E ‵Fuli ne te Tusi Tapu a Olaga o Tino

“Ko Momea Aka Toku ‵Lei e Pelā me se Avaga Tagata.”​—RIGOBERT HOUETO

• TAUSAGA NE FANAU I EI: 1941

• TENA FENUA: BENIN

• TENA TALA FAKASOLOPITO: SE TAGATA E UKE ANA AVAGA, KAE ‵TEKE KI MOLIMAU A IEOVA

TOKU OLAGA MUA: Au se tino mai Cotonou, se fa‵kai lasi i Benin.

Ne puti aka au e pelā me se Katolika, kae ne seki kau atu faeloa au ki lotu. A te tokoukega o Katolika i te koga ne nofo ei au, e uke olotou avaga, me ne talia i te tulafono a te faiga o avaga e tokouke i aso konā. Ne avaga fakamuli au ki fāfine e tokofa.

I te taimi ne sae aka se potukau ‵teke i te 1970, ne mafaufau au me kāti ka aoga ki toku fenua. Ne ‵lago katoatoa atu au ki te potukau ‵teke kae ne aofia au i mea fakapolitiki. Ne seki fia‵fia a te potukau ‵teke tenei ki Molimau a Ieova, me ne tumau latou i te sē ‵kau ki se feitu i mea fakapolitiki. Ne aofia au i a latou kolā ne fakasaua atu ki Molimau. I te taimi ne afuli ei a misionale Molimau mai te fenua i te 1976, ne fakamautinoa aka ne au ke mo a eiloa e toe ‵foki mai latou.

TE AUALA NE ‵FULI EI TOKU OLAGA NE TE TUSI TAPU: Ne gata a te ‵tekeatuga tenā i te 1990.

Ne poi au me e seki leva kae ne toe ‵sae mai a misionale Molimau. Ne kamata o mafaufau au me kāti e fakatasi atu te Atua ki tino konei. Ko te taimi foki tenā, ne ‵fuli ei toku koga galue. E isi se Molimau ne ga‵lue tasi mo au, kae ne seki fakatalave a ia o fakaasi mai ana talitonuga. Ne fakaasi mai ne ia a fuaiupu i te Tusi Tapu kolā ne fakamatala mai i ei a Ieova e pelā me ko te Atua alofa kae fakamaoni. (Teutelonome 32:4; 1 Ioane 4:8) Ne ‵gali ki a au a uiga konā. Ne manako au ke tauloto ki mea e uke atu e uiga ki a Ieova, telā ne talia ei ne au se akoga faka-te-Tusi Tapu.

E seki leva kae ne kamata o kau atu au ki fakatasiga a Molimau a Ieova. Ne ofo malosi au i te alofa tonu ne lavea ne au i konā—e seai se fakakese‵kesega o telega io me ko tulaga. Ko te uke o taimi ne ‵kau fakatasi au mo te kau Molimau, ko te manino faka‵lei foki o fakamaoniga me konei eiloa a soko ‵tonu o Iesu.—Ioane 13:35.

Ne fakaiku aka ne au me kafai e fia tavini atu au ki a Ieova, e ‵tau o tiaki ne au te Lotu Katolika. A te mea tenā e sē se mea faigofie me ne mataku au i mafaufauga o nisi tino. Mai tua o se taimi leva, kae fakatasi mo te fesoasoani o Ieova, ne ati aka ne au te loto malosi kae ne fulitua atu au ki te lotu.

Kae ne isi foki se suā ‵fuliga lasi ne ‵tau o fai ne au. I taku sukesukega ki te Tusi Tapu, ne akoako mai i ei me e se talia ne te Atua a te faiga o avaga e tokouke. (Kenese 2:18-24; Mataio 19:4-6) I tena kilokiloga, ko taku avaga fua muamua e talia ne ia. Tenā ne avaga faka‵lei ei māua i te tulafono kae ne tiaki aku nisi avaga, kae ne fakatoka ne au a nisi mea mō olotou manakoga faka-te-foitino. Ne seki leva kae ne fai aku avaga muamua e tokolua mo fai ne Molimau a Ieova.

TE AUALA NE MAUA EI NE AU A MEA AOGA: E tiga eiloa koi fai taku avaga mo fai se Katolika, e āva tou fafine ki taku fakaikuga ke tavini atu ki a Ieova.

Ne lavea ‵lei ne māua me ko momea aka toku ‵lei e pelā me se avaga tagata.

