Ke Tali‵tonu ki a Ieova Ona ko te Pili Mai o te Gataga

“Fakatuaga ki te Aliki [ko Ieova] ki te se gata mai.”​​—ISAIA 26:4.

1. Se a te mea e ‵kese i ei a tavini a te Atua mo tino i te lalolagi?

E ‵NOFO atu tatou i se lalolagi telā ko se iloa ne te fia miliona o tino me ko oi ka tali‵tonu latou ki ei, kāti ona ko te mea e logo‵mae kae fanoa‵noa latou i taimi e uke. Ko oko eiloa i te ‵kese mo tavini a Ieova! Mai te takitakiga a te poto fakaatua, e iloa ‵lei ne latou a te koga telā e ‵tau o tali‵tonu latou ki ei i te lalolagi tenei io me ko “takitaki o te olaga nei.” (Salamo 146:3) I lo te fai penā, e fakalago‵lago olotou ola mo fakamoemoega i aso mai mua ki a Ieova, me e iloa ne latou me e alofa a ia ki a latou kae e fakataunu faeloa ne ia tena Muna.​​—Loma 3:4; 8:​38, 39.

2. Ne a pati a Iosua e uiga ki te fakatuagagina o te Atua?

² Ne fakamaoni aka ne te toeaina ko Iosua a te fakatuagagina o te Atua. Ko pili eiloa o mate a ia, ne fai atu a ia ki ana taina Isalaelu: “E iloa faka‵lei ne koutou katoa i otou ‵kano loto taki tokotasi, me i te Aliki [ko Ieova] te otou Atua ko oti ne tuku atu ne ia ki a koutou a mea ‵lei katoa, kolā ne tauto a ia ke tuku atu. A tautoga katoa a ia ne fai, ko oti katoa ne fakataunu.”​​—Iosua 23:14.

3. Se a te mea e fakaasi mai i te igoa o te Atua e uiga ki a ia?

³ E fakataunu ne Ieova ana folafolaga, e se ona ko tena alofa mō ana tavini kae mō te ‵lei o tena igoa totino. (Esoto 3:​14; 1 Samuelu 12:22) E uiga ki te igoa o te Atua, e fai mai te fakatomuaga o The Emphasized Bible, telā ne ‵lomi ne J.B. Rotherham, penei: “E fai eiloa a te mea [tenei] e pelā me ko te ‵toe folafolaga kaimalie; me ne mafai ne te Atua o fakamasani atu ki so se fakanofonofoga, so se mea faigata, so se manakoga telā e mafai o sae aka . . . A te mea [tenei] se folafolaga, . . . se fakaasiga, se fakamasauaga, se tautoga. Ki te Igoa tenei, ka fakamaoni eiloa te Atua; ka se fakamasiasigina eiloa a Ia.”

4. (a) Se a te mea e fakamalosi mai i te Isaia 26:4 ke fai ne tatou? (e) Ne a mea ka sau‵tala tatou ki ei i te mataupu tenei?

⁴ Fesili ifo ki a koe eiloa, penei: ‘E mata, ko iloa ‵lei ne au a Ieova ke talitonu katoatoa au ki ei? E mata, e fakafesagai atu au ki aso mai mua mo te loto talitonu, mai te iloa atu me e malosi katoatoa te Atua?’ E fai mai te Isaia 26:​4, penei: “Fakatuaga ki te Aliki [ko Ieova] ki te se gata mai; e puipui faeloa ne ia tatou.” E tonu, ko se aofia nei te Atua i olaga o tino e pelā mo nisi taimi i aso o te Tusi Tapu. Kae e pelā me ko ‘te tou Puipuiga ki te se gata mai,’ e mafai o tali‵tonu “faeloa” ki a ia. E fesoasoani mai pefea a te ‵tou Atua fakatuagagina ki ana tino tapuaki fakamaoni i aso nei? Ke onoono nei tatou ki auala e tolu: E fakamalosi ne ia tatou māfai e ‵sala atu ki tena fesoasoani ke ‵teke atu ki tofotofoga, e ‵lago mai a ia ki a tatou māfai e fakafesagai atu ki tino kolā e se fia ‵saga mai mo ‵tekemaiga, kae fakamalosi ne ia tatou māfai e fakavāivāi tatou ne fakalavelave e uke. I te taimi e suke‵suke ei tatou ki feitu konei, masaua ke fakaataata i ‵tou mafaufau a te auala e mafai ei o fakamalosi aka tatou ne te ‵tou tali‵tonu ki a Ieova.

