Ke Fakatāua Tou Tulaga i te Fakapotopotoga
“Ne fakasoa ne te Atua a mea takitasi o te foitino, e pelā eiloa mo tena loto.” —1 KOLINITO 12:18.
1, 2. (a) Se a te mea e fakaasi mai i ei me e maua ne tino taki tokotasi katoa se tulaga telā e mafai o fakatāua ne ia? (e) Ne a fesili ka mafau‵fau ki ei i te mataupu tenei?
TALU mai aso o te kau Isalaelu, ne fai faeloa a te fakapotopotoga mo fai te fakatokaga a Ieova ke fagai ei ana tino i te feitu faka-te-agaga kae tuku atu foki ei a fakatakitakiga ki a latou. Mai tua o te fakatakavalega ne te kau Isalaelu a te fa‵kai o Ai, “ne faitau ei ne Iosua te Tulafono kātoa, e aofia ei a fakamanuiaga mo fakamalaiaga, e pelā eiloa mo te mea e tusi i te tusi o te Tulafono . . . ki te fenua kātoa.”—Iosua 8:34, 35.
2 I te senitenali muamua T.A., ne fai atu te apositolo ko Paulo ki te toeaina Kelisiano ko Timoteo me i te fakapotopotoga Kelisiano ko te “pou mo te lagolago o te munatonu.” (1 Timoteo 3:15) A te “kaukāiga” i aso nei ko te kautaina o Kelisiano ‵tonu i te lalolagi kātoa. I te mataupu e 12, e fakatusa ne Paulo te fakapotopotoga ki te foitino o se tino. Ne fai mai a ia me e tiga eiloa e kese‵kese a mea e fai ne vaega takitasi, e aoga katoa eiloa latou. Ne tusi mai a Paulo: “Ne fakasoa ne te Atua a mea takitasi o te foitino, e pelā eiloa mo tena loto.” Ne fakasino atu foki a ia ki te manatu i “vaega o te foitino kolā e ma‵natu tatou me se ‵malu, e faka‵malu malosi ne tatou.” (1 Kolinito 12:18, 23) Tela la, a te tulaga o se tino amio ‵lei i te kaukāiga o te Atua e se sili atu io me e se masei atu i lō te suā Kelisiano fakamaoni. E kese‵kese fua latou. E mafai la pefea o fakataunu ‵tou tulaga i te fakatokaga a te Atua kae fakatāua, io me e fakapelepele ne tatou? Ne a nisi mea e mafai o pokotia ei ‵tou tulaga i te fakapotopotoga? Kae e mafai pefea ne tatou o fai “ke matea ne tino katoa ‵tou gasolosolo ki mua”?—1 Timoteo 4:15.
Ke Fakatāua ‵Tou Tulaga —E Pefea la?
3. Se a te auala e tasi e mafai ei o fakataunu ‵tou tulaga i te fakapotopotoga kae e fakaasi atu foki me e fakatāua ne tatou?
3 A te auala e fakataunu ei ‵tou tulaga i te fakapotopotoga kae fakamaoni atu me e fakatāua ne tatou ko te ‵lago katoatoa atu ki te “tavini fakamaoni kae poto” mo tena sui ko te Potukau Pule. (Faitau te Mataio 24:45-47.) E ‵tau o iloilo aka ne tatou te lasi o ‵tou faka‵logo ki fakatonuga kolā e maua ne tatou mai i te potukau ko te tavini. I te fia o tausaga ko ‵teka atu, ne maua ne tatou a fakatonuga e uiga ki ‵tou gatu mo teuga, fakafiafiaga, mo te fakaaogaga ‵se o te Itaneti. E mata, e faka‵logo faka‵lei eiloa tatou ki te manatu fakatonutonu aoga tenei ko te mea ke puipuigina ei tatou i te feitu faka-te-agaga? Kae e a fakamalosiga ke fai se fakasologa tumau o tapuakiga a te kāiga i te vaiaso? E mata, ko oti ne talia katoatoa ne tatou te fakamalosiga kae fakaaoga se afiafi-po e tasi mō te mea tenā? Kafai koi ‵nofo taka tatou, e mata, e fakaaoga ne tatou a taimi mō sukesukega totino ki te Tusi Tapu? Ka fakamanuia ne Ieova a tatou taki tokotasi kae e pelā foki me se kāiga māfai e tau‵tali atu tatou ki te takitakiga a te potukau ko te tavini.
