E Mata, e Fakatāua ne Koe a Mea ko Oti ne Fai ne Ieova ke Fakasao ei Koe?

“Ke tavae ne tatou te Aliki te Atua o Isalaelu! Me ne vau o fesoasoani kae fakasaoloto ona tino.”​—LUKA 1:​68.

1, 2. E mafai pefea o fakamatala atu a te fakamataku o ‵tou tulaga i aso nei, kae ne a fesili ka sau‵tala ki ei?

MAFAUFAU la me ko moe atu koe i se moega i te fa‵kaimasaki. Ko nofo atu koe i se potu telā e logo‵mae ei a tino katoa i se masaki eiloa e tasi, se masaki tamate tino telā e seai eiloa se faka‵leiga ki ei. Kafai ko iloa ne koe me ko taumafai malosi se tokita ke ‵sala atu ki se faka‵leiga, e mafai eiloa o isi sou fakamoemoega. Ko fakatalitali eiloa koe mo te loto naunau ki tala e uiga ki mea e fai ne te tokita. I te aso e tasi, ko iloa ne koe me ko oti ne maua se faka‵leiga ki ei! Ne fai ne te tokita telā ne maua ne ia te faka‵leiga ki a taumafaiga ‵lasi ke mafai ei o maua se faka‵leiga. Ka saga atu pefea koe ki ei? E mautinoa eiloa me ka momea aka te lasi o tou āva mo te loto fakafetai ki te tagata telā ne ‵tala mai ne ia se auala ke ‵sao atu ei koutou mo nisi tino mai te mate.

² E mafai o foliga mai me e fakalasilasi fua te tala tenā, kae e fetaui ‵lei eiloa te mea tenā mo se mea tonu telā e fakafesagai atu tatou katoa ki ei. E sili atu te masei o te tulaga ko ‵nofo atu tatou taki tokotasi i ei i lō te mea telā ne fakamatala atu. Ko ma‵nako malosi eiloa tatou ki se tino ke faka‵sao ne ia tatou. (Faitau te Loma 7:​24.) Ke faka‵sao tatou, ko oti ne fai ne Ieova a mea faiga‵ta e uke. Ne fai foki ne Tena Tama a mea tāua kae faiga‵ta. Ke na mafaufau nei tatou ki fesili fakavae e fa. Kaia e ma‵nako ei tatou ki te fakasaolotoga? Ne a mea faiga‵ta ne talia ne Iesu ko te mea ke faka‵sao ei tatou? Ne a mea faiga‵ta ne oko atu ki a Ieova? Kae e mafai pefea o fakaasi atu me e fakatāua ne tatou a te faka‵saoga a te Atua?

Te Pogai e Ma‵nako ei Tatou ki te Faka‵saoga

3. E fakatusa pefea a te agasala ki se masaki ‵pisi?

³ E ‵tusa mo fakatautauga fakamuli nei, e tasi o masaki ‵pisi matagā i tala mua o tino ko te fulū faka-Sepania i te 1918, telā ne ‵mate ei a te fia sefulu miliona o tino. E sili atu i te fakama‵taku o nisi masaki ‵pisi. E tiga eiloa e mafai o pokotia a nai tino, kae e lasi atu te pasene o tino ne ‵mate i ei.a Kae e a māfai ko fakatusa ne tatou a te agasala ki se vaegā masaki ‵pisi penā? Masaua la a pati i te Loma 5:​12: “Ne oko mai te agasala ki te lalolagi i te tagata e tokotasi, ne aumai foki ne tena agasala te mate. Tela la, ko oko ki tino katoa te mate, i te mea ko agasala a tino katoa.” A te malosi o te agasala e 100 pasene ona ko te mea e agasala katoa a tino sē ‵lei katoatoa. (Faitau te Loma 3:​23.) Kae e tokofia a tino e ‵mate ona ko te agasala? Ne tusi mai a Paulo me ne aumai ne te agasala a te mate ki “tino katoa.”