Ne masani o mafaufau au me ne mafai o faka‵lei ne au a toku fa‵kai e auala i mea fakapolitiki, kae ne seai eiloa se aoga o taumafaiga konā. Nei la, ko lavea ne au me i te Malo o te Atua ko te faka‵leiga fua e tasi ki fakalavelave o tino. (Mataio 6:9, 10) Ko oko eiloa i toku fiafia ki a Ieova me ne fakaasi mai ne ia te auala ke maua se olaga fiafia tonu.

“E sē se mea faigofie ke fai a ‵fuliga e ‵tau o fai.”—ALEX LEMOS SILVA

• TAUSAGA NE FANAU I EI: 1977

• TENA FENUA: BRAZIL

• TENA TALA FAKASOLOPITO: FAIFEAU O TE LOTU PENITEKOSO

TOKU OLAGA MUA: Ne puti aka au i se fa‵kai tai ‵mao o Itu, i São Paulo.

A te vaega tenei o te fa‵kai ne lauiloa i te uke o amioga solitulafono.

Ne amio fakasaua kae amio masei ‵ki au. E se gata i ei, ne aofia au i te aveavega o vailakau tapu. E seki leva ne kamata o mafaufau au me i te vaegā olaga tenā ka iku atu ki te falepuipui io me ki te tanuga, telā ne fakagata ei ne au. Ne kau atu au ki te Lotu Penitekoso, kae ne fai fakamuli au mo fai se faifeau.

Ne mafaufau au me e mafai o fesoasoani atu au ki tino e auala i taku galuega i te lotu. Ne fakasalalau atu foki ne au a polokalame fakalotu i te letio ki tino o te fa‵kai, kae ne kamata o lauiloa malosi au i te kogā koga tenā. Kae ui ei, ne kamata o talitonu malielie au me i te lotu kātoa, e se manava‵se ki te ‵lei o ana tino—kae e se manava‵se malosi foki latou ke fakaaloalo atu ki te Atua. Ne mafaufau au me i te fakamoemoega fua o te lotu ko te fakaputuga o tupe. Ne fakaiku aka ne au ke lisaina mai te lotu.

TE AUALA NE ‵FULI EI NE TE TUSI TAPU TOKU OLAGA: I te taimi ne kamata o sukesuke au ki te Tusi Tapu mo Molimau a Ieova, ne lavea vave ne au me ne ‵kese latou mai nisi lotu.

E lua a mea kolā ne tu ‵kese ki a au. Muamua, e se fai‵pati fua a Molimau a Ieova e uiga ki te alofa ki te Atua mo tuakoi; e fakaasi atu foki ne latou. A te lua, e se aofia latou i faifaiga fakapolitiki io me ko taua. (Isaia 2:4) A manatu ‵tonu e lua konā ne fakatalitonu mai ki a au me ko oti ne maua ne au te lotu tonu—ko te auala sai‵tia telā e iku atu ki te ola se-gata-mai.—Mataio 7:13, 14.

Ne iloa ne au me kafai e fia fakafiafia atu au ki te Atua, e ‵tau o fai ne au a nisi ‵fuliga ‵lasi. Ne ‵tau o saga malosi atu au ki toku kāiga. Ne ‵tau foki o momea aka toku loto maulalo. E sē se mea faigofie ke fai a ‵fuliga e ‵tau o fai, kae fakatasi mo te fesoasoani o Ieova, ne manumalo au. Ne ofo malosi taku avaga i ‵fuliga konei. Ne mua a ia o fai tena akoga ki te Tusi Tapu, kae nei la ko gasolo vave atu ki mua i tena akoga. E seki leva, ne iloa ‵lei ne māua me e ma‵nako māua ke fai mo fai ne Molimau a Ieova. Ne papatiso māua i te aso eiloa e tasi.

TE AUALA NE MAUA EI NE AU A MEA AOGA: Ne maua ne māua mo taku avaga a te fiafia i te fesoasoani atu ki mā tama‵liki e tokotolu ke ati aka ne latou se fesokotakiga pili mo Ieova.

Ko fai nei matou mo fai se kāiga fiafia. E fakafetai au ki a Ieova mō te ‵futimaiga ne ia au ki te munatonu, telā e maua i tena Muna, ko te Tusi Tapu. E ‵fuli eiloa i ei a olaga o tino! Kae fai eiloa au mo fai se fakamaoniga ola.

“Ko fatoa maua ne au se lagonaga ‵ma, malosi, kae katoatoa.”—VICTORIA TONG

• TAUSAGA NE FANAU I EI: 1957

• TENA FENUA: AUSETALIA

• TENA TALA FAKASOLOPITO: SE TUPUAKAGA FAIGATA

TOKU OLAGA MUA: Ne tupu aka au i Newcastle, i New South Wales.

