1 E se Mafai o Iloa te Atua e Mata, e Tonu te Manatu Tenā?

Mea kolā kāti ne logo koe i ei: “E galue te Atua i auala e se mafai o iloa.” “E se mafai o malamalama tatou i te Tamana, e se mafai o malamalama i te Tama, e se mafai foki o malamalama i te Agaga Tapu.”—Te fakamatalaga i The Athanasian Creed e uiga ki te Tolutasi telā ne akoakogina ne lotu e uke i Lotu Kelisiano ‵Se.

Mea kolā e akoako mai i te Tusi Tapu: Ne fai mai a Iesu me i tino kolā e ma‵nako ke iloa ne latou a “te Atua tonu e tokotasi” ka maua ne latou a fakamanuiaga. (Ioane 17:3) Kae e mafai pefea o iloa ne tatou te Atua māfai a ia se Atua telā e se mafai o iloa? E se ‵funa ne ia a ia mai i a tatou. E ‵kese mai i ei, e manako a ia ke iloa ne tino katoa a ia.—Ielemia 31:34.

E tonu, ka se mafai o iloa ne tatou a mea katoa e uiga ki te Atua. E ‵tau o fakamoe‵moe tatou penā me i ana mafaufauga mo ana auala e se ‵pau mo tatou.—Failauga 3:11; Isaia 55:8, 9.

Te auala e fesoasoani mai ei a te iloaga e uiga ki te munatonu ki a koe: Kafai e se mafai o malamalama a tino i te Atua, kaia la e ‵tau ei o taumafai tatou ke iloa ne tatou a ia? E se gata i ei, e manako a ia ke iloa ne tatou a ia kae ke ati aka foki ne tatou se va fakataugasoa ‵pili mo ia. Ne taku ne te Atua a te tagata fakamaoni ko Apelaamo e pelā me ko tena “taugasoa” kae ne tusi mai te tupu o Isalaelu ko Tavita, penei: A Ieova “ko te taugasoa [pili] o tino kolā e faka‵logo ki a ia.”—Isaia 41:8; Salamo 25:14.

E mata, e tonu te manatu me e se mafai o maua se va fakataugasoa ‵pili mo te Atua? Kāti la, kae mafaufau aka ki pati kolā e fakaasi mai i te Galuega 17:27: “Ka ko ia [te Atua] e se ‵mao mai i a tatou takitokotasi.” I te auala fea? E auala i te Tusi Tapu, e tuku mai ne te Atua a mea kolā e manakogina ke mafai o iloa ‵lei ne tatou a ia.a

E fakaasi mai ne ia a tena igoa, ko Ieova. (Isaia 42:8, Tusi Paia, Samoa) Ne fakamau ne ia ki lalo a fakamatalaga e uiga ki ana faifaiga ki tino ko te mea ke mafai o malamalama tatou me ko ia se vaegā Tino pefea. E se gata i konā, e fakaasi mai ne te Atua ana lagonaga ki a tatou. A iae “‵fonu i te alofa mo te kaimalie, e tuai o ita kae lasi tena alofa mo tena fakamaoni.” (Esoto 34:6) A ‵tou faifaiga e mafai o pokotia i ei ana lagonaga. E pelā me se fakaakoakoga, ne “fakafanoanoa” a ia ne te fenua ko Isalaelu i aso mua i te taimi ne ‵teke atu ei latou ki a ia, a ko latou kolā ne ‵poto o faka‵logo ki a ia ne fakafiafia ne latou a ia.—Salamo 78:40; Faataoto 27:11.

[Fakamatalaga fakaopoopo]

[Manatu tāua i te itulau e 4]

Kafai te Atua se vaega o te Tolutasi telā e se mafai o iloa ne tatou, e mafai la pefea o iloa faka‵lei ne tatou a ia?

[Ata i te itulau e 4]

The Trinity c.1500, Flemish School, (16th century)/H. Shickman Gallery, New York, USA/The Bridgeman Art Library International