4. Se a te mea e ‵tau o mafau‵fau tatou ki ei māfai ko fai a fakaikuga totino?
4 Kāti e fai mai a nisi tino me i vaegā mea pelā mo fakafiafiaga mo gatu mo teuga ne mea kolā e ‵tau eiloa o filifili aka ne se tino. Kae mō te Kelisiano tukugina atu telā e fakatāua ne ia tena tulaga i te fakapotopotoga, e se ‵tau eiloa o fai a mea kolā e ‵lei fua ki a ia e pelā me se fakavae i te taimi e fai ei a fakaikuga. E ‵tau eiloa o mafaufau malosi ki te kilokiloga a Ieova telā e fakaasi mai i tena Muna, ko te Tusi Tapu. E ‵tau o fai te fekau i ei e pelā me ‘se moli e takitaki i ei tatou, se mainaga foki ki ‵tou auala.’ (Salamo 119:105) Se mea poto foki ke mafaufau tatou ki te auala e pokotia ei ‵tou filifiliga totino e auala i ‵tou galuega talai mo nisi tino, i loto mo tino mai tua o te fakapotopotoga, i filifiliga totino kolā e fai ne tatou.—Faitau te 2 Kolinito 6:3, 4.
5. Kaia e ‵tau ei ke ‵kalo keatea tatou mai i te agaga o te fia tu tokotasi?
5 A “te agaga telā e pule ne ia a tino kolā e se faka‵logo ki te Atua” ko salalau valevale atu e pelā eiloa mo te ea telā e mānava ne tatou. (Efeso 2:2) A te agaga tenā e fai ne ia tatou ke mafaufau me e se ma‵nako tatou ki te takitakiga a te fakapotopotoga a Ieova. E mautinoa me e se ma‵nako tatou ke fai pelā mo Siofilisi, telā ne ‘se fia fakalogo eiloa ki muna mai i te apositolo ko Ioane.’ (3 Ioane 9, 10) E ‵tau o ‵kalo keatea tatou mai i te atiakaga o se uiga fia tu tokotasi. I ‵tou pati mo faiga, ke mo a eiloa ma ‵teke atu tatou ki te auala o fesokotakiga telā e fakaaoga ne Ieova i aso nei. (Numela 16:1-3) E ‵kese mai i ei, e ‵tau o fakatāua ne tatou ‵tou tauliaga ke ga‵lue fakatasi mo te potukau ko te tavini. Kae e ‵tau foki o taumafai tatou ke faka‵logo kae ‵lago atu ki tino kolā e fai ne latou te takitakiga i ‵tou fakapotopotoga, ne?—Faitau te Epelu 13:7, 17.
6. Kaia e ‵tau ei o iloilo aka ne tatou ‵tou fakanofonofoga totino?
6 A te suā auala ke fakaasi atu me e fakatāua ne tatou ‵tou tulaga i te fakapotopotoga ko te iloilo faka‵lei aka o ‵tou fakanofonofoga totino kae fai a mea katoa e mafai ne tatou o fai ke faka‵malu ei ‘‵tou galuega’ kae ke fakaaloalo atu foki ki a Ieova. (Loma 11:13) E mafai ne nisi tino o paenia tumau. E tavini atu a nisi tino i vaega fakapito o te taviniga tumau e pelā me ne misionale, ovasia faima‵laga, mo sui o te kāiga Peteli i te lalolagi kātoa. E fesoasoani atu a taina mo tuagane e tokouke ki te faitega o Kingdom Hall. A te tokoukega o tino o Ieova ko fai ne latou te ‵toe mea e mafai o fai ke tausi atu ki manakoga faka-te-agaga o olotou kāiga kae ‵kau katoatoa atu ki te galuega talai i vaiaso takitasi. (Faitau te Kolose 3:23, 24.) E mafai o tali‵tonu tatou me kafai e ‵kau atu tatou mo te loto fiafia ki te galuega a te Atua kae fai te ‵toe mea e mafai o fai ke tavini atu mo te loto kātoa, e maua faeloa ne tatou se tulaga i tena fakatokaga.
