Tali ki Fesili e Sefulu e Uiga ki te ‵Moe Fakatauavaga

1 E mata, a te ‵moe fakatauavaga ko te agasala telā ne fai ne Atamu mo Eva i te fatoaga o Etena?

▪ Tali: E mafau‵fau a tino e tokouke me i te fuaga telā ne fakatapu i te fatoaga o Etena e fakasino atu eiloa ki amioga fakatauavaga. Kae e se tenā loa te mea e akoako mai i te Tusi Tapu.

Mafaufau ki te mea tenei: Mai mua o faite a Eva, ne fakatonu atu a te Atua ki a Atamu ke se kai ki te fuaga o “te lakau telā e fai ne ia te tino ke iloa te ‵lei mo te masei.” (Kenese 2:15-18) Ona ko te mea ne nofo tokotasi a Atamu i te taimi tenā, ne seki fakasino atu a te fuaga telā ne fakatapu ki amioga fakatauavaga. E se gata i ei, ne fai atu ne te Atua ki a Atamu mo Eva se fakatonuga manino ke “fakatokouke otou tama‵liki, ko te mea ko otou fanau ke ‵nofo i te lalolagi.” (Kenese 1:28) E mata, e mafai o fakatonu atu ne se Atua alofa a te tauavaga muamua ke ‘fakatokouke lā tama‵liki’—telā e mautinoa eiloa me e aofia i ei amioga fakatauavaga—kae oti aka ko fakasala ne ia lāua ki te mate ona ko te faka‵logo ki ana fakatonuga?—1 Ioane 4:8.

E se gata i ei, ne seki nofo atu a te avaga a Eva i te taimi “ne puke aka ne ia te fuagā lakau, kai ei ne ia. Ne tuku atu ne ia ne mu mea ki tena avaga, telā ne kai foki ki ei.”—Kenese 3:1-6.

I tafa i ei, ne seki polopoloki ‵mafa a Atamu mo Eva i te taimi ne ‵moe fakatauavaga ei lāua kae fa‵nau foki lā tama‵liki. (Kenese 4:1, 2) E manino ‵lei, me i te fuaga telā ne kai ne Atamu mo Eva e se fakasino atu ki amioga fakatauavaga kae ko te fuaga tonu eiloa telā ne fua mai i te lakau.

2 E mata, e fakatapu ne te Tusi Tapu a manakoga fakatauavaga?

▪ Tali: E fakaasi mai i te tusi muamua i te Tusi Tapu me ko te Atua ne faite ne ia te “tagata mo te fafine.” Ne “fiafia malosi” eiloa a te Atua ki ana mea ne faite. (Kenese 1:27, 31) Fakamuli ifo, ne fakamalosi atu a te Atua ki se tino ne tusi ne ia te Tusi Tapu ke fai atu a fakatonuga konei ki tāgata a‵vaga: “Ke fiafia koe ki te tamafine ne avaga koe ki ei . . . Ke malie koe ki ana ū i taimi katoa.” (Faataoto 5:18, 19 Tusi Paia, Samoa) E mata, e fakaasi mai i pati konā me e fakatapu ne te Tusi Tapu a manakoga fakatauavaga?

E tonu, i tafa o te faiga ke fanafanau se tino, ne faite foki ne te Atua a koga tapu o te foitino ko te mea ke mafai o fakatau fakaasi atu ne se tauavaga a te lā a‵lofa i se auala fakafiafia. A faifaiga penā e fai ei ke fakama‵lie aka a manakoga mo lagonaga o te tagata mo te fafine kolā e maua ne lāua se fesokotakiga alofa kae ‵pili.

3 E mata, e talia i te Tusi Tapu ke ‵nofo fakapouliuli se tokolua?

▪ Tali: E fakaasi manino mai te Tusi Tapu: “E fakamasino ne te Atua a latou kolā e fina lalolagi.” (Epelu 13:4) A te pati Eleni telā ne ‵fuli ki te finalalolagi ko te por·neiʹa, kae fakasino atu ki te fakaaogaga o koga tapu o se tino i se auala sē ‵tau ne tino kolā e seki a‵vaga.a Tela la, e se talia eiloa ne te Atua ke ‵nofo fakapouliuli se tokolua—faitalia me e fakamoe‵moe lāua ke avaga fakamuli ifo.

