fakaakoakoga e fakaasi mai i ei me e masani o fakatāua ne tatou se mea telā e ‵lei, io me katoatoa? (e) Kafai e mafau‵fau tatou ki tino sē ‵lei katoatoa, e mata, e fakauiga eiloa te fakamaoni me ‵tau o ‵lei katoatoa se tino? Fakamatala mai.

⁵ E se se mea fou te manatu e uiga ki te ‵sala atu mo te fakatāua o se mea ‵lei, io me e katoatoa. Mafaufau ki se tino telā e fiafia ki tusi valevale, ne maua ne ia se tusi tāua ‵ki telā ko leva ne ‵sala sāle a ia ki ei, kae ne iloa aka ne ia me e ‵galo a nāi itulau tāua i ei. Ona ko te sē fiafia, kāti e toe fakafoki atu ne ia te tusi ki te fatatusi. Io me e fakaataata i tou mafaufau se fafine e taemisa i te matāfaga. Ona ko tena ofo i te uke mo te ‵gali o mea konei, e punou ifo a ia ki lalo kae iloilo ne ia a misa takitasi. Ne a mea ka puke ne ia? Ko mea kolā e ‵lei kae katoatoa. E penā foki loa, e salasala atu te Atua ki tino kolā e ‵lei, io me e katoatoa te lotou fakamaoni.​​—2 Nofoaiga Tupu 16:9.

⁶ Kāti e mafaufau koe me e ‵tau o ‵lei katoatoa se tino ke mafai ei o fakamaoni a ia. Ona ko te mea ko oti ne fakamasei tatou ne te agasala mo te tulaga sē ‵lei katoatoa, e mafai o mafau‵fau tatou me e fai tatou pelā me se tusi telā e se katoatoa io me se misa telā ko se ‵lei. E mata, e penā eiloa ou lagonaga i nisi taimi? Ke na talitonu la me e se fakamoemoe a Ieova ke ‵lei katoatoa tatou. E se fakamoemoe lele eiloa a ia ke fai ne tatou a mea e uke atu i lō mea e mafai ne tatou o fai.a (Salamo 103:14; Iakopo 3:2) Kae e fakamoemoe eiloa a ia ke tumau tatou i te fakamaoni. E mata, e isi se ‵kese i te va o te ‵lei katoatoa mo te fakamaoni? Ao. Ke fai se tala fakatusa: E fiafai se tamataene ki se tamafine telā ka avaga a ia ki ei. Se mea valea ‵ki māfai e fakamoemoe a ia ke ‵lei katoatoa tou fafine. Kae se mea poto ke fakamoemoe a ia ke katoatoa tena alofa ki a ia, mai te fiafai atu fua ki tou tagata tokotasi. I se auala tai ‵pau, ‘e se mafai o fakasaoloto ne Ieova tatou ke ifo ki so se mea.’ (Esoto 20:5) E se fakamoemoe a ia ke ‵lei katoatoa tatou, kae ke a‵lofa tatou ki a ia mo ‵tou loto kātoa, mai te tapuaki atu fua ki a ia tokotasi.

7, 8. (a) Se a te fakaakoakoga ne tuku mai ne Iesu e uiga ki te fakamaoni? (e) Se a te uiga tonu o te fakamaoni e ‵tusa mo te Tusi Tapu?

⁷ Kāti e masaua ne tatou te tali a Iesu i te taimi ne fesili atu ei ki a ia me se a te ‵toe tulafono tafasili i te tāua i tulafono katoa. (Faitau te Maleko 12:​28-​30.) Ne seki tuku atu fua ne Iesu te tali, kae ne ola foki eiloa a ia e ‵tusa mo te mea tenā. Ne tuku mai ne ia te ‵toe fakaakoakoga sili i te alofa atu ki a Ieova mo tena mafaufau, loto, ola, mo te malosi kātoa. Ne fakaasi mai ne ia me i te fakamaoni e se lavea atu fua i pati, kae i faifaiga aoga kolā e māfua mai i lagonaga ‵ma. Ke tumau i te fakamaoni e ‵tau o tau‵tali atu tatou ki kalafaga o Iesu.​​—1 Petelu 2:​21.

