5 E Talia ne te Atua a Tapuakiga Katoa e Mata, e Tonu te Manatu Tenā?

Mea kolā kāti ne logo koe i ei: “E pelā mo auala fo‵liki mo auala ‵lasi e uke kolā e mafai o takitaki atu ei koe ke oko ki te koga e tasi, e uke foki a auala kolā e takitaki atu ei koe ki te Atua. E ‵tau mo tino taki tokotasi o ‵sala tena auala ki te Atua.”

Mea kolā e akoako mai i te Tusi Tapu: E ‵tau o fakamaoni tatou ki te ‵tou tapuakiga, kae ‵kalo keatea mai te uiga fakaloiloi. Ne fai atu ne Iesu ki takitaki lotu i ona aso a te pogai ne seki talia ei ne te Atua a latou: “Ko tonu ei te valoaga a Isaia ne fai e uiga mō koutou! Ne tusi ne ia i a koutou ne tino fia amio‵tonu: ‘Muna a te Atua i tino konei e faka‵malu io me āva mai ki a au i olotou pati, ka ko olotou loto ko oko eiloa i te ‵mao mai i a au.’” (Maleko 7:6) Kae ko te fakamaoni i a ia eiloa, e se fakaasi mai i ei me ka talia ne te Atua a ‵tou tapuakiga.

Ne fakaasi manino mai ne Iesu a te mea tenei mai te fakaasi faka‵sau atu a te ‵se o te tapuakiga telā ne tuku atu ne takitaki lotu konā mo olotou soko. Ne fakasino atu ne ia ki a latou a muna a te Atua konei: “E se aoga te lotou tapuaki mai ki a au, i te mea e akoako a fakatonuga a tino e pelā me ne tulafono a te Atua!” (Maleko 7:7) “E se aoga” te lotou tapuakiga, me e fakamuamua ne latou olotou tuu fakalotu i lō fakatakitakiga a te Atua.

I lō te ‵lago atu ki te manatu me e uke a auala ‵lei ke fakapili‵pili atu ki te Atua, e akoako mai te Tusi Tapu me e tasi fua te auala tenā. E fai mai te Mataio 7:13, 14, penei: “Ulu atu koutou ki te mataloa mataliki; me i te mataloa mataefa e faigofie ei te auala e tau atu ki te malaia, e tokouke foki latou kolā e olo atu i ei. Ka ko te mataloa mataliki e faigata te auala e tau atu ki te ola, e timomo foki a tino e maua ne latou.”

Te auala e fesoasoani mai ei a te iloaga e uiga ki te munatonu ki a koe: Fakaataata i tou mafaufau me e pefea ou lagonaga māfai ne fakamasani koe i se fia masina ke tele i se fakatau‵telega loa kae ne manumalo koe i ei, kae se lau tou sili ona ko te mea ne soli ne koe se tulafono e tasi e aunoa mo te iloa ne koe. Kāti e mafai o mafaufau koe me ne māumāu fua au taumafaiga katoa ne fai. E mata, e mafai o tupu se mea penei ki ‵tou tapuakiga ki te Atua?

Kafai e fakatusa ne tatou a te ‵tou tapuakiga ki se fakatau ‵telega, ne tusi mai te apositolo ko Paulo, penei: “A te tino tele telā e tele i te fakatau‵telega, e se mafai o maua ne ia se fakailoga seiloga ke tausi ki tulafono o te fakatau ‵telega.” (2 Timoteo 2:5) E maua ne tatou a te taliaga a te Atua mai te tapuaki atu ki a ia e ‵tusa mo “tulafono” kolā e talia ne ia. E se mafai ne tatou o olo atu ki te Atua i so se auala telā e ma‵nako tatou ki ei e pelā mo se tino tele telā e mafai o tele ki te mea e manako a ia ki ei kae fakamoemoe foki ke sili a ia i te fakatau ‵telega.

Ke fakafiafia te Atua, e ‵tau mo tatou o tausi a te ‵tou tapuakiga ke saoloto mai akoakoga ‵loi e uiga ki a ia. Ne fai mai a Iesu: “Tela la, ko latou kolā e tapuaki fakamaoni, ka tapuaki ki te Tamana i te agaga mo te fakamaoni.” (Ioane 4:23) E tauloto ne tatou a te auala tonu ki te Atua mai tena Muna, ko te Tusi Tapu.—Ioane 17:17.a

[Fakamatalaga fakaopoopo]

[Manatu tāua i te itulau e 8]

E mata, e akoako ne lotu katoa a tino ke tapuaki atu ki te Atua i te auala telā e talia ne ia?