Tagata, E Mata, E Faka‵logo Koutou Ki Te Pulega A Keliso?

“I a Keliso e sili eiloa i tino katoa.”​—1 KOLINITO 11:3.

1. Se a te mea e fakaasi mai i ei me i a Ieova se Atua o te tokagamalie?

“TE MOTOU Aliki mo te motou Atua! E ‵tau eiloa o maua ne koe a te ‵malu, te vikiga, mo te ‵mana,” e fai mai te Fakaasiga 4:11, “me ne faite ne koe a mea katoa, kae mai i tou loto foki, ne faite ei ne koe a mea ke tino mai kae ke ola foki.” Ona ko te mea ne faite ne Ia a mea katoa, e fai eiloa a Ieova te Atua mo fai te Atua Tafasili i te Maluga i te lagi mo te lalolagi kae sili atu foki i ana mea katoa ne faite. Me i a Ieova e sē se Atua telā e “sona fai” ana mea, kae se Atua o te filemu, telā e mafai o lavea atu.​—1 Kolinito 14:33; Isaia 6:1-3; Epelu 12:22, 23.

2, 3. (a) Ko oi te tino muamua ne faite ne Ieova? (e) Se a te tulaga ne maua ne te Tama toekimua ki tena Tamana?

² A koi tuai o faite a nisi mea katoa, ko leva eiloa ne ola a te Atua i te fia o tausaga. A tena mea muamua eiloa ne faite ko te tino faka-te-agaga telā ne lauiloa e pelā me ko “te Muna” ona ko te mea ne fai a ia e pelā me se Tukumuna mō Ieova. A te Muna ko te tino telā ne faite ei a nisi mea katoa e auala i a ia. Fakamuli ifo, ne vau a ia ki te lalolagi e pelā me se tino ‵lei katoatoa kae ne lauiloa a ia e pelā me ko Iesu Keliso.​—Faitau te Ioane 1:1-3, 14.

³ Ne a muna a te Tusi Tapu e uiga ki tulaga o te Atua mo tena Tama toekimua? E fai mai a te apositolo ko Paulo i ana tusitusiga fakaosofia, penei: “Au e manako ke iloa ne koutou i a Keliso e sili eiloa i tino katoa, a te tagata e sili foki i tena avaga, ka ko te Atua e sili foki i a Keliso.” (1 Kolinito 11:3) A Keliso e nofo mai lalo i te pulega a tena Tamana. E tāua eiloa a te pulega mo te fakalogo ki te faiga ke tumau te filemu mo te tokagamalie i va o mea ola katoa. A te tino foki telā “ne faite a mea katoa e alatu i a ia” e manakogina ke fakalogo ki te pulega a te Atua.​—Kolose 1:16.

4, 5. Ne pefea a lagonaga o Iesu i tena tulaga ki a Ieova?

⁴ E pefea a lagonaga o Iesu e uiga ki te fakalogo ki te pulega a Ieova mo tena vauga ki te lalolagi? E fai mai te Tusi Tapu: “I tena nofoga i te lagi, ne iai mo ia a te ‵malu faka-Atua, kae ne puke ‵mau ne ia te ‵malu fakaatua tenei. Mai luga i tona lotomalie, ne tiakina katoatoa ne ia tona ‵malu faka-Atua, kae fai mo tavini. Ne liutino a ia, ne fanau foki a ia i foliga faka te foitino. Ne loto maulalo a ia kae ne sasale foki i te auala o te fakalogo muna, ke oko eiloa ki tona mate, telā ko tena mate i luga i te sataulo.”​—Filipi 2:5-8.

⁵ Ne fakalogo eiloa a Iesu mo te loto maulalo ki te loto o tena Tamana i taimi katoa. Ne fai mai a ia: “E se mafai ne au o fai se mea e tasi i taku pule eiloa. . . . Tela la, e tonu taku fakamasinoga, me se fai ne au i toku loto, ka ko te loto o ia telā ne uga mai ne ia au.” (Ioane 5:30) Ne folafola mai a ia: “Me fai sāle eiloa ne au a mea kolā e fiafia a ia ki ei.” (Ioane 8:29) I te fakaotiga o tena olaga i te lalolagi, ne fai atu a Iesu i tena ‵talo ki tena Tamana: “Ne fakaasi atu ne au tou ‵malu i te lalolagi. Ne fakapalele foki ne au te galuega ne tuku mai ne koe ki a au ke fai.” (Ioane 17:4) E fakamaoni mai i ei me e se faigata eiloa ki a Iesu ke iloa kae talia ne ia te pulega a te Atua ki luga i a ia.