⁸ Tenei eiloa te uiga tonu o ‵tou fakamaoni e ‵tusa mo te Tusi Tapu: ko te tapuaki atu mo te loto kātoa ki te Tino faka-te-lagi e tokotasi, ko Ieova te Atua, e ‵tusa mo tena loto mo tena fuafuaga. A te tumau i te fakamaoni e fakauiga ki te taumafai faeloa o tatou ke fai a mea katoa ke fakafiafia atu ki a Ieova te Atua i ‵tou olaga i aso takitasi. Ka fakaasi atu i mea e fakamuamua ne tatou i ‵tou olaga a mea kolā e fakamuamua ne ia. Ke na onoono tatou ki pogai e tolu e tāua ‵ki ei te mea tenei.

1. Te ‵Tou Fakamaoni mo te Kinauga e Uiga ki te Pulega Sili

9. E ‵soko tasi pefea te ‵tou fakamaoni ki te kinauga e uiga ki te pulega sili i te lagi mo te lalolagi?

⁹ E se faka‵na eiloa te pulega sili a Ieova ki te ‵tou fakamaoni. E amiotonu, e tumau ki te se-gata-mai, kae e oko atu foki tena pulega sili ki te lagi mo te lalolagi kātoa. Ka fai faeloa penā, faitalia a pati io me ko faiga e fai ne so se mea ola. Kae ko oti ne taku fakamaseigina i se auala matagā a te pulega sili a te Atua i te lagi mo te lalolagi. Tela la, e ‵tau o fakamaluga aka tena pulega​​—mai te fakatalitonu atu o te ‵tonu, te amiotonu, mo te alofa​​—i mua o tino ‵poto katoa. E pelā me ne Molimau a Ieova, e fia‵fia eiloa tatou ke sau‵tala e uiga ki te pulega sili a te Atua i te lagi mo te lalolagi mo so se tino telā e loto fiafia o fakalogologo ki ei. Kae e mafai la pefea o fai ‵tou fakaikuga e uiga ki te kinauga tenei? E fakaasi atu pefea me e filifili ne tatou a Ieova mo fai ‵tou Pule Sili? Mai te tumau i te fakamaoni.

10. Ne a pati ‵toa ne fai ne Satani e uiga ki te fakamaoni o tino, kae e saga atu pefea koe ki ei?

¹⁰ Mafaufau ki te auala e aofia i ei tou fakamaoni. Ne ‵losi mai Satani me ka seai eiloa se tino e ‵lago atu ki te pulega sili a te Atua, me e seai se tino ka tavini atu ki a Ieova mo te alofa tonu. I mua o agelu e tokouke, ne fai atu te Tiapolo ki a Ieova: “A te tagata e mafai fua o tiakina ana mea katoa manafai ko manako ke ola a ia.” (Iopu 2:4) Masaua la me ne seki fakasino atu fua ne Satani ana pati matagā konā ki te tagata amiotonu ko Iopu kae ne taku atu ne ia e pelā me se faifaiga masani a tino katoa. Ona ko te mea tenā, e taku ne te Tusi Tapu a Satani ki “te tino telā ne ‵moli ne ia o‵tou taina.” (Fakaasiga 12:10) E fakaitaita atu a ia ki a Ieova i ana pati me i Kelisiano​​—e aofia i ei koe​​—ka se tumau i te fakamaoni. E ‵losi mai Satani me ka fakafiti ne koe a Ieova ko te mea fua ke fakaola ei koe. E pefea ou lagonaga ki vaegā pati ‵toa penā? E mata, ka se fia fakaaogā faka‵lei ne koe se avanoaga ke fakamaoni atu ei me i a Satani se tino loi? Mai i tou tumau i te fakamaoni, e mafai eiloa ne koe o fai penā.

11, 12. (a) Ne a fakaakoakoga e fakaasi mai i ei me e ‵soko tasi ‵tou fakaikuga i aso katoa mo te kinauga e uiga ki te ‵tou fakamaoni? (e) Kaia e fai ei a te tumau i te fakamaoni mo fai se tauliaga?

