Fakatumau Se Loto E Katoatoa Ki A Ieova

“Taku tama, . . . ke talitonu koe ki te Atua o tou tamana, kae tavini atu ki a ia mo tou loto kātoa.” —1 NOFOAIGA TUPU 28:9.

‵SALA AKA A TALI KI FESILI KONEI:

Se a te fatu fakatusa?

Se a te auala e tasi e mafai ei ne tatou o iloilo a ‵tou loto?

E mafai pefea o tavini atu tatou ki a Ieova mo ‵tou loto kātoa?

1, 2. (a) Se a te vaega o te foitino e masani o fakasino sāle ki ei te Tusi Tapu i se auala fakatusa i lō nisi vaega aka? (e) Kaia e tāua ei ke malamalama tatou i te uiga o te fatu fakatusa?

A TE Tusi Tapu e masani o fakaaoga a vaega o te foitino i se auala fakatusa, ke fakamatala i ei se mea fakaa‵tea. E pelā me se fakaakoakoga, ne fai mai a Iopu: “E seai ne fakasauaga i oku alofilima.” Ne lavea ne te tupu ko Solomona me: “A te lipoti telā e ‵lei e fakasinusinu ne ia te ivi.” Ne fakapa‵tonu atu a Ieova ki a Esekielu: “Ko oti ne fai ne au ou mualae e pelā me se taemani telā e makeke atu i te fatukala.” Kae ne tusi atu a Paulo ki a Timoteo: “Ka faka‵tuli ne latou olotou taliga ki te munatonu.”—Iopu 16:17, NW; Faataoto 15:30, NW; Esekielu 3:9, NW; 2 Timoteo 4:4.

² E tasi te vaega o te foitino e fakasino sāle ki ei te Tusi Tapu i se auala fakatusa i lō nisi vaega aka. A te mea tenā ko te fatu. Ne faipati a te tino fakamaoni ko Hana e uiga ki ei i tena talo. Muna a tou fafine: “Ko te Aliki ne fakafonu ne ia toku loto i te fiafia.” (1 Samuelu 2:1) Toeitiiti ko kātoa te afe taimi e fakasae mai ei ne tino ne tusi ne latou a te Tusi Tapu, a te fatu i se auala fakatusa. E tāua ‵ki ke malamalama tatou me se a te mea e sui mai ne te fatu me e fai mai te Tusi Tapu me e ‵tau o puipui ne tatou.—Faitau te Ielemia 17:9.

TE FATU FAKATUSA—SE A TE MEA TENĀ?

3. E mafai pefea o iloa ne tatou a te uiga o te fatu fakatusa i te Tusi Tapu? Tuku mai se fakaakoakoga.

³ E tiga eiloa e se tuku mai i te Muna a te Atua se fakamatalaga e uiga ki te “fatu,” koi mafai eiloa o iloa ne tatou a te uiga o te pati tenā. E pefea la? Ke fai se fakaakoakoga, mafaufau ki se ata gali ‵ki telā e faite mai i fatu mole‵mole fo‵liki e afe kolā ko oti ne fakapikipiki fakatasi. Ko te mea ke lavea ‵lei atu me se a te ata telā e faite aka ne fatu mole‵mole katoa, e ‵tau o soloki mālie tatou ki tua kae ‵kilo atu ki te ata saukātoa. E penā foki loa, e manakogina ke onoono tatou ki koga katoa kolā e fakaaoga i ei a te pati “fatu” [io me ko te loto] i te Tusi Tapu ko te mea ke mafai o malamalama tatou me se a te mea e fakauiga ki ei. Tela la, se a te te fatu fakatusa?

4. (a) Se a te mea e sui mai ne te “fatu”? (e) Se a te uiga o pati a Iesu kolā e tusi i te Mataio 22:37?