4. Se a te kilokiloga a Ieova ki te leva o ‵tou olaga, kae e ‵kese pefea tena kilokiloga mai i tino e tokouke i aso nei?

⁴ E mafau‵fau a tino e tokouke i aso nei me i te agasala mo te mate ne mea masani. E manava‵se latou ki te ‵mate fo‵liki, kae e ‵kilo atu fua latou ki te mate telā e māfua mai i te olaga matua e pelā me se “mea masani.” E sili atu te faigofie ke puli i tino te kilokiloga a te Mafuaga. E toetoe fua ‵tou olaga i lō te mea ne mafaufau a ia ki ei. A te ‵tonuga loa, e seai eiloa se tino kai tumau i te ola i se “aso e tasi” mai i te kilokiloga a Ieova. (2 Petelu 3:8) E fai mai te Muna a te Atua me e toetoe fua ‵tou ola e pelā eiloa mo mouku io me se laumatagi. (Salamo 39:5; 1 Petelu 1:​24) E ‵tau o masaua faeloa ne tatou te kilokiloga tenā. Kaia? Kafai e iloa ne tatou a te fakamataku o te “masaki” telā e pokotia ei tatou, e mafai ei o iloa ne tatou a te tāua o te “faka‵leiga”​—‵tou fakasaolotoga.

5. Se a te mea ne seki maua aka eiloa ne tatou taki tokotasi ona ko te agasala?

⁵ Ko te mea ke malamalama i te fakamataku o te agasala mo ikuga mai i ei, e ‵tau o taumafai tatou ke malamalama i mea ne fai ne te agasala ki a tatou. E mafai o faigata te mea tenā i te kamataga me ne fai ne te agasala ke se maua ne tatou se mea telā ne maua ne ‵tou mātua muamua. Ne maua muamua ne Atamu mo Eva a te ola ‵lei katoatoa. Ne ‵lei katoatoa lā mafaufau mo foitino, telā ne mafai ei o filifili ne lāua ke pule faka‵lei atu ki lā mafaufauga, lagonaga, mo faifaiga. Ne mafai o saoloto lāua ke ‵tupu aka e pelā me ne tavini a Ieova te Atua, ke fakataunu ei a mea katoa e mafai o fai ne lāua. I lō te fai penā, ne ‵pei atu ne laua keatea a te meaalofa gali tenā. Mai i te filifili ke agasala ki a Ieova, ne galo atu i a lāua mo lā tama‵liki a te vaegā olaga telā ne fuafua ne Ieova mō latou. (Kenese 3:​16-​19) I te faiga penā, ne faka‵pisi mai ei ne lāua ki a lāua eiloa mo tatou katoa a te “masaki” ne sau‵tala tatou ki ei. Se mea ‵tau eiloa ke taku fakamasei ne Ieova a lāua. Kae ko tatou, ne tuku mai ne ia se fakamoemoega o te faka‵saoga.​—Salamo 103:10.

Mea Faiga‵ta ne Oko Atu ki a Iesu Ona ko ‵Tou Faka‵saoga

6, 7. (a) Ne fakaasi mai muamua pefea ne Ieova me ne uke ‵ki a mea faiga‵ta e aofia i ‵tou faka‵saoga? (e) Ne a mea e tauloto ne tatou mai i taulaga ne ofo atu ne Apelu mo tagata mua kolā ne ola mai mua o te Tulafono?

⁶ Ne iloa ne Ieova me ka uke ‵ki eiloa a mea faiga‵ta e ‵tau o ‵tupu ke faka‵sao ei a tama‵liki a Atamu mo Eva. I te valoaga telā ne fakamau i te Kenese 3:​15, ne tauloto ne tatou a mea e uiga ki te faigata o te fakasaolotoga. Ne ‵tau o tuku mai ne Ieova se “fanau,” se tino fakasao telā ka fakaseai katoatoa atu ne ia a Satani i te aso e tasi. Kae ne ‵tau o logo‵mae te tino fakasao tenā, kae pakia tena mulivae i se auala fakatusa. E foliga mai me e fakalogo‵mae kae faigata a te mea tenā, kae se a te mea e fakauiga ki ei? Kae ne a mea e ‵tau o kufaki i ei a te Tino Filifilia a Ieova?

