Ke Faka‵logo Kae Loto ‵Toa e Pelā mo Keliso

“Kae ke loto ‵toa koutou! Ko oti ne fakatakavale ne au a te lalolagi!” ​—IOANE 16:​33, TUSITAPU TAULOTO.

1. E pefea te katoatoa o te fakalogo o Iesu ki te Atua?

NE FAI faeloa ne Iesu Keliso a te loto o te Atua. Ne seki mafaufau aka eiloa tou tagata ke se fakalogo a ia ki tena Tamana faka-te-lagi. (Ioane 4:​34; Epelu 7:​26) Kae ne seki ‵tau o faigofie ke fakalogo a Iesu ona ko mea ne ‵tupu ki a ia i te lalolagi. Mai i te kamataga o tena galuega talai, ne taumafai a fili o Iesu, e aofia i ei a Satani, o fakatalitonu atu, faimālō, io me fakakolekole a Iesu ke fulitua atu ki tena olaga fakamaoni. (Mataio 4:​1-​11; Luka 20:​20-​25) Ne fai ne fili konei ke logo‵mae malosi a Iesu i te feitu tau te mafaufau, lagonaga, mo te feitu faka-te-foitino. Fakamuli loa, ne manuia latou i te faiga ke mate a ia i luga i te sataulo. (Mataio 26:​37, 38; Luka 22:44; Ioane 19:​1, 17, 18) Faitalia a mea katoa konei e pelā foki mo ana logo‵maega, ne tumau eiloa a Iesu “i te auala o te fakalogo muna, ke oko eiloa ki tona mate.”​—Faitau te Filipi 2:8.

2, 3. Ne a mea e mafai o tauloto ne tatou mai i te fakalogo o Iesu faitalia a logo‵maega ne fe‵paki mo ia?

² A mea ne ‵tupu ki a Iesu e pelā me se tino i te lalolagi ne akoako atu ei ki a ia a nisi vaega ‵fou o te fakalogo. (Epelu 5:8) E mafai o foliga mai me ne seai aka foki eiloa ne mea ne toe ‵tau o tauloto ne Iesu e uiga ki te tavini atu ki a Ieova. I tafa i ei, ne maua ne ia se fesokotakiga pili mo Ieova i se vaitaimi leva ‵ki kae ne fai foki mo fai te “tagata poto i te fakatutu” a te Atua i te faitega o mea. (Faataoto 8:​30) E tiga eiloa te feitu tenā, a te tumau i te fakatuanaki e pelā me se tino faitalia a logo‵maega, ne fakatalitonu atu ei tena fakamaoni katoatoa. Ne gasolo aka a Iesu, te Tama a Atua o malosi i te feitu faka-te-agaga. Ne a mea e mafai o tauloto ne tatou mai i mea ne ‵tupu ki a ia?

³ E tiga eiloa ne fai a ia mo fai se tagata ‵lei katoatoa, ne seki taumafai a Iesu ke tumau te ‵lei katoatoa o tena fakalogo i tena malosi eiloa. Ne ‵talo atu tou tagata ki te fesoasoani o te Atua ke tumau a ia i te fakalogo. (Faitau te Epelu 5:7.) Ke tumau tatou i te faka‵logo, e ‵tau foki o loto maulalo tatou, kae ‵talo atu faeloa ki te Atua mō se fesoasoani. Ona ko te pogai tenei, ne polopoloki atu a te apositolo ko Paulo ki Kelisiano: “A te faifaiga e ‵tau o maua ne koutou, ko te faifaiga foki telā ne fai ne Keliso Iesu,” telā ne “loto maulalo a ia kae ne sasale foki i te auala o te fakalogo muna, ke oko eiloa ki tona mate, telā ko tena mate i luga i te sataulo.” (Filipi 2:​5-8) Ne fakamaoni mai ne te olaga o Iesu me e mafai o faka‵logo a tino faitalia te olaga masei tenei. A te ‵tonuga loa, ne ‵lei katoatoa a Iesu, kae e a tino sē ‵lei katoatoa e pelā mo tatou?