⁴ E fakaaoga ne tino kolā ne tusi ne latou a te Tusi Tapu a te pati “loto” io me ko te fatu fakatusa ke fakamatala mai i ei a mea katoa i loto i te tino. E aofia i ei a ‵tou manakoga, mafaufauga, uiga totino, faifaiga, mea e mafai o fai, lagonaga, mo fakamoemoega. (Faitau te Faataoto 13:12; Isaia 10:7; Galuega 2:26.) Kae e isi eiloa ne taimi e se fakauiga a te pati “loto” io me ko te fatu fakatusa ki mea katoa konei. E pelā me se fakaakoakoga, muna a Iesu: “E ‵tau mo koe o alofa ki a Ieova tou Atua mo tou loto kātoa mo tou foitino kātoa mo tou mafaufau kātoa.” (Mataio 22:37) I konei, e fakasino atu a te pati “loto” io me ko te fatu fakatusa ki lagonaga mo manakoga tonu o te tino. Ne taku taki tasi mai ne Iesu a te loto, foitino, mo te mafaufau ke faka‵mafa mai i ei me e ‵tau o fakaasi atu ‵tou a‵lofa ki te Atua mai i ‵tou lagonaga e pelā foki mo te auala e ola ei tatou kae fakaaoga a ‵tou mafaufau. (Ioane 17:3; Efeso 6:6) Kafai e taku mai a te pati “loto” io me ko te fatu fakatusa i a ia eiloa, e fakauiga loa ki mea katoa i loto i te tino.

TE POGAI E MA‵NAKO EI TATOU O PUIPUI ‵TOU LOTO

5. Kaia e ma‵nako ei tatou o fai a te ‵toe mea e mafai ne tatou o fai ke tavini atu ki a Ieova mo te loto kātoa?

⁵ Ne fakamasaua atu a te tupu ko Tavita ki a Solomona: “Taku tama, au e fai atu ki a koe, ke talitonu koe ki te Atua o tou tamana, kae tavini atu ki a ia mo tou loto kātoa mo tou mafaufau kātoa. E iloa ne ia a ‵tou mafaufauga mo ‵tou manakoga katoa.” (1 Nofoaiga Tupu 28:9) E sukesuke ne Ieova a loto katoa, e aofia i ei ‵tou loto. (Faataoto 17:3; 21:2) A ko mea kolā e maua aka ne ia i ‵tou loto, e fakamalosi aka ei te ‵tou fesokotakiga mo ia e pelā foki mo ‵tou aso mai mua. Tela la, e ‵tau o tautali tatou i te manatu o Tavita mai te faiga o te ‵toe mea e mafai ne tatou ke tavini atu ki a Ieova mo te loto kātoa.

6. Se a te mea e ‵tau o iloa ne tatou e uiga ki ‵tou fakaikuga ke tavini atu ki a Ieova?

⁶ Ko leva ne fakaasi atu ne tatou e auala i ‵tou galuega kolā e fai mo te loto finafinau e pelā me ne Molimau a Ieova me e ma‵nako tatou ke tavini atu ki a Ieova mo te loto kātoa. Kae e iloa ne tatou me i te lalolagi masei a Satani mo ‵tou manakoga agasala e mafai o fakamalosi mai ki a tatou kae fakavāivāi i ei a ‵tou fakaikuga ke tavini atu ki a Ieova mo ‵tou loto kātoa. (Ielemia 17:9; Efeso 2:2) Ko te mea ke mo a ma tupu a te mea tenei, e ‵tau o iloilo aka faeloa ne tatou a ‵tou loto. E mafai pefea o fai ne tatou a te mea tenā?

7. Se a te mea e fakaasi atu i ei a tulaga tonu o ‵tou loto?

⁷ E seai se tino e mafai o lavea ne ia a mea i loto i a tatou, e pelā loa mo te sē mafai o lavea ne se tino a te kogāloto io me ko te uso o te lakau ola. E pelā mo muna a Iesu i te Lāuga i luga i te Mauga, me e fakaasi mai ne fuataga o te lakau a te tulaga o te lakau, e penā foki a faifaiga e fai ne tatou e fakaasi mai i ei a tulaga tonu o ‵tou loto. (Mataio 7:17-20) Ke mafau‵fau aka tatou ki se faifaiga e tasi i konei.