Talitonu ki te Atua Māfai ko Fakaosoosogina ke Fai se Mea ‵se

5. Ona ko te ‵tou tali‵tonu ki te Atua, se a te ‵toe tofotofoga telā e fakafesagai atu tatou ki ei?

⁵ E tasi te mea ke tali‵tonu ki a Ieova māfai ko fakataunu tena folafolaga ki te Palataiso io me ko te toe‵tuga​​—ko mea kolā e ma‵nako tatou ki ei. Kae e mafai o faigata ‵ki ke tali‵tonu ki a ia māfai ko fakaiku aka ke tau‵tali tatou i ana tulaga i mea tau amioga, ke talitonu katoatoa me i te faka‵logo ki ana auala mo tulaga se mea tonu kae ka takitaki ei tatou ki te fiafia lasi. Ne tusi mai ne te tupu ko Solomona a te fakamalosiga tenei: “Talitonu ki te Aliki [ko Ieova] mo tou loto kātoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.” (Faataoto  3:​5, 6) Mafaufau la ki te tulaga o ‵tou “mea katoa e fai” mo “auala.” Ao, a ‵tou auala kātoa i te olaga​​—e se ko te ‵tou fakamoemoega fua faka-Kelisiano​​—e ‵tau o fakaasi atu i ei a te ‵tou tali‵tonu ki te Atua. E mafai pefea o fakaasi atu ne tatou a te talitonu tenā māfai ko ‵sae aka a tofotofoga?

6. E mafai pefea o fakamalosi aka ne tatou a ‵tou fakaikuga ke ‵teke atu a mafaufauga ma‵sei?

⁶ A te ‵fuli keatea mai te masei e kamata mai te mafaufau. (Faitau te Loma 8:5; Efeso 2:3.) Kae e mafai pefea ne koe o fakamalosi aka tau fakaikuga ke ‵teke atu ki mafaufauga ma‵sei? Mafaufau la ki auala e lima konei: 1. ‵Sala atu ki te fesoasoani o te Atua e auala i te ‵talo. (Mataio 6:​9, 13) 2. Mafaufau ‵loto ki fakaakoakoga i te Tusi Tapu e uiga ki a latou kolā ne seki faka‵logo ki a Ieova mo latou kolā ne faka‵logo. Ko mafaufau ei ki mea ne iku atu ki a latou.a (1 Kolinito 10:​8-​11) 3. Mafaufau ki te fi‵ta o te mafaufau mo lagonaga telā e mafai o aumai ne te agasala ki a koe mo ou tino pele. 4. Mafaufau ki lagonaga o te Atua māfai ko agasala se tokotasi o ana tavini. (Faitau te Salamo 78:​40, 41.) 5. Ke fakaataata ne koe a te fiafia o te loto o Ieova māfai ko lavea ne ia se tino tapuaki fakamaoni e ‵teke atu ki mea ma‵sei kae fai te mea tonu, i mua o tino io me nofo tokotasi. (Salamo 15:​1, 2; Faataoto 27:11) E mafai foki ne koe o fakaasi atu me e talitonu koe ki a Ieova.

