Mea Kolā Ka Fakaasi Faka‵sau Mai I Te Aso O Ieova

“A te aso o [Ieova] e oko mai e pelā mo se tino kaisoa, . . . [“kae ka fakaasi faka‵sau atu foki te lalolagi mo ana galuega,” NW].”​—2 PETELU 3:10.

1, 2. (a) Ka fakaseai atu pefea a te olaga masei tenei? (e) Ne a fesili ka mafau‵fau tatou ki ei?

E FAKAVAE a te olaga masei tenei ki te manatu ‵se me e mafai ne te tagata o pule atu ki te lalolagi mo te manuia e aunoa mo Ieova. (Salamo 2:2, 3) E mata, e mafai o tumau ki te se-gata-mai se mea telā ne fakavae ki mea ‵se? Ikai eiloa! Kae e se ‵tau o faka‵tali tatou ki te fakaseaiga o te lalolagi a Satani i a ia eiloa. I lo te fai penā, ka fakaseai eiloa ne te Atua i tena taimi tonu mo te auala e manako a ia ki ei. A faifaiga a te Atua ki te lalolagi masei tenei ka fakaasi faka‵lei mai ei a tena fai mea tonu mo tena alofa.​—Salamo 92:7; Faataoto 2:21, 22.

² “A te aso o [Ieova],” ko muna a te apositolo ko Petelu, “e oko mai e pelā mo se tino kaisoa. I te Aso tenā ka palele atu te lagi mo te ‵gulu fakamataku, ka ‵sunu a mea katoa [“kae ka fakaasi faka‵sau atu foki te lalolagi mo ana galuega”, NW].” (2 Petelu 3:10) Se a te “lagi” mo te “lalolagi” telā e fakaasi mai i konei? Ne a “mea katoa” kolā ka ‵sunu? Kae se a te mea ne fakauiga ki ei a Petelu me “ka fakaasi faka‵sau atu foki te lalolagi mo ana galuega”? Kafai ko iloa ne tatou a tali ki fesili konei ka fesoasoani atu ei ke toka tatou mō fakalavelave faka‵mataku kolā ka ‵sae aka i aso mai mua.

Ka Palele Atu a te Lagi mo te Lalolagi

3. Se a te “lagi” telā ne fakaasi mai i te 2 Petelu 3:10, kae ka palele atu pefea?

³ Kafai ko fakaaoga a pati fakatusa i te Tusi Tapu, a te pati “te lagi” e fakasino atu faeloa ki pulega ma‵luga, kolā e pule atu ki tino mai lalo i a latou. (Isaia 14:13, 14; Fakaasiga 21:1, 2) A te “lagi” telā “ka palele atu” e fakaata mai ne ia a malo o tagata kolā e pule atu ki te lalolagi sē amioatua. A te palele atu o te lotou “‵gulu fakamataku”​—io me “se logoā” e ‵tusa mo nisi ‵fuliga—⁠e mafai o fakaasi mai i ei a te fakaseaiga katoatoa o lagi konei.

4. Se a te “lalolagi,” kae ka fakaseai atu pefea?

⁴ A te “lalolagi” e fakaata mai ne ia te potukau o tino kolā ne ‵vae keatea mai i te Atua. A te vaegā lalolagi tenā ne ola i aso o Noa, kae e auala i se fakatonuga a te Atua, ne fakaseai atu ei i te Lolo. “Ka ko te lagi mo te lalolagi konei e iai nei e se tumau eiloa, e ‵sunu ki te afi e alatu i te muna a te Atua. E tuku eiloa penā ke oko ki te aso e fakamasino kae fakamasei ei a tino amio ma‵sei.” (2 Petelu 3:7) E tiga eiloa ne fakaseai atu i te Lolo a tino katoa kolā e se amioatua i te taimi e tasi, a ko te fakaseaiga telā ko pili mai i te taimi o te ‘fakalavelave lasi’ ka faifai malie. (Fakaasiga 7:14) I te kamataga o te fakalavelave tenei, ka fai ei ne te Atua a malo fakapolitiki o te lalolagi tenei ke fakaseai ne latou a ‘Papelonia te Sili,’ ke fakaasi atu ei tena takalialia ki te fafine tali tagata fakalotu tenā. (Fakaasiga 17:5, 16; 18:8) Kae i te taua i a Amaketo, te fakaotiga o te fakalavelave lasi, ka ‵fulu faka‵ma ei ne Ieova a te ‵toega o te lalolagi a Satani.​—Fakaasiga 16:14, 16; 19:19-21.