Te Fakalogo Faitalia ‵Tou Tulaga sē ‵Lei Katoatoa

4. Ne a mea e mafai o fai ne tatou ona ko te ‵tou faitega mo te saolotoga ke fai a filifiliga?

⁴ Ne faite ne te Atua a Atamu mo Eva e pelā me ne tino ‵poto kolā ne maua ne lāua te saolotoga ke fai a filifiliga. E pelā me ne tino ne ‵tupu mai i a lāua, e maua foki ne tatou te saolotoga ke fai a filifiliga. Se a te uiga o te mea tenā? E fakauiga i ei me e mafai o filifili tatou ke fai a mea ‵lei io me ko mea ma‵sei. I nisi tugapati, ko oti ne tuku mai ne te Atua te saolotoga ke filifili aka me e faka‵logo tatou ki a ia io me ikai. E aofia i te vaegā saolotoga lasi penā a tiute. A te ‵tonuga loa, e mafai o iku atu ‵tou fakaikuga i mea tau amioga ki te ola io me ko te mate. E mafai foki o pokotia i ei a tino i ‵tou tafa.

5. Se a te mea faigata e maua ne tatou katoa, kae e mafai pefea o iku manuia tatou i ei?

⁵ Ona ko ‵tou tulaga sē ‵lei katoatoa, a te fakalogo e sē se mea ne fa‵nau mai mo tatou. E se faigofie faeloa ke faka‵logo ki tulafono a te Atua. Ne fepaki a Paulo mo te mea faigata tenei. Ne tusi mai a ia: “Kae e matea foki ne au te suā tulafono e galue i toku foitino, ko te tulafono telā e taua mo te tulafono e tonu ki toku mafaufau. Ko fai ne ia au e pelā mo se pagota ki te tulafono o te agasala, telā e galue i toku foitino.” (Loma 7:​23) E tonu, e faigofie ke fakalogo māfai e seai ne mea faiga‵ta, logo‵maega, io me ko fakalavelave. Kae e ‵saga atu pefea tatou māfai ko fe‵paki ‵tou manakoga ke fakalogo mo “manakoga agasala, ko mea e matea ne tino kae ma‵nako ki ei”? A manakoga ma‵sei konei e māfua mai i ‵tou tulaga sē ‵lei katoatoa e pelā foki mo te fakamalosiga mai i “te agaga o te lalolagi” i ‵tou tafa, kae e ma‵losi ‵ki latou. (1 Ioane 2:​16; 1 Kolinito 2:​12) Ke ‵teke atu ki ei, e ‵tau o ‘fakatoka ‵tou loto’ a koi tuai o fe‵paki tatou mo se fakalavelave io me se tofotofoga kae ke fakaiku aka me ka faka‵logo tatou ki a Ieova, faitalia me ne a mea ka ‵tupu. (Salamo 78:​8, Tusi Paia, Samoa) E maua ne tatou a fakaakoakoga e uke i te Tusi Tapu e uiga ki tino kolā ne iku manuia ona ko te mea ne fakatoka olotou loto.​—Esela 7:​10; Tanielu 1:8.

6, 7. Fakamatala mai te auala e mafai ei o fesoasoani mai a sukesukega totino ke fai ne tatou a filifiliga ‵poto.

⁶ A te auala e tasi ke fakatoka ei ‵tou loto ko te suke‵suke malosi ki te Tusi Tapu mo tusi faka-te-Tusi Tapu. Mafaufau la me e tu atu koe i se tulaga penei. Kāti ko te afiafi ne fakatoka sāle ne koe mō au sukesukega totino. Ne fatoa ‵talo atu koe mō te agaga o Ieova ke fesoasoani atu ke fakagalue aka a mea ne tauloto ne koe mai i tena Muna. Ko oti ne fai au fakatokaga ke onoono ki se ata i te TV i te afiafi o te suā aso. Ko oti ne lagona ne koe a pati tavae a nisi tino e uiga ki ei, kae e iloa foki ne koe me e aofia i ei a nisi amioga finalalolagi mo amioga fakasaua.

