E Mata, e Iloa ne Koe?

Kaia ne ‵nofo atu ei a tino faka‵liu tupe i te faletapu i Ielusalema?

▪ Mai mua malie eiloa o tena mate, ne faipati a Iesu ki se faifaiga sē fakamaoni kae matagā i loto i te faletapu. E lipoti mai te Tusi Tapu, penei: “A Iesu . . . ne afuli ne ia ki tua a tino katoa kolā ne fakatau mea i ei. Ne ‵tule foki ne ia a laulau a tino faka‵liu tupe, pelā foki mo nofoaga o tino fakatau lupe. Ne muna atu a ia ki a latou: ‘Ko oti ne tusi i te Tusi, i te Atua ne muna mai penei, “E taku toku fale ko te fale ‵talo.” Ka ko fai nei ne koutou ke fai mo ana o tino kai‵soa!’”—Mataio 21:12, 13.

I te senitenali muamua, ne faima‵laga atu a tino Iutaia mo tino kolā ne ‵fuli ki te lotu Iutaia mai fenua mo fa‵kai e uke, ki te faletapu i Ielusalema, kae avatu olotou tupe mai olotou koga ‵nofo. Kae ne ma‵nako ke fakaaoga ne latou a tupe konā ke ‵togi ki ei olotou lafoga i te faletapu i te tausaga kātoa, ke ‵togi ki ei olotou manu mō fai a taulaga, kae ke fai foki olotou meaalofa. Kae e ‵fuli ne tino faka‵liu tupe a tupe a tino kolā ne aumai i koga kese‵kese ki te mea telā e ma‵nako ki ei a tino, kae tausi ne latou se vaega o tupe konā e pelā me se ‵togi. Kafai ko pili o fai a ‵kaiga faka-Iutaia, e faka‵tu ne tino ‵fuli tupe konei a taipola i te koga ateatea o tino o Fenua Fakaa‵tea i loto i te faletapu.

Ne seki talia ne Iesu me ne ‵fuli ne tino faka‵liu tupe konei a te faletapu ki se “ana o tino kai‵soa” telā e fakaasi manino mai i ei me ne tuku atu ne latou ki tino se ‵togi ‵mafa ke ‵fuli aka ei a tupe.