E Mata, ko Oti ne Galo i a Tatou a te Kilokiloga Tonu e Uiga ki te Agasala?

I ASO ko ‵teka, ne lagona faeloa ne tino kolā e olo atu ki lotu a olotou faifeau e lauga atu ke ‵teke ki “agasala matagā e fitu”​—te finalalolagi, gafula, fia maumea, paie, kaitaua, loto masei, mo te fakamatamata. Kae i te ukega o taimi, e fakamatala atu ne te faifeau a ikuga sē ‵lei o te agasala kae fakamalosi atu ki ana tino ke sala‵mo. E fai mai se tino tusitala, penei: “Nei la, ko fakaseke‵seke a faifeau i fakamatalaga sē ‵tonu e uiga ki te agasala kae ‵saga tonu atu fua latou ki mataupu kolā e ‘fia‵fia ki ei’ olotou kaulotu.”

Ko oti ne iloilo aka ne tino tusitala o te nusipepa a te manakoga foki tenā. Konei la a nai fakamatalaga mai te nusipepa:

▪ “Ko sē lauiloa nei a kilokiloga mua e uiga ki te agasala, te salamō mo te fakasaolotoga kae ko lauiloa nei a lauga ‵gali e uiga ki te auala e ati aka ei ne koe a te loto talitonu ki a koe mo tou alofa ki a koe eiloa.”​—Star Beacon, Ashtabula, Ohio.

▪ “A te kilokiloga e uiga ki te tāua o te agasala io me ko te fakaeteete i a tatou ma agasala ko gasolosolo malie o galo atu.”​—Newsweek.

▪ “Ko se toe fesili ifo eiloa tatou penei ‘Se a te mea e manako ki ei te Atua ke fai ne au,’ kae ko fesili atu fua penei ‘Se a te mea e mafai ne te Atua o fai mai ki a au?’”​—Chicago Sun-Times.

I loto i se fenua telā e ‵fonu i tino valevale, e fakata‵mala a tino i ei ke fai a faka‵tauga ‵lei. E sē se faiga āva ke fakamasino ne tatou a amioga a nisi tino. A te ‵toe agasala matagā ko te fakamasino ne tatou a faifaiga a te suā tino. Tela la, e ‵tau o mafau‵fau tatou, penei: ‘A te mea telā e talitonu koe ki ei me e ‵lei ki a koe, e se ‵tau eiloa mo koe o taumafai ke faimālō atu ou mafaufauga ki so se tino. I aso konei, e fakatokatoka ne tino olotou olaga ki vaegā tulaga tāua kese‵kese. E se ko koe fua e iloa ne koe te mea tonu. Koi aoga eiloa a mea kolā e fakatāua ne nisi tino e pelā eiloa mo koe.’

Ko oti ne ‵fuli a te kilokiloga tenei i te auala e fai‵pati ei a tino. A te pati “agasala” ko se fakaaoga nei ne tino i olotou fai‵patiga tāua. Mō te tokoukega o tino, ko fai ne latou a te mataupu tenei e pelā me se mea fai faka‵kata. A tino kolā e ‘‵nofo fakatasi’ kae seki avaga ko se fai pelā me se “agasala.” Ko se toe fai latou e pelā me ne tino “mulilua”; ko “fai famau” fua latou. Ko se fai latou mo “tino amio fakasotoma”; ko ‵lei fua ki a latou “se isi vaegā olaga.”

E seai se fakalotolotolua me ko oti ne ‵fuli a mea kolā ne talia ne tino e pelā me ne “mea masani” io me e taku fakamasei e pelā me se “agasala.” Kae kaia ko ‵fuli i ei a kilokiloga a tino? Se a tou iloa e uiga ki te agasala? Kae e mata, e tāua eiloa tau kilokiloga ki ei?