⁷ E mafaufau koe ki pati fakatonutonu a Paulo i te Efeso 5:3: “Ona ko koutou ko tino o te Atua, tela la, se mea sē ‵tau ke faipatigina koutou e fina lalolagi, e amio sē tonu mo te kaimanako.” Kāti e masaua foki ne koe a te fakamalosiga a Paulo i te Filipi 4:​8. (Faitau.) I te taimi e mafaufau ‵loto ei koe ki te fakatakitakiga tenei mai te Atua, fesili ifo ki a koe eiloa, ‘Kafai e tuku faka‵sau atu ne au mo te iloa tonu a toku loto mo toku mafaufau ki vaegā polokalame penā, e mata, e tautali atu au ki te fakaakoakoga a Iesu i tena fakalogo katoatoa ki te Atua?’ Ne a au mea ka fai? E mata, ka onoono eiloa koe ki te ata tenā?

8. Kaia e ‵tau ei o fakatumau ne tatou a tulaga ma‵luga i mea tau amioga mo te feitu faka-te-agaga?

⁸ Se mea ‵se ke fakamalalo ifo ‵tou tulaga i mea tau amioga mo te feitu faka-te-agaga, kāti mai te mafau‵fau me e malosi ‵lei tatou ke ‵teke atu ki ikuga o taugasoa ma‵sei, e aofia i ei a taugasoa kolā e fakafoliga mai i fakafiafiaga fakasaua kae ma‵sei. I lō te fai penā, e ‵tau o puipui tatou mo ‵tou tama‵liki mai i fakamalosiga ma‵sei a te agaga o Satani. A tino kolā e fakaaoga ne latou a komupiuta e taumafai malosi ke puipui olotou komupiuta mai i polokalame kolā e mafai o fakama‵sei i ei a komupiuta kae fakaaoga foki ne vaegā polokalame penā a te komupiuta tenā ke fakamasei ei a nisi komupiuta. E mata, e se ‵tau o matapula‵pula malosi tatou i te puipuiga o tatou mai i “auala ma‵sei” o Satani?

9. Kaia e ‵tau ei o fakaiku aka ne tatou i aso katoa ke faka‵logo ki a Ieova?

⁹ Toeitiiti ko aso katoa e fai ei ‵tou filifiliga i nisi auala me ka fai ne tatou a mea i te auala o Ieova io me ikai. Ke maua te fakaolataga, e ‵tau o faka‵logo tatou ki te Atua kae ola e ‵tusa mo ana akoakoga fakavae amio‵tonu. Mai i te tau‵tali atu ki te fakaakoakoga a Keliso i tena fakalogo “ke oko eiloa ki tona mate,” e fakaasi atu i ei me e maua ne tatou te fakatuanaki tonu. Ka taui mai ne Ieova a ‵tou fakamaoni. Ne tauto mai a Iesu: “Ka ko te tino e loto mau ke oko ki te ikuga, e ola eiloa a ia.” (Mataio 24:13) E manino ‵lei me e manakogina i te mea tenei a te fakamalosiakaga o te loto toa tonu, e pelā mo te mea ne fakaasi mai ne Iesu.​—Salamo 31:24.

Iesu​—Te ‵Toe Fakaakoakoga Sili o te Loto Toa

10. Ne a vaegā fakalavelave e mafai o oko mai ki a tatou, kae e ‵tau o ‵saga atu pefea tatou ki ei?

¹⁰ Ona ko te mea e ‵nofo atu tatou i te kogaloto o kilokiloga mo amioga a te lalolagi tenei, e ‵tau o loto ‵toa tatou ke ‵teke atu ki mea kolā e fakamasei ei tatou. E fakafesagai atu a Kelisiano ki fakalavelave i mea tau amioga, te olaga, i mea tau tupe, mo mea fakalotu kolā e mafai o fai ei latou ke fulitua atu ki auala amio‵tonu o Ieova. E fe‵paki a tino e tokouke mo ‵tekemaiga mai i kāiga. I nisi fenua, e fakamalosi aka ne akoga ma‵luga a te akoakoga o te evolusione, kae ko te talitonuga me e seai se Atua ko gasolo aka foki eiloa o talia i te lalolagi. I te fakafesagai atu ki vaegā fakalavelave penā, e se mafai o fakaseaoga io me e fulitua atu fua tatou ki ei. E ‵tau o gasue‵sue tatou ko te mea ke ‵teke atu kae puipuigina foki tatou. E fakaasi mai ne te fakaakoakoga a Iesu te auala e mafai ei o manuia tatou.

