Iesu—Te Koga ne Vau ei a Ia

“Ne ulu atu a ia [Pilato] ki loto i te fale kae fai mai ki a Iesu, ‘A koe se tino a?’ Ka ko Iesu ne seki tali atu ki a ia.”—IOANE 19:9.

NE ‵SILI atu ne te Kovana o Loma ko Ponitio Pilato a te fesili tenā i te taimi ne tofotofogina ei a te ola o Iesu. Ne iloa ne Pilato a te kogā koga i Isalaelu telā ne vau i ei a Iesu. (Luka 23:​6, 7) Ne iloa foki ne ia me e ‵kese ‵mao eiloa a Iesu mai tino. E mata, ne mafaufau a Pilato me ko Iesu ne ola muamua i fea? E mata, ne toka a te pule fapaupau tenei ke talia kae gasuesue ke fai te mea tonu? Faitalia me se a te ikuga, ne seki tali atu a Iesu, kae ne fakaasi manino mai i ei me ne manako malosi a Pilato ki tena tulaga pule i lō te fai ne ia te mea tonu.​—Mataio 27:​11-​26.

E loto fakafetai a nisi tino me e faigofie ke iloa ne latou a te koga ne vau ei a Iesu. E fakaasi manino mai i te Tusi Tapu a te māfuaga o Iesu Keliso. Ke mafaufau ki pogai konei mai lalo:

▪ Te koga ne fanau ei a ia E fakaasi mai i fakagaluegaga i aso nei me i te kamataga o te tausaga telā ne taku nei ko te 2 T.L.M., ne fanau ei a Iesu mai lalo i tulaga loto maulalo i se fa‵kai o Iuta ko Peteleema. A te fakatonuga a Kaisala Aokuso ke fai te fakamauga o igoa ne fakamalosi ne ia te mātua o Iesu, ko Malia, telā e “faitama,” ke faima‵laga atu mo tena avaga ko Iosefa ki Peteleema, te fa‵kai o tupuga o Iosefa. Ona ko te mea ko se mafai o maua se fale talimālō i te fa‵kai mo olotou ‵nofo, ne fakaaoga ne te tauavaga se koga ‵lei, telā ne fanau ei a Iesu kae tuku atu ki se tali fagai manu.​—Luka 2:​1-7.

I senitenali muamua, ne ‵valo mai i te Tusi Tapu e uiga ki te koga e fanau ei a Iesu: “Peteleema Efalata, a koe se fa‵kai e tasi mai fa‵kai fo‵liki eiloa o Iuta, kae ka avaka ne au mai i a koe se pule mō Isalaelu, ko tena gafa e vau mai aso mua eiloa.”a (Mika 5:2) A Peteleema ko ‵to foliki ke tu tena igoa i te fakasologa o fa‵kai o Iuta. Kae ka tu ‵kese eiloa a te fa‵kai foliki tenei. Ka vau eiloa a te Mesia telā ne folafola mai, io me ko te Keliso, mai i Peteleema.​—Mataio 2:​3-6; Ioane 7:​40-​42.

▪ Te koga ne tupu aka ei a ia Mai tua o te ‵nofoga malie o latou i Aikupito, ne toe faima‵laga atu a te kāiga o Iesu ki Nasaleta, se fa‵kai i loto i Kalilaia telā e nofo pelā ki se 60 maila (96 kilomita) ki mātū o Ielusalema. I te taimi tenā a Iesu ko lua tupu ana tausaga. I te fa‵kai gali tenei telā e ‵fonu i tino fai fatoaga, tausi mamoe mo tino faiika, ne tupu aka a Iesu i se kāiga lasi telā e se maumea malosi.​—Mataio 13:​55, 56.

I senitenali mai mua atu i ei, ne ‵valo mai i te Tusi Tapu me e taku foki a te Mesia ki te “Nasaleta.” E fai mai a te tino tusitala o te Evagelia ko Mataio me ne olo atu a te kāiga o Iesu o ‵nofo i Nasaleta, ko te mea ke mafai o fakataunu ei a muna a pelofeta ne fai: “E taku foki a ia se Nasaleta.” (Mataio 2:​19-​23) E foliga mai i te igoa Nasaleta e isi sena sokoga ki te pati Epelu mō te “kaula.” E mautinoa eiloa me ne fakasino atu a Mataio ki te valoaga a Isaia me ne taku a te Mesia ki “se kaula” i te matakāiga o Iese, e fakauiga i ei me i te Mesia se tino mai te gafa o Iese, te tamana o te tupu ko Tavita. (Isaia 11:1) Tela la, a Iesu se tino mai te gafa o Iese e auala i a Tavita.​—Mataio 1:​6, 16; Luka 3:​23, 31, 32.

▪ Te koga tonu ne vau ei a ia E akoako mai i te Tusi Tapu me ko leva eiloa ne ola a Iesu a koituai o fanau a ia i te fale o manu i Peteleema. E fai mai te valoaga a Mika telā ne siki mai muamua me i “tena gafa e vau mai aso mua eiloa.” (Mika 5:2) E pelā me ko te uluaki a te Atua, ne fai a Iesu e pelā me se tino faka-te-agaga i te lagi a koituai o fanau mai e pelā me se tino i te lalolagi nei. Ne fai mai a Iesu: “Au ne . . . fanaifo mai te lagi.” (Ioane 6:​38; 8:​23) Ne mafai pefea o fai te mea tenei?

E auala i te agaga tapu, ne fai ne Ieova te Atua se vavega mai te tukumaiga o te ola o tena Tama faka-te-lagi ki te moegatama o te taupou Iutaia ko Malia ko te mea ke mafai o fanau mai ne ia se tino ‵lei katoatoa.b E faigofie fua ke fai ne te Atua Malosi Katoatoa se vavega ‵mana penā. Me ne fakamatala mai ne te agelu ki a Malia me “e seai se mea e se mafai ne te Atua o fai.”​—Luka 1:​30-​35, 37.

E uke atu a mea e fakamatala mai i te Tusi Tapu e uiga ki a Iesu i lō te fakamatalaga fua e uiga ki te koga ne vau ei a Iesu. A Evagelia e fa​—Mataio, Maleko, Luka mo Ioane​—e fakamatala mai i ei a mea e uke atu e uiga ki te auala ne ola ei a ia.

[Fakamatalaga fakaopoopo]