O‵mai Ki Te ‵Toe Olaga ‵Lei!

“Me e ola tatou io me ‵mate, ko tino o [Ieova] tatou.”​—LOMA 14:8.

1. Se a te mea ne akoako mai ne Iesu e uiga ki te ‵toe olaga ‵lei?

E MANAKO a Ieova ke maua ne tatou te ‵toe olaga ‵lei. E mafai o kese‵kese a olaga o tino, kae e tasi fua te ‵toe olaga ‵lei. E seai aka se mea e mafai o fai ne tatou ki ‵tou olaga i lō te fakafetaui aka ki te Muna a te Atua kae fakaakoako ki tena Tama, ko Iesu Keliso. Ne akoako ne Iesu ana soko ke tapuaki atu ki te Atua i te agaga mo te munatonu, kae ne fakatonu foki ne ia a latou ke olo atu o fai a soko. (Mataio 28:19, 20; Ioane 4:24) Mai i te ola e ‵tusa mo fakatonuga a Iesu, e fakafiafia ne tatou a Ieova kae e maua foki i ei ne tatou Ana fakamanuiaga.

2. Ne ‵saga atu pefea a tino e tokouke ki te fekau o te Malo i te senitenali muamua, kae se a te mea ne fakauiga ki ei a te “Ala Tonu”?

² Kafai ko fai a latou kolā “ko oti ne filifilia mō te ola se gata mai” mo fai ne tino tali‵tonu kae papatiso, e maua eiloa ne tatou a pogai ‵lei ke fai atu ki a latou, “Ko talia mo te fiafia koutou ki te ‵toe vaegā olaga ‵lei!” (Galuega 13:48) I te senitenali muamua i ‵tou Aso Nei, e lau i afe o tino mai i atufenua kese‵kese ko oti ne talia ne latou a te munatonu kae fakamaoni atu i mua o tino katoa te lotou tapuakiga ki te Atua e auala i te papatisoga. (Galuega 2:41) Ne ‵kau atu eiloa a soko mua konā ki te “Ala Tonu.” (Galuega 9:2; 19:23) Ne fetaui ‵lei eiloa te tugapati tenei me i tino kolā ne fai mo fai a soko o Keliso ne tau‵tali atu ki se olaga telā ne fakavae ki te fakatuanaki ki a Iesu Keliso mo te tau‵tali atu ki tena fakaakoakoga.​—1 Petelu 2:21.

3. Kaia e papatiso ei a tino o Ieova, kae e tokofia a tino ne papatiso i te sefulu tausaga ko ‵teka atu nei?

³ Ko oti ne gasolo fakavave atu ki mua te galuega ko te faiga o soko i aso fakaoti konei kae ko fai nei i fenua e silia atu i te 230. I te sefulu tausaga ko ‵teka atu, e sili atu i te 2,700,000 o tino ko oti ne fai te lotou fakaikuga ke tavini atu ki a Ieova kae papatiso foki i te fakamailogaga o te lotou tukuatuga ki a ia. E nofo pelā ki te 5,000 o tino e papatiso i vaiaso katoa! A te fakaikuga ke papatiso e fakavae ki te alofa ki te Atua, te malamalama ‵lei i te Tusi Tapu, mo te fakatuanaki ki mea e akoako atu ne latou. A te papatisoga ko te ‵toe mea tāua i ‵tou olaga, me e fakamailoga ki ei te kamataga o se fesokotakiga ‵pili mo Ieova. Se fakaasiga foki o te loto talitonu me ka fesoasoani mai a ia ki a tatou ke tavini atu mo te fakamaoni ki a ia, e pelā eiloa mo tena fesoasoani ki ana tavini i aso mua ke sa‵sale atu i ana auala.​—Isaia 30:21.

Kaia e ‵Tau ei mo Koe o Papatiso?

4, 5. Ke taku mai a nisi fakamanuiaga mo mea aoga ne maua mai i te papatisoga.