11. E momea aka pefea te lasi o ‵tou loto ‵toa mai i te mafaufau ki te fakaakoakoga a Iesu?

¹¹ Ne fai atu a Iesu ki ana soko: “Ka fai ne te lalolagi a koutou ke puapuagatia. Kae ke loto ‵toa koutou! Ko oti ne fakatakavale ne au a te lalolagi!” (Ioane 16:​33, Tusitapu Tauloto) Ne ‵teke atu faeloa a ia ki fakamalosiga a te lalolagi. Ne seki talia ne ia te lalolagi ke taofi aka a ia mai i te faiga o tena galuega talai io me ke fakavāivāi aka ana tulaga mō te tapuakiga tonu mo amioga ‵lei; kae e ‵tau foki o fai tatou e pelā mo ia. I tena ‵talo, ne fai atu a Iesu e uiga ki ana soko: “E se ne tino o te lalolagi latou, e penei foki mo au e sē se tino o te lalolagi.” (Ioane 17:16) A te sukesuke ki te fakaakoakoga a Keliso e uiga ki te loto toa mo te mafaufau ‵loto ki ei, e mafai o maua i ei a te loto toa e manakogina ke tumau ei tatou i te ‵vae keatea mai te lalolagi.

Ke Fakaakoako ki te Loto Toa Mai i a Iesu

12-14. Tuku mai ne fakaakoakoga e uiga ki te auala ne fakaasi atu ei ne Iesu te loto toa.

¹² Ne fakaasi atu ne Iesu te lasi o tena loto toa i tena galuega kātoa. Mai i te fakaaogaga o tena malosi e pelā me ko te Tama a te Atua e aunoa mo te mataku, “ne ulu atu a Iesu ki loto i te Fale Tapu, kae ne afuli ne ia ki tua a tino katoa kolā ne fakatau mea i ei. Ne ‵tule foki ne ia a laulau a tino faka‵liu tupe, pelā foki mo nofoaga o tino fakatau lupe.” (Mataio 21:12) I te taimi ne olo atu ei a sotia o puke fakapagota a Iesu i tena toe po i te lalolagi, ne fanatu eiloa a ia ki mua mo te loto toa o puipui ana soko, ana muna: “Kafai e ‵sala mai koutou ki a au, tuku atu tino konei ke olo.” (Ioane 18:8) Mai tua malie ifo, ne fai atu a ia ki a Petelu ke ave keatea tena pelu, telā e fakaasi mai i ei me ne seki fakavae te loto talitonu o Iesu ki meatau faka-te-lalolagi, kae ki a Ieova.​—Ioane 18:11.

¹³ Ne fakaasi faka‵sau atu ne Iesu e aunoa mo te mataku a faiakoga ‵loi kae sē a‵lofa i ana aso mo olotou akoakoga ‵se. “Kalofa eiloa i a koutou faiakoga o te Tulafono mo Falesaio! A koutou ne tino ‵loi. Ko ‵pono ne koutou a te mataloa o te Malo o te lagi i mata o tino,” ne fai atu a Iesu ki a latou. “Ko tiakina ne koutou a feitu aoga o akoakoga mai i te Tulafono, e pelā mo te fai mea tonu, te alofa mo te fakamaoni. . . . E ‵fulu ne koutou a te tua o te ipu mo te tifa, ka ko te koga i loto e ‵fonu i mea ne puke mālō mo te amio masei.” (Mataio 23:​13, 23, 25) E ‵tau foki o maua ne soko o Iesu a te vaegā loto toa penā ona ko te mea ka fakasaua kae tamate a nisi tino o latou ne takitaki lotu ‵se.​—Mataio 23:34; 24:9.

