Mea Kolā ne Akoako Mai ne Iesu e Uiga ki te Atua

“A te tino fua e tokotasi telā e iloa tonu ne ia te Tamana ko te Tama. Kae e manako te Tama ke fai atu ki nisi tino a mea e uiga ki te Tamana, ko te mea ke iloa foki ne latou a ia.”​—LUKA 10:22, CONTEMPORARY ENGLISH VERSION.

A KOI tuai o ola mai a ia e pelā me se tino, ne fakamāumāu ne te Tama toekimua a te Atua a tausaga e uke fakatasi mo tena Tamana. (Kolose 1:15) Tela la, ne kamata o iloa ne te Tama a mafaufauga, lagonaga mo auala o tena Tamana. I te taimi ne vau ei a te Tama ki te lalolagi nei e pelā me ko te tagata ko Iesu, ne loto finafinau a ia o akoako atu te munatonu e uiga ki tena Tamana. E mafai o tauloto ne tatou a mea e uke e uiga ki te Atua mai te fakalogo‵logo ki akoakoga a tena Tama.

Te igoa o te Atua A te igoa o te Atua, telā ko Ieova, ko te ‵toe mea tāua eiloa ki a Iesu. Ne manako a te Tama fagasele tenei ke iloa kae ke fakaaoga ne nisi tino a te igoa o tena Tamana. E fakauiga eiloa a te igoa o Iesu ki a “Ieova te Fakaolataga.” I te po mai mua o tena mate, ne mafai o fai atu a Iesu ki a Ieova i se ‵talo, penei: “Ne fakailoa atu foki ne au tou igoa ki a latou.” (Ioane 17:26) E mautinoa eiloa me ne fakaaoga ne Iesu a te igoa o te Atua ke fakailoa atu ei ki nisi tino. Mai mea katoa konei, ne mafai pefea o malamalama a tino fakalogo‵logo a Iesu i te munatonu e uiga ki a Ieova e aunoa mo te iloa ne latou a Tena igoa mo te uiga o tena igoa?a

Te alofa sili o te Atua Ne toe fai atu a Iesu ki te Atua i tena ‵talo: “Te Tamana, . . . ne tuku mai ne koe ki a au tou alofa, kae seki faite te lalolagi.” (Ioane 17:24) Ona ko te mea ne iloa ‵lei ne ia te alofa o te Atua i te lagi, ne manako a Iesu o fakaasi atu a te alofa tenā i te taimi ne nofo ei a ia i te lalolagi nei i so se feitu gali.

Ne fakaasi mai ne Iesu me i te alofa o Ieova e lauefa. Ne fai mai a Iesu: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” (Ioane 3:16) A te pati Eleni telā ne ‵fuli i konei ki te “lalolagi” e sē fakauiga eiloa ki te “lalolagi” tenei. E pelā mo te fakaaogaga i konei, e fakasino atu eiloa ki tino​—e tonu, ki tino katoa. Ko oko eiloa i te lasi o te alofa o te Atua mō tino, telā ne tuku mai ei ne ia tena toe Tama pele ko te mea ke saoloto a tino fakamaoni mai te agasala mo te mate kae ke maua a te fakamoemoega ko te ola se-gata-mai. E se mafai ne tatou o fua aka te lauefa mo te ‵poko o te vaegā alofa sili tenā.​—Loma 8:38, 39.

Ne folafola mai ne Iesu se fakamalosiga tonu: E alofa malosi a Ieova ki ana tino tapuaki taki tokotasi. Ne akoako mai ne Iesu me i a Ieova e pelā me se tausi mamoe telā e ‵kese kae tāua ki tino taki tokotasi. (Mataio 18:12-14) Ne fai mai a Iesu me e seai se manu foliki e to ki lalo i te laukele e se iloa ne Ieova. Ne toe fakaopoopo mai a Iesu: “E faitaugina katoa olotou lauulu.” (Mataio 10:29-31) Kafai e isi se atamai o Ieova ke iloa ne ia me e tasi te manu foliki e galo mai te ofaga, e pefea te lasi o te taimi e ‵tau ei o kilokilo kae atafai mai a ia ki tino tapuaki taki tokotasi? Kafai e mafai ne Ieova o lau a lauulu takitasi mai ‵tou ulu, e mata, e isi ne fakamatalaga e uiga ki ‵tou olaga​—‵tou manakoga, taumafaiga, mo mea e manava‵se tatou ki ei​—e se iloa ne ia?