Mea Kolā e Mafai o Pokotia i ei te Fakataunuga o ‵Tou Tulaga
7. Fakamatala mai te auala e mafai ei o pokotia ‵tou tulaga i te fakapotopotoga i ‵tou fakanofonofoga.
7 Se mea tāua ke iloilo aka ne tatou ‵tou fakanofonofoga me e faka‵na eiloa ‵tou tulaga i te fakapotopotoga ki mea e mafai o fai ne tatou. E pelā mo te mea e fai ne se taina i te fakapotopotoga e ‵kese i nisi feitu mai i mea e fai ne se tuagane. Ko te matua, malosi, mo nisi mea aka foki e mafai o faka‵na ki ei a mea e mafai o fai ne tatou i te galuega a Ieova. E fai mai te Faataoto 20:29: “E tavae ne tatou te malosi o talavou, kae fakaāva tatou ki te ulusina o toeaina.” E mafai o uke atu a mea e mafai o fai ne talavou i te fakapotopotoga ona ko te lotou malosi faka-te-foitino, kae e aoga malosi a tino ma‵tua ki te fakapotopotoga ona ko te poto mo te lotou ata‵mai. E ‵tau foki o masaua ne tatou me i so se mea telā e fai ne tatou i te fakapotopotoga a Ieova e fakalagolago eiloa ki te alofa kaimalie o te Atua.—Galuega 14:26; Loma 12:6-8.
8. E pokotia pefea ‵tou mea e fai i loto i te fakapotopotoga ona ko manakoga o te tino?
8 Se tala fakatusa e uiga ki se tautaina fafine kolā e fakaasi mai i ei a te manatu telā e fakavae ki ei ‵tou tulaga i te fakapotopotoga. Ne oti tasi mai lāua i se akoga maluga. E ‵pau eiloa lā fakanofonofoga. Ko oti ne fakamalosi atu lā mātua ke taumafai lāua o ‵kau atu ki te galuega ko te paenia tumau māfai ko oti lā akoga. Mai tua o te pukegā pepa, e tokotasi ne kau atu ki te taviniga fakapaenia, kae ko te suā tino ne kamata o galue tumau i se galuega ‵togi. Se a te mea e ‵kese ei lāua? Ko te manakoga o te tino. I te fakaotiga loa, ne fai ne lāua taki tokotasi a te mea ne ma‵nako lāua ki ei. E a, e se penā eiloa te tokoukega o tatou? E ‵tau o mafaufau ‵mafa tatou ki mea kolā e ma‵nako tatou ki ei i te taviniga a te Atua. E mata, e mafai o momea aka a mea e fai ne tatou i ei, ke oko foki eiloa ki te tulaga māfai e ‵tau o fakama‵fuli ‵tou fakanofonofoga?—2 Kolinito 9:7.
9, 10. E a māfai e se lava te loto finafinau, ne a mea e ‵tau o fai ne tatou ke fakauke atu ‵tou mea e fai i te taviniga a Ieova?
9 E a māfai e galo te ‵tou loto finafinau i te faiga o mea e uke i te taviniga a Ieova kae nei la ko fai fua a nai mea i te fakapotopotoga? I tena tusi ki te kau Filipi, e fai mai a Paulo: “Me i te Atua e galue faeloa i loto i a koutou, o fai ne ia koutou ke talia o fai a mea kolā e loto a ia ki ei.” E tonu, e mafai eiloa o gasuesue a Ieova i a tatou kae ‵fuli ne ia ‵tou loto, io me ko ‵tou manakoga.—Filipi 2:13; 4:13.
10 E mata, e se ‵tau o akai atu tatou ki a Ieova ke fai ne ia tatou ke fia fai tena loto? Ne fai eiloa penā te tupu mua o Isalaelu ko Tavita. Ne ‵talo atu a ia: “[Ieova], akoako mai ki a au ou auala; fakaasi mai foki ke iloa ‵lei ne au. Akoako mai au ke ola i tau munatonu; me i a koe ko toku Atua, telā e fakasao ne ia au. Au e talitonu faeloa ki a koe.” (Salamo 25:4, 5) E mafai foki o fai tatou penā mai i te ‵talo atu ke fai ne Ieova tatou ke fia fai a mea kolā e fakafiafia atu ki a ia. Kafai e mafau‵fau tatou ki lagonaga o Ieova te Atua mo tena Tama e uiga ki mea e fai ne tatou i te tavini atu ki lā manakoga, e ‵fonu eiloa ‵tou loto i te fakafetai ki a lāua. (Mataio 26:6-10; Luka 21:1-4) A te lagonaga fiafia tenā e mafai o fakamalosi aka ei tatou ke akai atu ki a Ieova ke fakamalosi aka ‵tou manakoga ke gasolo atu ki mua i te feitu faka-te-agaga. Ko oti ne tuku mai ne te pelofeta ko Isaia se fakaakoakoga e uiga ki te kilokiloga e ‵tau o ati aka ne tatou. I te taimi ne lagona ei ne ia te leo o Ieova e fesili mai: “Ko oi te tino ka uga atu ne au? Ko oi ka fai mo avefekau a tatou?” ne tali atu te pelofeta: “Ko au! Uga mai au!”—Isaia 6:8.
