Kaia E Tuku Atu Ei Koe Ki A Ieova?

“I te mea ne oko mai ki a au i te po a te agelu a te Atua, telā e o ia a au.”​—GALUEGA 27:23.

1. Ne a mea e ‵tau o fai ne tino kolā e tuku atu a latou eiloa ke papatiso, kae ne a fesili e faka‵sae aka ne te mea tenei?

“E AUALA i te fakavae o te taulaga a Iesu Keliso, e mata, ko oti ne salamo koe ki au agasala kae tuku atu koe ki a Ieova ke fai tena loto?” A te mea tenei se fesili e tasi mai i fesili e lua kolā e taligina ne tino papatiso i te fakaotiga o se lauga mō te papatisoga. Kaia e ‵tau ei o tuku atu ne Kelisiano a latou eiloa ki a Ieova? E aoga pefea ki a tatou a te tuku atu ki te Atua? Kaia e se mafai ei o tapuaki atu se tino ki te Atua e aunoa mo te tuku atu ki a ia? Ke malamalama i te tali, e ‵tau o mafau‵fau muamua tatou me se a te tukuatuga.

2. Se a te uiga ke tuku atu ne se tino a ia eiloa ki a Ieova?

² Se a te uiga o te tuku atu ne se tino a ia eiloa ki te Atua? Mafaufau la ki te auala ne fakamatala mai ei ne te apositolo ko Paulo tena fesokotakiga mo te Atua. A koi tuai o ‵sopo atu a nisi tino e tokouke ki luga i se vaka telā ne afātia, ne taku ne ia a Ieova ki “te Atua, telā e o ia a au.” (Faitau te Galuega 27:22-24.) A Kelisiano ‵tonu katoa e o Ieova. E ‵kese mai i ei, a te lalolagi kātoa “ko i lalo i te pule a te tino masei.” (1 Ioane 5:19) E o Ieova a Kelisiano māfai ko fai ne latou se tukuatuga telā e talia ne ia i se ‵talo. A te tukuatuga tenā se tautoga totino. E ‵soko atu ki ei ko te papatisoga ki te vai.

3. Se a te mea e fakauiga ki ei a te papatisoga a Iesu, kae e mafai pefea o fakaakoako atu ana soko ki a ia?

³ Ne tuku mai ne Iesu se fakaakoakoga mō tatou i te taimi ne fai ei tena filifiliga totino ke fai te loto o te Atua. Ona ko te mea ne fanau mai a ia ki loto i te atufenua tukugina atu o Isalaelu, ne fai eiloa pelā me ko oti ne tukugina atu a ia ki te Atua. Kae i tena papatisoga, ne fai ei ne ia se mea telā e sili atu i lō te mea ne manakogina mai i lalo i te Tulafono. E fakaasi mai i te Muna a te Atua me ne fai atu a ia: “Tenei au e te Atua, o fai a te mea e loto koe ki ei.” (Epelu 10:7; Luka 3:21) Tela la, a te papatisoga o Iesu ne fakamailoga ki ei tena tukuatuga ki te Atua mō te faiga o te loto o tena Tamana. Ne tau‵tali atu ana soko ki tena fakaakoakoga i te taimi e fai ei te lotou papatisoga. Kae e pelā mo latou, a te papatisoga ki te vai se fakaasiga i mua o tino e tokouke me ko oti ne fai ne latou se tukuatuga totino ki te Atua e auala i se ‵talo.

Te Auala e Aoga ei te Tukuatuga ki a Tatou

4. Se a te mea e fakaasi mai i te va fakataugasoa o Tavita mo Ionatana e uiga ki te fai feagaiga?

⁴ A te tukuatuga faka-Kelisiano se mataupu tāua ‵ki. E sili fakafia atu tena tāua i lō te faiga fua o se feagaiga. E aoga la pefea te faiga o se tukuatuga ki a tatou? Ke fai se fakatusaga ko te mea ke mafau‵fau tatou ki te auala e aoga ei a te faiga o feagaiga i va o tino. A te fakaakoakoga e tasi ko te va fakataugasoa. Ke fia‵fia ki te tauliaga ko te mauaga o se taugasoa mo te taliaga o te tiute ke fai mo fai se taugasoa o se tino. E aofia i te mea tenā se feagaiga​—e maua ne koe a te tiute ke fakaasi atu te atafai ki tou taugasoa. A te va fakataugasoa fakaofoofogia e tasi telā e fakamatala mai i te Tusi Tapu ko Tavita mo Ionatana. Ne fai foki ne lāua se feagaiga telā e fakavae ki te lā taugasoa. (Faitau te 1 Samuelu 17:57; 18:1, 3.) E tiga eiloa e mauagatā a vaegā taugasoa penā, e gasolo aka eiloa o ma‵losi a te ukega o taugasoa māfai e tuku kātoa atu, io me fakatau fesoasoani te suā tino ki te suā tino.​—Faataoto 17:17; 18:24.

