E Mata, e ‵Lei a Lotu Katoa?

E OLA tatou i se lalolagi telā ko ‵fonu i lotu kese‵kese. I se sukesukega e tasi ne fai fakamuli nei, ne iloa aka ei me e 19 a fakapotopotoga o lotu ‵lasi mo tamā lotu e 10,000 i te lalolagi kātoa. Ona ko te uke o vaegā lotu kese‵kese i aso nei, ko tuku atu eiloa ki tino a te avanoaga ke filifili aka ki lotu e fia ‵kau latou ki ei. Tela la, e mata, e se tāua a te lotu telā e filifili aka ne koe?

E fai mai a nisi tino me i lotu kese‵kese e fai pelā me ne auala kese‵kese kolā e tau atu ki luga i se mauga. E seai eiloa se ‵kese ki a latou a te auala telā e filifili aka ne latou, me i auala katoa e tau atu ki te koga e tasi. E fakasako‵sako mai latou me e tokotasi fua te Atua Malosi Katoatoa, tela la, e ‵tau o tapuaki atu a lotu katoa ki a ia.

E Mata, a Auala Katoa e Tau Atu ki te Atua?

Ne a pati a Iesu Keliso, te ‵toe faiakoga fakalotu telā ne āva ki ei i tala mua, e uiga ki te mataupu tenei? “Ulu atu koutou ki te mataloa mataliki,” ne fai atu a ia ki ana soko. Kaia? “Me i te mataloa mataefa e faigofie ei te auala e tau atu ki te malaia, e tokouke foki latou kolā e olo atu i ei. Kae ko te mataloa mataliki e faigata te auala e tau atu ki te ola, e timomo foki a tino e maua ne latou.”​—Mataio 7:​13, 14.

E mata, ne fakauiga eiloa a Iesu me e iku atu a nisi lotu ki “te malaia”? Io me ne akoako atu ne ia me ko tino sē tali‵tonu fua e olo atu i te auala mataefa, kae ko tino kolā e tali‵tonu ki te Atua​—faitalia me se a te lotou lotu​—e olo atu i te auala mataliki telā e tau atu ki te ola?

Mai tua faeloa o ana pati me e lua fua a auala, ne toe fai atu a Iesu: “Ke fakaeteete koutou i pelofeta ‵loi kolā e o‵mai ki a koutou i amioga fakamamoe, ka ko olotou loto ko fe‵kai eiloa e pelā me ne luko.” (Mataio 7:​15) Fakamuli ifo, ne fai mai a ia: “E se ‵sao ki te Malo o te lagi a latou katoa kolā e fai mai ki a au, ‘Te Aliki, te Aliki,’ na ko ia fua telā e fai ne ia te loto o toku Tamana telā i te lagi.” (Mataio 7:​21) Kafai e taku se tino ki se pelofeta io me e fai mai i a Iesu ko tena “Aliki,” se mea ‵lei ke fai atu me i a ia se tino lotu, kae e se fai pelā me se tino sē talitonu. E manino ‵lei, me ne fakailoa atu ne Iesu me e se ko lotu katoa e ‵lei kae e se ko faiakoga fakalotu katoa e ‵tau o fakatalitonugina.

E Mata, e Mafai Eiloa o Maua te Auala Mataliki?

Ona ko te mea e se iku atu ki te Atua a auala katoa, e mafai pefea o maua aka ne koe, i te fia afe o lotu konei, a te auala mataliki telā e tau atu ki te ola? Mafaufau ki te tala fakatusa tenei: Fakaataata i tou mafaufau me ko galo koe i se fa‵kai lasi. E fakaiku aka ne koe ke fakamolemole atu mō se fesoasoani. E fai atu se tino mo te loto talitonu ke fano koe ki te saegala. E fakamalosi atu a te suā tino ke fano koe ki te togala. Kae ko te suā tino e fakamalosi atu ke filifili ne koe so se auala e mafaufau koe me ko te ‵toe auala tonu. Fakamuli loa, e puke aka ne se tino, telā e faima‵laga fakatasi atu koulua, se mape telā e fakatalitonugina kae e fakaasi atu ki a koe a te auala tonu. E tuku atu ne tou tagata ki a koe a te mape ko te mea ke mafai o fesoasoani atu ke oko tonu koe ki te koga e faimalaga koe ki ei. E mata, ko sili atu tou loto talitonu me e oko atu eiloa koe ki te koga e faimalaga koe ki ei?

Tela la, kafai foki e filifili aka te auala fakalotu tonu, e ‵tau o maua ne tatou se mape faka-te-agaga telā e fakatalitonugina. E mata, e isi se mea penā? Ao, e isi. A te mape tenā ko te Tusi Tapu, telā e fai mai: “Me i Tusitusiga Tapu katoa ne aumai mai te Atua, kae aoga ki te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei.”​—2 Timoteo 3:​16.

Kāti ko oti ne maua ne koe i tau ‵gana se ‵fuliga o te Tusi Tapu telā e mafai o fakaaoga e pelā me se mape faka-te-agaga. A tino kolā ne ‵lomi ne latou te mekesini tenei, ko Molimau a Ieova, e ‵lomi ne latou se ‵fuliga o te Tusi Tapu telā e fakatalitonugina ko te New World Translation of the Holy Scriptures. Kae kafai koe e sē se Molimau a Ieova, kāti e ‵lei atu ki a koe ke fakaaoga a nisi ‵fuliga māfai ko mafaufau ki te mataupu e uiga ki te auala e iloa ei te lotu ‵lei mai i lotu ma‵sei. Tela la, a te fakasologa o mataupu konei e siki mai eiloa i nai ‵fuliga o te Tusi Tapu kolā e lasi te āva o nisi lotu ki ei.

I te taimi e faitau ei koe ki mataupu kolā e ‵soko mai ki te mataupu tenei, ke fakatusa ne koe a mea kolā e iloa ne koe mo pati i te Tusi Tapu. Masaua a pati a Iesu e uiga ki te auala e mafai ei o faka‵kese ne koe a te lotu ‵lei mai i lotu ma‵sei. Ana muna: “A te lakau ‵lei e fua mai ei fuaga ‵lei, ka ko te lakau masei, e fua mai ei a fuaga ma‵sei. A te lakau ‵lei e se mafai o fua mai ei ne fuaga ma‵sei, io me ko te lakau masei ke fua mai ei ne fuaga ‵lei.” (Mataio 7:17, 18) Mafaufau aka ki fuataga ‵lei e tolu kolā e fai mai te Tusi Tapu me ka iloa ei te “lakau ‵lei.”

[Te Manatu Tāua i te itulau e 3]

A te Tusi Tapu e fai pelā me se mape telā e fakatalitonugina kae e mafai o fesoasoani atu ki se tino ke maua ne ia te auala ki te lotu tonu