⁷ Ko te mea ke faka‵sao a tino mai i te agasala, e ‵tau o tuku mai ne te tino fakasao tenei se auala ke fakamagalo ei tatou, se auala ke faka‵lei aka ei a tino mo te Atua e auala i te ‵toe faka‵leiga o ikuga o te agasala. Ne a mea e aofia i te mea tenā? Ne isi eiloa ne fakaasiga mua me e manakogina se taulaga. I te taimi ne ofo atu ei ne te tagata fakamaoni muamua, ko Apelu, a taulaga manu ki a Ieova, ne talia eiloa ne te Atua mo te fiafia. Fakamuli ifo, ne ofo atu foki ne tagata mua kolā e ma‵taku ki te Atua, e pelā mo Noa, Apelaamo, Iakopo, mo Iopu a taulaga tai ‵pau, kolā ne fakafiafia atu ki te Atua. (Kenese 4:4; 8:​20, 21; 22:13; 31:54; Iopu 1:5) I te fia o senitenali mai tua ifo, ne toe faka‵mafa mai i ei a te faiga o taulaga i te Tulafono a Mose.

8. Ne a mea e fai ne te faitaulaga sili i te Aso o te Faka‵maga?

⁸ E aofia i toe taulaga tāua ne manakogina i te Tulafono, ko taulaga kolā ne ofo atu i te Aso o te Faka‵maga. I te aso tenā, ne ‵tau o fai ne te faitaulaga sili a te fakasologa o faifaiga kolā e fakaata mai i ei a nisi mea. Ne ofo atu ne ia a taulaga ki a Ieova ke fakamagalo ei a agasala​—muamua la, ki tino o te potukau o faitaulaga, mo matakāiga kolā e se aofia i te potukau o faitaulaga. Ne ulu atu te faitaulaga sili ki loto i te Potu Tafasili i te Tapu o te faleie tapu io me ko te faletapu, telā ko ia fua tokotasi ne mafai o ulu atu ki ei i te aso fua e tasi tenei o te tausaga. E apiapi atu ne ia i konā a toto o te taulaga i mua o te pusa o te feagaiga. Mai luga o te pusa tapu tenā, e sae mai i ei i nisi taimi se kaumana maina kae malapulapu, telā e fakaata mai i ei te fakatasi mai o Ieova te Atua.​—Esoto 25:22; Levitiko 16:​1-​30.

9. (a) I te Aso o te Faka‵maga, ko oi e fakaata mai i te faitaulaga sili, kae se a te mea e fakauiga ki ei a taulaga kolā ne ofo atu ne ia? (e) Se a te mea e fakaata mai i te uluatuga o te faitaulaga sili ki te Potu Tafasili i te Tapu?

⁹ Ne fakaosofia a te apositolo ko Paulo ke fakaasi atu ne ia te uiga o faifaiga fakatusa konā. Ne fakaasi mai ne ia me e fakaata mai ne te faitaulaga sili a te Mesia, telā ko Iesu Keliso, kae ko te ofoatuga o taulaga e fakauiga ki te mate o Keliso e pelā me se taulaga. (Epelu 9:​11-​14) A te taulaga ‵lei katoatoa tenā e tuku mai i ei te faka‵maga tonu o potukau e lua o tino​—ko te potukau fakafaitaulaga o taina fakaekegina ki te agaga o Keliso e toko 144,000 mo ‘nisi mamoe.’ (Ioane 10:16) I te taimi ne ulu atu ei a te faitaulaga sili ki te Potu Tafasili i te Tapu, ne fakaata mai ne ia te uluatuga o Iesu ki te lagi ke tuku atu i mua o Ieova te Atua a te tāua o te taulaga togiola.​—Epelu 9:​24, 25.

