Auala e Mafai ei o Malamalama Koe i te Tusi Tapu—1. Fakamolemole Atu ki te Atua mō se Fesoasoani

“E isi se vaitaimi ne faitau sāle au ki te Tusi Tapu mai mua o moe,” ko pati a Ninfa, telā e nofo i Italia. “Ne fai ne au te mea tenā me e iloa ne au me ko te Muna a te Atua, kae e tiga eiloa ne seki fiafia malosi au ki ei, ne fia iloa ne au a mea ne tusi ne te Atua i te Tusi Tapu. Ne taumafai au ke faitau ki te tusi kātoa tenā. I te kamataga, ne faigofie fua ki a au, kae i taku okoga ki koga kolā ko tō faiga‵ta, tenā ne taofi aka ei taku faitauga.”

E MATA, e ‵pau koulua mo Ninfa? E penā eiloa a tino e tokouke. Kae e pelā mo te mea ko iloa ne tatou mai te mataupu muamua, e manako eiloa a Ieova, te Atua, telā ne tusi ne ia te Tusi Tapu, ke malamalama tatou i tena Muna. E malamalama la pefea koe i ei? A te mea muamua ko te fakamolemole atu ki te Tino ne tusi ne ia te Tusi Tapu mō se fesoasoani.

Ne fakaigoa a apositolo a Iesu e pelā me “ne tino e seki a‵koga” me ne seki ‵kau atu latou ki akoga a te kau lapi e uiga ki mea fakalotu. (Galuega 4:13) Kae ne fakamautinoa atu ne Iesu ki a latou me e mafai eiloa o malamalama latou i te Muna a te Atua. E pefea la? Ne fai atu Iesu: “Ka ko te fesoasoani, ko te agaga tapu tenā, ka uga mai ne te Tamana e alatu mai i toku igoa, o akoako atu ki a koutou i mea katoa.” (Ioane 14:26) Ne fakaaoga ne te Atua te agaga tapu, io me ko te malosi galue, ke faite ei te lalolagi fakatasi mo mea ola katoa i ei. (Kenese 1:2) Ne fakaaoga foki ne ia ke fakaosofia ei a tagata e toko 40 ke tusi ne latou ana manatu ki te Tusi Tapu. (2 Petelu 1:20, 21) E mafai foki o fesoasoani atu a te agaga tenā ki so se tino telā e manako ke malamalama i te Tusi Tapu.

E mafai pefea o maua ne koe te agaga tapu o te Atua? E ‵tau o fakamolemole atu koe e uiga ki ei i te fakatuanaki. A te tonuga loa, e ‵tau o fakamolemole malosi atu koe e uiga ki ei. “Akai atu [faeloa], kae ka tuku mai ki a koutou,” ko pati a Iesu. “Kafai . . . e iloa ne koutou o tuku atu a mea ‵lei ki otou tama‵liki, e se sili atu la te otou Tamana i te lagi, i te fia tuku atu o te agaga tapu ki tino kolā e fakamolemole atu ki a ia?” (Luka 11:9, 13) E tuku mai eiloa ne Ieova mo te loto fiafia a te agaga tapu ki tino kolā e fakamolemole atu ki a ia. A te malosi galue tenā e mafai o fesoasoani atu ki a koe ke malamalama i te uiga o muna fakaosofia kolā ne tusi ki lalo i te Tusi Tapu i te fia afe tausaga ko ‵teka. E mafai foki o tuku mai ne te agaga o te Atua a te poto e manakogina ke fakagalue aka ne koe i tou olaga a te fekau tāua mai te Tusi Tapu.—Epelu 4:12; Iakopo 1:5, 6.

Tela la, i so se taimi e sagasaga ei koe o faitau ki te Tusi Tapu, ‵talo ki te Atua ke tuku mai tena agaga tapu ke fesoasoani atu ki a koe ke malamalama i tena Muna.