¹¹ A te kinauga e uiga ki tou fakamaoni e fai ei ke tāua ‵ki au amioga mo filifiliga i aso katoa. Masaua la a tulaga kese‵kese e tolu ne taku atu mua. E fakatumau aka pefea te lotou fakamaoni? E tofotofogina a te tamaliki tagata telā ne fakaitaita ne tama‵liki i te akoga ke fia fusu atu ki a latou, kae e masaua ne ia te fakamalosiga tenei: “Aku fagasele, sa taui ma sui, kae tuku eiloa ki te taui ma sui a te Atua, me ne fai mai te Tusi, ‘Muna a te Aliki, e a aku te taui ma sui, kae e a aku foki e toe ‵togi atu.’ ” (Loma 12:19) E fulitua atu eiloa tou tagata keatea. E mafai o onoono atu te avaga tagata telā e fakaaoga ne ia te Itaneti ki se mea matagā telā e fakamalosi aka ei a faifaiga fakatauavaga ma‵sei, kae e masaua ne ia te akoakoga fakavae i pati a Iopu: “Ko oti ne fai ne au se tautoga ‵malu, ke mo a e kilo oku mata ki se fafine mo toku loto lailai.” (Iopu 31:1) E penā foki loa, e ita fitifiti te tagata tenā ma onoono atu a ia ki ata ma‵sei, mai te ‵teke atu ki ei, e pelā me ne mea poisini. E fakatalave malie te faipati atu o te fafine telā ne sau‵tala i se potukau, i te taimi e lagona ei ne ia a pati fatufatu fakalogo‵mae, kae masaua ne ia te takitakiga tenei: “E ‵tau mo tatou takitokotasi o fakafiafia o‵tou tuakoi mō te olotou ‵lei, ko te mea ke fakatupu ake ei a ia i te fakatuanaki.” (Loma 15:2) E se fakamalosi loto a pati fatufatu kolā ne mafai o toe fai atu ne tou fafine. E se ‵lei eiloa a pati konā ki tena taina Kelisiano; kae e se fakafiafia atu foki ki tena Tamana faka-te-lagi. Tela la, e pule faka‵lei atu tou fafine ki ana pati kae ‵fuli ne ia te mataupu.

¹² I taimi takitasi konā, e fai ne te Kelisiano se filifiliga telā e mafai o fai atu ei a ia: ‘A Ieova ko toku Pule. Ka taumafai au o fai a mea kolā e fakafiafia atu ki a ia i te feitu tenei.’ E mata, e fai eiloa ne koe au filifiliga mo fakaikuga totino i te auala tenā? Kafai e fai koe penā, e mafai eiloa o ola koe e ‵tusa mo pati fakamalosi i te Faataoto 27:11: “Taku tama, a koe ke atamai kae ka fiafia malosi eiloa au. Ka isi se tali e mafai o avatu ne au ki so se tino telā e fakamasei ne ia au.” Ko oko eiloa i te ‵tou taulia ke fakafiafia ne tatou te loto o te Atua! E a, e se aoga eiloa ‵tou taumafaiga ke fakatumau te ‵tou fakamaoni?

2. Te Fakavae mō te Fakamasinoga a te Atua

13. E fakaasi mai pefea ne pati a Iopu mo Tavita me i te fakamaoni ko te mea telā e fakavae ki ei ne Ieova te fakamasinoga o tatou?

¹³ E lavea atu i konei me e mafai eiloa o ‵lago atu tatou ki te pulega sili a Ieova ona ko te fakamaoni. Tenā eiloa te mea e fakavae ki ei ne te Atua ‵tou fakamasinoga. Ne malamalama ‵lei eiloa a Iopu i te munatonu tenei. (Faitau te Iopu 31:6.) Ne iloa ne Iopu me e fua aka ne te Atua a tino katoa ki “fua mea ‵mafa kolā e ‵tonu katoatoa,” mai te fakaaogaga o Tena tulaga amiotonu ‵lei katoatoa ke fua aka ki ei ‵tou fakamaoni. Ne fai mai foki Tavita: “Te Aliki, a koe ko te famasino o tino katoa; fakamasino mai mo te alofa ki a au, e iloa ne koe i a au e ‵ma kae ‵lei [io me “fakamaoni,” NW]. . . . Me i a koe ko te Atua amiotonu, telā e fakamasino ne koe omotou mafaufauga mo omotou manakoga.” (Salamo 7:​8, 9) E iloa ne tatou me e mafai o kilo atu te Atua ki ‘mafaufauga mo manakoga’ o te tino. E ‵tau o masaua ne tatou a mea kolā e ‵sala atu a ia ki ei. E pelā mo muna a Tavita, e fakamasino ne Ieova tatou e ‵tusa mo ‵tou fakamaoni.

14. Kaia e se ‵tau ei o mafau‵fau tatou me e se mafai o tumau tatou i te fakamaoni ona ko ‵tou tulaga sē ‵lei katoatoa kae agasala?

