Mea Kolā ne Akoako Atu ne Iesu e Uiga ki a Ia

“Ne seki fakalotolotolua a Iesu ki te manatu me ko oi a ia, te koga ne vau ei a ia, te pogai ne vau ei a ia ki te lalolagi, mo tena fakamoemoega i aso mai mua.” ​—TINO TUSITALA KO HERBERT LOCKYER.

AKOI tuai o talia kae fakatuanaki tatou ki akoakoga a Iesu, e ‵tau o iloa ne tatou se mea e uiga ki a ia. Ko oi a Iesu? Ko oi tena fenua? Se a te aoga o tena olaga? I Tusi Evagelia​—Mataio, Maleko, Luka, mo Ioane—⁠e mafai o lagona ne tatou a tali mai i te gutu o Iesu, e pelā eiloa me ne ‵nofo atu tatou i konā.

Ne ola muamua a ia a koi tuai o fanau mai ki te lalolagi Ne fai mai a Iesu: “Ka koi tuai o fanau Apelaamo ka ko iai au.” (Ioane 8:58) Ne ola a Apelaamo i nai tausaga e 2,000 a koi tuai o fanau a Iesu. Kae ne ola atu muamua a Iesu a koi tuai o ola mai a te tagata fakamaoni tenei. Kae ne ola i fea a Iesu? Ne fakamatala mai a ia, penei: “Au ne . . . . fanaifo mai te lagi.”​—Ioane 6:38.

Te Tama a te Atua E tokouke a tama a Ieova ko agelu. Kae e tu ‵kese eiloa a Iesu. Ne fakasino atu ki a ia e pelā me ko te “Tama e tokotasi a te Atua.” (Ioane 3:18) A te tugapati tenei e fakauiga me i a Iesu ne faite tokotasi eiloa ne te Atua. Ko te tama eiloa e tokotasi telā ne faite ei ne Ieova a mea katoa e alatu i a ia.​—Kolose 1:16.

“Te Tama a te Tagata” E uke atu a taimi ne fakaaoga ei ne Iesu a te tugapati tenei i lo nisi tugapati ke fakasino atu ki a ia. (Mataio 8:20) Kae ne fakaasi atu ne ia me i a ia e sē se agelu fia maumea io me se agelu telā ne ola mai i se isi mea aka. I lo te fai penā, ne fai katoatoa eiloa a ia mo fai se tino. E auala i tena agaga tapu, ne tuku atu ei ne te Atua a te ola o tena Tama tagata mai te lagi ki te lalolagi ki te moegatama o te taupou ko Malia. Tela la, ne fanau mai a Iesu e pelā me se tino ‵lei katoatoa kae sē agasala.​—Mataio 1:18; Luka 1:35; Ioane 8:46.

Te Mesia telā ne folafola mai “E iloa ne au i te Mesia e vau,” ko muna a te fafine Samalia ki a Iesu. Ne tali atu a ia: “A te tino telā e faipati koe ki ei, ko au tenā.” (Ioane 4:​25, 26) A te pati “Mesia” e pelā foki mo te pati “Keliso” e fakauiga ki te “Tino Fakaekegina.” A Iesu ne fakaekegina, io me ne filifili ne te Atua, ke fakaoti ne ia se tiute fakapito i te fakataunuga o folafolaga a te Atua.

Te pogai tāua o tena vau ki te lalolagi Ne toe fai mai a Iesu: “E ‵tau mo au o takutaku atu te Tala ‵Lei o te Malo o te Atua ki nisi fa‵kai, me tenā eiloa te mea ne uga mai ei au ne te Atua, ke vau o fai.” (Luka 4:43) E tiga eiloa ne fai ne ia a mea ‵lei e uke mō tino fakaa‵lofa, ne fakamuamua ne ia te talaiatuga o te Malo o te Atua i tena olaga. A mea kolā ne akoako atu ne ia e uiga ki te Malo tenā ka sau‵tala fakamuli tatou ki ei.

E manino ‵lei eiloa me i a Iesu e sē se tino penei mo tatou.a E pelā mo te mea ka lavea ne tatou, a te olaga telā ne maua ne ia i te lagi ne fakaopoopo atu ki te aoga o pati ne fai ne ia i te lalolagi. E mata, e ‵tau o ofo tatou me ne talai atu ne ia se fekau telā ne mafai o pokotia i ei a ola o te fia miliona o tino i te lalolagi kātoa?

[Fakamatalaga fakaopoopo]