Iesu Keliso​—Te Auala e Aofia ei Koe i Tena Fekau

“Au ne vau ko te mea ke maua ne latou te ola, kae ke maua malosi eiloa ne latou.”​—IOANE 10:10.

NE VAU muamua eiloa a Iesu Keliso ki te lalolagi nei ke tuku mai se mea, kae e seki vau ke maua ne ia se mea. E auala i tena galuega talai, ne tuku mai ne ia se meaalofa ‵togi ‵mafa ki tino katoa​—se fekau telā e fakaasi mai i ei a te munatonu e uiga ki te Atua mo Tena loto. A tino kolā e ‵saga atu ki te fekau tenā ka fia‵fia i te olaga nei, e pelā mo mea ko oti ne fakatalitonu aka ne te fia miliona o Kelisiano ‵tonu.a A ko te fakavae o te fekau telā ne folafola atu ne Iesu ko te ‵toe meaalofa tāua eiloa i mea katoa​—te ola ‵lei katoatoa telā ne tuku mai ne ia ki a tatou. E fakalagolago eiloa ‵tou ola ki te se-gata-mai ki te tāua o tena fekau.

Mea kolā ne tuku mai ne te Atua mo Keliso Ne iloa ne Iesu me ne ‵tau o mate a ia i se mate fakalogo‵mae i lima o ana fili. (Mataio 20:17-19) Kae i ana pati lauiloa kolā ne fakamau i te Ioane 3:16, ne fai mai a ia penei: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” Ne fai mai foki a Iesu me i a ia ne vau “ke tuku atu foki a toku ola mō tino e tokouke.” (Mataio 20:28) Kaia e fai atu ei a ia me i tena ola ka tuku atu i lō te puke keatea?

Ona ko tena alofa sē fakanafagina, ne fai ei ne te Atua a fakatokaga ke faka‵sao a tino mai te agasala telā ne togi mai mo tena ikuga​—te tulaga sē ‵lei katoatoa mo te mate. Ne fai ne te Atua a te mea tenei mai te ugamaiga o tena Tama e tokotasi ki te lalolagi ke mate e pelā me se taulaga. Ne fakalogo katoatoa a Iesu i te tukumaiga o tena ola ‵lei katoatoa e pelā me se tino mō tatou. Ne taku a te fakatokaga tenei ki te togiola, ko te meaalofa sili a te Atua mō tino katoa.b Se meaalofa telā e mafai o iku atu ki te ola se-gata-mai.

Mea kolā e ‵tau o fai ne koe E mata, e fai a te togiola e pelā me se meaalofa ki a koe eiloa? E faka‵na eiloa a te mea tenā ki a koe. Ke fai se fakatusa: Mafaufau me ko tuku atu ne se tino ki a koe se meaalofa i se pokisi. E tonu, ka se fai eiloa pelā me i a koe a te meaalofa ke oko eiloa ki te taimi e tuku atu i ei kae talia ne koe. I se auala tai ‵pau, e tuku atu ne Ieova a te togiola ki a koe, kae e se i a koe eiloa a te meaalofa tenei vagana ke tuku atu kae talia ne koe. E pefea la?

Ne fai mai a Iesu me i tino kolā e “fakatuanaki” ki a ia ka maua ne latou a te ola se-gata-mai. A te fakatuanaki e aofia i ei a te auala e ola ei koe. (Iakopo 2:26) A te fakatuanaki ki a Iesu e fakauiga ki te fakafetaui aka o tou olaga ki pati mo mea ne fai ne Iesu. Ke fai penā, e ‵tau o iloa ‵lei ne koe a Iesu mo tena Tamana. Ne fai mai a Iesu: “Kae tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.”​—Ioane 17:3.

I tausaga e 2,000 ko ‵teka, ne fai atu ne Iesu Keliso se fekau telā ne ‵fuli i ei a olaga o te fia miliona o tino i te lalolagi kātoa. E mata, e fia iloa ne koe a mea e uke atu e uiga ki te fekau tenā mo te auala e maua ei ne koe mo ou tino pele a mea aoga mai te mea tenei, e se mō te taimi fua tenei, kae ke oko foki loa ki te se-gata-mai? E fia‵fia eiloa a Molimau a Ieova o fesoasoani atu ki a koe.

Ka fakamatala mai i mataupu konei e ‵soko mai a mea e uiga ki a Iesu Keliso, te tagata telā ne folafola atu ne ia se fekau telā ne mafai o ‵fuli ei a olaga o tino ki te se-gata-mai.

[Fakamatalaga fakaopoopo]