E Mata, e Isi se Igoa o te Atua?

Tali masani:

▪ “A tena igoa ko te Atua.”

▪ E seai sena igoa totino.”

Ne a pati a Iesu?

▪ “Tela la, ke ‵talo koutou penei: ‘Te motou Tamana telā i te lagi, ke tapu tou igoa.’” (Mataio 6:9) Ne talitonu a Iesu me e isi se igoa o te Atua.

▪ “Ne fakailoa atu foki ne au tou igoa ki a latou, kae ka fakailoa atu faeloa ne au; ko te mea ke i loto i a latou a te alofa ne alofa mai ei koe ki a au, ko au foki ke i loto i a latou.” (Ioane 17:26) Ne fakailoa atu ne Iesu a te igoa o te Atua.

▪ “Au e muna atu ki a koutou, ka se lavea ne koutou au, ke oko ki te taimi telā ka muna ake ei koutou pelā, ‘Ke manuia a ia telā e vau i te igoa o te Aliki [“Ieova,” NW].’” (Luka 13:35; Salamo 118:26) Ne fakaaoga ne Iesu a te igoa o te Atua.

NE FAKAASI mai ne te Atua a tena igoa. Ne fai mai a ia penei: “Ko au ko Ieova, tenā toku igoa.”a (Isaia 42:​8, Tusi Paia, Samoa) A te igoa ko Ieova ko te ‵toe pati telā e pili atu ki te igoa o te Atua telā ne ‵fuli mai i te ‵gana Epelu. Kāti ka poi koe me e sae mai fakafia afe taimi a te igoa tu ‵kese tenei i te ‵gana Epelu i loto i tusitusiga faka-te-Tusi Tapu i aso mua. A te tonuga loa, e uke a taimi e sae mai ei te igoa tenā i loto i te Tusi Tapu i lō nisi igoa aka.

“Ko oi te igoa o te Atua?” Kāti ka tali mai a nisi tino, “ko te Atua.” E tonu, e ‵pau eiloa te se aoga o te tali tenā mo te tali ki te fesili tenei, “Ko oi ne sili i te palota?” kae tali atu, “ko te sui.” A tali konā e se ne tali mautinoa, me i te “Atua” mo te “sui” e seai ne igoa.

Kaia ne fakaasi mai ei ne te Atua a tena igoa ki a tatou? Ne fai ne ia ko te mea ke iloa ‵lei ne tatou a ia. Ke fai se fakatusa, e mafai o taku se tino e pelā me ko Tou ‵Malu, Te Pule, Pāpā, io me ko te Tupuna, e ‵tusa loa mo olotou fakanofonofoga. E fakaasi mai i tofi konei se mea e uiga ki a ia. Kae ko te igoa o te tino e fakamasaua mai i ei ki a tatou a mea katoa e uiga ki te tino tenā. E penā foki a tofi e pelā mo te Aliki, Tou ‵Malu, Tamana, mo te Mafuaga e fakaasi mai i ei a mea kese‵kese ko oti ne fai ne te Atua. Kae e fakamasaua mai ne tena igoa totino, ko Ieova, a mea katoa e iloa ne tatou e uiga ki a ia. E mafai pefea o iloa ‵lei ne koe te Atua e aunoa mo te iloa ne koe tena igoa?

E tāua ‵ki ke iloa ne tatou tena igoa kae ke fakaaoga foki ne tatou. Kaia? Me e fai mai te Tusi Tapu: “Ko tino katoa kolā e ka‵laga atu ki te igoa o te Aliki [Ieova], ka fakaolagina latou.”​—Loma 10:13; Ioelu 2:​32.

[Fakamatalaga mai lalo]

[Ko manatu tāua e 6]

E mafai o taku se tino e pelā me ko Tou ‵Malu, Te Pule, Pāpā, io me ko te Tupuna, e ‵tusa loa mo olotou fakanofonofoga. Kae e fakaasi mai i tena igoa totino a mea katoa e iloa ne tatou e uiga ki a ia