“Ka ‵Sunu a Mea Katoa”

5. Ne a mea e fakatusa ki ei a mea katoa?

⁵ Ne a “mea katoa” kolā ka “sunu”? A “mea katoa” kolā ne fakamatala mai ne Petelu e fakasino atu ki mea kolā e fakatāua ne te lalolagi e pelā mo faifaiga sē amioatua, uiga, amioga mo fakamoemoega. E aofia i “mea katoa” konei a “te agaga o te lalolagi,” telā “e pule ne ia a tino kolā e se faka‵logo ki te Atua.” (1 Kolinito 2:12; faitau te Efeso 2:1-3.) A te agaga tenā, io me ko te “ea” tenā e lavea atu i te lalolagi a Satani. E fakamalosi ne ia a tino ke mafau‵fau, fai olotou aofaga, fai‵pati, kae gasue‵sue i auala kolā e fakaata mai i ei te mafaufau o Satani, te pule fakamatamata “o te ‵mana fakatiapolo i te lagi.”

6. E fakaasi mai pefea ne te agaga o te lalolagi a ia eiloa?

⁶ Tela la, me ne iloa io me se iloa ne koe, a tino kolā e sikomia ne te agaga o te lalolagi e talia ne latou a olotou mafaufau mo loto ke fakamalosi aka ne Satani, ko te mea ke fakaasi mai ne latou a mafaufauga mo uiga o Satani. E iku atu ki te fai ne latou a mea e ma‵nako latou ki ei, e aunoa mo te faiga o te loto o te Atua. E ‵saga atu latou ki tulaga kolā e fakavae ki te fakamatamata mo te kaimanako, e fakaasi mai ne latou se kilokiloga ‵teke ki pulega, kae tosina atu ki “manakoga agasala, ko mea e matea ne tino kae ma‵nako ki ei.”​—Faitau te 1 Ioane 2:15-17.a

7. Kaia e ‵tau ei mo tatou o ‘puipui ‵tou loto’?

⁷ Kae e tāua ‵ki ke ‘puipui ‵tou loto’ mai te atiakaga o te poto mai te Atua i ‵tou fakaikuga e uiga ki taugasoa, mea kolā e fai‵tau ne tatou, fakafiafiaga, mo te Itaneti! (Faataoto 4:23) Ne tusi mai te apositolo ko Paulo: “Ke onoono faka‵lei koutou, ke mo a e vau se tino o fakapologa koutou i te poto mo takolekolega se aoga, kolā e fakavae i munatuku a tino, io me ko agaga pule muamua o te lalolagi, kae se fakavae i a Keliso.” (Kolose 2:8) E manakogina ke fakaoko fakavave atu a te fakatonuga tenā ona ko te pili mai o te aso o Ieova, me i te ‘vela’ telā e seki fai aka eiloa penā muamua ka ‵sunu ne ia a “mea katoa” o te olaga masei a Satani, kae fakaasi faka‵sau atu ei a te sē mafai ne latou o tali a te ‵vela o te kaitaua o te Atua. A te mea tenei e fakamasaua mai ki a tatou e uiga ki pati i te Malaki 4:1: “Ko pili o oko mai a te aso e ‵sunu ei a tino ma‵sei mo tino fakamata‵mata pelā me ne kaiga. I te aso tenā, ka ‵ka valevale latou, kae ka seai ne mea e ‵toe mai i a latou.”

“Ka Fakaasi Faka‵sau Atu Foki te Lalolagi mo Ana Galuega”

8. Ka “fakaasi faka‵sau” mai pefea a te lalolagi mo ana galuega?

⁸ Se a te mea ne fakauiga ki ei a Petelu i te taimi ne tusi mai a ia me “ka fakaasi faka‵sau atu foki te lalolagi mo ana galuega”? A te pati “fakaasi faka‵sau” e mafai foki o ‵fuli ki te “tuku faka‵sau atu.” Ne fakauiga eiloa a Petelu me i te taimi o te fakalavelave lasi, ka tuku faka‵sau atu ne Ieova a te lalolagi a Satani, ke fakaasi atu ei a tena ‵teke ki a Ia mo Tena Malo kae e ‵tau eiloa o fakaseai atu. E auala i pati fakapelofeta, e fai‵tau tatou penei ki te Isaia 26:21: “A te Aliki [ko Ieova] ko vau mai i te lagi o fakasala a tino o te lalolagi ona ko olotou agasala. A tino kolā ne tamate kae e se iloa i te lalolagi ka fakaasi katoa ke iloa, mo te laukele foki ka se mafai o fakamuni ne ia a tino kolā ne tamate.”