Au ko te ulumatua o tama‵liki e tokofitu, a te motou tamana se tagata inu kava kae ko te motou mātua se fafine fakasaua. Ne fakasaua au ne toku mātua i te feitu faka-te-foitino kae penā foki i ana pati. Ne fai mai faeloa a ia me i a au e masei kae ka fakapuapuaga au ki te afi i seoli. Ne mataku ‵ki au i vaegā fakamatakutakuga penā.

Ne seki fano sāle au ki te akoga ona ko pa‵kiaga kolā ne māfua mai i toku mātua. I te taimi ko 11 ei oku tausaga, ne ave keatea au mai i oku mātua kae avatu ki se akoga a te malo kae fakamuli ifo ki se fale tausi tama‵liki. I te taimi ko 14 ei oku tausaga, ne tele keatea au mai te koga tenā. Ne seki manako au ke foki ki te fale telā ne nofo fua ei au i auala, i Kings Cross, se fa‵kai foliki i tua o Sydney.

I te taimi ne nofo ei au i auala, ne kamata o fakaaoga ne au a vailakau tapu, meainu ma‵losi, onoono ki ata ma‵sei, kae fai mo fai se fafine talitāgata. E isi se mea ne tupu telā ne mataku malosi au i ei. Ne nofo sāle au i se potu o se tino i o ia te faletuisi. I te afiafi e tasi, ne o‵mai se avā tāgata ki a ia. Ne uga ne ia au ki te potu ‵moe kae ne lagona ne au te lotou sau‵talaga. A te tino i o ia te faletuisi ne fai ne ia se fakatokaga ke ‵togi atu ne ia au ki tāgata konei. Ka taumafai lāua ke ‵funa aka au i se vaka tali kako ke avatu au ki Tiapani ke galue i se pā. Ne mataku malosi au kae eva atu ki tua i te fakaosoga kae tele o ‵sala se fesoasoani.

Ne fetaui au mo se tagata telā ne āsi mai ki Sydney, kae ne fakamatala atu ne au toku fakalavelave ki ei mo te fakamoemoega ke tuku mai ne ia ne tupe. I lō te fai penā, ne ‵kami ne ia au ki tena koga nofo ko te mea ke koukou faka‵lei au kae ke kai foki. Kae ne iku atu ki toku nofo i konā. I te tausaga mai tua ifo, ne avaga māua.

TE AUALA NE ‵FULI EI NE TE TUSI TAPU TOKU OLAGA: I te taimi ne kamata ei au o sukesuke ki te Tusi Tapu mo Molimau a Ieova, ne maua ne au a vaegā lagonaga kese‵kese.

Ne kaitaua au i te taimi ne iloa aka ei ne au me i a Satani ko te pogai o mea ma‵sei; me ne akoako mai faeloa ki a au me i te Atua ko te pogai o ‵tou logo‵maega. Ne maua ne au se fakatapūga lasi ‵ki i te taimi ne iloa ne au me e se fakasala ne ia a tino ki te afi i seoli, se akoakoga telā ko leva ne fakamatakutaku mai ki a au.

Ne ofo malosi au i te auala ne fakaaoga ei ne te kau Molimau a te Tusi Tapu i olotou fakaikuga i aso katoa. Ne ola latou e ‵tusa mo te lotou fakatuanaki. Au se tino faigata, kae faitalia me ne a aku pati io me ne mea e fai, ne atafai mai faeloa a te kau Molimau mo te āva.

A te ‵toe mea faigata ki a au ko lagonaga me e seai soku aoga. Ne takalialia malosi au ki a au eiloa, kae ne tumau a lagonaga penā i se taimi leva ‵ki mai tua o taku papatisoga e pelā me se Molimau a Ieova. Ne iloa ne au me ne alofa au ki a Ieova, kae ne talitonu foki au me e se mafai o alofa mai a ia ki se tino penei mo au.

Ne ‵fuli te tulaga tenā mai tua o te 15 tausaga o taku papatisoga. I se lāuga i te Fale Tapuaki o Molimau a Ieova, ne fakasino atu te failauga ki te Iakopo 1:23, 24. I fuaiupu konā, ne fakatusa te Muna a te Atua ki se kilo telā e mafai o ‵kilo ifo tatou ki a tatou eiloa i te auala e kilo mai a Ieova ki a tatou. Ne kamata o mafaufau au me kāti e ‵kese a mea e lavea ne au i a au, mai i mea ne lavea ne Ieova. Muamua la, ne ‵teke atu au ki te manatu fou tenei. Koi mafaufau au i te fakaasi mai o te alofa se mea telā ko tō lasi ke fakamoemoe au ki ei mai i a Ieova.