¹⁴ Ne tumau eiloa a Iesu i te ‵teke atu mo te loto toa ki temoni. I te taimi e tasi, ne fetaui a ia mo se tagata e pukea ne temoni telā ne seki mafai o saisai ne se tino a ia ki se seni ona ko te mea ne malosi ‵ki eiloa tou tagata. E aunoa mo te mataku, ne ‵tuli keatea ne Iesu a temoni e uke kolā ne pule fakasaua atu ki te tagata tenā. (Maleko 5:​1-​13) I aso nei, e seki tuku atu ne te Atua ki Kelisiano a te ‵mana ke fai ne latou a vaegā vavega penā. Kae i te faiga o te galuega talai mo te akoako atu, koi ‵tau eiloa o aofia tatou i se taua faka-te-agaga mo Satani, telā e ‘fakapouli ne ia a mata o tino sē tali‵tonu.’ (2 Kolinito 4:4) Kae e pelā eiloa mo aso o Iesu, a ‵tou meatau “e se ne meatau o te lalolagi, ka ko meatau malosi a te Atua e tamate ei ona fili”​—akoakoga fakalotu lauiloa kae ‵se. (2 Kolinito 10:4) Ke fakaaoga ne tatou a meatau faka-te-agaga konei, e ‵tau eiloa o tauloto ne tatou a mea e uke mai i te fakaakoakoga a Iesu.

15. Se a te mea ne fakavae ki ei te loto toa o Iesu?

¹⁵ Ne seki fakavae te loto toa o Iesu ki tena mafi, kae ki te fakatuanaki. E ‵tau foki o fai tatou penā. (Maleko 4:​40) E mafai pefea o maua ne tatou a te fakatuanaki tonu? E takitaki foki tatou ne te fakaakoakoga a Iesu. Ne fakaasi mai ne ia te katoatoa o tena iloa i te Tusi Tapu mo tena talitonu katoatoa ki ei. E pelā me se meatau, ne seki fakaaoga ne Iesu se meatau tonu, kae ko te meatau o te agaga, telā ko te Muna a te Atua. Ne fakamaoni atu faeloa ne ia ana akoakoga mai te fakasino atu ki te Tusi Tapu. E masani o fakatomua sāle ana pati, penei: “Muna a te Tusi,” telā, ko te Muna a te Atua.a

16. E mafai pefea o maua ne tatou se fakatuanaki lasi?

¹⁶ Ke ati aka te fakatuanaki telā e mafai o ‵teke atu ki tofotofoga kolā e maua fakatasi mo te faiga o se tino mo fai se soko, e ‵tau mo tatou o fai‵tau kae suke‵suke ki te Tusi Tapu i aso katoa kae ‵kau atu ki fakatasiga Kelisiano, mai i te faka‵fonuga o ‵tou mafaufau ki muna‵tonu kolā e fai mo fakavae o te fakatuanaki. (Loma 10:17) E ‵tau foki o mafau‵fau ‵loto tatou ki mea e tauloto ne tatou, ko te mea ke oko ‵tonu ifo ki ‵tou loto. Ko te fakatuanaki fua telā e ola e mafai o fakamalosi aka ei tatou ke gasue‵sue mo te loto ‵toa. (Iakopo 2:​17) Kae e ‵tau o ‵talo atu tatou mō te agaga tapu ona ko te fakatuanaki se vaega o fuataga o te agaga.​—Kalatia 5:​22.

17, 18. Ne fakaasi atu pefea ne se tuagane talavou a te loto toa i te akoga?

¹⁷ Ne iloa aka ne se tuagane talavou ko Kiti a te auala e fakamalosi aka ei ne te fakatuanaki tonu a te loto toa. I te taimi koi foliki ‵ki ei a ia, ne iloa ne ia me ne seki ‵tau o “ma [a ia] i te tala ‵lei” i te akoga, kae ne manako malosi tou fafine ke tuku atu se molimau ‵lei ki tena vasega. (Loma 1:​16) I tausaga takitasi, ne fakaiku aka ne ia ke taumafai a ia o fakaoko atu te tala ‵lei ki nisi tama‵liki, kae ne seki mafai ne ia o fai ona ko te sē lava o tena loto toa. I te taimi ko tu atu ei a ia i te tulaga talavou, ne ‵fuli tena akoga. Ne fai mai tou fafine, “Tenei eiloa te taimi ka fakaaoga ei ne au so se avanoaga telā ne seki fakaaoga faka‵lei ne au muamua.” Ne ‵talo atu a Kiti ke maua se loto toa e pelā mo Keliso, te poto, mo te avanoaga ‵lei.