⁴ Kāti ko malamalama koe i mea e uiga ki te Atua, ko oti ne fai ne koe a ‵fuliga i tou olaga, kae ko fai nei koe mo fai se tino talai e seki papatiso. E fakamālō atu eiloa ki tou gasolo atu ki mua i feitu konā. Kae e mata, ko oti ne fai ne koe se tukuatuga ki te Atua i se ‵talo, kae e mata, e fakamoemoe koe ke papatiso? Mai i tau sukesukega ki te Tusi Tapu, kāti ko iloa nei ne koe me e ‵tau o fakavae tou olaga ki te avatuga o tavaega ki a Ieova, kae e se ko te fakafiafia fua o koe io me ko te ‵sala atu ki kope faka-te-foitino. (Faitau te Salamo 148:11-13; Luka 12:15) Tela la, ne a nisi fakamanuiaga mo mea aoga e maua mai i te papatisoga?

⁵ E pelā me ne Kelisiano tukugina atu, ka maua eiloa ne tou olaga a te ‵toe mea aoga sili. Ka fiafia koe ona ko te mea e fai ne koe te loto o te Atua. (Loma 12:1, 2) Ka fakamalosi aka ne te agaga tapu o Ieova a vaegā uiga fakaatua i a koe e pelā mo te filemu mo te fakatuanaki. (Kalatia 5:22, 23) Ka tali mai ne te Atua a ‵talo kae fakamanuia ne ia au taumafaiga ke fakafetaui aka tou olaga ki tena Muna. Ka fiafia koe i tau galuega, kae ko te ola i te auala telā e talia ne te Atua ka fakamalosi aka ei tou fakamoemoega ki te ola se-gata-mai. E se gata i ei, a te faiga o te tukuatuga mo te papatisoga ka fakaasi atu ei me e manako tonu eiloa koe ke fai mo fai se tokotasi o Molimau a Ieova.​—Isaia 43:10-12.

6. Se a te mea e fakailoa atu ne te ‵tou papatisoga?

⁶ Mai i te tukuatuga o tatou ki te Atua mo te papatisoga, e fakailoa atu ei ne tatou ki tino katoa me e o Ieova a tatou. Ne tusi mai a te apositolo ko Paulo: “E seai se tino i a tatou e ola mō ia eiloa, kae e seai foki se tino o tatou e mate mō ia eiloa. Kafai e ola tatou, e ola tatou mō te Aliki, kae kafai foki e ‵mate tatou, e ‵mate tatou mō te Aliki; tela la, me e ola tatou io me ‵mate, ko tino o te Aliki tatou.” (Loma 14:7, 8) Ne fakaaloalo eiloa tatou ne Ieova mai i te tukumaiga ki a tatou a te saolotoga ke fai a filifiliga. Kafai ko oti eiloa ne fakaiku aka ne tatou ke kausaki atu ki te vaegā olaga tenei ona ko te mea e a‵lofa tatou ki te Atua, ko fai ei ne tatou tena loto ke fiafia. (Faataoto 27:11) A te ‵tou papatisoga se fakailoga o te ‵tou tukuatuga ki te Atua mo te fakaasiatuga i mua o tino katoa me ko fai a Ieova mo fai te ‵tou Pule. E fakaasi atu ei me e ‵kau atu tatou ki tena feitu i te kinauga e uiga ki te pulega sili i te lagi mo te lalolagi. (Galuega 5:29, 32) Ko fai ei ke kau mai foki a Ieova ki ‵tou feitu. (Faitau te Salamo 118:6.) E ‵tala mai foki ne te papatisoga a te auala ke maua nei ne tatou a nisi fakamanuiaga faka-te-agaga e uke nei, kae penā foki loa i aso mai mua.

E Fakamanuiagina ei Tatou ki se Kautaina Alofa

7-9. (a) Se a te fakatalitonuga ne tuku atu ne Iesu ki tino kolā ne tiakina olotou mea katoa kae tau‵tali atu i a ia? (e) E fakataunu pefea a te folafolaga a Iesu i te Maleko 10:29, 30?