10. Ne a mea e fakaasi mai i valoaga i te Tusi Tapu me ka ‵tupu ki te Mesia?

¹⁰ E manino ‵lei i ei, me e uke foki a mea faiga‵ta e aofia i te faka‵saoga o tama‵liki a Atamu mo Eva. Ne ‵tau o tuku atu ne te Mesia tena ola! Ne tuku mai ne pelofeta i te Tusi Tapu faka-Epelu a nisi fakamatalaga likiliki e uiga ki te munatonu tenei. E pelā me se fakaakoakoga, ne taku ‵tonu mai ne te pelofeta ko Tanielu me i te Mesia te “Takitaki Filifilia” ka “tamate,” ko te mea ‘ke fakamagalo ei agasala.’ (Tanielu 9:​24-​26) Ne ‵valo mai a Isaia me ka ‵teke atu, fakasauagina, tamate, io me velo a te Mesia ko te mea ke tauave ne ia a agasala a tino sē ‵lei katoatoa.​—Isaia 53:​4, 5, 7.

11. Ne a auala ne fakaasi atu ei ne te Tama a Ieova a te loto fiafia ke tuku atu a ia eiloa mō te ‵tou faka‵saoga?

¹¹ A koi tuai o vau a ia ki te lalolagi, ne iloa ne te Tama eiloa e tokotasi a te Atua a mea ne manakogina ke fai ne ia ke faka‵sao ei tatou. Ne ‵tau o logo‵mae malosi a ia kae oti aka loa, ko tamate ei. I te taimi ne akoako atu ei ne tena Tamana a muna‵tonu konā, e mata, ne loto vāivāi a ia io me ne ‵teke atu? E ‵kese mai i ei, ne fakalogo a ia mo te loto fiafia ki fakatonuga a tena Tamana. (Isaia 50:​4-6) E penā foki loa, i te taimi koi nofo ei i te lalolagi, ne fakalogo eiloa a Iesu o fai te loto o tena Tamana. Kaia? Ne tuku mai ne ia se tali e tasi i pati konei: “Au e alofa ki te Tamana.” Ne tuku mai ne ia te suā tali i pati konei: “A te alofa tafasili e ‵tau o fakaasi ne te tino, ko te tuku atu o tona ola e sui ei a ola o ona taugasoa.” (Ioane 14:31; 15:13) Tela la, a te pogai sili e faka‵saogina ei tatou, ona ko te alofa o te Tama a Ieova. E tiga eiloa ne ‵tau o tuku atu ne ia tena ola ‵lei katoatoa faka-te-foitino, ne fiafia eiloa a ia o fai te mea tenā mō te ‵tou faka‵saoga.

Mea Faiga‵ta ne Fe‵paki mo Ieova i te ‵Tou Faka‵saoga

12. Ko oi ne fakatoka ne ia te togiola, kae kaia ne fakatoka ei ne ia?

¹² A Iesu e se ko te Pogai io me ko te Tino ne fakatoka ne ia te taulaga togiola. I lō te fai penā, a te pogai tenei o te faka‵saoga se vaega tāua o te loto o Ieova. Ne fakaasi mai ne te apositolo ko Paulo me i te fatafaitaulaga i te faletapu, telā ne ofo atu ei a taulaga, ne fakaata mai i ei te loto o Ieova. (Epelu 10:10) Tela la, a te faka‵saoga telā e maua ne tatou e auala i te taulaga a Keliso se mea telā e ‵nofo kaitalafu muamua ei tatou ki a Ieova. (Luka 1:​68) Se fakaasiga o tena loto ‵lei katoatoa mo tena alofa sili ki tino.​—Faitau te Ioane 3:​16.

13, 14. E mafai pefea o fesoasoani mai te tala o Apelaamo ke malamalama tatou i mea ko oti ne fai ne Ieova mō tatou?

