Tala ‵Kai 1: E Isi se Vaega o te Tino Telā e Fakaola ne ia te Tino Māfai ko Mate
Ne māfua mai fea te tala ‵kai tenei? E fai mai a The New Encyclopedia Britannica (1988), Volume 11, itulau e 25, me ne tau‵tali atu a Kelisiano ‵poto i te senitenali muamua ki te talitonuga a te kau Eleni e uiga ki te vaega o te foitino telā e tumau i te ola kae ne tuku atu foki ki te foitino i te kamataga.
Se a te mea e akoako mai i te Tusi Tapu? “E toe foki atu a ia ki tena lalolagi; i te aso tenā ka fakagata ei ana fuafuaga katoa.”—Salamo 146:4, King James Version.
E mata, e isi se “agaga” o te tino telā e tumau i te ola i loto i te foitino? E akoako mai a te Tusi Tapu me e tuku atu ne te Atua ki tino mo manu a te manava ola, io me ko te agaga, telā e fakaolaola ne te manava. A te manava ola ko te mea telā e fakagalue ne ia te foitino. Kae kafai ko se manava te foitino i loto i tino mo manu kae ko se mafai o maua te manava ola telā ne tuku mai ne te Atua, e ‵mate eiloa latou. Ko seai eiloa se mea e mafai ne latou o fai.—Kenese 3:19; Failauga 3:19-21; 9:5.
Mai i te kamataga, ne ‵sae aka eiloa a fesili e uiga ki te vaega o te foitino telā e tumau i te ola māfai ko mate te foitino: Tefea te koga ka fanatu ki ei a te vaega tenā o te foitino māfai ko mate? Ne a mea e ‵tupu ki tino ma‵sei māfai ko ‵mate latou? I te taimi ne tau‵tali atu ei a Kelisiano ki te akoakoga ‵se e uiga ki te vaega o te foitino telā e tumau i te ola māfai ko mate te foitino, ne iku atu te mea tenei ki te talia ne latou a te suā akoakoga ‵se—te akoakoga e uiga ki te afi i seoli.
Ke fakatusa ki fuaiupu konei i te Tusi Tapu: Failauga 3:19; Mataio 10:28; Galuega 3:23
TE MANATU TONU:
Ka fakagata eiloa a fuafuaga a te tino māfai ko mate