Tauloto Mai te Muna a te Atua

Se a te Tala ‵Lei e Uiga ki Lotu?

Ka mafaufau a te mataupu tenei ki fesili kolā ne faka‵sae aka ne koe kae fakasino atu te koga e mafai ei ne koe o faitau a tali i tau Tusi Tapu. Ka fia‵fia eiloa a Molimau a Ieova ke sau‵tala fakatasi mo koe ki tali konei.

1. E mata, e ‵lei a lotu katoa?

E uke a potukau fakalotu e aofia i ei a tino loto fakamaoni e ma‵nako o fakafiafia te Atua. E lavea ne ia a tino konā kae tausi atu ki a latou. Se mea fakafanoanoa me ko oti ne fakaaoga ne nisi tino a lotu mō pogai faka-tiapolo. I taimi ko ‵teka, ne fakasauā atu foki a takitaki lotu ki olotou fili. (2 Kolinito 4:3, 4; 11:13-15) I aso nei, e ‵tusa mo li‵poti, ko oti ne fakamalosi atu a nisi takitaki lotu ki amioga takafia‵toa io me ‵lago atu ki taua, io me ko oti ne aofia latou i te manea‵neaga o tama‵liki.​—Faitau te Mataio 24:3-5, 11, 12.

E akoako mai te Tusi Tapu me lua a vaegā lotu​—te lotu tonu mo te lotu ‵se. E se akoako ne te lotu ‵se a te munatonu e uiga ki te Atua. E tigā eiloa te feitu tenā, e manako a Ieova te Atua ke iloa ne tino a te munatonu e uiga ki a ia.​—Faitau te 1 Timoteo 2:3-5.

2. Se a te tala ‵lei e uiga ki lotu?

E se manako te Atua ke fakaloiloigina a tino ne lotu kolā e fai mai me a‵lofa latou ki a ia kae sē akoako ne latou a te munatonu e uiga ki a ia. A te tonuga loa, a tino kolā e ‵kau ki lotu konā e fia fai taugasoa ki te lalolagi telā e pule ne Satani te Tiapolo. (Iakopo 4:4; 1 Ioane 5:19) E fakamatala mai i te Muna a te Atua me i lotu kolā e ‵lago atu ki malo o tāgata i lō te Atua e pelā me se fafine talitāgata. E taku ne te Tusi Tapu a te fafine talitāgata tenei ko “Papelonia te Sili,” se fa‵kai mua telā ne kamata mai i ei a lotu ‵se mai tua o te Lolo i aso o Noa. Ko pili fua o aumai ne te Atua se gataga fakapoi ki lotu kolā e fakaloiloi kae pule fakasauā atu ki tino.​—Faitau te Fakaasiga 17:1, 2, 5, 17; 18:8, 23, 24.

3. Ka aumai pefea ne te Atua a te fiafia ki tino i te lalolagi kātoa?

A te fakamasinoga telā ka oko mai ki luga i lotu ‵se se tala ‵lei. Ka aumai i ei se fakatapūga mai pulega faiga‵ta i te lalolagi kātoa. Ka sē toe mavae‵vae kae takitaki ‵se a tino ne lotu ‵se. A tino katoa kolā e ola ka ‵kau fakatasi i te tapuakiga ki te Atua tonu fua e tokotasi.​—Faitau te Isaia 11:9; Fakaasiga 18:20, 21; 21:3, 4.

4. Ne a mea e ‵tau o fai ne tino loto fakamaoni?

Ne seki puli i a Ieova a tino loto fakamaoni kolā e salalau i vasia o lotu ‵se i te lalolagi kātoa. Ko fakamaopoopo nei ne tou tagata a vaegā tino penā ke ‵kau fakatasi mai te akoako atu ki a latou a te munatonu.​—Faitau te Mika 4:2, 5.

E talia ne Ieova ki loto i tena kāiga a tino kolā e ma‵nako ke tavini atu ki a ia. Kafai foki e se fia‵fia a ‵tou taugasoa mo kāiga i a tatou ko kamata o tavini ki a Ieova, e maua ne tatou a mea e uke i ei. E maua ne tatou se va fakataugasoa mo te Atua, se “kāiga” fou kae a‵lofa, mo te fakamoemoega ke maua te ola se gata mai.​—Faitau te Maleko 10:29, 30; 2 Kolinito 6:17, 18.

Ke maua a fakamatalaga e uke atu, ke onoono ki te mataupu e 15 mo te 16 o te tusi tenei Ne a Mea e Akoako ‵Tonu Mai i te Tusi Tapu?, telā ne ‵lomi ne Molimau a Ieova.

[Ata i te itulau e 26]

The Complete Encyclopedia of Illustration/ J. G. Heck