Faitalia me e fia‵fai ‵ki se tokolua, e manako eiloa te Atua ke fakaipoipo muamua lāua a koituai o ‵moe fakatauavaga lāua. Ko te Atua eiloa ne faite ne ia tatou mo te manakoga ke fiafai ki te suā tino. A te uiga tāua o te Atua ko te alofa. Tela la, e isi loa se pogai tonu ne fakamalosi aka ei ne ia ke ‵moe fakatauavaga a tino fua kolā ko oti ne fakaipoipo, e pelā mo te mea e fakamatala mai i te suā mataupu.

4 E mata, e talia ke tokouke a avaga a se tino?

▪ Tali: Ne talia ne te Atua mō se vaitaimi ke tokouke a avaga a se tagata. (Kenese 4:19; 16:1-4; 29:18-30:24) Kae e se ko te Atua ne kamata ne ia te faifaiga ke tokouke a avaga a se tino. E tokotasi fua te avaga a Atamu ne tuku atu ne ia.

Ne talia ne te Atua ke toe fakamalosi aka ne Iesu Keliso a Tena fuafuaga i te kamataga ke tokotasi fua te avaga a se tino. (Ioane 8:28) I te taimi ne fakafesili atu ei ki a ia e uiga ki te faiga o fakaipoipoga, ne fai atu a Iesu: “A ia telā ne faite ne ia a tino i te kamataga, ne faite ne ia a te tagata mo te fafine. Ne fai atu, ‘Tenā te pogai ko tuku ei ne te tagata tena tamana mo tena mātua, kae fakatasi mo tena avaga, ko fai ei lāua mo foitino e tasi.’”—Mataio 19:4, 5.

Ne fakamalosi atu te Atua ki se soko e tokotasi o Iesu, ke tusi mai penei: “Ko ‵tau ei i tāgata takitokotasi ke fai ne olotou avaga, e pelā foki mo fāfine.” (1 Kolinito 7:2) E fai mai foki te Tusi Tapu me i so se tagata avaga i te fakapotopotoga Kelisiano telā e isi ne ana tauliaga fakapito “e ‵tau foki eiloa mo ia o tokotasi tena avaga.”—1 Timoteo 3:2, 12.

5 E mata, e se ‵tau o fakaaoga ne taki tauavaga a fuafuaga?

▪ Tali: Ne seki fakatonu atu a Iesu ki ana soko ke mo a ma fai olotou tama‵liki. Ke oko foki loa ki soko o Iesu, e seki ai se fakatonuga penā ne tuku mai ne latou. E seai se tusi i te Tusi Tapu e taku fakamasei i ei a te fuafuaga o kāiga.

Tela la, e maua ne taki tauavaga a te saolotoga ke fai olotou filifiliga me e ‵tau o fai ne tama‵liki io me ikai. E mafai foki o fakaiku aka ne lāua me e fia lā tama‵liki e ma‵nako ki ei, kae ko te taimi fea foki ke fai ei. Kafai e fakaaoga ne se tauavaga te fuafuaga telā e se aofia i ei te fakatōga o pepe, a te mea tenā se filifiliga totino eiloa a lāua.b E seai se tino e ‵tau o fakamasino ne ia lāua.—Loma 14:4, 10-13.

6 E mata, e se ‵lei ke fakatō se pepe?

▪ Tali: E tāua ‵ki eiloa a te ola ki te Atua, kae e kilo atu a ia ki te pepe i loto i te moegatama o se fafine e pelā eiloa me se tino ola. (Salamo 139:16) Ne fai mai te Atua me e ‵tau eiloa o fakasala a te tino telā ne fakapakia ne ia se tamaliki e seki fanau mai. Tela la, a te tamatega o se tamaliki e seki fanau mai, ko te tatino eiloa tenā i te kilokiloga a te Atua.—Esoto 20:13; 21:22, 23.

