Te ‵Toe Fanau Fou Se a te Pogai?

E TALI‵TONU a tino e tokouke me e ‵tau o toe fanau mai se tino ke maua ei te fakaolataga se-gata-mai. Mafaufau la ki pati ne fai mai ne Iesu e uiga ki te pogai o te ‵toe fanau fou. Ana muna: “Kafai e se toe fanau mai se tino, e se mafai eiloa o matea ne ia a te Malo o te Atua.” (Ioane 3:​3) Tela la, e ‵tau o toe fanau mai se tino ko te mea ke mafai o matea ne ia te Malo o te Atua, kae e se ko te mea ke maua ne ia te fakaolataga. ‘Kae’ e fai mai a nisi tino, e mata, e se fakasino atu te avā tugapati konei ko ‘te mateaatuga o te Malo mo te mauaga o te fakaolataga​—ki te taui e tasi?’ Ikai, e se penā. Ke malamalama i te ‵kese, ke na mafau‵fau muamua tatou ki te uiga o te tugapati ko te “malo o te Atua.”

A te malo se pulega. Tela la, a te tugapati ko te “malo o te Atua” e fakauiga ki te “pulega a te Atua.” E akoako mai i te Tusi Tapu me i a Iesu Keliso, te “tama a te tagata,” ko te Tupu i te Malo o te Atua kae e isi ne tino e pule fakatasi mo Keliso. (Tanielu 7:​1, 13, 14; Mataio 26:​63, 64) E se gata i ei, ne fakaasi mai i se fakaasiga ne tuku atu ki te apositolo ko Ioane me i tino kolā e pule fakatasi mo Keliso ne tino kolā ne filifili “mai fenua katoa, matakāiga takitasi, mo ‵gana kese‵kese” kae ‘ka pule latou ki te lalolagi.’ (Fakaasiga 5:​9, 10; 20:6) E toe fakaasi mai foki i te Muna a te Atua me i tino kolā ka pule mai e pelā me ne tupu e aofia i “te lafu foliki” o te toko 144,000 “kolā ko oti ne fakaolagina mai te lalolagi.”​—Luka 12:32; Fakaasiga 14:​1, 3.

E fakavae i fea te Malo o te Atua? E taku foki a “te malo o te Atua” ki te “malo o te lagi,” telā e fakaasi mai i ei me ka pule mai a Iesu mo ana tupu lagolago mai te lagi. (Luka 8:​10; Mataio 13:11) Tela la, a te Malo o te Atua se pulega faka-te-lagi telā e aofia i ei a Iesu Keliso mo se potukau o tino pule kolā ne filifili mai i tino.

Se a la te mea ne fakauiga ki ei a Iesu i te taimi ne fai atu ei a ia me e ‵tau ke toe fanau mai se tino ke “mafai eiloa o matea ne ia a te Malo o te Atua”? Ne fakauiga a ia me e ‵tau mo te tino o toe fanau mai ko te mea ke pule fakatasi mai mo Keliso i te lagi. I se auala faigofie, a te pogai o te toe fanau fou ko te fakatoka o se tamā potukau o tino mō te pulega faka-te-lagi.

Tela la, ko lavea atu ne tatou me e tāua ‵ki eiloa a te ‵toe fanau fou, e ‵tau o māfua mai i te Atua, kae e fakatoka ei se potukau o tino mō te pulega i te lagi. Kae e tupu pefea te ‵toe fanau fou?

[Ko manatu tāua e 7]

A te pogai o te ‵toe fanau fou ko te fakatoka o se tamā potukau o tino mō te pulega faka-te-lagi

[Ata i te itulau e 7]

A Iesu Keliso mo se potukau o tino ne filifili mai i tino ke aofia i te Malo o te Atua