¹⁴ Mafaufau la me e sukesuke ne Ieova te Atua te fia piliona o loto o tino i aso nei. (1 Nofoaiga Tupu 28:9) E pefea te uke o taimi e maua aka ei ne ia se Kelisiano e tumau i te fakamaoni? A te ‵tonuga loa, e mauagatā! Kae e se ‵tau o mafau‵fau tatou me e se mafai o fakatumau ‵tou fakamaoni ona ko ‵tou tulaga sē ‵lei katoatoa. E ‵kese mai i ei, e maua ne tatou a pogai ‵lei ke tali‵tonu, e pelā mo Tavita mo Iopu, me ka maua eiloa ne Ieova tatou e tumau i te fakamaoni, faitalia ‵tou tulaga sē ‵lei katoatoa. Masaua, me e se fai ne te tulaga ‵lei katoatoa ke mafai o fakamaoni tatou. E tokotolu fua a tino ‵lei katoatoa ne ola i te lalolagi tenei, kae e tokolua mai i ei, ko Atamu mo Eva, ne fakata‵mala o tumau i te fakamaoni. Kae ko lau eiloa i miliona a tino sē ‵lei katoatoa ko oti ne manuia i te faiga penā. E mafai foki o fai koe penā.

3. E Tāua ki ‵Tou Fakamoemoega

15. Ne fakaasi mai pefea ne Tavita a te tāua o te fakamaoni ki te ‵tou fakamoemoega i aso mai mua?

¹⁵ Ona ko te mea e fakavae te fakamasinoga a Ieova ki te fakamaoni, e tāua eiloa te mea tenā ki ‵tou fakamoemoega i aso mai mua. Ne iloa ne Tavita te ‵tonu o te mea tenei. (Faitau te Salamo 41:12.) Ne fakatāua ne ia te fakamoemoega ke maua te taliaga a te Atua ki te se-gata-mai. E pelā mo Kelisiano ‵tonu i aso nei, ne fakamoemoe a Tavita ke ola ki te se-gata-mai, mai te tumau i te fakapilipili atu faeloa ki a Ieova te Atua i te taimi e tavini atu ei ki a ia. Ne iloa ne Tavita a te tāua o tena tumau i te fakamaoni māfai e fia lavea atu ne ia te fakataunuga o te fakamoemoega tenā. E penā foki loa, e ‵lago mai, e akoako, e takitaki, kae fakamanuia ne Ieova tatou i te taimi e tumau ei tatou i te fakamaoni.

16, 17. (a) Kaia e fakaiku aka ei ne koe ke tumau faeloa i tou fakamaoni? (e) Ne a fesili ka tali mai i te suā mataupu?

¹⁶ E tāua foki te fakamoemoega ki te ‵tou fia‵fia i aso nei. E mafai o tuku mai i ei a te fiafia telā e manakogina ke manumalo ei tatou i taimi faiga‵ta. E mafai foki o puipui ‵tou mafaufauga ne te fakamoemoega. Masaua me e fakatusa ne te Tusi Tapu a te fakamoemoega ki se puloutau. (1 Tesalonia 5:8) E pelā mo te puipui ne se puloutau a te ulu o se sotia i te taua, e puipui foki ne te fakamoemoega ‵tou mafaufau mai mafaufauga sē aoga kolā e fakamalosi aka ne Satani i te lalolagi mua telā ko pili o fakaseai atu. E tonu, e seai eiloa se aogā o te olaga māfai e seai se fakamoemoega. E ‵tau o iloilo ne tatou a tatou eiloa mo te fai mea tonu, mai te mafaufau faka‵lei ki te tulaga o ‵tou fakamaoni mo te fakamoemoega telā e isi sena sokoga ki ei. Ke mo a ma puli me i te tumau i te fakamaoni, e fakamaluga aka i ei ne koe te pulega sili a Ieova kae puipui foki ei tou fakamoemoega gali mō aso mai mua. Ke na tumau faeloa koe i tou fakamaoni!

¹⁷ Ona ko te tāua o te fakamaoni, e ‵tau o mafau‵fau tatou ki nisi fesili. E fakamalosi aka pefea ne tatou te fakamaoni? E mafai pefea o fakatumau ne tatou? Kae ne a mea e mafai o fai māfai ne seki tumau se tino i te fakamaoni? Ka tali mai ne te suā mataupu a fesili konei.

[Fakamatalaga mai lalo]

Ka Tali Mai Pefea ne Koe?

• Se a te fakamaoni?

• E aofia pefea te fakamaoni i te kinauga e uiga ki te pulega sili i te lagi mo te lalolagi?

• E tuku mai pefea ne te fakamaoni se fakavae mō ‵tou fakamoemoega?

[Fakamatalaga o te Ata i te itulau e 14]

E uke a mea faiga‵ta e fe‵paki mo ‵tou fakamaoni i aso katoa o te olaga