⁷ Ne fai atu a te apositolo ko Petelu ki a Iesu: “Kiloke, ko tuku ne matou omotou mea katoa, kae tau‵tali atu i a koe. E a, e isi la se mea e maua ne matou?” (Mataio 19:27) Ne fia iloa ne Petelu me ne a mea e maua ne ia mo nisi soko o Iesu i aso mai mua. Ke tuku katoatoa latou ki te galuega talai o te Malo, ko oti ne tiakina ne latou a nisi mea. (Mataio 4:18-22) Se a te fakatalitonuga ne tuku atu ne Iesu ki a latou?

⁸ E ‵tusa mo te tala tai ‵pau a Maleko, ne fakaasi atu ne Iesu me ka fai ana soko mo fai se vaega o te kautaina faka-te-agaga. Ana muna: “So se tino e tiakina ne ia tena fale, taina, tuagane, te mātua mo te tamana, fanau mo ona manafa ona ko au mo te tala ‵lei, ka uke atu ana mea e maua i te kautama tenei. Ka fakafia selau ona fale e maua, taina, tuagane, mātua, fanau, mo manafa pelā foki mo fakasauaga. Ka maua ne ia i aso konei e o‵mai a te ola se gata mai.” (Maleko 10:29, 30) A Kelisiano i te senitenali muamua, e pelā mo Litia, Akuila, Pisila, mo Kaio, ne aofia i a latou kolā ne tuku atu ne latou a “fale” kae fai mo fai ne “taina mo tuagane mo mātua” ki taina tali‵tonu, e pelā mo te mea ne folafola mai ne Iesu.​—Galuega 16:14, 15; 18:2-4; 3 Ioane 1, 5-8.

⁹ A pati kolā ne fai mai ne Iesu ko fakataunu i aso nei i se auala lasi ‵ki. A “manafa” kolā ne tiakina ne ana soko e fakasino atu ki mea kolā ne tiakina ne tino e tokouke, e aofia i ei a misionale, tino i te kāiga Peteli, tavini i galuega fakatu‵tū, mo nisi tino aka ko te mea ke fakataunu ei a manakoga o te Malo i fenua kese‵kese. Ko oti ne tiakina ne taina mo tuagane e tokouke olotou fale ko te mea ke fakafaigofie aka olotou olaga, kae e maua ei ne tatou a te fiafia ke lagona atu olotou tala kolā e fakaasi mai i ei a te auala ne tausi atu a Ieova ki a latou mo te auala ne maua ei ne latou a te fiafia i te lotou tavini atu ki a ia. (Galuega 20:35) E se gata i ei, e mafai o maua ne tavini papatiso katoa a Ieova a te fakamanuiaga mai i te “mua [o latou] o ‵sala tena Malo mo tena amiotonu” e pelā me se vaega o te kautaina Kelisiano i te lalolagi kātoa.​—Mataio 6:33.

E Saogalēmū i te “Koga ‵Funa”

10, 11. Se a te “koga ‵funa a te Tino Tafasili i te Maluga,” kae e mafai pefea o ulu atu tatou ki ei?

¹⁰ A te tukuatuga mo te papatisoga e iku atu ki te suā fakamanuiaga gali​—te tauliaga ke ‵nofo atu mai lalo i te “koga ‵funa a te Tino Tafasili i te Maluga.” (Faitau te Salamo 91:1, NW.) A te mea tenei se koga fakatusa telā e fakauiga ki te tulaga saogalēmū mo te tokagamalie​—⁠se puipuiga mai i mea fakama‵taku ki te malosi faka-te-agaga. Se “koga ‵funa” me e se iloa ne tino kolā e se matapula‵pula i te feitu faka-te-agaga kae e se fakalagolago foki ki te Atua. Mai i te ola e ‵tusa mo ‵tou tukuatuga mo te fakaasi atu o te loto talitonu katoatoa ki a Ieova, e pelā me e fai atu ei tatou ki a ia: “A koe ko toku lafiga mo toku puiga. Koe ko toku Atua; e fakatuanaki au ki ei.” (Salamo 91:2) E fai a Ieova te Atua mo fai te ‵tou koga ‵nofo telā e saogalēmū. (Salamo 91:9) Se a foki la te koga e sili atu i te saogalēmū?