¹⁸ I te aso muamua o te akoga, ne fakamolemole atu ki tama‵liki ke fakamatala mai ne latou a mea e uiga ki a latou. Ne taku mai ne nisi tama‵liki a talitonuga ne ‵tupu aka ei latou, kae fai mai foki me ne seki ‵kau atu faeloa latou ki olotou lotu. Ne iloa ne Kiti me tenei eiloa te avanoaga ne ‵talo atu a ia ki ei. I te taimi ne oko atu ei ki a ia, ne fai atu tou fafine mo te loto talitonu, “Au se tokotasi o Molimau a Ieova, kae e fakaaoga ne au te Tusi Tapu e pelā me se takitakiga ki a au i te feitu faka-te-agaga mo te feitu i mea tau amioga.” I te taimi ne fai atu ei ana fakamatalaga, ne fakama‵sei atu a mata o nisi tamaliki. Kae ne ‵saga tonu atu a nisi tama‵liki kae fakamuli ifo ne ‵sili atu olotou fesili. Ne fakaaoga foki eiloa ne te faiakoga a Kiti e pelā me se fakaakoakoga ‵lei o te ‵lago malosi atu ki ana talitonuga. Ne fiafia malosi a Kiti ke tautali atu ki te fakaakoakoga a Iesu e uiga ki te loto toa.

Ke Fakaasi Atu te Fakatuanaki mo te Loto Toa e Pelā mo Keliso

19. (a) Ne a mea e aofia i te mauaga o te fakatuanaki tonu? (e) E mafai pefea o fakafiafia atu tatou ki a Ieova?

¹⁹ Ne iloa foki ne te kau apositolo me ne ‵tau o fakavae olotou faifaiga loto ‵toa ki te fakatuanaki. Ne fakamolemole atu latou ki a Iesu: “Fakalasi ake te motou fakatuanaki.” (Faitau te Luka 17:​5, 6.) A te mauaga o te fakatuanaki tonu e fakauiga ki mea e uke atu i lō te talitonu fua me e ola te Atua. E aofia i ei te atiakaga o se fesokotakiga ‵pili mo Ieova, e pelā mo te fesokotakiga o se tamā tamaliki mo se tamana atafai kae alofa. Mai i lalo i te takitakiga a te agaga tapu, ne tusi mai a Solomona: “Taku tama, kafai e maua ne koe te poto kae ka fiafia malosi eiloa au. Ka fakamatamata au manafai e lagona ne au a koe e faipati ki muna o te poto.” (Faataoto 23:​15, 16) I se auala tai ‵pau, a te ‵tou ‵lago atu mo te loto ‵toa ki akoakoga fakavae amio‵tonu e fakafiafia atu ki a Ieova, kae e fakamalosi aka foki ei ‵tou loto ‵toa. Tela la, ke na tau‵tali atu faeloa tatou ki te fakaakoakoga a Iesu, mai i te ‵lago atu mo te loto ‵toa ki te amiotonu!

[Fakamatalaga mai lalo]

E Mafai o Fakamatala Mai ne Koe?

• Ne a mea ka fai ei ke tumau tatou i te faka‵logo faitalia ‵tou tulaga sē ‵lei katoatoa?

• Se a te mea e fakavae ki ei te fakatuanaki tonu, kae e mafai pefea o fesoasoani mai te mea tenei ke loto ‵toa tatou?

• Ne a mea ka iku mai i te ‵tou faka‵logo mo te fakaasi atu o te loto toa e pelā mo Keliso?

[Ata i te itulau e 16]

E mata, e ‘fakatoka tou loto’ ke ‵teke atu ki fakaosoosoga?

[Ata i te itulau e 18]

E pelā mo Iesu, e mafai o fakaasi atu ne tatou te loto toa telā e fakavae ki te fakatuanaki