Talitonu ki te Atua Māfai e Fakafesagai Atu ki te Kaitaua mo ‵Tekemaiga

7. Ne a tofotofoga ne fakafesagai atu ki ei a Ielemia, kae pefea ana lagonaga i nisi taimi?

⁷ E tavini atu a te tokoukega o ‵tou taina i koga talai faiga‵ta. Ne tavini atu a te pelofeta ko Ielemia i se vaegā koga penā​​—i te taimi telā ne uke ei a mea faiga‵ta ne ‵tupu ki te malo o Iuta i aso fakaoti. Ne tofotofogina tena loto talitonu ki a Ieova i aso takitasi me ne faka‵pula atu ne ia a fekau o te fakamasinoga a te Atua. E se gata i ei, ke oko foki ki tena failautusi fakamaoni ko Paluka, ne fameo foki ona ko te fi‵ta. (Ielemia 45:​2, 3) E mata, ne loto vāivāi a Ielemia? Ia, ne loto māfatia a ia i nisi taimi. “Muna ‵tuku atu te aso ne fanau ei au!” ko ana muna. “Ai a ne fanau mai ei au? Ko te mea fua ke puapuaga kae fanoanoa au, ke iku toku ola i te masiasi?”​​—Ielemia 20:​14, 15, 18.

8, 9. E ‵tusa mo pati i te Ielemia 17:​7, 8 mo te Salamo 1:​1-3, ne a mea e ‵tau o fai ne tatou ke tumau te ‵fua mai o fuataga ‵lei?

⁸ Kae ne seki ‵fiu eiloa a Ielemia. Ne tumau eiloa tena loto talitonu ki a Ieova. E pelā me ko te ikuga, ne aofia a te pelofeta fakamaoni tenei i te fakataunuga o pati totino a Ieova kolā ne tusi ki lalo i te Ielemia 17:​7, 8: “Kae ka fakamanuia ne au a te tino telā e talitonu mai ki a au. E pelā a ia me se lakau telā e ola i tafa o se vaitafe foliki kae ‵solo atu ona aka ki te vai. E se mafai o manavase manafai ko oko mai te ‵tau ‵vela me i ona lau e lau usiusi faeloa; e se manavase manafai e seai ne vaiua; e tumau faeloa te ‵fua mai o ana fuataga.”

⁹ E pelā me se lakau ola ‵lei “telā e ola i tafa o se vaitafe,” io me i se fatoaga, ne tumau eiloa a Ielemia i te “‵fua mai o ana fuataga.” Ne seki talia ne ia a fakamalosiga a tino fakatauemu ma‵sei i ana tafa. I lo te fai penā, ne ‵piki ‵mau eiloa a ia ki te Māfuaga o te “vai” o te ola mai te fai ne ia a mea katoa kolā ne fakatonu atu ne Ieova ki a ia. (Faitau te Salamo 1:​1-3; Ielemia 20:9) Ko oko eiloa i te gali o te fakaakoakoga a Ielemia mō tatou, maise loa tatou kolā e tavini atu ki te Atua i koga talai faiga‵ta! Kafai tenā loa tou tulaga, ke tumau te fakalagolago malosi ki a Ieova, telā ka tuku atu ne ia ki a koe a te loto kufaki i te taimi e “‵viki faeloa tatou ki tona igoa i o‵tou leo.”​​—Epelu 13:15.

10. Ne a fakamanuiaga e maua ne tatou, kae ne a fesili e ‵tau o fesili ifo ne tatou ki a tatou eiloa?

¹⁰ Ke fesoasoani mai ke fa‵ki tatou i te olaga tenei i aso fakaoti konei, ne tuku mai ne Ieova ki a tatou a mea e uke ke fesoasoani mai ki mea faiga‵ta e fe‵paki mo tatou. I tafa o nisi mea aka, ne tuku mai ne ia te Muna a te Atua telā ko katoatoa, telā ko oti ne ‵fuli ki nisi ‵gana e uke. Ko oti ne tuku mai ne ia a meakai faka-te-agaga e uke e auala i te potukau ko te tavini fakamaoni kae poto. Kae ko oti ne tuku mai ne ia se aofaki lasi o taina tali‵tonu kae ‵kau fakatasi i fakatasiga mo fono. E mata, e ‵tau o fakaaoga faka‵lei ne koe a fakatokaga konei? A tino katoa kolā e fai penā “ka usu pese latou mo te fia‵fia.” Kae ko tino kolā e se fia faka‵logo ki te Atua “ka ‵tagi i te fanoa‵noa.”​​—Isaia 65:​13, 14.