5. E mafai pefea o tumau se pologa i te mauaga o mea aoga mai i te tuku atu o ia ke fai mo pologa a tena pule ‵lei?

⁵ A te Tulafono telā ne tuku atu ne te Atua ki te kau Isalaelu e fakamatala mai i ei a te suā fesokotakiga telā ne aoga ki tino ona ko te faiga o se feagaiga. Kafai ko manako se pologa ke nofo a ia mai lalo i te puipuiga tumau a se pule ‵lei, e mafai o fai ne ia se feagaiga tumau mo tena pule. E fai mai te Tulafono: “Kafai e fakaasi ‵tonu i a ia e alofa eiloa ki tena pule, tena avaga mo ana tama‵liki, kae e se manako foki a ia o saoloto, ke ave la a ia ne tena matai ki te koga e fai ei tapuakiga. I konā e fakatu ei a ia i te mataloa io me ko te pou mataloa kae ‵suki tena taliga. Ko fai ei a ia mo pologa i tena olaga kātoa.”​—Esoto 21:5, 6.

6, 7. (a) E aoga pefea ki tino a te faiga o feagaiga? (e) Se a te mea e fakaasi mai ne te mea tenā e uiga ki te ‵tou fesokotakiga mo Ieova?

⁶ A te fakaipoipoga se fesokotakiga telā e manakogina i ei a te faiga o se feagaiga telā e maluga atu. E sē se feagaiga ki se kamupane kae ki se tino. A tino kolā e ‵nofo fakatasi fua e aunoa mo te fakaipoipo, e se mafai eiloa o maua ne lāua a te tokagamalie tonu; e penā foki loa mo lā tama‵liki. Kae ko tino kolā ko oti ne fakaipoipo faka‵lei e maua eiloa ne latou se pogai faka-te-Tusi Tapu ke taumafai o faka‵lei aka a mea faiga‵ta i te alofa māfai ko ‵sae aka a fakalavelave.​—Mataio 19:5, 6; 1 Kolinito 13:7, 8; Epelu 13:4.

⁷ I taimi o te Tusi Tapu, e maua ne tino a mea aoga mai i te faiga o feagaiga i mea tau pisinisi mo galuega ‵togi. (Mataio 20:1, 2, 8) Se mea tonu eiloa te mea tenā i aso nei. E pelā mo te maua ne tatou o mea aoga mai i te sainaga o se feagaiga, a koi tuai o kamata se pisinisi io me kamata o galue i se kamupane. Tela la, kafai e fakamalosi aka ne feagaiga a fesokotakiga e pelā mo te va fakataugasoa, fakaipoipoga, mo galuega ‵togi, e pefea foki la te uke o mea aoga e maua ne koe māfai e fai ne koe se tukuatuga i tou fesokotakiga mo Ieova! Ke mafau‵fau nei tatou ki te auala ne maua ei ne tino i aso mua a mea aoga mai i te tuku atu ki a Ieova te Atua mo te auala e sili atu ei te mea tenei i lō se feagaiga.

Te Auala ne Aoga ei ki Tino Isalaelu a te Tukuatuga ki te Atua

8. Se a te uiga o te tukuatuga ki te Atua mō tino Isalaelu?

⁸ Ne tuku atu te fenua kātoa o Isalaelu ki a Ieova i te taimi ne fai ei ne latou se tautoga ki te Atua. Ne fai ne Ieova ke maopoopo latou i tafa o te Mauga o Sinai, kae ne fai atu a ia ki a latou: “Kafai e faka‵logo mai koutou ki a au kae tausi taku feagaiga, ka fai koutou mo oku tino tonu eiloa.” Ne tali fakatasi atu a tino katoa penei: “Ka fai ne matou a mea katoa kolā ne faipati mai ei te Aliki [ko Ieova].” (Esoto 19:4-8) Ne sili atu te mea e fakauiga ki ei a te tuku atu o te kau Isalaelu i lō te tuku atu fua ke fai se mea. E fakauiga i ei me ko fai latou mo tino o Ieova, kae ko fai latou ne Ieova e pelā me ne ana “tino filifilia.”