Ke Gasolo Atu ki Mua —E Pefea la?
11. (a) Se a te manakoga mō taina ke taumafai o kausaki atu ki tauliaga i te fakapotopotoga? (e) E mafai pefea o kausaki atu se taina ki tauliaga i te fakapotopotoga?
11 Ona ko te toko 289,678 a tino ne papatiso i te lalolagi kātoa i te tausaga faka-te-taviniga ko te 2008, e mautinoa eiloa me e isi se manakoga lasi mō taina ke fai ne latou te takitakiga. E ‵tau o saga atu pefea se taina ki te manakoga tenei? Mai i te taumafai atu fua ke fakafetaui aka tena olaga ki mea e manakogina mō tavini fakafaifeau mo toeaina kolā e fakamatala mai i te Tusi Tapu. (1 Timoteo 3:1-10, 12, 13; Tito 1:5-9) E mafai pefea o taumafai se taina ke ola e ‵tusa mo mea e manakogina ke fai ne ia i te Tusi Tapu? Mai i te kau malosi atu ki te galuega talai, mai i te tausi atu mo te loto fiafia ki ana tofiga i te fakapotopotoga, mai i te galue malosi ke momea aka te ‵lei o ana tali i fakatasiga Kelisiano, mo te fakamasani faka‵lei atu ki taina tali‵tonu. Ko fakaasi atu ei ne ia me e fakatāua ne ia tena tulaga i te fakapotopotoga.
12. E mafai pefea o fakaasi atu ne talavou te lotou loto finafinau mō te munatonu?
12 Ne a mea e mafai o fai ne talavou tagata, ke gasolo atu latou ki mua i te fakapotopotoga? E mafai o taumafai malosi latou ke momea aka te lotou ‘poto mo te iloa faka te agaga’ mai i te sukesuke malosi ki te Tusi Tapu. (Kolose 1:9) I te fai mo fai se tino sukesuke loto finafinau ki te Muna a te Atua mo te kau malosi atu ki fakatasiga a te fakapotopotoga ka fesoasoani malosi atu eiloa ki ei. E mafai foki o taumafai a talavou tagata ke toka latou mō “avanoaga konei mō te galuega a te Atua” i vaega kese‵kese o te taviniga tumau. (1 Kolinito 16:9) A te kausaki malosi atu ki te galuega a Ieova se olaga fakamalie loto tonu kae e iku atu foki ki fakamanuiaga e uke.—Faitau te Failauga 12:1.
13, 14. Ne a auala e mafai ei o fakaasi atu ne tuagane me e fakatāua ne latou olotou tulaga i te fakapotopotoga?
13 E mafai foki o fakaasi atu ne tuagane me e fakatāua ne latou olotou tulaga mai i te aofia tonu i te fakataunuga o te Salamo 68:11. E fai‵tau tatou ki ei: “Ne tuku mai ne te Aliki te fakatonuga, kae fakasalalau ne fafine te tala tenā.” A te auala sili e mafai ei o fakaasi atu ne tuagane te lotou loto fia‵fia mō olotou tulaga i te fakapotopotoga ko te ‵kau atu ki te galuega ko te faiga o soko. (Mataio 28:19, 20) Tela la, mai i te ‵kau katoatoa atu ki te galuega talai mo te taliaga mo te loto finafinau a mea faiga‵ta mō te galuega tenā, e fakamaoni atu ei ne tuagane me e fakatāua ne latou olotou tulaga i te fakapotopotoga.
14 I tena tusi ki a Tito, ne fai atu a Paulo: “Ke penā foki eiloa tau fakatonuga ki loma‵tua ke amio fakaaloalo, . . . ke akoako atu ne latou a te mea ‵lei, kae akoako atu foki tamafine ke a‵lofa ki olotou avaga mo tamaliki, ke loto pulea kae amio ‵lei, ke fai latou mo fafine ‵lei o te kāiga, e a‵lofa kae faka‵logo foki ki olotou avaga, ko te mea ke se fakamasei ne latou a te muna a te Atua.” (Tito 2:3-5) E lasi te fakamalosiga e mafai o maua mai i tuagane ma‵tua i te fakapotopotoga! Mai i te fakaasi atu o te āva ki taina kolā e fai ne latou te takitakiga mo te faiga o fakaikuga ‵poto i vaegā tulaga penā o te olaga e pelā mo gatu mo teuga mo fakafiafiaga, e fai ei ne latou se fakaakoakoga ‵lei mō nisi tino kae e fakaasi atu foki me e fakatāua ne latou olotou tulaga i te fakapotopotoga.