Talitonu ki te Atua Māfai ko Fakafesagai Atu ki Fakalavelave

11, 12. I te kilokiloga e uiga ki fakalavelave o te lalolagi, se a te auala ke maua ei a te poto tonu?

¹¹ E pelā mo te mea ko oti ne ‵valo mai, ko fakafesagai atu nei a tino ki fakalavelave e uke. (Mataio 24:​6-8; Fakaasiga 12:12) Kafai e oko ‵tonu mai a lofiaga, e ‵tau o ‵tele atu ki koga ma‵luga io me ‵kake ki te tuafale o se fale​​—ki so se koga telā e maluga. I se auala tai ‵pau, kafai ko uke ‵ki a fakalavelave o te lalolagi, e ‵sala atu a te fia miliona o tino ki se faka‵lafiga i mea tau tupe, mea fakapolitiki, io me ko fakapotopotoga fakalotu, e pelā foki mo mea fakasaienisi mo poto ‵fou. Kae e se maua eiloa ne koe se puipuiga tonu mai mea konei. (Ielemia 17:​5, 6) Kae i te suā feitu, e isi eiloa se koga faka‵lafi mautinoa o tavini a Ieova​​—“e puipui faeloa ne ia tatou.” (Isaia 26:4) Ne fai mai te faisalamo: “Ko ia fua [Ieova] ko toku puipuiga mo toku fakaola; ko ia foki toku ‵puluga, ka se mafai ei au o takavale.” (Faitau te Salamo 62:​6-9.) E mafai pefea o fai ne tatou a Ia mo fai ‵tou puipuiga mo ‵tou lafiga?

¹² E ‵piki ‵mau atu tatou ki a Ieova māfai e faka‵logo tatou ki tena Muna, telā e ‵kese ‵ki mai poto o tino. (Salamo 73:​23, 24) E pelā me se fakaakoakoga, e mafai o fai mai a tino kolā ne fakamalosigina ne poto o tino, penei: ‘E tasi fua tou ola; fakaaoga faka‵lei a te mea tenā.’ ‘Kausaki atu ki se galuega ‵lei.’ ‘Fai ke uke au tupe.’ ‘‵Togi te mea tenei, ‵togi te mea telā.’ ‘Fai sau malaga ke oko atu koe ki te lalolagi kātoa.’ A ko te poto o te Atua, i te suā feitu, e fetaui ‵lei mo te polopolokiga tenei: “[Mō] latou kolā e fakaaoga ne latou te lalolagi ke se fakaaoga katoatoa ne latou; me e mafuli‵fuli a mea kolā e ‵tupu i te lalolagi tenei.” (1 Kolinito 7:​31, NW) I se auala tai ‵pau, e fakamalosi mai a Iesu ke fakamuamua faeloa ne tatou a manakoga o te Malo kae ke fakatupu ne tatou a “koloa i te lagi,” telā ka maua katoatoa i ei ne tatou te puipuiga tonu.​​—Mataio 6:​19, 20.

13. Kafai e masaua ne tatou a pati i te 1 Ioane 2:​15-​17, ne a fesili e ‵tau o fesili ifo ne tatou ki a tatou eiloa?

¹³ E mata, a tau kilokiloga ki te “lalolagi” mo “mea faka te lalolagi” e fakaasi mai i ei tou talitonu katoatoa ki te Atua? (1 Ioane 2:​15-​17) E mata, e tāua malosi a koloa faka-te-agaga mo tauliaga e uiga ki te taviniga o te Malo ki a koe i lo a koloa faka-te-lalolagi? (Filipi 3:8) E mata, e taumafai koe ke fakatumau se ‘kilokiloga faigofie’? (Mataio 6:​22) E tonu, e se manako te Atua ke sē saga atu koe o fai tou tiute, maise loa māfai e isi sou kāiga ke tausi atu ki ei. (1 Timoteo 5:8) Kae e fakamoemoe a ia ke tali‵tonu katoatoa ana tavini ki a ia​​—kae e se i te lalolagi a Satani telā ko pili o fakaseai atu.​​—Epelu 13:5.