9. (a) Ne a mea e ‵tau o ‵teke atu ne tatou, kae kaia? (e) Se a te mea e ‵tau o ati aka ne tatou, kae kaia?

⁹ I te aso o Ieova, a tino kolā ne ‵fuli ne te lalolagi mo ana uiga ma‵sei ka fakaasi atu ne latou olotou uiga ‵tonu, ke oko loa ki te fakatau tamate o te suā tino ki te suā tino. A te tonuga loa, ne mafai ne vaega kese‵kese o fakafiafiaga fakasaua kolā ko lauiloa i aso nei o faka‵numi ne ia a mafaufau o tino e tokouke ke oko loa ki te taimi “ko ma‵taku ei latou kae fakatau ‵ta i a latou eiloa.” (Sakalia 14:13) Kae se mea tāua ke ‵teke atu ne tatou so se mea​—ata i tamunei, tusi fai‵tau, tafaoga i vitio, mo nisi mea kolā e mafai o fakamalosi aka i loto i a tatou a uiga kolā e fakatakalialia atu ki te Atua, e pelā mo te fakamatamata mo te ofa tulafono! (2 Samuelu 22:28; Salamo 11:5) I lo te fai penā, ke ati aka ne tatou a fuataga o te agaga o te Atua, me ka mafai ne vaegā uiga penā o faka‵sao tatou mai te ‵vela o te aso o Ieova.​—Kalatia 5:22, 23.

Se “Lagi Fou mo te Lalolagi Fou”

10, 11. Se a te “lagi fou” mo te “lalolagi fou”?

¹⁰ Faitau te 2 Petelu 3:13. A te “lagi fou” ko te Malo faka-te-lagi o te Atua, telā ko oti ne fakatu i te tausaga ko te 1914 i te taimi ne palele atu ei a “aso o fenua fakaa‵tea.” (Luka 21:24) A te pulega fakatupu tenei e aofia i ei a Keliso Iesu mo te 144,000 o pule lagolago, te tokoukega o latou ko oti ne maua te lotou taui i te lagi. I te tusi o Fakaasiga, a tino filifilia konei e sui ne latou a te “Fa‵kai Tapu, ko Ielusalema fou, ko fanaifo mai te Atua i te lagi, ko oko eiloa i te gali te kilokiloga tenā, e pelā eiloa mo se tamafine ko toka ‵lei o fanatu ki tena fakaipoipoga.” (Fakaasiga 21:1, 2, 22-24) E pelā eiloa mo Ielusalema faka-te-lalolagi telā ne fai mo sui o te malo i Isalaelu mua, ka fakatu aka ne te Ielusalema Fou mo tena Avaga Fakaipoipo a te malo i te fakanofonofoga fou. A te fa‵kai faka-te-lagi tenei ka ‘vau mai luga i te lagi’ i se auala fakatusa o fakaoko mai tena takitakiga ki te lalolagi.

¹¹ A te “lalolagi fou” e fakasino atu ki se potukau o tino i te lalolagi fou kolā ne fakaasi atu te lotou faka‵logo katoatoa ki te Malo o te Atua. A te palataiso faka-te-agaga telā ko maua nei ne tino ka tumau i tena tulaga tonu i te ‘lalolagi nofoaki’ kae gali. (Epelu 2:5) E mafai pefea o fai tatou e pelā me se vaega o te fakanofonofoga fou?