9. Ne mafai pefea o maua ne tino Isalaelu a mea aoga mai i te tuku atu ki te Atua?

⁹ Ne maua ne te kau Isalaelu a mea aoga mai i te fai mo fai ne tino o Ieova. Ne alofa fakamaoni kae atafai atu ki a latou e pelā me se mātua alofa telā e tausi atu ki se tamaliki. Ne fai atu te Atua ki te kau Isalaelu: “E mafai ne se fafine o puli tena pepe, kae se alofa ki te tamaliki ne fanau mai ne ia? Kafai foki la e isi se mātua e mafai o fakapuli ne ia tena tamaliki, ka ko au e se mafai o fakapuli ne au koutou.” (Isaia 49:15) Ne tuku atu ne Ieova te takitakiga o te Tulafono, fakamalosiga a pelofeta, mo te puipuiga a agelu. Ne tusi mai te faisalamo: “E fai tena fakatonuga ki tena fenua, ko ana fakatonuga mo tulafono ki a Isalaelu. E seki fai ne ia te mea nei mō nisi malo.” (Salamo 147:19, 20; faitau te Salamo 34:7, 19; 48:14.) E pelā eiloa mo te atafai o Ieova ki te fenua telā ne fai mō ia i aso ko ‵teka, ka atafai atu foki a ia ki a latou kolā e tuku atu ki a ia i aso nei.

Te Pogai e Tuku Atu ei Tatou ki te Atua

10, 11. E mata, ne fa‵nau mai tatou ki loto i te kāiga o te Atua i te lagi mo te lalolagi? Fakamatala mai.

¹⁰ I te taimi koi mafaufau ei koe ki te tukuatuga mo te papatisoga, e mafai o mafau‵fau penei a nisi tino, ‘Kaia e se mafai ei o tapuaki atu au ki te Atua e aunoa mo te tuku atu ki a ia?’ E mafai eiloa o maina koe i te pogai māfai e mafaufau ki ‵tou tulaga nei i mua o te Atua. Masaua me ona ko te agasala a Atamu, ne seki fa‵nau mai a tatou katoa ki loto i te kāiga o te Atua. (Loma 3:23; 5:12) A te tukuatuga o tatou ki te Atua se mea tāua telā e manakogina ko te mea ke talia ei tatou ki loto i tena kāiga i te lagi mo te lalolagi. Ke na onoono aka tatou ki te pogai tenā.

¹¹ E seai eiloa se tino i a tatou e isi sena tamana e mafai o tuku mai ne ia a te ola telā e ‵tau o maua ne tatou​—ko te ola ‵lei katoatoa. (1 Timoteo 6:19) Ne seki fa‵nau mai tatou e pelā me ne tama a te Atua me i te taimi ne agasala te tauavaga muamua, ne ‵vae keatea ei a te matakāiga o tino mai i tena Tamana alofa mo tena Mafuaga. (Fakatusa ki te Teutelonome 32:5.) Mai i te taimi tenā o vau ki mua, ne seki fai eiloa te lalolagi o tino mo fai se vaega o te kāiga o Ieova i te lagi mo te lalolagi kae ne ‵vae keatea latou mai i te Atua.

12. (a) E mafai pefea o fai a tino sē ‵lei katoatoa mo fai ne tino i te kāiga o te Atua? (e) Ne a mea e ‵tau o fai muamua ne tatou kae koi tuai o papatiso?

¹² E tiga eiloa te feitu tenā, e mafai ne tatou taki tokotasi o akai atu ke talia tatou ne te Atua ki loto i tena kāiga o tavini kolā e talia ne ia.a E mafai pefea o tupu te mea tenā ki tino agasala e pelā mo tatou? Ne tusi mai a te apositolo ko Paulo: “Kafai ne fai tatou mo fili o te Atua, ne faka‵lei tatou mo ia i te mate o tena Tama.” (Loma 5:10) I te papatisoga, e akai atu tatou ki te Atua mō se loto lagona ‵lei ko te mea ke talia tatou ne ia. (1 Petelu 3:21) Kae koi tuai o papatiso, e isi ne mea kolā e ‵tau o fai ne tatou. E ‵tau o iloa ne tatou a te Atua, fakamasani o fakalagolago ki a ia, salamo, kae ‵fuli ‵tou auala. (Ioane 17:3; Galuega 3:19; Epelu 11:6) Kae e isi se mea e ‵toe telā e ‵tau o fai kae koi tuai o talia tatou ki loto i te kāiga o te Atua. Se a la te mea tenā?