¹¹ A te fanatu ki “te koga ‵funa” o Ieova e fakauiga foki i ei me ko oti ne fakamanuiagina tatou ki te tauliaga o te atiakaga o se fesokotakiga totino mo ia. E kamata eiloa te mea tenei ki te tukuatuga mo te papatisoga. Mai tua ifo i ei, e ati aka ne tatou ‵tou fesokotakiga mo te Atua mai i te fakapili‵pili atu ki a ia e auala i ‵tou sukesukega ki te Tusi Tapu, ‵talo mai i ‵tou loto, mo te fakalogo katoatoa. (Iakopo 4:8) E seai aka foki eiloa se tino ne sili atu tena pili ki a Ieova i lō Iesu, telā ne seki vāivāi lele eiloa tena loto talitonu ki te Mafuaga. (Ioane 8:29) Tela la, ke mo a eiloa ma fakalotolotolua tatou ki a Ieova io me ko tena manakoga mo tena atamai ke fesoasoani mai ke fakataunu faka‵lei ‵tou tautoga e uiga ki ‵tou tukuatuga. (Failauga 5:4) A fakatokaga faka-te-agaga kolā ne fai ne te Atua mō ana tino ne fakamaoniga e se mafai o fakafiti me e alofa tonu mai ki a tatou kae e manako foki ke manumalo tatou i te tavini atu ki a ia.

Ke Fakatāua ‵Tou Palataiso Faka-te-Agaga

12, 13. (a) Se a te palataiso faka-te-agaga? (e) E mafai pefea o fesoasoani atu tatou ki tino ‵fou?

¹² A te tukuatuga mo te papatisoga e ‵tala mai foki i ei a te auala ke ‵nofo atu tatou i te palataiso faka-te-agaga gali. Se tulaga faka-te-agaga telā e fakaofoofogia kae e fakaaoga fakatasi ne taina tali‵tonu, kolā e maua ne latou se fesokotakiga filemu mo Ieova te Atua, e pelā foki loa i va o latou. (Salamo 29:11; Isaia 54:13) E seai eiloa se mea i te lalolagi telā e mafai o fakatusa tonu ki te gali o ‵tou palataiso faka-te-agaga. E lavea malosi atu eiloa te fakamaoniga o te mea tenei i ‵tou fono i atufenua, telā e ‵kau fakatasi ei a ‵tou taina mo tuagane mai i fenua, ‵gana, matakāiga i te filemu, fealofani mo te alofa fakataina.

¹³ A te palataiso faka-te-agaga telā e maua ne tatou e tu ‵kese eiloa mo tulaga matagā i te lalolagi i aso nei. (Faitau te Isaia 65:13, 14.) Mai i te folafola atu o te fekau o te Malo, e maua ne tatou te tauliaga ke fakaoko atu ki nisi tino a se ‵kamiga ke ulu mai ki loto i te palataiso faka-te-agaga. Se fakamanuiaga foki ke fesoasoani atu ki a latou kolā ko ‵kau atu nei ki te fakapotopotoga kae maua foki a mea aoga mai i te fakamasani ki te galuega talai. Mai lalo i te takitakiga a toeaina, e mafai eiloa o fakamanuiagina tatou ki te tauliaga ke fesoasoani atu ki tino ‵fou, e pelā mo Akuila mo Pisila ne “akoako atu faka‵lei” a Apolo ki “Ala ‵Tonu o te Atua.”​—Galuega 18:24-26.

Ke Tumau Eiloa i te Tauloto Mai i a Iesu

14, 15. Ne a pogai ‵lei e ‵tau ei o tumau tatou i te tauloto mai i a Iesu?