I nai aso mai tua ifo, ne faitau ne au se tusi siki telā ne ‵fuli i ei toku olaga. A te fuaiupu tenā ko te Isaia 1:18, telā e fai mai i ei a Ieova penei: “Nei la, o‵mai ke faka‵tonu aka ne tatou a mea ke ‵tonu i te va o tatou. . . . Faitalia me fai otou agasala e pelā me se laugatu kula, ka fai eiloa a mea konā ke ‵kena e pelā me se kiona.” Ne maua ne au se lagonaga me ko faipati ‵tonu mai a Ieova ki a au: “Vau, e Vicky, ke faka‵tonu aka ne tāua a mea ke ‵tonu i te va o tāua. E iloa ne au koe, e iloa ne au au agasala, e iloa ne au tou loto—kae alofa au ki a koe.”

Ne seki mafai o moe au i te po tenā. Koi fakalotolotolua au me e mafai ne Ieova o alofa mai ki a au, kae ne kamata o mafaufau au ki te taulaga togiola a Iesu. E seki leva, ne kamata o malamalama au me ne kufaki a Ieova i a au mō se taimi leva ‵ki, kae fakaasi mai ne ia i auala e uke tena alofa ki a au. Kae e pelā loa me ne fai atu au ki a ia: “E se lava tou alofa ki a au. E se lava foki te taulaga a tau Tama ke fakamagalo ei aku agasala.” E pelā loa me ne toe ‵pei atu ne au te taulaga togiola ki a Ieova. Kae nei la, mai te mafaufau ‵loto ki te meaalofa ko te togiola, ne kamata o lagona ne au a te alofa o Ieova.

TE AUALA NE MAUA EI NE AU A MEA AOGA: Ne fatoa maua ne au se lagonaga ‵ma, malosi, kae katoatoa.

Ko gasolo o ‵lei toku olaga avaga, kae ko fiafia au me e mafai ne au o fakaaoga toku tala ke fesoasoani atu ki nisi tino. Ko momea aka nei toku pili atu ki a Ieova.

“Tenei eiloa te tali ki taku ‵talo.”—SERGEY BOTANKIN

• TAUSAGA NE FANAU I EI: 1974

• TENA FENUA: LUSIA

• TENA TALA FAKASOLOPITO: FIAFIA MALOSI KI PESE MA‵SEI

TOKU OLAGA MUA: Ne fanau au i Votkinsk, te koga ne fanau ei te ‵toe tino fatu pese lauiloa ko Pyotr Ilich Tchaikovsky.

Ne ma‵tiva te motou kāiga. Ne uke ‵ki a uiga ‵lei o toku tamana, kae ne umiti foki ki meainu ma‵losi, tela la, e isi faeloa se lagonaga sē ‵lei i te motou kāiga.

Ne seki poto au i te akoga, kae i te ‵tekaga o tausaga, ne ati aka ne au a manatu fatauva ki a au eiloa. Ne kamata o faka‵mao au mai tino kae se talitonu ki nisi tino. A te kau atu ki te akoga se mea fakafi‵ta. Kafai ko fai mai ke fai atu ne au se lipoti, ne seki mafai ne au o fakamatala faka‵lei atu a manatu tāua i nisi taimi. I te taimi ne oti ei aku akoga, ne tusi penei i taku lipoti: “E se uke ana pati e iloa, kae e se mafai o faipati faka‵lei.” Ne loto vāivāi malosi au i pati konā, kae ne maua ei ne au a lagonaga me e seai soku aoga. Ne kamata o mafaufau au ki te aoga o toku olaga.

I te taimi ko tai matua aka ei au, ne kamata o inu au ki meainu ma‵losi. Muamua la, ne fai ne te inu ke ‵lei oku lagonaga, kae kafai ko tō inu malosi au, ko kamata o pakiakia toku loto lagona. Ne foliga sē aoga mai toku olaga. Ne kamata ei o maua ne au te loto mafatia, kae i nisi taimi e se tiaki ne au toku fale i se fia o aso. Ne kamata o mafaufau au ke fakamate.

I te taimi ko 20 ei oku tausaga, ne kamata o lagona ne au a te fiafia fou kae ne seki tumau. Ne kamata o fiafia malosi au ki pese ma‵sei. Ne maua ne au te malosi mai pese kae ne ‵sala atu au ki nisi tino kolā ne fakalogo‵logo ki ei. Ne faka‵loa toku laulu, ne faka‵pū oku taliga, kae ne teu e pelā me se tino usu pese telā ne fiafia malosi au ki ei. Fakamuli loa, ne fai valevale aku amioga kae uiga fakasaua, telā ne masani sāle o kinau au mo toku kāiga.