E TASI TE AUALA E MAFAI EI NE TATOU O ILOILO A ‵TOU LOTO

8. Se a te sokoga o pati a Iesu kolā e maua i te Mataio 6:33 ki mea kolā i loto i ‵tou loto?

⁸ I te Lāuga i luga i te Mauga, ne fai atu foki ne Iesu ki ana tino fakalogo‵logo a mea e ‵tau o fai ne latou ke fakaasi atu i ei te lotou manakoga ke tavini atu ki a Ieova mo te loto kātoa. Ana muna: “Tela la, ke ‵sala muamua faeloa ne koutou te Malo mo tena amiotonu, kae ka fakaopoopo atu a mea katoa konei ki a koutou.” (Mataio 6:33) A mea kolā e fakamuamua ne tatou i ‵tou olaga e fakaasi atu i ei ne tatou a ‵tou manakoga, mafaufauga, mo palani kolā i loto i ‵tou loto. Tela la, a te auala e tasi e iloa ei me e tavini atu tatou ki te Atua mo te loto kātoa ko te iloilo faka‵lei aka me se a te ‵toe mea tāua i ‵tou olaga.

9. Se a te ‵kamiga ne fakaoko atu ne Iesu ki nisi tāgata, kae se a te mea e fakaasi mai i olotou faifaiga?

⁹ Ke mafau‵fau tatou ki se mea telā ne tupu fakavave mai tua o te faiatuga a Iesu ki ana soko ke tumau i te ‵sala muamua ki te Malo. E fakaasi mai ne te mea tenei me e mafai o iloa a lagonaga o se tino i tena loto mai mea kolā e fakamuamua ne ia i tena olaga. E fai mai a Luka ki a tatou me i a Iesu ne “malosi eiloa tena loto ke fanatu a ia ki Ielusalema faitalia me e iloa ne ia a mea kolā ka logo‵mae ei a ia i konā. “A koi olo atu latou i te auala,” ne fetaui a Iesu mo nisi tāgata kae ‵kami atu latou ke fai mo ana soko. Ne loto fia‵fia a tāgata konā o talia a tena ‵kamiga, kae ne ma‵nako latou o fai muamua aka a nisi mea. E tali mai se tagata e tokotasi: “Tuku mai mua au ke fano o tanu toku tamana.” Muna a te suā tino: “Ka tautali atu au i a koe, e te Aliki, kae talia mai ke fakatofa muamua au ki tino o toku kāiga.” (Luka 9:51, 57-61) E lavea ‵lei ne tatou a te lasi o te ‵kese o te fakaikuga makeke a Iesu ke fai te loto o te Atua mo faifaiga vāivāi a tāgata konā ki te ‵kamiga a Iesu. Ne fakamuamua ne latou olotou manakoga totino, kae fakaasi mai ne te mea tenei me e se loto fia‵fia latou o tavini atu ki te Atua mo te loto kātoa.

10. (a) Ne ‵saga atu pefea a soko o Keliso ki te ‵kamiga telā ne fai atu ne Iesu? (e) Se a te tala fakatusa ne taku mai ne Iesu?

¹⁰ E ‵kese a ‵tou faifaiga mo faifaiga a tāgata konā. Ko oti ne talia ne tatou a te ‵kamiga a Iesu ke fai mo ana soko kae ko tavini atu nei tatou ki a Ieova i aso katoa. I te auala tenei e fakaasi atu ei ne tatou i ‵tou loto a ‵tou lagonaga e uiga ki a Ieova. Kae faitalia te fakalave‵lave o tatou i te taviniga ki a Ieova, e ‵tau o masaua ne tatou me koi fakamataku eiloa a ‵tou loto. Se a te mea e fakamataku i ei? E tauloto ne tatou a te tali mai pati a Iesu ne fai atu ki a latou kolā ne ‵kami ne ia ke fai mo ana soko. Ne fakailoa atu a ia ki a latou: “E seai se tino e puke tena lima ki se mea fakamalū laukele, kae toe kilo ki mea i ana tua, e aoga mō te Malo o te Atua.” (Luka 9:62) Se a te akoakoga e maua ne tatou mai i te tala fakatusa tenei?

E MATA, E “PUKE ‵MAU [TATOU] KI MEA ‵LEI”?