15. Ne a mea e mafai o fai ne se tuagane taka ke manumalo i lagonaga sē sologa?
15 I nisi taimi, e mafai o faigata ke fakataunu ne se tuagane taka tena tulaga i te fakapotopotoga. Ne fai mai se tuagane telā ne mafaufau penā: “E mafai eiloa o pokotia i lagonaga sē sologa māfai e nofo taka koe.” I te taimi ne fesili atu ei ki tou fafine e uiga ki tena tulaga, ne fai mai a ia: “E fesoasoani mai a ‵talo mo sukesukega ke fakataunu faka‵lei toku tulaga i te fakapotopotoga. E sukesuke au e uiga ki te kilokiloga a Ieova ki a au. Oti aka, e taumafai au ke fesoasoani atu ki nisi tino i te fakapotopotoga. E fesoasoani mai te mea tenei ke mo a ma mafaufau au ki a au eiloa.” E ‵tusa mo te Salamo 32:8, ne fai atu a Ieova ki a Tavita: “Ka akoako atu ne au ki a koe te auala e ‵tau o fano koe i ei.” E tonu, e fiafia mai eiloa a Ieova ki ana tavini katoa, e aofia i ei a tuagane taka, kae ka fesoasoani atu a ia ke fai ne latou olotou tulaga i te fakapotopotoga.
Ke Tumau Eiloa i te Fakataunuga o Tou Tulaga!
16, 17. (a) Kaia e fai ei a te taliaga o te ‵kamiga a Ieova ke fai mo vaega o tena fakapotopotoga e pelā me ko te ‵toe fakaikuga ‵lei e mafai o fai ne tatou? (e) E mafai pefea o tumau tatou i te fakataunuga faka‵lei o ‵tou tulaga i te fakapotopotoga a Ieova?
16 Ne fai eiloa mo te alofa ne Ieova ana tavini taki tokotasi ke maua ne latou se fesokotakiga pili mo ia. Ne fai mai a Iesu: “E se mafai ne se tino o vau ki a au, seiloga ne māfua tona vau mai te Tamana telā ne uga mai ne ia au.” (Ioane 6:44) Mai i te fia piliona o tino i te lalolagi, ne aumai eiloa ne Ieova se ‵kamiga totino ki a tatou ke fai mo vaega o tena fakapotopotoga i aso nei. A te taliaga o te ‵kamiga tenei ko te ‵toe fakaikuga ‵lei eiloa ne fai ne tatou. E fai i ei ke isi se fuafuaga kae aoga o ‵tou olaga. Kae ko oko eiloa i te fia‵fia mo te lotoma‵lie o tatou me ne fakataunu ‵tou tulaga i te fakapotopotoga!
17 Muna a te faisalamo: “[Ieova], au e fiafia ki te fale tenā e nofo koe i ei, ko te koga tenā e nofo i ei tou ‵malu.” Ne toe usu mai a ia: “Au e ‵viki atu ki te Aliki [ko Ieova] i te fakapotopotoga o ona tino.” (Salamo 26:8, 12) E maua ne tatou taki tokotasi se tulaga telā ne tuku mai ne te Atua tonu i loto i tena fakapotopotoga. Mai i te tumau i te tau‵tali atu ki takitakiga mai i te Atua mo te fakalavelave faeloa i te galuega a te Atua, e mafai ei o fakataunu faka‵lei ‵tou tulaga tāua i te fakatokaga a Ieova.
E Masaua ne Koe?
• Kaia e ‵lei ei ke fakaiku aka me e maua ne Kelisiano katoa se tulaga i te fakapotopotoga?
• E mafai pefea o fakaasi atu me e fakatāua ne tatou ‵tou tulaga i te fakapotopotoga a te Atua?
• Ne a mea e mafai o pokotia i ei ‵tou tulaga i te fakapotopotoga?
• E fakaasi atu pefea ne talavou Kelisiano mo tino ma‵tua me e fakatāua ne latou olotou tulaga i te fakatokaga a te Atua?
[Ata i te itulau e 21]
E mafai pefea o kausaki atu a taina ki tauliaga i te fakapotopotoga?
[Ata i te itulau e 22]
E mafai pefea o fakaasi atu ne tuagane me e fakatāua ne latou olotou tulaga i te fakapotopotoga?