Kae pefea la māfai e sae fakavave aka se fakalavelave i te taimi e fanau ei se fafine, kae ko faimalō atu ki te tauavaga ke filifili aka me ko oi ka fakasao i te tamaliki mo te mātua? I te tulaga tenā, e ‵tau o fakaiku aka ne te tauavaga me ko oi ka fakasao ne lāua.c

7 E mata, e talia ne te Tusi Tapu ke ‵tala a avaga?

▪ Tali: E talia ne te Tusi Tapu ke ‵tala a avaga. Kae ne tuku mai ne Iesu a te pogai fua e tasi ke ‵tala aka ei se avaga, i ana pati: “So se tino e ‵tala tena avaga kae seki mulilua [ko te ‵moe fakatauavaga mo se tino telā e se avaga mo koe], e mulilua eiloa a ia manafai e toe avaga ki se isi fafine.”—Mataio 19:9.

E takalialia a te Atua ki te avaga telā e ‵tala i pogai sē ‵tonu. Ka fakamasino eiloa ne ia a tino kolā e tiaki ne latou olotou avaga mo te fakamoemoega ke avaga ki se isi tino.—Malaki 2:13-16; Maleko 10:9.

8 E mata, e talia ne te Atua a amioga fakatauavaga i te va o tāgata, e pelā foki mo fāfine?

▪ Tali: E taku fakamasei eiloa ne te Tusi Tapu a amioga fakatauavaga sē ‵tau, kae e aofia i ei a amioga fakatauavaga i va o tāgata, e pelā foki mo fāfine. (Loma 1:26, 27; Kalatia 5:19-21) E tiga eiloa e fakaasi ‵tonu mai i te Tusi Tapu a te takalialia o te Atua ki te vaegā olaga penā, kae e iloa foki ne tatou me ne “alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se-gata-mai.”—Ioane 3:16.

E ui eiloa e se talia ne Kelisiano ‵tonu a faifaiga penā, kae e fakaasi atu ne latou te alofa atafai ki tino katoa. (Mataio 7:12) E manako te Atua ko tatou ke “āva ki tino katoa.” Tela la, e se talia ne Kelisiano ‵tonu a vaegā faifaiga penā.—1 Petelu 2:17.

9 E mata, e masei te sautala, te fakalogologo mo te lafo atu o ata o amioga fakatauavaga i luga i te telefoni io me ko te itaneti?

▪ Tali: E se fakamatala fakamaea mai i te Tusi Tapu a vaegā faifaiga penei. Kae e fai mai, penei: “Ona ko koutou ko tino o te Atua, tela la, se mea sē ‵tau ke faipatigina koutou e fina lalolagi, e amio sē tonu mo te kaimanako. E se ‵tau foki mo koutou o fai‵pati ki pati ma‵sei, pati va‵lea mo pati lai‵lai.” (Efeso 5:3, 4) A te sautala, te fakalogologo mo te lafo atu o ata o amioga fakatauavaga e fakamalosi aka ei a tino ke fai ne latou a amioga fakatauavaga mo tino kolā e se avaga latou. I lō te fesoasoani atu ki tino ke taofi aka olotou manakoga fakatauavaga, e fakamalosi aka fua ne faifaiga penei ke fakataunu eiloa ne tino olotou manakoga fakatauavaga.

10Se a te kilokiloga a te Tusi Tapu ki te fai tokotasi?

▪ Tali: E seai se fakamatalaga manino mai i te Tusi Tapu e uiga ki te fai tokotasi—ko te fakamalosi aka o lagonaga fakatauavaga i se tino. Kae e fakatonu mai a te Muna a te Atua ki Kelisiano: “Fakagata a uiga faka-te-lalolagi i loto i a koutou, e penei mo mea konei: te fina lalolagi, ko te amio se ‵ma, ko manakoga masei.”—Kolose 3:5.

E fakamalosi aka ne te fai tokotasi se kilokiloga sē tonu ki te ‵moe fakatauavaga. E fakamautinoa mai te Tusi Tapu me e mafai o tuku mai ne te Atua a “te ‵mana” ki a latou kolā e taumafai malosi o fakagata aka a te faifaiga masani tenei.—2 Kolinito 4:7; Filipi 4:13.

[Fakamatalaga fakaopoopo]