Ke Toka mō te Aso Lasi o Ieova

12. Kaia ka fai ei a te aso o Ieova e pelā me se mea fakapoi ki te lalolagi?

¹² Ne ‵valo mai ne Paulo mo Petelu me i te aso o Ieova ka vau pelā “mo se tino kaisoa”​—se tino faomea, kae seki fakamoemoegina. (Faitau te 1 Tesalonia 5:1, 2.) Ke oko loa ki Kelisiano ‵tonu, kolā e ‵nofo fakatalitali ki te aso tenā, ka ‵poi i tena oko fakavave mai. (Mataio 24:44) A ko te lalolagi, ka ofo malosi i te mea ka tupu. Ne tusi mai a Paulo: “Kafai e fai ake pelā a tino [kolā ne ‵vae keatea mai i a Ieova, ‘Ko tokagamalie a mea katoa mo te manuia,’ ko te mea eiloa ko oko mai te fakamaseigina ki ei! E se mafai o ‵sao me oko mai eiloa. E fakatusa eiloa tena ‵mae ki te fafine ka fanau.”​—1 Tesalonia 5:3.

13. E mafai pefea o ‵kalo keatea tatou mai te ‵tagi fakaloiloi tenei “Ko tokagamalie a mea katoa mo te manuia”?

¹³ A te ‵tagi tenei “Ko tokagamalie a mea katoa mo te manuia,” ko te suā loi faka-temoni; kae ka se fakavalea ne ia a tavini a Ieova. “A koutou nei e se ‵nofo i te pouliga,” ne tusi mai a Paulo, “tela la ke se puketu koutou ne te Aso e pelā mo se tino kaisoa. A koutou katoa ko tino o te mainaga, ko tino foki o te ao.” (1 Tesalonia 5:4, 5) Tela la, ke na ‵nofo atu tatou i te mainaga, telā e ‵mao ‵ki mai te pouliga o te lalolagi a Satani. Ne tusi mai a Paulo: “Ka ko koutou e oku taugasoa, ko leva eiloa ne iloa ne koutou a te mea nei. Tela la, ke matapula koutou, ke mo a e takitaki ‵se koutou ne [faiakoga ‵loi i loto i te fakapotopotoga] tino ofa tulafono kae pa‵ku ei koutou mai otou tulaga ‵mautakitaki.”​—2 Petelu 3:17.

14, 15. (a) E fakatāua pefea ne Ieova tatou? (e) Ne a pati fakaosofia e ‵tau o mafaufau ‵loto tatou ki ei?

¹⁴ Ke masaua me e seki fai mai fua a Ieova ke ‘matapula‵pula’ tatou. I lo te fai penā, e fakatāua ne ia tatou mai i te tukumaiga o te poto telā ko ‘leva ne iloa ne tatou’ e auala i fakamatalaga fakavae e uiga ki mea kolā ka ‵tupu i aso mai mua.

¹⁵ Se mea fakafanoanoa, me i nisi tino ko se manava‵se io me ko fakata‵mala ki fakamasauaga e uiga ki te tumau i te mataala. ‘Ko oti ne lagona ne matou a te fakamasauaga tenā mō se fia o tausaga,’ ko olotou muna. Kae, e ‵tau o masaua ne tino konā me i te fai ne latou o vaegā pati penā, ko fakafesili eiloa ne latou a Ieova mo tena Tama, kae e se ko te potukau o te tavini fakamaoni. Ne fai mai a Ieova: “Kae faka‵tali eiloa ki ei.” (Sapakuka 2:3) E tenā foki te mea ne fai mai ne Iesu: “Ke matapula‵pula koutou me se iloa ne koutou me tefea te aso e vau ei te otou Aliki.” (Mataio 24:42) E se gata i ei, ne tusi mai a Petelu: “Se vaegā olaga la pefea e fia ola koutou i ei? E ‵tau o faka‵malu kae fakatapu otou olaga mō te Atua. Ka koi fakatali‵tali koutou ki te Aso o te Atua.” (2 Petelu 3:11, 12) Ka se mafai lele eiloa ne te tavini fakamaoni mo tena Potukau Pule o manatu mā‵ma e uiga ki pati ‵tonu konei!