Ne mafaufau au me i te fakalogologo ki pese ma‵sei ka fai ei ke fiafia au, kae e se tenā loa te mea ne tupu. Ne kamata o ‵kese oku uiga! Kae i te taimi ne iloa ei ne au a nisi mea ma‵sei e uiga ki tino usuusu lauiloa kolā ne fiafia malosi au ki ei, ne mafaufau au me ne fakatogafitigina au.

Kae ne toe kamata o maua ne au a lagonaga fia fakamate—kae ne gasolo aka o masei. E tasi fua te mea ne taofi aka ei au ko te manatu me e se mafai o fa‵ki toku mātua i ei. E alofa malosi tou fafine ki a au, kae ne uke ‵ki ana mea ne fai mō oku. Ne kamata o fakalavelave malosi mai te tulaga tenā. E seki fia tumau au i te ola, kae ne manako fua au ke fakamate.

Ke fulitua atu ki te mafaufauga tenā, ne kamata o faitau au ki nisi tusi Lusia. E tasi te tala ne aofia i ei se tino lauiloa telā ne tavini atu i se lotu. E seki leva kae ne maua ne au se lagonaga ke fai se mea mō te Atua, kae penā foki ki nisi tino. Mō te taimi muamua, ne ‵tala atu toku loto ki te Atua i se ‵talo. Ne akai atu au ki te Atua ke fesoasoani mai ke maua se olaga aoga. I te faiga o te ‵talo tenā, ne maua ne au se lagonaga ‵lei kae fakaofoofogia. Kae sili atu te fakaofoofogia a te mea ne tupu mai tua ifo. I se lua itula fua mai tua ifo, kae tukituki mai a Molimau a Ieova kae ofo mai se akoga faka-te-Tusi Tapu. Ne talitonu au me tenei eiloa te tali ki taku ‵talo. Tenā loa te kamataga o toku olaga fou kae fiafia.

TE AUALA NE ‵FULI EI NE TE TUSI TAPU TOKU OLAGA: E tiga eiloa ne faigata, ne taumafai au o fakagata so se mea telā e isi sena sokoga ki pese ma‵sei.

Kae ne tumau loa i toku mafaufau a pese mō se taimi leva. I so se taimi ne sasale fakapoi atu au i se koga telā e tagi‵tagi mai i ei a pese, ne mafaufau fakavave au ki toku olaga mua. Ne seki manako au ke palu fakatasi a mea mua sē ‵lei mo mea ‵lei kolā ko kamata o ‵mau i toku mafaufau mo toku loto. Tela la, ne ‵kalo keatea au mai i vaegā koga penā. Kae i so se taimi ne tofotofo aka ei au ke mafaufau ki toku olaga mua, ne ‵talo malosi atu au. A te faiga penā, ne fesoasoani mai ke maua ne au “te filemu o te Atua telā e sili fakafia atu i mea katoa kolā e malamalama i ei a tino.”—Filipi 4:7.

I te taimi ne sukesuke ei au ki te Tusi Tapu, ne iloa ne au me e ‵tau mo Kelisiano o fakaasi atu olotou fakatuanaki ki nisi tino. (Mataio 28:19, 20) Ne mafaufau au me e se mafai o fai atu ne au oku talitonuga ki nisi tino. Kae ko mea ‵fou kolā ne tauloto ne au, ne maua ei a te fiafia mo te filemu lasi. Ne iloa ne au me e ‵tau o iloa ne nisi tino a muna‵tonu foki konei. Faitalia toku mataku, ne kamata o faipati atu au ki nisi tino e uiga ki aku mea ne tauloto. Ne poi malosi au me i te faipati ki nisi tino e uiga ki te Tusi Tapu, ne fakamalosi aka ei toku loto talitonu. Ne faka‵mautakitaki foki i ei a talitonuga ‵fou konei i toku loto.

TE AUALA NE MAUA EI NE AU A MEA AOGA: Nei la, ko maua ne au se olaga avaga fiafia mo te fiafia foki i te fesoasoani atu ki nai tino ke tauloto e uiga ki te Tusi Tapu, e aofia i ei toku tuagane mo toku mātua.

A te tavini atu ki te Atua mo te fesoasoani ki nisi tino ke tauloto e uiga ki a ia, ne maua ei ne au se olaga aoga tonu.