E Maua ne te Tama a Mea Aoga Mai i te Fakalogo ki te Tamana

6. Ne a uiga ‵gali ne fakaasi mai ne Iesu?

⁶ I te taimi ne nofo ei a ia i te lalolagi, ne fakaasi atu ne Iesu a uiga ‵gali e uke. E aofia i ei ko te alofa sili ne fakaasi atu ne ia mō tena Tamana. “Au e alofa ki te Tamana,” ko ana muna. (Ioane 14:31) Ne fakaasi atu foki ne ia a te alofa sili ki tino. (Faitau te Mataio 22:35-40.) Ne atafai kae loto malamalama a Iesu, e se faigata io me e pule mālō atu. “O‵mai ki a au a koutou katoa kolā e fi‵ta i te ‵mafa otou amoga,” ko ana muna, “me ka avatu ne au ki a koutou a te malōlōga. Ke amo ne koutou taku amoga, kae fakaakoako mai ki a au, me i a au e filemu kae loto maulalo; e maua foki i ei ne koutou a te tokagamalie otou agaga. Me amogofie taku amoga, kae māmā foki.” (Mataio 11:28-30) Ne maua eiloa ne tino kese‵kese, e pelā me ne mamoe, kae maise eiloa a latou kolā e puapuaga kae loto mafatia, a fakamafanafanaga sili e uiga mo te fekau fakamalosi loto a Iesu.

7, 8. Mai lalo i te Tulafono, ne a mea ne seki mafai o fai ne te fafine telā ne ‵tafe tena sua, kae ne pefea a faifaiga a Iesu ki tou fafine?

⁷ Mafaufau ki faifaiga a Iesu ki fafine. E ‵tusa mo tala fakasolopito, ko oti eiloa ne fai fakamasei ne tagata e tokouke a fafine. Konā eiloa a mea ne fai ne takitaki lotu i Isalaelu mua. Kae ne fakaasi atu eiloa ne Iesu a te āva ki fafine. Ne fakamaoni mai a te mea tenei i ana faifaiga ki se fafine telā ne ‵tafe tena sua i tausaga e 12. “E uke a mea ne fi‵ta ei a ia i tokita” kae ne fakamāumāu ne ia ana mea katoa i ana taumafaiga ke ‵lei a ia. Faitalia ana taumafaiga katoa, ne “gasolo aka . . . o masei” tena masaki. Mai lalo i te Tulafono, ne seki ‵ma a ia i te kilokiloga a tino. So se tino e patele ki tou fafine, ka se ‵ma foki.​—Levitiko 15:19, 25.

⁸ I te taimi ne lagona ei ne te fafine me ne faka‵lei ne Iesu a tino ma‵saki, ne fanatu a ia i te vaitino, ana muna: “Ko au fua ke patele atu ki te gatu o Iesu, ko ‵lei ei au.” Ne patele atu a ia ki a Iesu, kae ne ‵lei fakavave ei a ia. Ne iloa ne Iesu me ne seki ‵tau eiloa mo tou fafine o patele atu ki ana gatu. E tiga eiloa te feitu tenā, ne seki kote ne ia a tou fafine. E ‵kese mai i ei, ne atafai atu tou tagata ki tou fafine. Ne malamalama a ia i ana lagonaga i tausaga katoa o tena masaki kae ne iloa foki ne ia a te lasi o te manakoga mō se fesoasoani. Ona ko tena alofa atafai, ne fai atu a Iesu ki tou fafine: “Taku tama, ko tou fakatuanaki ko ola ei koe. Na fano la mo te manuia, i a koe ko ‵lei.”​—Maleko 5:25-34.

9. I te taimi ne taumafai ei a soko o Iesu o taofi a tama‵liki mai i te olo atu ki a ia, ne saga atu pefea a ia ki ei?

⁹ Ke oko foki ki tama‵liki ne seki ma‵taku latou ma ‵nofo atu i tafa o Iesu. I te taimi ne aumai ei ne tino a tama‵liki ki a ia, ne taofi latou ne ana soko, ona ko te mafau‵fau me e se manako eiloa a Iesu ke fakalavelave atu a tama‵liki. Kae e se penā eiloa a lagonaga o Iesu. E fai mai te tala i te Tusi Tapu ki a tatou: “Ne iloa ne Iesu a te mea ne fai ne ona soko, ko oko eiloa i tena ita, fai atu ei ki ona soko: ‘Tuku tama‵liki ke o‵mai ki a au! Sa taofigina latou, me e o tino penei a te Malo o te Atua.’” E se gata i ei, “ne kopi ne ia a tama‵liki, kae puke atu ona lima ki a latou taki tokotasi o fakamanuia atu latou.” Ne seki talia fua ne Iesu a tama‵liki; ne atafai atu foki a ia ki a latou.​—Maleko 10:13-16.