16. Se a te kilokiloga e ‵tau o ‵kalo keatea tatou mai i ei, kae kaia?

¹⁶ E tonu, ko te “tavini sē fakamaoni” telā e fai mai me koi tuai o oko mai te Pule. (Mataio 24:48) A te tavini sē fakamaoni tenā se vaega o te potukau telā ne fakamatala mai i te 2 Petelu 3:3, 4. “I aso fakaoti,” ko muna a Petelu, “e isi ne tino ka ‵sae mai” kolā “e pulea olotou olaga ne olotou manakoga ma‵sei,” ka fakatauemu ki tino kolā e masaua ne latou a te pili mai o te aso o Ieova. E tonu, i lo te ‵saga tonu atu ki manakoga o te Malo, e ‵saga atu a tino fakatauemu konā ki a latou eiloa mo olotou manakoga kaima‵nako. Ke mo a ma ati aka ne tatou se vaegā uiga sē fakalogo mo se kilokiloga sē ‵lei penā. Kae ke “mafau‵fau ki te kufaki o te Aliki” mai te tumau i te fakalavelave i te talaiatuga o te Malo mo te faiga o soko kae ke mo a ma tō manavase ki te taimi ka ‵tupu ei a mea, me ko Ieova fua te Atua e iloa ne ia.​—2 Petelu 3:15; faitau te Galuega 1:6, 7.

Ke Tali‵tonu ki te Atua o te Fakaolataga

17. E ‵saga atu pefea a Kelisiano fakamaoni ki te fakatonuga a Iesu ke olo keatea mai Ielusalema, kae kaia?

¹⁷ Mai tua o te taimi ne nikoi ei ne te kautau Loma a Iutaia i te 66 T.A., ne gasue‵sue a Kelisiano fakamaoni e ‵tusa mo te fakatonuga a Iesu ke olo keatea mai te fa‵kai o Ielusalema. (Luka 21:20-23) Kaia ne gasue‵sue fakavave ei latou? E mautinoa eiloa me ne masaua ne latou a te faka‵pulaga a Iesu. E tonu, ne fakamoe‵moe latou me ka aofia i te lotou fakaikuga a mea faiga‵ta, e pelā mo te mea ne fakailoa atu ne te Keliso. Kae i te taimi tenā, ne iloa ne latou me e se mafai lele o tiaki ne Ieova ana tino fakamaoni.​—Salamo 55:22.

18. E fakamalosi mai pefea a pati a Iesu i te Luka 21:25-28 ki tau kilokiloga e uiga ki te oko mai o te fakalavelave lasi?

¹⁸ E ‵tau foki mo tatou o tali‵tonu katoatoa ki a Ieova, me ko ia fua tokotasi ka faka‵sao ne ia tatou māfai ko oko mai te fakalavelave lasi ki te fakanofonofoga tenei. I te vaitaimi mai tua o te kamataga o te fakalavelave lasi kae koi tuai o fakaoko mai ne Ieova tena fakamasinoga ki te ‵toega o te lalolagi, ka “‵mate foki tino i te ma‵taku mo te fakatali‵tali ki mea ka oko mai ki te lalolagi.” Kae i te taimi e pole‵pole ei a fili o te Atua i te ma‵taku, ka se ma‵taku eiloa a tavini fakamaoni a Ieova. E ‵kese mai i ei, ka fia‵fia latou me e iloa ne latou me ko pili mai a te lotou faka‵saoga.​—Faitau te Luka 21:25-28.

19. Se a te mea ka sau‵tala ki ei i te suā mataupu?

¹⁹ E tonu, ko tafaga la i te gali o te olaga i aso mai mua telā e fakatali‵tali ki ei a tino kolā e tumau i te ‵vae keatea mai te lalolagi mo “mea katoa” i ei! Kae e pelā mo te mea ka fakamatala mai i te suā mataupu, kafai e ma‵nako ke maua ne tatou a te ola, e ‵tau o uke atu a ‵tou mea e fai i lo te ‵kalo keatea mai te masei. E ‵tau o ati aka ne tatou a uiga kolā e fakafiafia atu ki a Ieova kae fai a galuega kolā e talia ne ia.​—2 Petelu 3:11.

[Fakamatalaga fakaopoopo]

E Fakamatala Mai Pefea ne Koe?

• Se a te mea e sui ne te . . .

‘lagi mo te lalolagi’ i te taimi nei?

“mea katoa”?

te “lagi fou mo te lalolagi fou”?

• Kaia e tali‵tonu katoatoa ei tatou ki te Atua?

[Ata i te itulau e 13]

E mafai pefea o ‘puipui tou loto’ kae tumau i te ‵vae keatea mai te lalolagi?

[Ata i te itulau e 14]

E mafai pefea o fakaasi atu ne tatou me i a tatou e “mafaufau ki te kufaki o te Aliki io me ko te avanoa ko tuku atu ne ia ke faka‵sao ei koutou”?