14-16. Ne mafai pefea o maua ne nisi tino a mea aoga mai te tumau i te ‘fakafaigofie o te kilo’ kae fakamuamua a manakoga o te Malo?

¹⁴ Mafaufau la ki te fakaakoakoga a Richard mo Luta, kolā e tokotolu la tama‵liki. “E fai mai toku loto me e mafai o uke atu aku mea e fai mō Ieova,” ko muna a Richard. “Ne maua ne au se olaga ‵lei kae ne mafaufau au me e tuku atu fua ne au ki te Atua aku mea ‵toe, kolā ne maua ne au. I taku otiga ne ‵talo e uiga ki te mea tenei kae mafaufau ki ei, ne talia ne māua mo Luta ke fakamolemole atu ki toku pule ke fakamu‵tana ifo oku aso ga‵lue ki te fa i te vaiaso​​—faitalia eiloa me ko tu atu eiloa te atufenua i se tulaga faigata i mea tau tupe. Ne talia taku fakamolemole, kae ne kamata o galue au e ‵tusa mo te fakasologa fou i se masina e tasi.” Ne a la nei a lagonaga o Richard i te taimi nei?

¹⁵ “Ne fanaifo ki lalo i se 20 pasene toku peofuga i lo te taimi mua,” ko ana muna, “kae nei ko maua ne au se 50 aso fakaopoopo i te tausaga ke fakatasi mo toku kāiga kae akoako aku tama‵liki. Ko mafai nei ne au o uke atu oku taimi i te galuega talai, faka-tolu taimi e uke atu ei aku akoga faka-te-Tusi Tapu, kae maua ne au se tauliaga i te fakapotopotoga. Kae ona ko te lasi o te avanoaga ko maua ne au ke fesoasoani atu ki tama‵liki, ne mafai ei ne Luta o paenia lagolago i te taimi tenā. Ko oti ne fakaiku aka ne au ke fakatumau te fakasologa tenei ki se leva telā e mafai o fai penā.”

¹⁶ A Roy mo Pertina, kolā e isi se lā tamaliki fafine i te fale, ne mafai eiloa o fakamu‵tana ifo lā taimi i galuega ‵togi ko te mea ke mafai o ‵kau atu ki te taviniga tumau. “Ne galue au i aso e tolu i se vaiaso,” ko muna a Roy, “kae ne galue a Pertina i aso e lua o te vaiaso. Kae ne olo atu foki matou ki se fale ‵togi foliki, telā e faigofie ‵ki ke tausi ki ei. Ne paenia māua a koi tuai o maua a mā tama‵liki, kae ne seki ‵galo i a maua te manakoga ke paenia. Tela la i te taimi ne gasolo aka ei o ma‵tua mā tama‵liki, ne toe mafai o galuega māua i te taviniga tumau. E seai se aofaki o tupe e mafai o fakatusa ki fakamanuiaga kolā ne maua ne māua.”

Ke Puipui Tou Loto ne te “Filemu o te Atua”

17. E uiga ki fakalavelave o te olaga, ne a fakamafanafanaga e maua ne koe mai te Tusi Tapu?

¹⁷ E seai se tino i a tatou e iloa ne ia a mea ka ‵tupu i te aso taeao, me e maua ne tatou katoa a “te malaia” io ko fakalavelave ‵tupu fakafuasei. (Failauga 9:11) Kae, ko te fakalotolotolua ki te aso taeao e se ‵tau o ave keatea ne ia te filemu o te mafaufau i te aso nei, e pelā mo latou kolā e se maua ne latou te puipuiga telā e maua mai i se fesokotakiga mo te Atua. (Mataio 6:​34) Ne tusi mai te apositolo ko Paulo: “Sa manava‵se ki se mea, kae fakatagi atu ki te Atua i mea e ma‵nako koutou ki ei, kae fakatagi eiloa i te agaga fakafetai. Ka ko te filemu o te Atua, telā e sili atu i mea e iloa ne tatou, ke tausi faka‵lei ne ia otou loto mo otou mafaufau.”​​—Filipi 4:​6, 7.