11. I te tala fakatusa a Iesu, se a te mea ne tupu ki te galuega a te tagata fakamalū laukele, kae kaia?

¹¹ Ke fakaopoopo aka ne tatou ne fakamatalaga likiliki e uke atu ki te tala fakatusa a Iesu ko te mea ke mafai o malamalama faka‵lei tatou i ei. Ko fakalavelave a te tino galue i te fakamalūga o te laukele. A koi fakamalū a ia, e mafaufau faeloa a tou tagata ki tena fale. I tena fale e mafai loa o ‵kai fiafia a ia fakatasi mo tena kāiga mo taugasoa, mea fakatagi‵tagi, kata‵kata, kae nofonofo i lalo o malumalūga o lakau. Ko oko eiloa i te manako malosi o tou tagata ki mea konei. Mai tua o te fakamalūga mō se taimi tai mata leva, ne gasolo aka eiloa o malosi a te manako o te tino galue ki mea ‵gali o te olaga telā ne toe ‵fuli ei a ia o “kilo ki mea i ana tua.” E tiga eiloa koi uke ‵ki a galuega e ‵tau o fai ke oko eiloa ki te taimi e ‵toki ei a te laukele, ko sē saga tonu a te tino galue kae ko sē fai faka‵lei foki a tena galuega. Ao, ne seki fiafia a te matai me i ana tino ga‵lue ne seki loto kufaki.

12. E mafai pefea o ‵pau a te tulaga o se Kelisiano i aso nei mo te tino galue i te tala fakatusa a Iesu?

¹² Nei la, ke mafaufau me e mafai pefea o tupu se mea tai ‵pau penā i aso nei. E mafai o faka‵tusa a te tino galue ki so se Kelisiano telā ne fanofano ‵lei eiloa kae ko tena loto ko tu i se tulaga fakamataku. E pelā me se fakaakoakoga, ke fakaataata i ‵tou mafaufau se taina telā e kau faeloa ki fakatasiga mo te galuega talai. Kae e mafaufau faeloa tou tagata ki nisi mea o te lalolagi nei kolā e fiafia a ia ki ei. I loto i tena loto, ko oko eiloa i te manako malosi o tou tagata ki ei. Mai tua o se fia tausaga ne fai ei ne ia tena taviniga, ne gasolo aka eiloa o malosi atu a tena manako ki nisi mea o te lalolagi tenei telā ne ‵fuli atu ei a ia kae toe “kilo ki mea i ana tua.” E tiga eiloa koi uke ‵ki a galuega e ‵tau o fai i te galuega talai, ko se saga tonu atu tou tagata ki ei kae ko sē tavini faka‵lei atu e pelā mo te taimi muamua. (Filipi 2:16) E fanoanoa a Ieova, “te Matai o te galuega,” māfai se tino galue e tokotasi a ia ko sē loto kufaki.—Luka 10:2.

13. Se a te uiga ke tavini atu ki a Ieova mo te loto kāota?

¹³ E manino ‵lei a te akoakoga e maua ne tatou. Ke tavini atu ki a Ieova mo te loto kātoa e fakauiga loa ki mea e uke atu i lō te kau faeloa ki fakatasiga a te fakapotopotoga mo te galuega talai. (2 Nofoaiga Tupu 25:1, 2, 27) Kafai e tumau eiloa a te loto o se Kelisiano i te fiafai ki “mea i ana tua,” ko mea kolā e aofia i te vaegā olaga o te lalolagi tenei, ka fakamataku eiloa tena va fakataugasoa mo Ieova. (Luka 17:32) Tela la ke tavini atu ki te Atua mo te loto kātoa, e ‵tau mo tatou o “takalia‵lia ki mea ma‵sei, kae puke ‵mau ki mea ‵lei” kae ka fai ei tatou ke “aoga mō te Malo o te Atua.” (Loma 12:9; Luka 9:62) Kafai foki e isi ne mea i te lalolagi a Satani e foliga mai me e aoga io me ‵gali, e ‵tau o fakamautinoa aka ne tatou ke seai eiloa se mea e taofi ne ia tatou mai i te tavini atu ki te Atua mo ‵tou loto kātoa.—2 Kolinito 11:14; faitau te Filipi 3:13, 14.

TUMAU I TE MATAPULA‵PULA!

14, 15. (a) E taumafai pefea a Satani o fakavāivāi a ‵tou loto finafinau mō te taviniga a Ieova? (e) Fakamatala mai a te auala e taumafai ei a Satani o fakaloiloi tatou.