13. Kaia e ‵lei ei ke fai ne se tino se tautoga ki te Atua ko te mea ke fai a ia mo vaega o Tena kāiga o tino tapuaki kolā e talia ne ia?

¹³ A koi tuai o fai se tino telā ne ‵vae keatea mai i te Atua mo fai se tino i te kāiga o tavini kolā e talia ne te Atua, e ‵tau o fai muamua ne ia se tautoga tāua ki a Ieova. Ke malamalama i te pogai, mafaufau ki se tamana telā e āva ki ei a tino kae e saga atu a ia mo te atafai ki se talavou telā e seai ne ana mātua kae e manako ke puke ne ia mo fai se tino o tena kāiga tonu. E lauiloa te tamana e pelā me se tagata ‵lei. Kae koi tuai o talia te talavou tenā e pelā me ko tena tama, e manako te tagata ke fai ne te tamaliki tenā se tautoga. Telā, fai atu ei te tagata, “A koi tuai o talia ne au a koe e pelā me se tama, e ‵tau o iloa ne au me ka alofa kae āva mai koe ki a au e pelā me ko tou tamana.” Kafai fua e loto fiafia te talavou o fai se tautoga tāua ka talia ei ne te tagata a ia ki loto i tena kāiga. E a, e se ‵lei te mea tenā? E penā foki loa a Ieova, e talia ne ia ki loto i tena kāiga a latou fua kolā e loto fia‵fia ke fai se tautoga o te tukuatuga ki a ia. E fai mai te Tusi Tapu: “Ke tuku atu otou foitino ki te Atua ke fai mo taulaga ola, taulaga tapu kae logomalie ki a ia.”​—Loma 12:1.

Se Faifaiga o te Alofa mo te Fakatuanaki

14. Se a te auala e fai ei a te tukuatuga mo fakaasiga o te alofa?

¹⁴ A te faiga o te tautoga i te tukuatuga ki te Atua se fakaasiga o te lasi o ‵tou a‵lofa ki a Ieova. E tai ‵pau eiloa mo se tautoga i te fakaipoipoga i nisi feitu. E fakaasi atu ne se tagata Kelisiano ka fakaipoipo a tena alofa mai te faiga o te tautoga ke fakamaoni ki tena avaga fakaipoipo, faitalia me ne a mea e ‵tupu. A te mea tenei se tautoga ki se tino kae e sē ki se mea. A te tagata Kelisiano telā ka fakaipoipo e malamalama me e se mafai o maua ne ia te tauliaga ke ‵nofo fakatasi mo tena avaga fakaipoipo māfai e se fai ne ia se tautoga i te fakaipoipoga. I se auala tai ‵pau, e se mafai o maua katoatoa ne tatou a mea aoga kolā e maua i te fai mo fai ne tino i te kāiga o Ieova e aunoa mo te faiga o se tautoga i te tukuatuga. Tela la, e tiga eiloa e se ‵lei katoatoa tatou, e tuku atu ne tatou a tatou eiloa ki te Atua ona ko te mea e ma‵nako tatou ke fai tatou mō ia kae fakaiku aka ke a‵lofa fakamaoni tatou ki a ia, faitalia a mea e ‵tupu.​—Mataio 22:37.

15. E fai pefea te tukuatuga mo fai se faifaiga o te fakatuanaki?

¹⁵ Kafai e tuku atu a tatou eiloa ki te Atua, ko fai ne tatou se faifaiga o te fakatuanaki. Kaia e fai ei penā? A te ‵tou fakatuanaki ki a Ieova e fai ei tatou ke tali‵tonu me i te fakapilipili atu ki te Atua e ‵lei ki a tatou. (Salamo 73:28) E iloa ne tatou me ka se faigofie faeloa ke sa‵sale fakatasi mo te Atua i te taimi tenei e ola ei tatou i tafa o se kautama “fai mea piko‵piko mo te kaiu,” kae e tali‵tonu tatou ki te tautoga a te Atua ke ‵lago mai ki a tatou i ‵tou taumafaiga. (Filipi 2:15; 4:13) E iloa ne tatou me e se ‵lei katoatoa a tatou, kae e tali‵tonu tatou me ka fakaasi mai eiloa ne Ieova te alofa fakamagalo ki a tatou ke oko foki ki taimi kolā e fai ei ne tatou a mea ‵se. (Faitau te Salamo 103:13, 14; Loma 7:21-25.) E maua ne tatou te fakatuanaki me ka taui mai ne Ieova ‵tou manakoga ke tumau i te fakamaoni.​—Iopu 27:5.