10. Ne mafai pefea o maua ne Iesu a uiga kolā ne fakaasi mai ne ia?

¹⁰ Ne maua pefea ne Iesu a uiga kolā ne fakaasi atu ne ia i tena olaga i te lalolagi nei? I tena olaga mai mua o tena vauga ki te lalolagi, ne kilokilo faeloa a ia ki tena Tamana faka-te-lagi i se taimi leva ‵ki kae ne fakaakoako atu ki ana auala. (Faitau te Faataoto 8:22, 23, 30.) I te lagi, ne lavea ne ia a te fakagaluegaga ne Ieova o tena Pulega i se auala alofa ki luga i Ana mea katoa ne faite kae ne fai eiloa mo fai se vaega mautinoa o ana uiga. E mata, ne mafai o fai ne Iesu a mea konā moi ne seki fakalogo a ia? Se mea fakafiafia ki a ia a te fakalogo ki tena Tamana, kae se mea gali foki ki a Ieova ke maua ne ia se vaegā Tama penā. I te taimi ne nofo ei a ia i te lalolagi, ne fakaasi katoatoa atu ne Iesu a uiga ‵gali o tena Tamana faka-te-lagi. Ko oko eiloa i te taulia o tatou ke faka‵logo ki te Keliso, te Pule o te Malo faka-te-lagi, telā ne ‵tofi aka ne te Atua!

Ke Fakaakoako ki Uiga o Keliso

11. (a) Ko oi e ‵tau o ga‵lue malosi tatou ke fakaakoako ki ei? (e) Kaia e ‵tau ei mo tagata i te fakapotopotoga o taumafai malosi ke fakaakoako atu ki a Iesu?

¹¹ A tino katoa i te fakapotopotoga Kelisiano, maise eiloa a tagata, e ‵tau o tumau i te taumafai malosi ke fakaakoako atu ki uiga o Keliso. E pelā mo te mea ne lavea atu muamua, e folafola mai te Tusi Tapu: “I a Keliso e sili eiloa i tino katoa.” E pelā mo te fakaakoako atu o Keliso ki tena Ulu, ko te Atua tonu, e ‵tau foki mo tagata o taumafai ke fakaakoako atu ki te lotou ulu​—ko te Keliso. Ne fai eiloa penā a te apositolo ko Paulo i te taimi ne fai ei a ia mo fai se Kelisiano. Ne fakamalosi atu a ia ki Kelisiano: “Fakaakoako mai ki a au, e pelā mo au e fakaakoako ki a Keliso.” (1 Kolinito 11:1) Kae ne fai atu a te apositolo ko Petelu: “Tenei te pogai ne kalagagina ei koutou ne te Atua; i te mea i a Keliso ne puapuagatia mō koutou, kae tuku atu foki ne ia ki a koutou te fakaakoakoga, ke tau‵tali ei koutou i ona kalafaga.” (1 Petelu 2:21) A te fakamalosiga ke tau‵tali atu ki te Keliso se mea e ‵tau o ‵saga malosi atu ki ei a tagata ona ko nisi pogai. A latou ko tino kolā e fai mo fai ne toeaina mo tavini fakafaifeau. E pelā eiloa mo te fiafia o Iesu i te fakaakoako atu ki a Ieova, e ‵tau foki mo tagata Kelisiano o fia‵fia ke fakaakoako atu ki a Keliso mo ana uiga.

12, 13. E ‵tau o pefea a faifaiga a toeaina ki mamoe kolā ne tuku atu ke tausi ne latou?