18, 19. I auala fea e fakamafanafana mai ei a te Atua ki a tatou? Fakamatala mai.

¹⁸ Ko oti ne maua ne taina mo tuagane e tokouke kolā ne ‵tu atu i tulaga faiga‵ta a te filemu mai i a Ieova. “I te taimi ne fakatalitali ei au ki toku ‵tipiga,” ko muna a se tuagane e tokotasi, “ne taumafai faeloa te tokita tipitipi o fakamalosi mai ke talia ne au a te ‵suki ki te toto. Ne fai mai a ia penei, ‘Se a te manatu valea tenei e uiga ki te se fakaaoga o te toto?’ Kae i nisi taimi, ne ‵talo lēmū au ki a Ieova, kae ne maua ne au tena filemu. Ne malosi au e pelā me se kaupapa. Faitalia te vāivāi ona ko te oge toto, ne mafai eiloa ne au o tuku atu a pogai faka-te-Tusi Tapu ona ko toku tulaga.”

¹⁹ E mafai o ‵lago mai te Atua i nisi taimi e auala i se fakamafanafanaga mai se taina talitonu io me ko meakai faka-te-agaga kolā e maua i te taimi tonu. Kāti ne lagona ne koe a pati a se taina io me se tuagane, penei: “E fetaui ‵lei eiloa te mataupu tenei mo te mea e manako au ki ei. Ne tusi eiloa mō oku!” Ao, faitalia me ne a ‵tou fakanofonofoga io me ko manakoga, ka fakamaoni mai eiloa ne Ieova tena alofa mō tatou māfai e tali‵tonu tatou ki a ia. Mai mea katoa, a tatou ko ana “mamoe” kae ne fakaigoa ne ia tatou ki tena igoa.​​—Salamo 100:3; Ioane 10:16; Galuega 15:​14, 17.

20. Kaia ka maua ei ne tavini a Ieova te puipuiga māfai ko fakaseai atu a te lalolagi a Satani?

²⁰ Kafai ko oko mai te aso o te “kaitaua fakamataku” o Ieova, ka fakaseai atu ei a te lalolagi a Satani. Ka se maua eiloa se puipuiga mai aulo, siliva mo nisi mea aoga. (Sefanaia 1:​18; Faataoto 11:4) E tasi fua te ‵tou lafiga telā ko te ‵tou ‘Puipuiga ki te se gata mai.’ (Isaia 26:4) Tela la ke na fakaasi atu te ‵tou tali‵tonu katoatoa ki a Ieova i te taimi nei mai te sa‵sale mo te faka‵logo i ana auala amio‵tonu, mai te folafola atu a te fekau o te Malo faitalia me fakafesagai atu tatou ki ‵tekemaiga, kae ke tuku atu katoa ki a ia a mea e manava‵se tatou ki ei. Kafai e fai ne tatou a mea konei, ‘ka maua ne tatou te saogalemu. Ka tokagamalie ‵tou olaga, kae seai se mea e ma‵taku ki ei.’​​—Faataoto 1:33.

[Fakamatalaga fakaopoopo]

E Mafai ne Koe o Fakamatala Mai?

E mafai pefea o tali‵tonu tatou ki te Atua

• māfai ko tofotofogina ke fai se mea ‵se?

• māfai ko fakafesagai atu ki te se fia ‵saga mai o tino mo ‵tekemaiga?

• māfai ko fakafesagai atu ki manavasega o te olaga?

[Ata i te itulau e 19]

A te taofi ‵mau ki tulaga o te Atua e iku atu ki te fiafia

[Ata i te itulau e 21]

‘A Ieova ko te ‵tou Puipuiga ki te se gata mai’