¹⁴ Ne fakaosofia tatou ne ‵tou a‵lofa ki a Ieova ke tuku atu ‵tou ola ki a ia. Talu mai te taimi tenā, ko oti ne fakatalitonu atu ne te tokoukega o tatou i se taimi leva ‵ki a te ‵tou fakaikuga ke tavini atu ki Ieova mo ‵tou loto kātoa. Kae e seki ‵fiu eiloa a Satani i a tatou. Koi fai eiloa a ‵tou loto mo fai a tena taketi. (Efeso 6:12) Ao, e iloa ne ia me ka sē fakagata fakavave a te ‵tou tapuakiga ki a Ieova. Tela la, e taumafai eiloa a Satani o fakaloiloi a tatou mai te fakaaogaga o te “olaga tenei” ke fakavāivāi malielie mai ki ‵tou loto finafinau. (Faitau te Maleko 4:18, 19.) Kaia e galue ‵lei ei a te togafiti tenei a Satani?

¹⁵ E mafai o fesoasoani mai se tala fakatusa ke tali aka ne tatou a te fesili tenei. Fakaataata i te mafaufau i a koe e faitau ki se tusi i tafa o se molī e maina ‵ki kae poi aka ko ‵paku a te mata molī. Se mea vave o iloa ne koe a te mea ko tupu i te potu ko pouli katoa. Sui aka ne koe a te mata molī mua ki se mea fou, ko toe maina aka ei a te potu. I te suā afiafi po, ko toe faitau koe i tafa o te molī foki eiloa tenā. A te mea telā e se iloa ne koe ko te suiga ne se tino a te mata molī fou ki se mea telā e tai vāivāi malie ifo. Kāti ka sē matea ne koe a te ‵kese. Kae i te suā aso, kafai e faulu ne se tino a te suā mata molī kae ko te mata molī tenei e tai vāivāi ifo i lō te mea muamua, kāti koi sē matea eiloa ne koe. Kaia? Me i te mainaga o te molī e fanaifo malielie eiloa ki lalo telā ko sē iloa ei ne koe. I te auala foki tenā, e fakavāivāi malielie eiloa ne fakamalosiga a te lalolagi a Satani a ‵tou loto finafinau mō te taviniga a Ieova. Kafai e se matapulapula se Kelisiano, ka sē matea foki ne ia a te ‵kese o te mafulifuli malieliega tenā.—Mataio 24:42; 1 Petelu 5:8.

E TAUA ‵KI A TE ‵TALO

16. E mafai pefea o puipui a tatou ne tatou eiloa mai i a Satani?

¹⁶ E mafai pefea o puipui a tatou mai i a Satani kae tumau i te tavini atu ki a Ieova mo te loto kātoa? (2 Kolinito 2:11) E ‵tau mo tatou o ‵talo. I te otiga ne fakamalosi atu a Paulo ki Kelisiano ke “‵tu ‵mautakitaki . . . o ‵teke atu a togafiti ma‵sei a te Tiapolo,” ne fai atu a ia ki a latou ke ‵talo “i taimi katoa” kae fakaaoga a “vaegā ‵talo mo fakatagi katoa.”—Efeso 6:11, 18; 1 Petelu 4:7.

17. Se a te akoakoga e tauloto ne tatou mai i ‵talo a Iesu?

¹⁷ Ko te mea ke tumau i te fakamaoni, e ‵tau o fakaakoako atu tatou ki a Iesu mo tena manakoga ke tavini atu ki a Ieova mo te loto kātoa. Ne tusi mai a Luka e uiga ki te auala ne ‵talo atu ei a Iesu i te po mai mua o tena mate: “Ne fi‵ta tena mafaufau kae ne tumau faeloa i te ‵talo malosi atu.” (Luka 22:44) Ne ‵talo malosi eiloa a Iesu. E se tenei te taimi muamua ne ‵talo malosi ei a Iesu, kae i te taimi tenei ko pili o fakafesagai atu a ia ki te ‵toe tofotofoga faigata eiloa o tena olaga i te lalolagi nei. Ona ko te pogai tenei ne momea aka te “‵talo malosi” o tou tagata kae ne tali mai ki tena ‵talo. E fakaasi mai ne te fakaakoakoga a Iesu me e ma‵losi atu a nisi ‵talo ix lō nisi ‵talo. Tela la, ko te momea aka o faiga‵ta a ‵tou tofotofoga mo te gasolo aka o ma‵losi atu a fakamalosiga a Satani, ko te momea aka foki o ‵tou ‵talo “malosi” atu mō te puipuiga a Ieova.

