Iesu—Te Pogai ne Mate ei a Ia

‘I te Tama a te Tagata ne vau o tuku atu tena ola o fakasaoloto ei a tino e tokouke.’—MALEKO 10:45.

NE ILOA ne Iesu a mea ka ‵tupu. Ne iloa ne ia me ka se ola a ia i se olaga filemu. E ‵kese mai ei, ne iloa ‵lei ne ia me ka toetoe fua tena ola a koi 30 tupu ana tausaga, kae ne toka katoatoa eiloa a ia o fakafesagai atu ki te mate.

E fakaasi mai i te Tusi Tapu a te tāua o te mate o Iesu. E fai mai se tusi e tasi me e ‵tusa mo te 175 taimi e taku mai i ei a te mate o Iesu i Tusitusiga Tapu i te ‵Gana Eleni, io me ko te Feagaiga Fou. Kae kaia la ne ‵tau ei o logo‵mae kae mate a Iesu? E ‵tau o iloa ne tatou a te mea tenei, me e pokotia malosi a ‵tou olaga ona ko te mate o Iesu.

▪ Mea kolā e iloa ne Iesu me ka ‵tupu I tausaga fakaoti o tena olaga, ne fakailoa fakafia atu ne Iesu ki ana soko e uiga ki logo‵maega mo te mate telā ka oko atu ki a ia. I tena auala ki Ielusalema o fakamanatu te ‵toe Paseka, ne fai atu a ia ki ana apositolo e toko 12: “Ka tuku atu ei au te Tama a te Tagata ki lima o faitaulaga sili mo faiakoga o te Tulafono. Ka tamate ne latou au kae tuku atu ki tino o fenua fakaa‵tea. Ka fakatauemu ki a au kae puapuaki, e kini kae tamate foki ne latou.”a (Maleko 10:​33, 34) Kaia ne mautinoa ei i a ia a mea kolā ka ‵tupu ki a ia?

Ne masani ‵lei a Iesu mo valoaga e uke i Tusitusiga Tapu i te ‵Gana Epelu kolā ne ‵valo mai ei a mea ka ‵tupu ki tena olaga. (Luka 18:​31-​33) Ke mafaufau ki nai valoaga konā fakatasi mo tusi siki mai te Tusi Tapu kolā e fakamatala mai ei te fakataunuga o valoaga konā.

A te Mesia ka . . .

▪ Fakalata ki tupe siliva e 30.—SAKALIA 11:12; ­MATAIO 26:​14-16.

▪ ‵Kini kae popoki atu ki ei.—ISAIA 50:6; MATAIO 26:67; 27:​26, 30.

▪ Fakasataulo.—SALAMO 22:16; MALEKO 15:​24, 25.

▪ Fakatauemu atu ki ei i luga i te sataulo.—SALAMO 22:​7, 8; MATAIO 27:​39-​43.

▪ Tamate e aunoa mo se ivi o ia e fati.—SALAMO 34:20; IOANE 19:​33, 36.

Ne fakataunu ne Iesu a valoaga konei mo nisi valoaga aka e uke. E seki mafai ne ia o fakataunu a mea konei i tena malosi eiloa. A te fakataunuga o valoaga katoa konei e auala i a Iesu e fakamaoni mai ei me i a ia ne uga mai eiloa ne te Atua.b

Kaia ne ‵tau ei o logo‵mae kae mate a Iesu?

▪ Ne mate a Iesu ke faka‵tonu aka ei a nisi kinauga tāua Ne iloa ‵lei ne Iesu a te tāua o te kinauga telā ne sae aka i te fatoaga o Etena. Mai te fakamalosiga a se tino ‵teke faka-te-agaga, ne filifili ei ne Atamu mo Eva ke se faka‵logo lāua ki te Atua. Ne fakafesili ne te ‵tekeatuga a te tauavaga konei a te ‵tonu o te pulega sili a te Atua, io me ko te auala ke pule mai ei. Ne fakasae aka foki ne te lā agasala a te fesili e uiga ki te fakamaoni o tino katoa ki te Atua mai lalo i tofotofoga.​—Kenese 3:​1-6; Iopu 2:​1-5.

Ne tuku atu ne Iesu a te ‵toe tali mautinoa ki kinauga konei​—e uiga ki te pulega sili a Ieova mo te fakamaoni o tino. Mai tena fakalogo ‵lei katoatoa “ke oko eiloa ki tona mate . . . i luga i te sataulo,” ne ‵lago atu a Iesu ki te pulega sili a te Atua. (Filipi 2:8) Ne fakamaoni mai foki ne Iesu me ne mafai eiloa ne se tagata ‵lei katoatoa o fakatumau tena fakamaoni ‵lei katoatoa ki a Ieova faitalia a tofotofoga faiga‵ta.

▪ Ne mate a Iesu ko te mea ke ‵togi mai ei a tino katoa Ne ‵valo mai ne te pelofeta ko Isaia me i te mate fakalogo‵mae o te Mesia telā ne folafola mai ka ofo atu e pelā me se taulaga mō agasala a tino katoa. (Isaia 53:​5, 10) Ne malamalama ‵lei a Iesu i te mea tenei, kae ne loto fiafia a ia o tuku atu tena “ola mō tino e tokouke.” (Mataio 20:28) Ne ‵tala mai ne tena mate e pelā me se taulaga a te auala ke maua ei ne tino sē ‵lei katoatoa se fesokotakiga ‵lei mo Ieova kae ke faka‵sao ei mai te agasala mo te mate. E ‵tala mai ne te mate o Iesu a te avanoaga ki a tatou ke toe maua ne tatou a te mea telā ne galo i a Atamu mo Eva​—ko te fakamoemoega ke ola ki te se-gata-mai i fakanofonofoga ‵lei katoatoa i te lalolagi nei.c​—Fakaasiga 21:​3, 4.

▪ Mea kolā e mafai o fai ne koe I te fakasologa o mataupu konei, ko oti ne suke‵suke tatou ki pati a te Tusi Tapu e uiga ki a Iesu​—te koga ne vau ei a ia, te auala ne ola mai ei a ia, mo te pogai ne mate ei a ia. A te iloa ne tatou a muna‵tonu konā e uiga ki a Iesu ka faka‵lei aka i ei a manatu ‵se e uiga ki a ia. A te ola e ‵tusa mo mea konei e mafai o aumai ne ia a fakamanuiaga—se olaga ‵lei i te taimi nei mo te ola se-gata-mai i aso mai mua. E fakaasi mai i te Tusi Tapu a mea kolā e ‵tau o fai ne tatou māfai e fia maua ne tatou a vaegā fakamanuiaga penā.

▪ Ke tauloto ki mea e uke e uiga ki a Iesu Keliso mo tena tulaga i fuafuaga a Ieova.—IOANE 17:3.

▪ Ke fakatuanaki ki a Iesu, ke fakaasi atu i te auala e ola ei koe me e talia ne koe a ia e pelā me ko tou Fakaola.—IOANE 3:​36; GALUEGA 5:​31.

E fia‵fia a Molimau a Ieova ke fesoasoani atu ki a koe i te taulotoga o mea e uke e uiga ki a Iesu Keliso, te “Tama e tokotasi” a te Atua, telā ne mafai ei o maua ne tatou a te meaalofa ko te “ola se gata mai.”​—Ioane 3:​16.

[Fakamatalaga fakaopoopo]