¹³ Ne a mea faiga‵ta ne fe‵paki mo Ieova i te fakaasi mai ne ia o tena alofa ki a tatou i te auala tenei? Ko oko eiloa i te faigata ke malamalama faka‵lei tatou i ei. Kae e isi se tala i te Tusi Tapu telā e mafai o fesoasoani mai ke maina faka‵lei tatou i ei. Ne fai atu a Ieova ki te tagata fakamaoni ko Apelaamo ke fai ne ia se mea faigata ‵ki​—ke ofo atu tena tama ko Isaako e pelā me se taulaga. Kae ko Apelaamo se tamana alofa. Ne faipati atu a Ieova ki a ia e uiga ki a Isaako e pelā me ko “tau tama eiloa e tokotasi . . . telā e pele i tou loto.” (Kenese 22:2) Kae ne iloa ne Apelaamo me koi sili atu eiloa i te tāua a te faiga o te loto o Ieova i lō tena alofa ki a Isaako. Ne fakalogo eiloa a Apelaamo. Kae ne seki talia ne Ieova ke fai ne Apelaamo se mea telā ka fai ne Ia i se aso e tasi. Ne uga atu ne te Atua se agelu ke taofi a Apelaamo mai mua faeloa o ofo atu ne ia tena tama e pelā me se taulaga. Ne fakaiku faka‵lei aka eiloa ne Apelaamo ke fakalogo a ia ki tena Atua i te tofotofoga faigata tenei me ne talitonu a ia me e isi se fakamoemoega ke toe lavea atu ne ia tena tama tagata e auala i te toe‵tuga. Kae ne fakatuanaki katoatoa a ia me e mafai o fai ne te Atua se vaegā toetuga penā. E tonu, ne fai mai a Paulo me ne toe maua ne Apelaamo a Isaako me ne toetu ake mai te mate ‘i se auala fakatusa.’​—Epelu 11:19.

¹⁴ E mata, e mafai o fakaataata ne koe te logo‵mae o Apelaamo i te taimi ne fakatoka ei ke ofo atu ne ia tena tama? I se auala tai ‵pau, e fesoasoani mai te tala o Apelaamo ke fakamatala mai i ei a Ieova i te tukumaiga o te tino telā e taku ne ia ko “taku Tama fagasele.” (Mataio 3:​17) Masaua la, me ne silia atu te logo‵mae o Ieova. Ko oti ne ‵nofo fakatasi a Ia mo tena Tama i te fia miliona, kāti i te fia piliona, o tausaga. Ne galue mo te fiafia a te Tama i tafa o tena Tamana e pelā me ko tena “tagata poto i te fakatutu” mo tena Tukumuna, telā ko “te Muna.” (Faataoto 8:​22, 30, 31; Ioane 1:1) A mea kolā ne kufaki i ei a Ieova i te kilo atu ki te fakapuapuaga, fakatauemu, mo te tamatega fakamuli o tena Tama e pelā me se tino ofa tulafono e sili fakafia atu i mea e mafai o iloa ne tatou. Ne logo‵mae a Ieova i mea e uke ona ko te ‵tou faka‵saoga! E mafai la pefea o fakaasi atu me e fakatāua ne tatou te faka‵saoga tenā?

E Fakaasi Atu Pefea me e Fakatāua ne Koe te Faka‵saoga?

15. Ne fakaoti pefea ne Iesu te faifaiga sili o te faka‵maga, kae ne a mea ne mafai o maua mai i ei?

¹⁵ Ne fakaoti ne Iesu te ‵toe faifaiga sili o te faka‵maga mai tua o tena toetuga ki te lagi. I te taimi ne toe ‵kau fakatasi ei a ia mo tena Tamana pele, ne tuku atu ei ne ia te tāua o tena taulaga. Ne iku atu i ei ki fakamanuiaga ‵lasi. Muamua la, ne mafai o fakamagalo katoatoa atu ei a agasala a taina fakaekegina o Keliso, kae oti aka loa, ko agasala “a tino katoa.” Ona ko te taulaga tenā, ko mafai ei o maua ne tino katoa i aso nei, kolā e sala‵mo mo te loto fakamaoni ki olotou agasala kae fai mo fai ne soko ‵tonu o Keliso, se tulaga ‵ma i mua o Ieova te Atua. (1 Ioane 2:2) E aoga pefea te mea tenei ki a koe?