¹² E maua ne toeaina i te fakapotopotoga Kelisiano a te tiute ke fai pelā mo Keliso. Ne tuku atu ne Petelu a te fakamalosiga tenei ki te kau ma‵tua, io me ko toeaina: “Ke fai koutou mo tausi mamoe o te lafu a te Atua telā ne tuku atu ne ia ki a koutou, kae tausi faka‵lei ki ei mo te loto fiafia, me tenā te mea e manako ki ei te Atua. Fai otou galuega e se mō te manatu fua ke maua te ‵togi kae mai te loto lagona o tavini atu mo te fakamaoni. Sa taumafai o pule fakasaua ki tino kolā ko tuku atu ke tausi ne koutou, ka ke fai koutou mo fakaakoakoga ki te lafu mamoe.” (1 Petelu 5:1-3) E se ‵tau o pule fakasaua atu a toeaina Kelisiano. E tau‵tali latou ki te fakaakoakoga a Keliso, mai te taumafai ke a‵lofa, atafai, loto maulalo, kae kaima‵lie i olotou faifaiga ki mamoe kolā ne tuku atu ke tausi ne latou.

¹³ A tino kolā e fai ne latou a te takitakiga i te fakapotopotoga ne tagata sē ‵lei katoatoa, kae e ‵tau faeloa o talia ne latou te lotou tulaga tenā. (Loma 3:23) Tela la, e ‵tau o loto finafinau latou o tauloto e uiga ki a Iesu kae tau‵tali atu ki tena alofa. E ‵tau o mafaufau ‵mafa latou ki faifaiga a te Atua mo Keliso ki tino kae taumafai ke fakaakoako atu ki a lāua. E fakamalosi mai a Petelu ki a tatou, penei: “A koutou katoa, e ‵tau o ‵pei koutou ki te gatu o te loto maulalo, ko te mea ke fakatau tavini koutou; me i muna a te Tusi, ‘A te Atua e ‵teke ki tino fakamata‵mata, kae tuku atu te alofa tauanoa ki tino loto maulalo.’”​—1 Petelu 5:5.

14. E pefea te lasi o te āva e ‵tau o fakaasi atu ne toeaina ki nisi tino?

¹⁴ I olotou faifaiga ki te lafu a te Atua, e ‵tau o fakaasi atu ne tagata kolā ne ‵tofi aka i te fakapotopotoga a uiga ‵lei. E fai mai te Loma 12:10: “Ke fakatau a‵lofa koutou i te alofa fakataina; kae ke fakatau fia‵fia koutou, i te āva o te suā tino ki te suā tino.” E fakaasi atu ne toeaina mo tavini fakafaifeau a te āva ki nisi tino. E pelā me ne Kelisiano, a tagata konei ‘e se fai ne latou ne mea e fakavae i luga i te manatu fakapito mō te ‵lei o te tino, io me i luga i te fakamatamata; kae e fakatau loto maulalo latou, kae e se manatu ake foki me e ‵lei atu latou i nisi tino.’ (Filipi 2:3) E ‵tau mo latou kolā e fai ne latou te takitakiga o ‵kilo atu ki nisi tino me e ma‵luga atu i a latou. Mai i te fai penā, e tau‵tali atu a vaegā tagata penā kolā ne ‵tofi aka ki pati fakatonutonu a Paulo: “Ko tatou kolā e ma‵losi i te fakatuanaki, e ‵tau mo tatou o fesoasoani ki mea e se mafai ne tino vāi‵vai, kae ke se fakafiafia ifo tatou ki a tatou eiloa. E ‵tau mo tatou taki tokotasi o fakafiafia o‵tou tuakoi mō te olotou ‵lei, ko te mea ke fakatupu ake ei a ia i te fakatuanaki. Me i a Keliso e seki fakafiafia ki a ia eiloa.”​—Loma 15:1-3.

‘Ke Atafai Atu ki Fafine A‵vaga’

15. E ‵tau o pefea a faifaiga a tagata a‵vaga ki olotou avaga?

¹⁵ Mafaufau nei ki pati fakatonutonu a Petelu ki tagata a‵vaga. Ne tusi mai a ia: “A koutou e tagata, i te otou ‵nofo tasi mo otou avaga, e ‵tau o iloa ne koutou me vāi‵vai latou; tela la, e ‵tau mo koe o atafai ki ei mo te āva.” (1 Petelu 3:7) Ke āva ki se tino e fakauiga ki te fakamalugaga o te tino tenā. Tela la, ka mafaufau koe ki manatu, mea e manakogina, mo manakoga o se tino penā kae fakalogologo faeloa ki ei māfai e isi se mataupu tāua vagana ke isi se pogai ‵tau ke se fai ei penā. Konā eiloa a faifaiga e ‵tau o fai ne se tagata avaga ki tena avaga.

16. Se a te fakailoaga ne tuku mai ne te Muna a te Atua ki tagata a‵vaga ke fakaeteete i ei e uiga ki te āva ki olotou avaga?