A te Tukuatuga ki te Atua e Iku Atu ki te Fiafia

16, 17. Kaia e iku atu ei a te tukuatuga ki a Ieova ki te fiafia?

¹⁶ A te tuku atu ki a Ieova e iku atu ki te fiafia ona ko te mea e aofia i ei a te tukuatuga o tatou. Ne taku mai ne Iesu se munatonu fakavae i te taimi ne fai mai ei a ia: “E sili atu te manuia [io me ko te fiafia] o te tino telā e tuku atu fua ana mea i lō o te tino telā e talia ne ia.” (Galuega 20:35) Ne maua katoatoa ne Iesu te fiafia i te tukuatuga ne ia a ia eiloa i tena galuega i te lalolagi nei. Kafai e manakogina, e se malōlō sāle a ia, e se kai, io me e fai a mea kolā e ‵gali ki a ia ko te mea ke mafai o fesoasoani atu ki nisi tino ke maua ne latou te auala ki te ola. (Ioane 4:34) Ne maua ne Iesu te fiafia i te faiga o te loto o tena Tamana ke fiafia. Ne fai mai a Iesu: “Me fai sāle eiloa ne au a mea kolā e fiafia a ia ki ei.”​—Ioane 8:29; Faataoto 27:11.

¹⁷ Tela la, ne fakasino atu ne Iesu ki ana soko a te vaegā olaga fakamalie loto i te taimi ne fai atu ei a ia: “So se tino e tautali mai i a au, ke se mafaufau ki a ia eiloa, kae ke amo tena sataulo, ko tautali mai ei i a au.” (Mataio 16:24) A te fai penā e fai ei ke fakapili‵pili atu tatou ki a Ieova. E mata, e mafai o tuku atu ne tatou a tatou eiloa ki lima o so se tino telā e mafai o sili atu tena tausi mai ki a tatou mo te alofa?

18. Kaia e maua ei a te fiafia lasi mai i te ola e ‵tusa mo te ‵tou tukuatuga ki a Ieova i lō te tuku atu ki se mea io me se isi tino?

¹⁸ A te tukuatuga o tatou ki a Ieova mo te ola e ‵tusa mo te tukuatuga tenā mai i te faiga o tena loto ka maua i ei a te fiafia telā e sili atu i lō te tuku atu fua ki se mea io me se isi tino aka. E pelā mo tino e tokouke e tuku atu olotou olaga ki te kausaki atu ki koloa faka-te-foitino e aunoa mo te mauaga o te fiafia mo te lotomalie tonu. Kae ko latou kolā e tuku atu a latou eiloa ki a Ieova e maua ne latou te fiafia tumau. (Mataio 6:24) A te tauliaga ke fai pelā me ne tino kolā e ‘ga‵lue fakatasi mo te Atua’ e fai ei latou ke fia‵fia, kae ko te lotou tukuatuga e se fai ki se galuega kae ki te ‵tou Atua loto fakafetai. (1 Kolinito 3:9) E seai se tino e mafai o sili atu tena loto fakafetai ki te lotou alofa sē fakapito i lō te Atua. Ka toe fakafoki atu ne ia ana tino a‵lofa fakamaoni ki te lotou tulaga talavou ko te mea ke mafai o maua ne latou a mea aoga mai i tena tausiga ki te se-gata-mai.​—Iopu 33:25; faitau te Epelu 6:10.

19. Se a te tauliaga e maua ne tino kolā e tuku atu ki a Ieova?

¹⁹ A te tukuatuga o tou olaga ki a Ieova e fai ei ke maua ne koe se fesokotakiga pili mo ia. E fai mai te Tusi Tapu: “Fakapili‵pili atu koutou ki te Atua, ko fakapilipili mai ei a ia ki a koutou.” (Iakopo 4:8; Salamo 25:14) I te mataupu telā e ‵soko mai, ka mafau‵fau tatou ki te pogai e mafai ei o tali‵tonu tatou ki te faiga o filifiliga kolā e fai ei tatou mo tino o Ieova.

[Fakamatalaga fakaopoopo]

Ka Tali Mai Pefea ne Koe?

• Se a te uiga o te tukuatuga o se tino ki te Atua?

• E aoga pefea ki a tatou a te tukuatuga ki te Atua?

• Kaia e ‵tau ei o tuku atu a Kelisiano ki a Ieova?

[Ata i te itulau e 12]

A te ola e ‵tusa mo ‵tou tukuatuga e iku atu ki te fiafia tumau