16. E mafai pefea o fakaasi atu ne tatou te loto fakafetai ki te faka‵saoga telā ne fakatoka ne Ieova mō tatou?

¹⁶ Ke toe mafau‵fau tatou ki te tala fakatusa i te kamataga o te mataupu tenei. Mafaufau la me ko fanatu a te tokita telā ne maua ne ia te faka‵leiga ki te masaki ki tino ma‵saki i tou potu, kae fai atu: So se tino masaki telā e talia ne ia te vailakau kae tautali atu ki mea e ‵tau o fai ka ‵lei eiloa tena masaki. Kae e a māfai e ita fitifiti a te tokoukega o tatou kolā e ma‵saki ke tau‵tali atu ki te fautuaga a te tokita, mai i te kinau atu me ko tō faigata ke fakaaoga te vailakau io me ke tautali atu ki mea kolā e ‵tau o fai? E mata, ka fai foki koe pelā mo latou, e tiga eiloa ko iloa ne koe a fakamaoniga ‵tonu me e aoga eiloa te vailakau tenā? E se fai eiloa koe penā! E seai se fakalotolotolua me ka fakafetai atu eiloa koe mō te faka‵leiga ki te masaki kae tautali faka‵lei atu koe ki fakatonuga a te tokita, kae kāti ka fai atu foki ne koe ki nisi tino e uiga ki tau filifiliga. I se auala tai lasi atu, e ‵tau o naunau ‵tou loto ke fakaasi atu ki a Ieova a te lasi o ‵tou loto fakafetai ki te fakasaolotoga ne fakatoka ne ia e auala i te taulaga togiola a tena Tama.​—Faitau te Loma 6:​17, 18.

17. Ne a auala e mafai o fakaasi atu i ei tou loto fakafetai ki mea ko oti ne fai ne Ieova mō koe?

¹⁷ Kafai e fakatāua ne tatou a mea ko oti ne fai ne Ieova mo tena Tama ke faka‵sao ei tatou mai i te agasala mo te mate, ka fakaasi atu eiloa ne tatou. (1 Ioane 5:3) Ka ‵teke atu eiloa tatou ki ‵tou manakoga ke fai te agasala. Ka se talia foki ne tatou ke fai te agasala mo te iloa tonu kae ola i se olaga magalua kae fakaloiloi kolā e ga‵lue fakatasi. E fakaasi atu i se vaegā olaga penā me e se fakatāua eiloa ne tatou te togiola. I lō te fai penā, ka fakaasi atu ‵tou loto fakafetai mai i te taumafai malosi ke tumau i te ‵ma i te kilokiloga a te Atua. (2 Petelu 3:​14) Ka fakaasi atu ne tatou te mea tenā, mai i te fai atu ki nisi tino e uiga ki ‵tou fakamoemoega gali ki te faka‵saoga, ko te mea ke mafai foki o maua ne latou se tulaga ‵ma i mua o Ieova mo te fakamoemoega ke ola ki te se-gata-mai. (1 Timoteo 4:​16) E mautinoa eiloa me e ‵tau eiloa o maua ne Ieova mo tena Tama a taimi katoa mo te malosi e mafai o fakaaoga ne tatou ke tavae atu ei ki a lāua! (Maleko 12:​28-​30) Mafaufau la ki ei! E mafai o ‵kilo atu tatou ki te taimi telā ka mafai ei o faka‵lei katoatoa tatou mai i te agasala. E mafai o ola tatou i te olaga telā ne manako a te Atua ki ei, i se tulaga ‵lei katoatoa, ki te se-gata-mai​—ona ko mea katoa ko oti ne fai ne Ieova ke faka‵sao ei tatou!​—Loma 8:​21.

[Fakamatalaga mai lalo]

Ka Tali Mai Pefea ne Koe?

• Kaia e ‵tau ei o fakasao fakavave koe?

• E pokotia pefea koe i te alofa sē fakapito o Iesu?

• E pefea ou lagonaga e uiga ki te meaalofa a Ieova ko te togiola?

• Ne a mea e fakamalosi atu ke fai ne koe ona ko fakatokaga a Ieova mō tou faka‵saoga?

[Ata i te itulau e 30]

I te Aso o te Faka‵maga, ne fai eiloa a te faitaulaga sili o Isalaelu mo fai se ata ola o te Mesia

[Ata i te itulau e 31]

A te loto fiafia o Apelaamo ke ofo atu tena tama e akoako mai ki a tatou e uiga ki mea faiga‵ta e uke ne fai ne Ieova