¹⁶ I te taimi ne fai atu ei ki tagata a‵vaga ke āva ki olotou avaga, ne toe fai atu ne Petelu a te pogai ke fakaeteete i ei: “Ko te mea ke seai se mea e fakalavelave atu ki otou talosaga.” (1 Petelu 3:7) E fakaasi manino mai i te mea tenā a te tāua ki a Ieova a faifaiga a se tagata ki tena avaga. A te fakatamala ke fakaasi atu te āva ki tou fafine e mafai o fakalavelave atu ki ana ‵talo. E sili atu i ei, e a, e se ‵saga faka‵lei atu a fafine a‵vaga māfai e fakaasi atu a faifaiga āva ne olotou a‵vaga?

17. E ‵tau o pefea te lasi o te alofa o se tagata avaga ki tena avaga?

¹⁷ E fakatonutonu mai te Muna te Atua e uiga ki te alofa ki te avaga fafine: “A tagata e ‵tau o a‵lofa ki olotou avaga e pelā eiloa mo te lotou atafai ki olotou foitino ‵tonu. . . . E seai lele eiloa se tino e ita ki tena foitino. E atafai ‵lei ki ei, i te fagai ne ia kae fai faka‵lei ki ei, e pelā foki eiloa mo faiga a Keliso ki te ekalesia . . . E ‵tau mo tagata katoa o a‵lofa ki olotou avaga, e pelā eiloa mo te lotou a‵lofa ki a latou eiloa.” (Efeso 5:28, 29, 33) E pefea te lasi o te alofa e ‵tau o fakaasi atu ne tagata a‵vaga ki olotou a‵vaga? Ne tusi mai a Paulo: “A koutou e tagata, ke a‵lofa koutou ki otou avaga, e pelā eiloa mo Keliso ne alofa ki te ekalesia, kae tuku atu foki tona ola mō te ekalesia.” (Efeso 5:25) E tonu, e ‵tau mo te tagata avaga o loto fiafia ke mate mō tena avaga, e pelā mo te mea ne fai ne Keliso mō nisi tino. Kafai e atafai, e alofa, kae ‵saga faka‵lei atu e aunoa mo uiga kaimanako a te tagata avaga Kelisiano ki tena avaga, e faigofie atu ki tena avaga ke fakalogo ki tena takitakiga.

18. Se a te fesoasoani e maua ne tagata i te tausi atu ki olotou tiute i te fakaipoipoga?

¹⁸ E mata, ko faigata a te fakaasiatuga o te āva ne tagata a‵vaga ki olotou a‵vaga? Ikai, e se mafai o fai mai a Ieova ke fai ne latou se mea telā e se mafai ne latou o fai. I tafa i ei, e mafai eiloa o maua ne tino tapuaki a Ieova a te malosi sili eiloa i te lagi mo te lalolagi​—ko te agaga tapu o te Atua. Ne fai mai a Iesu: “Tela la, kafai koutou e ma‵sei, kae e iloa ne koutou o tuku atu a mea ‵lei ki otou tama‵liki, e se sili atu la te otou Tamana i te lagi, i te fia tuku atu o te agaga tapu ki tino kolā e fakamolemole atu ki a ia?” (Luka 11:13) I olotou ‵talo, e mafai o akai atu a tagata a‵vaga me e auala i tena agaga, ka fesoasoani atu a Ieova ki a latou i olotou faifaiga ki nisi tino, e aofia i ei olotou avaga.​—Faitau te Galuega 5:32.

19. Se a te mea ka suke‵suke ki ei i te ‵tou suā mataupu mō sukesukega?

¹⁹ A te ‵tonuga loa, e tauave ne tagata se tiute ‵mafa ke fakaakoako o faka‵logo ki te Keliso kae tau‵tali atu ki tena takitakiga e pelā me ko te ulu. Kae e a fafine, maise eiloa a fafine a‵vaga? Ka fakamatala mai ne te suā mataupu a te kilokiloga e ‵tau o maua ne latou ki olotou tulaga i te fakatokaga a Ieova.

E Masaua ne Koe?

• Ne a uiga o Iesu e ‵tau o fakaakoako tatou ki ei?

• Ne a faifaiga e ‵tau o fakaasi atu ne toeaina ki mamoe?

• E ‵tau o pefea a faifaiga a se tagata avaga ki tena avaga?

[Ata i te itulau e 15]

Fakaakoako ki a Iesu mai i te fakaasiatuga o te āva ki nisi tino