Tamana faka-te-lagi E pelā mo te mea ne lavea ne tatou i te mataupu muamua, a Iesu ko te Tama e tokotasi eiloa a te Atua. E mautinoa eiloa me ne fakasino atu faeloa te Tama pele tenei ki a Ieova kae faipati atu e uiga ki a Ia e pelā me ko tena “Tamana.” E tonu, i pati muamua a Iesu kolā ne fakamau ki lalo i te taimi koi 12 i ei ana tausaga, ne taku ne ia a Ieova e pelā me ko “toku Tamana.” (Luka 2:49) A te pati “Tamana” a sae faka-190 taimi i Tusi Evagelia. Ne faipati faeloa a Iesu e uiga ki a Ieova e pelā me ko te “otou Tamana,” “te motou Tamana” mo “toku Tamana.” (Mataio 5:16; 6:9; 7:21) Mai te fakaaogaga o te igoa tenei, ne faka‵mafa mai ei ne Iesu me i te fesokotakiga ‵lei kae tonu mo Ieova e aofia i ei a tino agasala kae sē ‵lei katoatoa.

Alofa fakamagalo Ne iloa ne Iesu me e manakogina ne tino sē ‵lei katoatoa a te alofa fakamagalo o Ieova. I tena tala fakatusa e uiga ki te tama fakamāumāu mea, ne fakatusa ne Iesu a Ieova ki se tamana alofa kae loto fakamagalo telā e ‵fola atu ana lima o puke atu ki tena tama telā ko salamō. (Luka 15:11-32) E fakatalitonu mai ne pati a Iesu me e kilo atu eiloa a Ieova ki so se ‵fuliga i te loto o te tino agasala telā e fai ei ke fakaasi atu ne Ia te alofa fakamagalo. E toka eiloa a Ieova o fakamagalo se tino agasala telā ko salamō. Ne fakamatala mai a Iesu: “Au e fai atu ki a koutou, me penā foki eiloa te lasi o te fiafia i te lagi i te tino agasala e tokotasi, ko salamo i lo te tinoiva mo te tokoiva tino amio‵tonu, kolā e se aoga ki ei te salamō.” (Luka 15:⁠7) Ko oi la te tino e se manako o fakapilipili atu ki se vaegā Atua alofa fakamagalo penā?

Te Tino telā e tali mai ne ia a ‵talo I luga i te lagi a koi tuai o vau ki te lalolagi, ne lavea muamua atu ne Iesu me i a Ieova ko te ‘Tino telā e tali mai ki ‵talo’ kae fiafia a ia ki ‵talo a ana tino tapuaki fakamaoni. (Salamo 65:⁠2) Tela la, i te taimi o tena galuega talai, ne akoako atu ne Iesu ana tino fakalogo‵logo ki te auala e ‵talo atu i ei mo mea kolā e ‵tau o ‵talo atu ki ei. Ne polopoloki atu a ia, penei: “Sa fakaukeuke otou pati.” Ne fakamalosi atu a ia ki tino fakalogo‵logo ke ‵talo atu ki te Atua ke “fai te mea e loto koe ki ei i lalo nei, e pelā mo te faiga i te lagi.” E mafai foki o ‵talo atu tatou mō mea‵kai o te aso, ke fakamagalo ‵tou agasala, kae ke ‵teke atu ki tofotofoga. (Mataio 6:5-13) Ne akoako atu ne Iesu me e saga mai a Ieova e pelā me se tamana ki ‵talo a Ana tavini, kae tali mai ne ia olotou fakatagi e auala i te fakatuanaki.​—Mataio 7:7-11.

E mautinoa eiloa me ne manako a Iesu ke akoako atu ne ia te munatonu e uiga ki a Ieova kae ko ia foki se vaegā Atua pefea. Kae e isi eiloa se mea e uiga ki a Ieova telā ne loto finafinau a Iesu o fakaasi mai​—te auala telā e ‵fuli ei ne Ieova a te lalolagi kātoa ke fakataunu ei Tena fuafuaga mō te lalolagi tenei e penā foki mo tino i ei. A te ‵tonuga loa, a te vaega o te fekau tenei a Iesu ko te matua eiloa o tena talaiga.

[Fakamatalaga fakaopoopo]