18. (a) Se a te mea e ‵tau o fesili ifo ne tatou ki a tatou eiloa e uiga ki ‵tou ‵talo, kae kaia? (e) Ne a nisi mea kolā e pokotia i ei ‵tou loto, kae i auala fea? (Onoono ki te pokisi i te itulau e 22.)

¹⁸ Ne a ikuga ka maua mai te ‵talo malosi atu o tatou? Muna a Paulo: “Ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga; a ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto.” (Filipi 4:6, 7) Kafai e ma‵nako tatou o tavini atu ki a Ieova mo te loto kātoa, e ‵tau o ‵talo malosi atu tatou kae fai faeloa penā. (Luka 6:12) Tela la, fesili ifo ki a koe eiloa: ‘E pefea te ma‵losi mo te fai ‵soko o aku ‵talo?’ (Mataio 7:7; Loma 12:12) E fakaasi mai ne au tali a mea e uke e uiga ki te malosi o tou manakoga ke tavini atu ki te Atua.

19. Ne a mea ka fai ne koe ke tumau i te tavini atu ki a Ieova mo te loto kātoa?

¹⁹ E pelā mo mea ko oti ne mafau‵fau tatou ki ei, a mea kolā e fakamuamua ne tatou i ‵tou olaga e mafai o fakailoa mai i ei ki a tatou a mea e uke e uiga ki ‵tou loto. E ‵tau o fakamautinoa aka ne tatou ke mo a eiloa e fakavāivāi mai a mea kolā ko oti ne tiakina ne tatou ki tua io me ko fakamalosiga kolā e fakaaoga ne Satani ki ‵tou fakaikuga ‵mautakitaki ke tavini atu tatou ki te Atua mo te loto kātoa. (Faitau te Luka 21:19, 34-36.) E pelā mo Tavita, ke tumau tatou i te fakatagi atu ki a Ieova: “Fai ke tasi toku loto.”—Salamo 86:11, Tusi Paia, Samoa.

[Ata i te itulau e 22]

E Tolu A Mea E Pokotia Ei ‵Tou Loto

E pelā mo mea e mafai o fai ne tatou ke aoga ki ‵tou fatu, e mafai foki o fai ne tatou ne faiga ke fesoasoani mai ke fakatumau ne tatou se loto telā e malosi ‵lei. Ke mafaufau ki mea tāua e tolu konei:

1 Meakai lei: E manako a ‵tou fatu ke maua ne meakai lei e lava. E penā foki loa, e ‵tau o fakamautinoa aka ne tatou me e lava a mea‵kai faka-te-agaga e maua ne tatou e auala i te fai faeloa o sukesukega totino, mafaufau ‵loto, mo te kau ki fakatasiga.—Salamo 1:1, 2; Faataoto 15:28; Epelu 10:24, 25.

2 Fakamalosiga: Ko te mea ke malosi lei, e ‵tau o pāmu faeloa a ‵tou fatu i nisi taimi. I se auala tai ‵pau, a te kau atu mo te loto finafinau ki te galuega talai—e se taumate mai te momea aka o ‵tou galuega e fai—e fakatumau ei ‵tou loto i se tulaga ‵lei.—Luka 13:24; Filipi 3:12.

3 ‵Kaufakatasi: A te ga‵lue kae ola i va o tino kolā e se āva ki te Atua e mafai o fai ne ia ke ‵mafa tukituki a ‵tou fatu mo ‵tou loto. Kae e ui i ei, e mafai o fakamāmā ne tatou a vaegā mea ‵mafa penā mai te ‵kaufakatasi faeloa mo taina tali‵tonu, kolā e atafai tonu mai ki a tatou kae kolā e tuku katoatoa atu olotou loto ki te Atua.—Salamo 119:63; Faataoto 13:20.