¹⁴ E maua ne tatou a pogai ‵lei ke tumau eiloa i te tauloto mai i a Iesu. I tena olaga mai mua o tena olaga faka-te-foitino, ne fakamāumāu ne Iesu te fia meleniuma o tausaga i te ga‵lue fakatasi mo tena Tamana. (Faataoto 8:22, 30) Ne iloa ne ia me i te ‵toe olaga ‵lei ko te olaga telā e fakavae ki te taviniga ki te Atua mo te molimau atu ki te munatonu. (Ioane 18:37) Ne manino ‵lei mai i ei ki a Iesu me i nisi vaegā olaga e fakavae ki manakoga kaima‵nako mo te sē malamalama. Ne iloa ne ia me ka tofotofogina malosi a ia kae ka tamate foki. (Mataio 20:18, 19; Epelu 4:15) E pelā me ko te ‵tou Fakaakoakoga ‵Lei, ne akoako ne ia a tatou ke iloa o fakatumau te ‵tou fakamaoni.

¹⁵ Mai tua malie ifo o te papatisoga o Iesu, ne tofotofo a ia ne Satani ke tiakina te ‵toe olaga ‵lei​—kae ne seki mafai. (Mataio 4:1-11) E akoako mai ne te mea tenei me faitalia a mea e fai ne Satani, e mafai o fakatumau ne tatou te ‵tou fakamaoni. Kāti e saga malosi atu eiloa a ia ki a latou kolā ko pili o papatiso e pelā foki mo tino papatiso ‵fou. (1 Petelu 5:8) E mafai o ‵teke mai a tino o te kāiga kolā e loto ‵lei kae e ‵se foki olotou lagonaga. Kae ko vaegā tofotofoga konā e tuku mai i ei a avanoaga ke fakaasi atu ne tatou a uiga ‵lei faka-Kelisiano, e pelā mo te āva mo te atamai, i te taimi e tali aka ei ne tatou a fesili kae tuku atu foki se molimau. (1 Petelu 3:15) Tela la, e mafai eiloa o fai a mea konei mo fai se fakamalosiga ‵lei ki tino kolā e fakalogo‵logo mai ki a tatou.​—1 Timoteo 4:16.

Ke Taofi ‵Mau ki te ‵Toe Olaga ‵Lei!

16, 17. (a) Ne a tulafono fakavae e tolu mō te ola kolā e maua i te Teutelonome 30:19, 20? (e) Ne ‵lago atu pefea a Iesu, Ioane, mo Paulo ki mea kolā ne tusi mai ne Mose?

¹⁶ I se 1,500 tausaga a koi tuai o sasale atu a Iesu i te lalolagi nei, ne fakamalosi atu a Mose ki te kau Isalaelu ke filifili ki te ‵toe olaga ‵lei i aso konā. Ana muna: “Ko tuku atu nei ne au ke filifili koutou i mea konei​—te ola me ko te mate, te fakamanuiaga a te Atua me ko tena fakamalaiaga. Au e kalaga ki te lagi mo te lalolagi ke molimau ki te mea ka fili ne koutou. Ko te ola e ‵tau o filifili ne koutou. Alofa ki te Aliki te otou Atua, faka‵logo ki a ia kae talitonu ki a ia.” (Teutelonome 30:19, 20) Ne seki fakamaoni eiloa a tino Isalaelu ki te Atua, kae ne seki ‵fuli eiloa a tulafono fakavae e tolu mō te ola kolā ne siki mai ne Mose. Ne toe taku mai a mea konā ne Iesu mo nisi tino.

¹⁷ Muamua la, ‘e ‵tau mo tatou o a‵lofa ki a Ieova te ‵tou Atua.’ E fakaasi atu me e a‵lofa tatou ki te Atua mai i te ola e ‵tusa mo ana auala amio‵tonu. (Mataio 22:37) A te lua, ‘e ‵tau o faka‵logo tatou ki te leo o Ieova’ mai i te faiga o sukesukega ki te Muna a te Atua mo te fakalogo ki ana fakatonuga. (1 Ioane 5:3) E manakogina i te mea tenei a te ‵tou ‵kau atu faeloa ki fakatasiga Kelisiano, telā e sukesuke i ei ki te Tusi Tapu. (Epelu 10:23-25) A ko te tolu, ‘e ‵tau o ‵piki ‵mau tatou ki a Ieova.’ Faitalia me ne a mea e mafai o fe‵paki mo tatou, ke na fakatuanaki eiloa tatou ki te Atua mo tena Tama.​—2 Kolinito 4:16-18.

18. (a) Ne fakamatala mai pefea ne The Watch Tower a te munatonu i te 1914? (e) E ‵tau o pefea ‵tou olaga e uiga ki te mainaga o te munatonu i aso nei?

¹⁸ Ko tafaga la te fakamanuiaga e maua i te ola e ‵tusa mo te munatonu i te Tusi Tapu! I te 1914, ne ‵lomi mai ei a te fakamatalaga fakaofoofogia tenei i The Watchtower, penei: “E a, e se fai tatou mo tino manuia kae fia‵fia? E a, e se fai ‵tou Atua mo Atua fakamaoni? Kafai e iloa ne so se tino se mea telā e ‵lei atu, ke na fanatu la i ei. Kafai e isi se tino i a koutou ne maua ne ia se mea telā e ‵lei atu, e fakamoe‵moe eiloa matou ke taku mai ne koe. E seai aka foki eiloa se mea e iloa ne matou io me e tai oko atu ki te āfa o mea ‵lei kolā ne maua ne matou i te Muna a te Atua. . . . E seai se gutu io me se peni e mafai o fakamatala mai ne ia a te filemu, te fiafia, mo te fakamanuiaga ne tuku mai ne te malamalama manino e uiga ki te Atua tonu ki ‵tou loto mo ‵tou olaga. A te Tala e Uiga ki te Poto, Fakamaoni, Malosi, mo te Alofa o te Atua e fai ei ke lotoma‵lie katoatoa tatou i ‵tou mafaufau mo ‵tou loto. E seai aka foki se isi mea e ‵tau o ‵sala atu ki ei. E seai aka foki se mea koi ‵tau o ma‵nako ki ei i lō te taumafai ke malamalama faka‵lei tatou i te Tala gali tenei.” (The Watch Tower, i a Tesema 15, 1914, te itulau e 377-378) A te ‵tou fia‵fia ki te mainaga mo te munatonu faka-te-agaga e se mafai eiloa o ‵fuli. A te ‵tonuga loa, e maua ne tatou a pogai ‵lasi ke fia‵fia me e “sa‵sale tatou i te mainaga telā ne aumai ne [Ieova].”​—Isaia 2:5; Salamo 43:3; Faataoto 4:18.

19. Kaia e ‵tau ei mo tino kolā ko fetaui ‵lei mō te papatisoga o fai te mea tenā e aunoa mo te fakatalave?

¹⁹ Kafai e fia ‘sasale atu koe i te mainaga o Ieova’ kae e seki fai koe mo fai se Kelisiano tukugina atu kae papatiso, ke mo a ma fakatalave ne koe te mea tenā. Fai so se mea e manakogina ke fakafetaui aka ki mea e ‵tau o fai mō te papatisoga​—ko te ‵toe auala ‵lei ke fakaasi atu ei ‵tou loto fiafia ki mea ko oti ne fai ne te Atua mo Keliso ki a tatou. Ke tuku atu ki a Ieova tou toe kope tāua eiloa​—ko tou ola. Ke fakaasi atu me e manako koe ke fai te loto o te Atua mai i te tautali atu ki tena Tama. (2 Kolinito 5:14, 15) E aunoa mo te fakalotolotolua, tenā eiloa te ‵toe olaga ‵lei!

Ka Saga Mai Pefea Koe?

• Se a te mea e fakauiga ki ei ‵tou papatisoga?

• Ne a fakamanuiaga e maua mai i te tukuatuga ki te Atua mo te papatisoga?

• Kaia e tāua malosi ei a te tauloto mai i a Iesu?

• Ne a mea ka fesoasoani mai ke taofi ‵mau tatou ki te ‵toe olaga ‵lei?

[Ata i te itulau e 27]

E fakaasi atu i tau papatisoga me ko oti ne filifili ne koe te ‵toe olaga ‵lei

[Ata i te itulau e 28]

E mata, e saogalēmū koe i “te koga ‵funa”?